داؤد دی فوج چ کجھ غیر اِسرائیلی فوجی وی سن جیویں کہ صلق‌عمونی، اُوریاہ‌حتی تے یتمہ‌موآبی۔‏ a (‏1-‏تواریخ 11:‏39،‏ 41،‏ 46‏)‏ داؤد دی فوج چ کِرِیتی، فلیتی تے شہر جات توں کجھ لوک وی شامل سن جیہڑا فلستیاں دا اِک شہر سی۔ (‏2-‏سموئیل 15:‏18‏)‏ کریتیاں تے فلیتیاں دا تعلق وی فلستی لوکاں نال سی۔—‏حِزقی‌ایل 25:‏16؛‏ یشوع 13:‏2، 3؛‏ 1-‏سموئیل 6:‏17، 18‏۔‏

پر داؤد نے اپنی فوج چ غیر اِسرائیلیاں نُوں بھرتی کیوں کیتا سی؟ کیونکہ داؤد نُوں پورا بھروسا سی کہ اوہ اوہدے تے یہوواہ خدا دے وفادار نیں۔ بائبل دی وضاحت کرن والی اِک کتاب چ دَسیا گیا اے:‏ ”‏ایہہ غیر اِسرائیلی اوہدوں داؤد دے وفادار رہے جدوں اوہنوں اپنی حکمرانی دے دوران مشکل توں مشکل حالاتاں دا سامنا ہویا۔“‏ اوہناں نے اپنی وفاداری کیویں ظاہر کیتی؟ اِک وار سبع ناں دے اِک فسادی بندے نے اِسرائیل دے سارے بندیاں نُوں اپنے مغر لا لیا جدی وجہ توں اوہناں نے بادشاہ داؤد دا ساتھ چھڈ دِتا۔ پر کِرِیتی تے فلیتی داؤد دے وفادار رہے تے سبع دی بغاوت نُوں ختم کرن چ اوہدی مدد کیتی۔ (‏2-‏سموئیل 20:‏1، 2،‏ 7‏)‏ اِک ہور موقعے تے بادشاہ داؤد دے پُتر ادونیاہ نے اپنے پیو دے تخت تے قبضہ کرن دی کوشش کیتی۔ پر کریتیاں تے فلیتیاں نے داؤد دا ساتھ دِتا تے اوہدے پُتر سلیمان نُوں بادشاہ بنان چ اوہدی مدد کیتی جنہوں یہوواہ نے اِسرائیل دے اگلے بادشاہ دے طور تے چُنیا سی۔—‏1-‏سلاطین 1:‏24-‏27،‏ 38، 39‏۔‏

اِک ہور پردیسی جیہڑا ہمیشاں داؤد دا وفادار رہیا اوہ اِتّی جاتی سی۔ جدوں داؤد دے پُتر ابی‌سلوم نے اِسرائیل دے لوکاں نُوں بادشاہ دے خلاف کر دِتا تے اِتّی تے اوہدے نال 600 فوجیاں نے بادشاہ داؤد دا ساتھ دِتا۔ شروع چ داؤد نے اِتی نُوں کہیا کہ اوہ اِسرائیلی نئیں اے ایس لئی اوہنوں ایس لڑائی چ پے کے اپنی جان خطرے چ پان دی کوئی لوڑ نئیں۔ پر اِتّی نے اوہنوں کہیا:‏ زندہ خدا یہوواہ دی قسم تے میرے بادشاہ دی قسم، جتھے کِتے میرا مالک بادشاہ جائے گا مَیں تیرا خادم وی اوتھے جاواں گا فیر بھانویں مینوں اپنی جان ای کیوں نہ قربان کرنی پووے۔—‏2-‏سموئیل 15:‏6،‏ 18-‏21‏۔‏

بھانویں کہ کریتی، فلیتی تے جات دے لوک غیر اِسرائیلی سن پر فیر وی اوہ من دے سن کہ یہوواہ سچا خدا اے تے اوہدا دِلوں احترام کردے سن۔ نالے اوہ ایہہ وی من دے سن کہ یہوواہ نے داؤد نُوں بادشاہ بنایا اے۔ داؤد ایس گل لئی واقعی بڑا شکرگزار ہوئے گا کہ ایہو جہے وفادار بندے اوہدے نال سن۔‏