YƐƐ pya nɔ̄ Devid, a ɛrɛ pya a naa bee le pya Izrɛl doodoo Zelek nɛɛ Amon, Uria nɛɛ Het, le Itna nɛɛ Moab. a (1 Edoo 11:39, 41, 46) “Pya Kerit, pya Pelet, le pya Gat” bee lenage yɛɛ pya nɔ̄ Devid. (2 Sam 15:18) A wee lu ekɛɛrɛ kɔ pya Filistia, pya Kerit le pya Pelet waɛloo ziī sa lu wuga. (Ezek 25:16) Pya Gat bee tɔɔ̄bu ziī buɛ̄ pya Filistia a kura Gat.—Josh 13:2, 3; 1 Sam 6:17, 18.

Ena anua Devid bee su pya a naa lu Izrɛl yere yɛɛ pya ye nɛɛ nɔ̄ a? A bee wa dɛrɛ nyiɛ nyɔɔ sa suā kɔ ba naale elɔgara ye, e lo a eetɔɔ̄ na kɔ, a bee suā kɔ ba yira agara nɛ Jɛhova. Bu edobah, ziī kpa a kura The New Interpreter’s Dictionary of the Bible kɔ kumaloo pya Kerit le pya Pelet kɔ: “Sɔ̄ Devid aa bee bɛɛ, ba naa bee ye lɔgara kere bu e’aga kɛ̄tɔɔ̄.” Bu mɛ sīdee na ba bee doo wo a? Kere sɔ̄ “dɛ̄dɛɛ̄ pya nɛɛ Israel” bee aaloo Mɛnɛ Devid sa nyɔɔnɛ ‘nɛɛ gbī-ue lo ye bee kura Sheba,’ pya Kerit le pya Pelet bee tɔɔ̄ bialoo Devid sa be Sheba. (2 Sam 20:1, 2, 7) E a ɛrɛnage sɔ̄ Adonija alu nwiīnɛɛdam Mɛnɛ Devid bee gbī esu bah ekpo suā dɔ mɛnɛ lɛɛ bah Solomɔn. Kerewo, pya Kerit le pya Pelet naa bee lɔgara Devid, ba bee ye yerebah nɛ lo ewu Solomɔn nua mɛnɛ nyɔnɛbee Jɛhova ebee ye tubebahloo kɔ a bɛɛ bu dɔ Devid.—1 Mɛnɛ 1:24-27, 38, 39.

Dɔɔ̄na nɛɛ a naa lu Izrɛl lo a naa bee lɔgaranage Devid na Itai nɛɛ Gat. Itai le dɔɔ̄na 600 pya nɔ̄ bee yerekpotɛ̄ Mɛnɛ Devid sɔ̄ ye nwiī a kura Absalom bee ye lɛɛbeekɛɛ̄ sa gɔm pio pya nɛɛ Izrɛl yaa dumɛ lo esu bɛbɛɛ lɛɛbah ye tɛ. Tua sɔ̄, Devid naa bee yiga kɔ Itai a bebe ye bee nyɔɔbee a naa lu Izrɛl. Kerewo, Itai bee ye ture nɛ kɔ: “Dookɛ̄ Jɛhova tɔɔ̄dum doo, e dookɛ̄ nɛɛ-a-mɛ-ɛrɛ mɛnɛ-buɛ̄ tɔɔ̄dum doo, ɛrɛgebah kɛ̄ nɛɛ-a-mɛ-ɛrɛ mɛnɛ-buɛ̄ ele, kere a lu luh ale dum, lo kɛ̄ na o zooro elenage a.”—2 Sam 15:6, 18-21.

Kereadoo pya Kerit, pya Pelet, le pya Gat naa bee le pya Izrɛl, ba bee suā sa yiga kaāna kɔ Jɛhova na lo kaka Bari a, le kɔ Jɛhova ebee tɔ̄ nɔɔ̄ bee Devid. Naa ɛp kɛ̄ bu Devid bee ɛɛ doo, sɔ̄ a bee muɛ kɔ pya nɛɛ ama naa bee ye lɔgara, mɛ ba bee ye tɔɔ̄ bialoo doo a!