Fa Nihainao Va?
Manino ro nisy olo baka amy firenena hafa ty tamy tafikin’i Davida Mpanjaka?
TSY Israelita ty sisany amy maramilan’i Davida rey, anisani-zay ry Zeleka Amonita, Oria Hetita, noho Jitma Moabita. a (1 Tan. 11:39, 41, 46) Anisan’ny tafikin’i Davida koa ‘ty Keretita, ty Peletita, noho ty Gatita.’ (2 Sam. 15:18) Misy mieritseritsy fa nifandramby marìny tamy Filistinina ty Keretita noho ty Peletita. (Ezek. 25:16) Baka a Gata, tanàn’ny Filistinina any ty Gatita.—Jos. 13:2, 3; 1 Sam. 6:17, 18.
Manino lahilahy reo ro neken’i Davida ho anisan’ny maramilany, kanefa tsy Israelita? Natoky ie fa tsy hivaliky aminy rozy sady tsy hivaliky amy Jehovah. Zao, ohatsy, ty resahin’ny diksionera raiky ara-baiboly, mikasiky an’ny Keretita noho Peletita rey: “Tsy nivaliky tamy Davida mihintsy rozy lafa ie niatriky raha farani-ze sarotsy tamy fanjakàny teo.” Ino ty mampiseho ani-zay? Nisy fotoa niala an’i Davida “ty lahilahy israelita iaby” ka nanaraky an’ny “lahilahy mpanakoronta atao hoe Sheba.” Tsy nivaliky tamy Davida anefa ty Keretita noho ty Peletita sady nanampy mba hampijano an’ny raha nataon’i Sheba iny. (2 Sam. 20:1, 2, 7) Nisy fotoa koa Adonia anakin’i Davida Mpanjaka niezaky nangalatsy fahefà satria ta ho mpanjaka. Fe mbo tsy nivaliky tamy Davida avao ty Keretita noho ty Peletita ka Solomona ro nataon-drozy mpanjaka. Solomona moa ro nifilin’i Jehovah handimby an’i Davida.—1 Mpanj. 1:24-27, 38, 39.
Nisy olo hafa koa ankoatsin’ny azy niresahintsika reo, tsy nivaliky tamy Davida mihintsy. Tsy ia zay fa Itahy Gatita. Nanampy an’i Davida Itahy noho ty maramilany 600 lafa nanohitsy azy Absaloma anakilahiny. Nitao ty lahilahy tamy Israely teo Absaloma tamy zay mba hanao azy ho mpanjaka. Nivola tamy Itahy Davida fa tsy tokony hiaraky aminy ie mba hialy amy fahavalony satria hafa firenena ie. Fe nivola Itahy hoe: “Laha mbo velo koa Jehovah, sady laha mbo velo koa mpanjaka tompoko, le amy ze hisy ty mpanjaka tompoko ro hisy ty mpanomponao, ndre ho maty ndre ho velo!”—2 Sam. 15:6, 18-21.
Tsy nivaliky tamy Davida Itahy satria hainy fa voahosotsin’i Jehovah ie
Ndre tsy israelita aza ty Keretita, ty Peletita, noho ty Gatita, le nino tanteraky rozy fa Jehovah ro Ndranahary marina, le Davida ro nitendreny ho mpanjaka. Azo antoky fa tena nifalifaly Davida nana an’ny lahilahy tsy nivaliky reo!
a Mivola ty lalàna-Ndranahary amy Deoteronomia 23:3-6 ao fa tsy mahazo militsy ho anisan’ny fiangonan’Israely ty Amonita noho ty Moabita. Midika zay fa tsy afaky ho anisan’ny firenenan’Israely rozy, sady tsy afaky hana zo noho tombotsoa iaby nananan’ny Israelita. Fe tsy midika lalàna io hoe tsy nahazo nifandramby tamy Israelita mihintsy ty Amonita noho ty Moabita, na tsy afaky niaraky nipetraky tamin-drozy. Henteo ty boky Fandalinana ny Soratra Masina, amy hoe “Amonita”: “Nifanambady tamin’ny Israelita” feh. 1-3.
