Τζανένας-λες;
Σόσκε ο στρατός του βασιλιά Δαβίδ τθερέλας τζενέν σο να ισινέ Ισραηλίτες;
Ο ΣΤΡΑΤΟΣ του Δαβίδ τθερέλας μερικέ τζενέν σο να ισινέ Ισραηλίτες, σαρ για παράδειγμας ο Σελέκ ο Αμμωνίτης, ο Ουρίας ο Χετταίος ντα ο Ιεθεμά ο Μωαβίτης. a (1 Χρον. 11:39, 41, 46) Τθερέλας επίσης τζενέν σαρ «ο Χερεθαίοι, ο Φαλεθαίοι ντα ο Γιθίτες». (2 Σαμ. 15:18) Ντικχίντιβελα ότι ο Χερεθαίοι ντα ο Φαλεθαίοι περένας τζενέ με το Φιλισταίοι. (Ιεζ. 25:16) Ο Γιθίτες ισινέ κατά Γαθ, εκ πόλη ι Φιλισταιόνγκι.—Ιησ. Ναυή 13:2, 3· 1 Σαμ. 6:17, 18.
Σόσκε ο Δαβίδ τσσουντάς αντρέ πι στρατόστε τζενέν σο να ισινέ Ισραηλίτες; Ισινέ σίγουρος ότι ανταλά μουρσά ισινέ αφοσιωμέ λέστε ντα, ο πο σημαντικός, κο Ιεχωβά. Για παράδειγμας, εκ λεξικός ι Γραφιάκο βακερέλα για το Χερεθαίοι ντα για το Φαλεθαίοι: «Ατσσιλέ πιστοί κο Δαβίδ κο πο μπαρέ δυσκολίες σο νακχλάς σαρ βασιλιάς». Σαρ κερντέ-λες ανταβά; Κάνα «σαρέ ο μουρσά κατά Ισραήλ» μουκχλέ ι βασιλιάς Δαβίδ ντα γκιλέ παλάλ κο Σεβά, εκχέ τζενέστε σο ανέλας φασαρίες, ο Χερεθαίοι ντα ο Φαλεθαίοι να μουκχλέ ι Δαβιδίς ντα βοηθιντέ-λες τι σταματίνελ ι κόντρα σο αντάς ο Σεβά κο Δαβίδ. (2 Σαμ. 20:1, 2, 7) Εκχέ γιαβερέ περιπτωσιάτε, ο τσσαβό του Δαβίδ, ο Αδωνίας, προσπαθιντάς τι αβέλ βοβ βασιλιάς, ντα όχι ο Σολομών. Όμως, ο Χερεθαίοι ντα ο Φαλεθαίοι ατσσιλέ αφοσιωμέ κο Δαβίδ ντα βοηθιντέ τον Σολομώντα τι αβέλ βασιλιάς, σόσκε λες τραμπιντάας ο Ιεχωβά.—1 Βασ. 1:24-27, 38, 39.
Εκ γιαβέρ τζενό σο να ισινέ Ισραηλίτης ντα ατσσιλό μπουτ αφοσιωμέ κο Δαβίδ ισινέ ο Ιτταΐ ο Γιθίτης. Ο Ιτταΐ πι 600 στρατιωτέντζαρ τσσιντιντέ κατά βασιλιάς Δαβίδ κάνα λέσκο τσσαβό, ο Αβεσσαλώμ, γκιλό λέσαρ κόντρα ντα κερντάς ι λαός τι μανγκέλ για βασιλιάς λες, ντα όχι ι Δαβιδίς. Κι αρχή, ο Δαβίδ βακερντάς κο Ιτταΐ ότι, επειδή να ισινέ Ισραηλίτης, να χρειαζίντιβελας τι πολεμίνελ λέσκε. Αλλά ο Ιτταΐ βακερντάς λέσκε: «Καζόμ μπαγιά ισί ότι τζουβντιόλα ο Ιεχωβά ντα καζόμ μπαγιά ισί ότι τζουβντιόλα μο βασιλιάς, κάι κα αβέλ μο βασιλιάς, είτε ισί ανγκλάλ κο μεριπέ είτε κι ζωή, οτθέ κα αβάβ με-ντα το υπηρέτης!»—2 Σαμ. 15:6, 18-21.
Ο Ιτταΐ ισινέ αφοσιωμέ κο Δαβίδ, σόσκε ισινέ ο βασιλιάς σο τραμπιντάας-λες ο Ιεχωβά
Παρόλο σο ο Χερεθαίοι, ο Φαλεθαίοι ντα ο Γιθίτες να ισινέ Ισραηλίτες, αγαβένας ότι ο Ιεχωβά ισί ο αληθινός Ντεβέλ ντα ότι τθερέλας τραμπιντό ι Δαβιδίς σαρ βασιλιάς. Καζόμ ευτυχισμέ πρέπει τι ισινέ ο Δαβίδ σο τθερέλας ασακέ αφοσιωμέ μουρσέν πασέ πέστε!
a Ο νόμος ι Ντεβλέσκο σο ισί γραμμέ κο εδάφια Δευτερονόμιο 23:3-6 να μουκχέλας ι Αμμωνιτέν ντα ι Μωαβιτέν τι αβέν αντρέ κο λαός Ισραήλ. Ανταβά νόμος μανγκέλας τι βακερέλ ότι να μπορίνενας τι τθερέν σαρέ ο δικαιώματα σο τθερένας ο Ισραηλίτες. Όμως, άμα κα δεχτίνενας ι αληθινή λατρεία, μπορίνενας τι κερέν παρέα ι Ισραηλιτέντζαρ ή τι μπεσέν κο τθεμ λένγκο. Ντικχέν Ενόραση στις Γραφές, Τόμος 1, σελ. 198, 199.
