IHWORHO jerẹ Zelek onyẹ Ammon, Uriah onyẹ Hittite, ọrhẹ Ithmah onyẹ Moab ri rhiẹ epha, i ha usuẹn egba owọnren i David. a (1 Chron. 11:​39, 41, 46) Egba owọnren i David o ji vwo “itu i Chereth, itu i Peleth, ọrhẹ itu Gittite.” (2 Sam. 15:18) Itu i Chereth ọrhẹ Peleth kugbe itu i Philistine i firi. (Ezek. 25:16) Itu i Gittite ihworho re rhirhiẹ amwa itu i Philistine re se Gath.—Josh. 13:​2, 3; 1 Sam. 6:​17, 18.

Mesoriẹ i David ọ ha epha ba usuẹn egba owọnren ọnẹyen? O vwo imwẹro taghene aye i vwo atamwu kpahiẹn, maido atamwu kpahen i Jehova. Jerẹ udje, The New Interpreter’s Dictionary of the Bible nọ ta kpahen itu i Chereth omana: “Aye i vwo atamwu kpahen i David uvwrọke ekwakwa a mai bẹn riẹn ọke ro suẹn.” Marhẹ aye i ru dje atamwu aye phia? Ọke “ehworhare Israel ephian” a sẹrerhumuji Orodje David, ji zẹ lele “ọguọlẹmro owu re se i Sheba,” itu i Chereth ọrhẹ Peleth i mevi kẹrẹ i David ji ha userhumu riẹn fiobarhọ ẹkparehaso i Sheba. (2 Sam. 20:​1, 2, 7) Uvuẹn erhirhiẹ ọrọrọ, ọmọ Orodje David re se Adonijah, nọ guọlọ ha ẹrhẹ orodje ọsẹ ye. Ọrẹn, itu i Chereth ọrhẹ Peleth i sẹrorẹ atamwu aye kpahen i David, ji ha ọmọyen Solomon ri Jehova ọ djẹha mwu, nọ ha ẹrhẹ orodje ọsẹ ye.—1 Ki. 1:​24-27, 38, 39.

Ọpha ọrọrọ rọ sẹrorẹ atamwu ọnẹyen kpahen i David yẹ Ittai onyẹ Gittite. Ittai ọrhẹ egba owọnren 600 enẹyen, i hobọtua Orodje David ọke ọmọyen Absalom ọ kparehasuiẹ, ji phiẹ ehworhare Israel ephian rhọ, nẹ aye i lelie ukperẹ ono rhiẹ ọsẹ ye David. Ọke ukaro, David ọ ta rẹn Ittai taghene ọ vwọ wọnrọ-ọn, fọkime ọye ọpha. Ọrẹn Ittai nọ tare: “Ri Jehova o nyerẹn, rẹ ọrovwori mẹ ro rhiẹ orodje o ji nyerẹn na, ekete ephian rẹ ọrovwori mẹ ro rhiẹ orodje na ọ havwọ, yẹ odibo ọnọ ono ji rhirhiẹ, sẹ obọrẹ uhwu yanghene arhọ!”—2 Sam. 15:​6, 18-21.

Dedevwo itu i Chereth, Peleth ọrhẹ Gittite epha, o mwurun aye ẹro taghene Jehova yẹ Osolobrugwẹ urhomẹmro na, David yi Jehova ọ ji djẹha. Itiọrurhomẹmro, oma ọnọ merhen i David omamọ taghene ehworhare enana ri vwo atamwu kpahiẹn, a hobọtua ye!