I ROTO i te nuku vaeau o te Ariki ko Davida e au tangata tetai kare i te ngati Iseraela mei ia Zeleka ngati Amona, Uria ngati Heta, e ko Itema ngati Moabi. a (1 Para. 11:​39, 41, 46) Kapiti mai ki tana au vaeau ko “te Kereti katoa ra, e te Peleti katoa ra, e to Gata katoa.” (2 Samu. 15:18) Te akaraanga e pirianga vaitata to te Kereti e te Peleti ki te ngati Philiseti. (Eze. 25:16) E to Gata katoa no roto mai ia i te oire o Gata i Philiseti.—Iosu. 13:​2, 3; 1 Samu. 6:​17, 18.

Eaa a Davida i āriki ei i teia aronga kia tavini ei au vaeau nona? Kua papu iaia e aronga tiratiratu ratou kiaia e tei puapinga atu kia Iehova. Ei akaraanga, akakite te puka The New Interpreter’s Dictionary of the Bible no te Kereti e te Peleti: “Kua vai tiratiratu ratou kia Davida noatu te au turanga ngatā i te tutara anga aia.” Akapeea ra? Te akaruke anga “to Iseraela” i te Ariki ko Davida e kua aru i “tetai tangata kanga ko Seba,” kua vai tiratiratu to Kereti e Peleti kia Davida e kua tauturu iaia kia tāpu ia Seba. (2 Samu. 20:​1, 2, 7) I tetai atianga, kua timata te tamaiti a te Ariki ko Davida, ko Adonia kia riro mai aia ei ariki. Inara, kua vai tiratiratu to Kereti e Peleti kia Davida e kua tauturu ia Solomona kia riro mai ei Ariki e ko ta Iehova te reira i iki.—1 Ari. 1:​24-27, 38, 39.

Tetai akaou tangata tei vai tiratiratu kia Davida ko Itai no Gata mai. Kua turuturu a Itai e tana au vaeau e 600 i te Ariki ko Davida te meameaau anga tana tamaiti ko Abasaloma e kia akakeu i te ngakau o te ngati Iseraela kia aru iaia. Akakite a Davida kia Itai no te mea kare aia i te ngati Iseraela, kare aia e anoanoia kia tamaki. Inara kua pau a Itai: “Te ora rā Iehova, e te ora ra taku pu te ariki ra, ei taua ngai ra e nooia e taku pu e te ariki ra, ei te mate e ei te ora, ei reira tikai to tavini nei.”—2 Samu. 15:​6, 18-21.

Noatu kare to Kereti, Peleti e to Gata i te ngati Iseraela, kua akangateitei ratou ia Iehova ei Atua mou e ia Davida ta Iehova i akatainu. E mea papu kua mataora a Davida i teia aronga tiratiratu tei tavini i te pae iaia!