Kodi Imwe Mukhapidziwa?
Thangwi yanji mu nsoka wa anyankhondo a Mambo Dhavidhi mukhalimbo na anthu a madziko anango?
ANTHU a madziko anango akuti akhalimbo mu nsoka wa anyankhondo a Dhavidhi ndi Zeleki wa dzindza ya Aamoni, Uriya wa dzinza ya Eti na Itima wa ku Moabhe. a (1 Kro. 11:39, 41, 46) Mu nsoka wa anyankhondo a Dhavidhi mukhagumanikambo “Akereti, Apeleti na Agati.” (2 Sam. 15:18) Akereti na Apeleti panango akhali a dzindza ya Afilisti. (Ezek. 25:16) Agati abuluka mu nzinda wa Gati wa ku Filisti.—Yos. 13:2, 3; 1 Sam. 6:17, 18.
Thangwi yanji Dhavidhi atawirisa kuti amuna anewa akhale mu nsoka wace wa anyankhondo? Iye akhadziwa kuti iwo akhali akukhulupirika kuna iye na kuna Yahova. Mwacitsandzo, bukhu yakuti Novo Dicionário Bíblico do Intérprete ya cingerezi, yalonga tenepa thangwi ya Akereti na Apeleti: “Iwo apitiriza kukhala akukhulupirika kuna Dhavidhi m’midzidzi yakunentsa kakamwe ya umambo wace.” Kodi iwo apangiza tani kukhulupirika kwawo? Mwacitsandzo, mu ndzidzi udasiya ‘amuna onsene a Izraeli kutowera Dhavidhi mbatowera Sabha,’ Akereti na Apeleti apitiriza kukhala pabodzi na Dhavidhi, pontho amphedza toera kumalisa kupanduka kukhadatomesa Sabha. (2 Sam. 20:1, 2, 7) Pontho mu ndzidzi ukhafuna Adoniya mwana wa Dhavidhi kukhala mambo pa mbuto ya Salomoni, Akereti na Apeleti apitiriza kukhala akukhulupirika kuna Dhavidhi, mbaphedza Salomoni toera akhale mambo, thangwi ndi Yahova akhadacita cisankhulo ceneci.—1 Ama. 1:24-27, 38, 39.
Mamuna unango wakuti nee akhali Muizraeli, mbwenye akhala wakukhulupirika kuna Dhavidhi akhali Itai wa ku Gati. Itai pabodzi na amuna akukwana 600 aphedzera Mambo Dhavidhi mu ndzidzi udapandukirwa iye na mwanace Abhisaloni, mbafuna kuti Aizraeli acitembo pibodzi pyene. Dhavidhi alonga kuti Itai nee akhafunika kukhala pabodzi na iwo pa nkhondo ineyi thangwi iye nee akhali Muizraeli. Mbwenye Itai alonga: “Ndiri kudumbira mu dzina ya Yahova Mulungu wa m’maso na mu dzina yanu mbuyanga mambo wakuti muli m’maso, konsene kunafuna kukhala imwe, ntumiki wanu anakhalambo kweneko, pontho ine ndiri dzololo toera kufa pabodzi na imwe!”—2 Sam. 15:6, 18-21.
Itai akhali wakukhulupirika kuna Dhavidhi, mambo wakudzodzwa na Yahova
Maseze Akereti, Apeleti na Agati akhali a madziko anango, iwo adzindikira kuti Yahova ndi Mulungu wandimomwene, pontho Dhavidhi adzodzwa na Yahova. Mwakukhonda penula, Mambo Dhavidhi akhapereka takhuta kakamwe thangwi yakukhala pabodzi na amuna anewa akukhulupirika!
a Mwakubverana na mwambo wa Yahova unagumanika pa Dheuteronomyo 23:3-6, Aamoni na Amoabhe nee akhafunika kupita mu mpingo wa Yahova. Pisaoneka kuti mwambo unoyu basi ene ukhalonga pya madzindza anewa kukhala na ufulu ninga ukhali na Aizraeli, mbwenye nee ukhakhondesa anthu a madziko anewa kukhala pabodzi na mbumba ya Mulungu. Onani Estudo Perspicaz das Escrituras, vol. 1, tsa. 111.
