Hast du daut jewist?
Wuarom kunnen eenje Mana, waut nich Israeliten wieren, en David siene Armee sennen?
EENJE von David siene Soldoten wieren nich Israeliten, biejlikj Zelek, de Amonita, Uria, de Hetita un Jitma, de Moabita (1. Chr. 11:39, 41, 46). a En David siene Armee wieren uk “de Kreeta un Pletta . . . [un de] Gatita” (2. Sam. 15:18). Daut sitt soo, daut de Kreeta un de Pletta väl met de Filista toop hauden (Hes. 25:16). De Gatita wonden en de Filistastaut Gat (Jos. 13:2-3; 1. Sam. 6:17-18).
Wuarom kunnen Mana, waut nich Israeliten wieren, en David siene Armee sennen? Wäajen David sikj secha wia, daut dise Mana am tru wieren, un waut noch wichtja wia, daut dee Jehowa tru wieren. Daut Buak The New Interpreter’s Dictionary of the Bible sajcht biejlikj von de Kreeta un Pletta: “Dee bleewen David tru, mau rajcht en de schwanste Tieden, aus hee rejieren deed”. Woo weesen dee, daut dee David tru wieren? Opp eene Sauz wull “een ruchloosa Maun, Scheba”, sikj selfst toom Kjennich moaken en David siene Städ. De Israeliten veleeten David un jinjen Scheba hinjaraun. Oba de Kreeta un Pletta bleewen David tru un holpen met, Scheba sienen Plon tonuscht to moaken (2. Sam. 20:1-2, 7). Opp eene aundre Sauz proowd David sien Sän Adonija sikj schwind selfst toom Kjennich to moaken enne Städ Salomo. Oba de Kreeta un Pletta (Keretita un de Peletita) bleewen David wada tru un holpen met, Salomo toom Kjennich to moaken, dän Jehowa doatoo jewält haud (1. Kjen. 1:24-27; 1:38-39, JHF).
Noch eena, waut nich een Israelit wia un David oba gaunz tru bleef, wia Ittai, de Gatita. Dee un siene 600 Soldoten unjastetten dän Kjennich David, aus David sien Sän Absalom de Israeliten proowd opp siene Sied to kjrieen, daut dee am sullen toom Kjennich moaken en David siene Städ. David säd to Ittai, daut am daut nuscht aunjinkj, wäajen dee nich een Israelit wia. Oba Ittai auntwuad: “Soo kloa aus de HAR läft, un soo secha aus de Har, mien Kjennich läft, wua mien Har un Kjennich han jeit, doa go ekj uk han, eendoont auf daut Läwen ooda Doot fa mie meent” (2. Sam. 15:6, 18-21).
Ittai wia David tru, dän Jehowa aus Kjennich jewält haud
Wan de Kreeta, de Pletta un de Gatita uk nich Israeliten wieren, hauden dee doawäajen väl Respakjt fa dän woaren Gott Jehowa un uk fa David, dän Jehowa toom Kjennich jewält haud. David mott daut secha sea väl jeräakjent haben, daut soone true Mana opp siene Sied wieren!
a Daut Jesaz, waut Jehowa de Israeliten jeef en 5. Mose 23:4-7 wiest, daut kjeen Amonita ooda Moabita sull en dee äare Vesaumlunk nennkomen. Dit Jesaz meent woomäajlich, daut dee nich kunnen en daut Volkj Israel tus jehieren un aul de Rajchten haben, waut een Israelit haud. Oba dee kunnen doawäajen met Gott siene Deena toop sennen ooda mank dee wonen. See Einsichten über die Heilige Schrift, Band 1 bie “AMMONITER” un bie de Äwaschreft “Ehen mit Israeliten”.
