Sera ki bu sibiba?
Pabia ku omis ku ka seduba israelitas ta sirbiba suma tropas di rei Davi?
NA TROPAS di rei Davi i tenba omis ku ka seduba israelitas, suma Zeleki di Amon, Urias eteu ku Itma di Moabi. a (1 Kron 11:39, 41, 46) Tropas di Davi teneba tambi “kereteus ku peleteus, ku tudu jiteus”. (2 Sam 15:18) I parsiba di kuma kereteus ku peleteus seduba parentis di filisteus. (Eze 25:16) Jiteus seduba di Gati, sidadi di filisteus. — Jos 13:2, 3; 1 Sam 6:17, 18.
Pabia ku Davi disa pa kilis ku ka seduba israelitas pa e fasi parti di si tropas? I konfiaba di kuma e na sedu fiel pa rel, ma mas importanti, e na sedu fiel pa Jeova. Pur isemplu, un disionariu bibliku fala sin aserka di kereteus ku peleteus: “E kontinua fiel pa Davi na situasons mas difisil di si renansa.” Di kal manera? Kontra ku “tudu omis di Israel” bandona rei Davi pa sigi “un omi malvadu comadu Seba,” kereteus ku peleteus kontinua sedu fiel pa Davi i e judal kaba ku rebelion ku Seba kumsa. (2 Sam 20:1, 2, 7) Un bias fiju di rei Davi, Adonias, tenta toma renansa aforsa. Mas un bias, kereteus ku peleteus kontinua fiel pa Davi, i e juda pa Salomon sedu rei, pabia i el ku Jeova kuji pa toma lugar di Davi. — 1 Re 1:24-27, 38, 39.
Utru omi ku ka seduba israelita ku kontinua fiel pa Davi i Itai, ku seduba jiteu. Itai ku si 600 tropas juda rei Davi kontra si fiju Absalon rebela, i tenta pui pa omis di Israel sigil en ves di sigi rei Davi. Na kumsada Davi fala Itai, suma el i ka israelita, i ka dibi di judal na gera. Ma Itai falal: “N jurmenta pa vida di SIÑOR, ku vida di Ñu Rei, kuma, na kalker kau ku Ñu Rei na sta, la tambi ku bu servu na sta, nin si i pa mortu o pa vida.” — 2 Sam 15:6, 18-21.
Itai seduba fiel pa Davi, rei ku Jeova kuji.
Mesmu manera ku kereteus, peleteus ku jiteus ka seduba israelitas, e ta ojaba Jeova suma Deus di bardadi i Davi suma algin ku Jeova kuji. Davi dibi di kontentiba di tene es omis fiel na si ladu!
a Lei di Deus ku sta na Ripitison di Lei 23:3-6 tuji amonitas ku moabitas pa yentra na kongregason di Israel. Parsi di kuma, e ka pudiba sedu sidadons ku teneba tudu diritu ku un fiju di Israel teneba. Ma amonitas ku moabitas pudiba junta ku israelitas i vivi na se metadi, si e setaba adorason di bardadi. Jubi asuntu “Amonitas”, bas di subtitulu “Casamentos com Israelitas” na Estudo Perspicaz das Escrituras.
