E te Silafia?
Aiseā na auai ai tane e lē o ni Isaraelu i le ʻautau a le tupu o Tavita?
NA IAI i le ʻautau a Tavita tagata totoa e lē o ni Isaraelu e pei o Seleka le tagata Amonī, o Uria le tagata Hetī, ma Itema le tagata Moapi. a (1 No. 11:39, 41, 46) Na aofia foʻi i le ʻautau a Tavita ʻtagata Kereti, tagata Peleti, ma tagata Kata.’ (2 Samu. 15:18) O tagata Kata e mai i Filisitia, ma e foliga mai foʻi e vavalalata le faiā a tagata Kereti ma tagata Peleti i tagata Filisitia.—Eseki. 25:16; Iosua 13:2, 3; 1 Samu. 6:17, 18.
Aiseā na faaaogā ai e Tavita tane e lē o ni Isaraelu i lana ʻautau? Na ia mautinoa e faamaoni nei tane iā te ia, ae e sili atu i lenā, e latou te faamaoni iā Ieova. O se faataʻitaʻiga, ua faamatalaina tagata Kereti ma tagata Peleti i le The New Interpreter’s Dictionary of the Bible e faapea: “Na latou faamaoni pea iā Tavita i taimi e sili ona faigatā o lana nofoaiga.” E faapefea? Ina ua tuua e “tagata uma o Isaraelu” le tupu o Tavita ma mulimuli i ʻse tagata faatupu vevesi e igoa iā Sepa,’ na mulimuli pea tagata Kereti ma tagata Peleti iā Tavita ma taumafai e taofi le fouvalega a Sepa. (2 Samu. 20:1, 2, 7) I se tasi taimi, na taumafai ai Atonia le atalii o le tupu o Tavita e faoa le nofoaiga a lona tamā. Peitaʻi na faamaoni pea tagata Kereti ma tagata Peleti iā Tavita, ma na latou fesoasoani ina ia avea Solomona ma tupu, auā o ia lea na tofia e Ieova.—1 Tu. 1:24-27, 38, 39.
O se isi tagata e lē o se Isaraelu na matuā faamaoni iā Tavita, o Itai le tagata Kata. Ina ua fouvale Apisaloma le atalii o Tavita ma taumafai e faaliliu atu loto o tagata iā te ia, na lagolagoina e Itai ma ona tagata totoa e toʻa 600 le tupu o Tavita. Na taʻu atu e Tavita iā Itai, talu ai e lē o ia o se Isaraelu, e lē manaʻomia ona ia tau mo ia. Ae na tali mai Itai: “Ou te tautō iā Ieova le Atua soifua ma loʻu alii le tupu o lē o loo soifua, po o fea lava e iai loʻu alii le tupu, po o le oti po o le ola, o i inā lava e iai lau auauna!”—2 Samu. 15:6, 18-21.
Na faamaoni Itai iā Tavita le tupu faauuina a Ieova
E ui o tagata Kereti, tagata Peleti, ma tagata Kata e lē o ni Isaraelu, ae na latou iloa o Ieova o le Atua moni, ma o Tavita o lē na faauuina e Ieova. E mautinoa na matuā lotofaafetai Tavita, ona o le iai o nei tane faamaoni e lagolagoina o ia!
a I le tulafono a le Atua o loo faamauina i le Teuteronome 23:3-6, na faasā ai ona avea tagata Amonī ma tagata Moapi ma sui o le faapotopotoga o Isaraelu. Peitaʻi, e foliga mai na uiga atu lenā tulafono i le lē mafai ona avea o na tagata ma tagatānuu moni o Isaraelu. Ae na mafai pea ona faatasitasi pe nonofo faatasi na tagata ma tagata o le Atua. Tagaʻi i le Insight on the Scriptures, Tusi 1, itu. 95.
