A REBEBIL er tirke el chad er a ngodech el beluu el milsiou er a urrurt er a resoldau er a David a mle Selek er a Amon, Uria el Hitait, me a Ithma er a Moab. a (1 Kr. 11:​39, 41, 46) Te dirrek el mla er ngii a “re Kerethait, re Pelethait, me a re Gitait” el mle chedal a urrurt er a resoldau er a David. (2 Sa. 15:​18, NW) A re Kerethait me a re Pelethait a mle chad el mora rechad er a Filistia. (Ese. 25:16) A re Gitait a kiliei er a Gath el mats er a Filistia.—Jos. 13:​2, 3; 1 Sa. 6:​17, 18.

Ngera uchul me tirka el chad er a ngodech el beluu a mle sebechir el mo soldau er a David? A David a mle ulterekokl a rengul el kmo te uleba blakerreng el mo er ngii, e a ngaruchei er ngii e ngmle ulterekokl a rengul el kmo te uleba blakerreng el mora Jehovah. El ua tiang, a The New Interpreter’s Dictionary of the Bible a mesaod el kirir a re Kerethait me a re Pelethait el kmo: “Te millemolem el loba blakerreng el mora David er a chelsel a kot el meringel el taem er a omengederederel.” Ngoeak a ngera el rolel? A “re bek el chad er a Israel” er a lechitii a King David e bo loltirakl er a “tal chelsengsang el chad el Seba ngklel,” e a re Kerethait me a re Pelethait a millemolem el oltirakl er ngii e ngilsuir el mekodir a ultok el lulechelii a Seba. (2 Sa. 20:​1, 2, 7) A kuk ta er a taem e a ngelekel a King David er a Adonia a mlo melasem el melai er a kleking. A re Kerethait me a re Pelethait a millemolem el loba blakerreng el mora David e ngilsuir el rullii a Salomon el mo king, el ngii a lengileltii a Jehovah el mo ongingil a David.—1 Ki. 1:​24-27, 38, 39.

A Itai el Gitait a lmuut el ta er a chad er a ngodech el beluu el kmal lulebang a blakerreng el mora David. A Itai me a re 600 el soldau er ngii a mle support er a King David er sel taem el ngelekel er a Absalom ulechau a rengrir a rechad er a Israel el mo omtok er a king. A David a dilu er a Itai el kmo ngchad er a ngodech el beluu me a mekemad a dimlak el mekemedil. Engdi Itai a dilu er ngii el kmo: “Kau el kuoll, ak ulsiich a tekingek el oba ngklel a RUBAK el kmo ak mo blechoel el obengkem el mor a ikel rokui el bor ngii, el mo lmuut a bo le kirek a kodall.”—2 Sa. 15:​6, 18-21.

Me alta re Kerethait, re Pelethait, me a re Gitait a mle chad er a ngodech el beluu engdi te miltebengii el kmo a Jehovah a mera el Dios me a David a ngellitel er ngii. A David a kmal ulterekokl el luleba omereng el saul el kirir tirka el chad el uleba blakerreng el mo er ngii e mla er bita er ngii!