Wɛ ongewake?
Ladjikɛnge angangɛnda yakambaka ete ngo angala wa Nkfumi Davidɛ?
ZƐLƐKƐ ose Amɔnɛ, Uriya ose Hitɛ, la Itima ose Moabɛ wayalaki angala wangangɛnda wakambaki ete ngo angala wa Davidɛ. a (1 Ɛk. 11:39, 41, 46) ‘Ase Kerɛtɛ, ase Pelɛtɛ l’ase Giti’ wakambaki ole iwɔ ete ngo angala wa Davidɛ. (2 Sa. 15:18) Mbala efula anto wɔsaki ase Kerɛtɛ l’ase Pelɛtɛ ete ngo botó dj’ase Filistiya. (Ezk. 25:16) Ase Giti oyɛwɔ nde ase Gatɛ, ngando kɛmɔtshi kɛ Filistiya.—Yos. 13:2, 3; 1 Sa. 6:17, 18.
Ladjikɛnge Davidɛ ndatshike angangɛnda wasɔ ndjala angala wande? Nde ayalaki l’eshikikelo ante wayalaki la nkɔmano le nde, la nkambo deka djonyi nde, wayalaki la nkɔmano te Yehova. Ndjɔmbɔmba, okanda ɔmɔtshi wetawɔ ambɔ The New Interpreter’s Dictionary of the Bible wotepela nghɔnɛ lá nkambo dj’ase Kerɛtɛ l’ase Pelɛtɛ: “Iwɔ wayalaka la nkɔmano te Davidɛ lá winá wɛ ndapomana l’ekakasano wɛ nkekete efula lá ɛlɔndjɛlɔ kɛnde.” Yɛnyɛ́ nkɔmano djɛwɔ ngete mo? Winá wɔ ‘ampame inkfumɔ yɛ Isariyɛlɛ’ yakadjɛ Nkfumi Davidɛ djɛ nkilika ‘Sheba, kanga ofutano,’ ase Kerɛtɛ l’ase Pelɛtɛ watshikalaka la Davidɛ edjinge w’okotshɛ́ka djɛ nshiyɛ ɔtɔmbɔkwɛlɔ wɔ Sheba. (2 Sa. 20:1, 2, 7) Lá mbamba kɛmɔtshi, Adɔniya wa wɔna Nkfumi Davidɛ asɛsaka ndjala nkfumi l’edjena kɛ Salɔmɔ. Lonkina, ase Kerɛtɛ, l’ase Pelɛtɛ watshikalaka la nkɔmano te Davidɛ, la w’okotshɛ́ka djɛ mbekadjɛ Salɔmɔ, kanga Yehova ndasɔnɛ ete ngo mpɛna kɛ Davidɛ nkfumi.—1 Nk. 1:24-27, 38, 39.
Ongangɛnda onkina w’otshikalisá la nkɔmano te Davidɛ nde Itayi, ose Giti. Itayi l’angala wande 600 wasukaka Nkfumi Davidɛ winá wɔ wɔnande Abisalɔmɔ ndatɔmbɔkɔ la ndadjimbola ampame y’Isariyɛlɛ djɛ ndowekadjɛ nkfumi djɛ nde nkita Davidɛ. Má bango Davidɛ ɛnyɛka Itayi ante mande nde ndayalaka nde ongangɛnda, atayala la djonyi djɛ nana mbandji kɛsɔ. Koko Itayi atepelaka ante: ‘Lá nsɔsɔlɔ ete ngo Yehova oyɛnde la lowiko la wɛ nkfumi kɛmi nkfumi kɛ nkanga oyɛ la lowiko, idjena inkfumɔ ingoyala nkfumi kɛmi nkfumi kɛ nkanga, ayale lá nyɔyi kana lá lowiko, okambi woko koko angoyala l’eteyi!’—2 Sa. 15:6, 18-21.
Itayi atshikalaka la nkɔmano te Davidɛ, kanga l’ɔsɔnamisá me Yehova ete ngo nkfumi
Kaanga ase Kerɛtɛ, ase Pelɛtɛ, l’ase Giti yayalaka angangɛnda, iwɔ w’awolaki Yehova ete ngo Ndjambe kɛ nsɔsɔlɔ la Davidɛ ete ngo kanga Yehova ndasɔnɛ. Ɔsɔ ngo Davidɛ ndayale la djedjɛ lá wopo wɔ ndawa ampame yɛ nkɔmano yɛ nghɔsɔ l’ompandju wɔnde!
a Ɔlɛmbɛ wɔ Ndjambe w’ofunamisá lá Mvungo k’Ɛlɛmbɛ 23:3-6 washimbaki ase Amɔnɛ l’ase Moabɛ djɛ nsanghana la oloyi wɔ wana w’Isariyɛlɛ. Koko, ɛnama ete ngo ɔlɛmbɛ wɔsɔ yaashimbaka nde dj’ipa iwɔ ndáwɔsá ete ngo ase mbandja koko w’otashimbaki dj’iwɔ nsanghana kana ndala olalo la enkambi wɛ Ndjambe. Lenda Étude perspicace des Écritures, vɔlimɛ 1, nki. 95.
