Dali džanljan?
Soske ki e Davideskiri vojska sine nesave so na sine Izraelcija?
KI E Davideskiri vojska, maškar o vojnikija kola so na sine Izraelcija sine o Selek o Amonco, o Urija o Hetejco hem o Itma o Moavco a (1. Let. 11:39, 41, 46). Isto agjaar ki vojska sine hem Heretejcija, Feletejcija hem manuša taro Gat (2. Sam. 15:18). O manuša taro Gat sine, a izgleda kaj hem o Heretejcija hem o Feletejcija sine paše familija e Filistejconcar (Is. Nav. 13:2, 3; 1. Sam. 6:17, 18; Ezek. 25:16).
Soske o David dozvolingja ki leskiri vojska te oven jabandžie? Ov sine uverimo kaj ola sine leske verna, a soj panda považno, kaj sine verna e Jehovaske. Na primer, bašo Heretejcija hem o Feletejcija, ko jekh biblisko rečniko pišinela akava: „Ola ačhile verna e Davideske ko najphare momentija džikote vladinela sine“ (The New Interpreter’s Dictionary of the Bible). Sar sikavgje pli vernost? Keda „sa o Izraelcija“ mukhle e Davide hem gele palo Sava, kova so sine lošno, o Heretejcija hem o Feletejcija ačhile e Davidea hem pomožingje leske te čhinavel i pobuna so kergja o Sava (2. Sam. 20:1, 2, 7). Ki javer prilika, o Adonija, o čhavo e Davideskoro, probingja ov te čhivel pe te ovel cari namesto o Solomon. Ama, o Heretejcija hem o Feletejcija ačhile verna e Davideske hem pomožingje leske te čhivel e Solomone te ovel cari, soske ov sine birimo taro Jehova (1. Car. 1:24-27, 38, 39).
Javer vojniko so na sine Izraelco, a ačhilo verno e Davideske, sine o Etaj taro Gat. O Etaj hem leskere 600 vojnikija poddržingje e Davide keda leskoro čhavo o Avesalom, buningja pe hem čhivgja e Izraelcon te protivinen pe e careske. O David vakergja e Etajeske kaj adaleske soj tano jabandžija, na očekujnela pe lestar te borinel pe bašo David. Ama o Etaj vakergja: „Sar soj dživdo o Jehova hem sar soj dživdo mlo gospodari, o cari, kote hem te ovel mlo gospodari, o cari, bizi razlika dali kerela pe lafi meribaske ili životoske, athe ka ovel hem tlo sluga!“ (2. Sam. 15:6, 18-21).
O Etaj sine verno e Davideske, o cari so sine pomazimo taro Jehova
Iako o Heretejcija, o Feletejcija hem o manuša taro Gat sine jabandžie, ola halile kaj o Jehova tano čačutno Devel hem sine len hor poštovanje sprema leste hem sprema o David, sar leskoro pomazaniko. O David sigurno sine but blagodarno so uzi leste sine asavke verna manuša!
a E Devleskoro zakoni soj pišimo ki 5. Mojseeva 23:3-6, zabraninela sine o Amoncija hem o Moavcija te oven primime ki izraelsko zaednica. Izgleda kaj akale zakonea na dozvolinela pe sine e jabandžienge te ovel len ista pravija ki izraelsko zaednica, ama na zabraninela pe sine lenge te družinen pe e Devleskere narodoja hem te živinen maškar lende. Dikh ko Uvid ko sveta lila, tom 1, str. 95 (angl.).
