K’Omanyire?
Bulya gurhi omurhwe gw’abasoda ba Daudi gwalimwo abalume barhali Baisraheli?
OMU murhwe gw’abalwi b’ivita ba Daudi barhali Baisraheli mwali abalume nka Seleki Muamoni, Uriya Muhiti na Itma Mumoabu. a (1 Nga. 11:39, 41, 46) Kandi omurhwe gw’abasoda ba Daudi gwal’ihiziremwo ‘Abakereti, Abapeleti, n’Aba-Gititi.’ (2 Sam. 15:18) Bibonekine oku Abakereti n’Abapeleti bal’igwerhe olushangi n’Abafilistini. (Eze. 25:16) Aba-Gititi bal’ilamire omu lugo lw’Abafilistini lw’e Gati.—Yoz. 13:2, 3; 1 Sam. 6:17, 18.
Bulya gurhi Daudi ayemeraga abo balume barhali Baisraheli omu murhwe gw’abasoda bage? Bulya al’iyemire n’obwalagale oku bali bishwekerezi kuli ye, n’akantu k’obulagirire bwenene, bali bishwekerezi kuli Yehova. Kwa lwiganyo, lugenda Abakereti n’Abapeleti, diksionere nguma ehugûla Ebibliya edesire ntya: “Bagendekire babêra bishwekerezi kuli Daudi omu kanga kazibu bwenene k’oburhegesi bwage.” Gurhi bajijiremwo ntyo? Erhi “bene Israheli boshi” baciyegula kuli Mwami Daudi lyo bakulikira “muntu muguma w’omurhima muminya, izino lyage ye Sheba,” Abakereti n’Abapeleti bacishwekera kuli Daudi banarhabala okuyusa obugoma bwa Sheba. (2 Sam. 20:1, 2, 7) Agandi mango, Adoniya mugala wa Mwami Daudi alonza okunyaga obwami. Cikone Abakereti n’Abapeleti babêra bishwekerezi kuli Daudi banarhabala okuyimika Solomoni bulya ye Yehova al’icishozire oku ye wakayimire omu bwami bwa Daudi.—1 Bam. 1:24-27, 38, 39.
Owundi mulume orhali Muisraheli wabêzire mwishwekerezi kuli Daudi ali Itai Mugititi. Ye n’abalwi bage b’ivita 600 balunga Mwami Daudi okuboko erhi Absalomu mugala wa Daudi azusa obugoma n’okulonza okujira abantu bamukulikire ahali h’okukulikira mwami. Oku murhondero, Daudi abwira Itai oku bulya arhali Muisraheli arhal’ishinganine amulwire. Cikone Itai aderha ntya: “Aganze Nyamubâho, aganze na mwami aha Nnawirhu akanaja erhi ho nani nandi, akaba oku bucire erhi lufu, aho ho mwambali wawe naye anabâ.”—2 Sam. 15:6, 18-21.
Itai ali mwishwekerezi kuli Daudi, mwami mushige amavurha wa Yehova
Ciru akaba Abakereti, Abapeleti, n’Aba-Gititi barhali Baisraheli, bal’iyemire n’obwalagale oku Yehova ye Mungu w’okuli n’oku Daudi ali mushige amavurha wage. Daudi agwasirwe abe avuzire omunkwa bwenene omu kuba n’abalume bishwekerezi ntyo aha burhambi bwage!
a Irhegeko lya Nnâmahanga liri omu Olushika 23:3-6 lyal’ihanzize Abaamoni n’Abamoabu okuja omu cigamba c’Abaisraheli. Ciru akaba ntyo, bibonekine oku er’irhegeko lyal’iyerekine oku abo bantu barhakayemerirwe okuba bacikala ba mw’er’ishanja bagwerhe ehaki zoshi z’Omuisraheli, cikone lirhal’ihanzize oku ago mashanja g’abantu barhali Baisraheli garhakacilunzire n’abantu ba Mungu erhi kulama haguma nabo. Olole ecitabu Étude Perspicace des Écritures, Ibugu lya 1, buk. 100.
