Oukanga su?
Buakinyi bantu ba ingi miilo babaadi basalayi mu kiluilo kia Nfumu Davide?
MUNKATSHI mua basalayi ba ingi miilo babaadi mu kiluilo kia nfumu Davide, mubaadi bana balume bu bano; Seleke muina Aamone, Uriaya muina Hiite, na Yetema muina Moabe. a (1 Mya. 11:39, 41, 46) Mu kiluilo kia Davide mubaadi dingi, “beena-Kerete, beena-Pelete, na beena-Giite.” (2 Sam. 15:18) Ke bungi atunangushenaa’shi bena Kerete na bena Pelete babaadi bakuabo na bena Filistine. (Es. 25:16) Bena Giite babaadi bashaale mu kibundi kia mu Filistine mu Gate.—Yos. 13:2, 3; 1 Sam. 6:17, 18.
Buakinyi mu kiluilo kia Nfumu Davide mubaadi mulongo wa bano basalayi ba ingi miilo booso? Muanda baadi mukulupile’shi abekala na lulamato kuadi, na muanda ubaadi na muulo ngofu abekala na lulamato kui Yehowa. Bu kileshesho, pabitale bena Kerete na bena Pelete, Dictionnaire dia The New Interpreter’s Dictionary of the Bible adiamba’shi: “Babaadi bashaale na lulamato kui Davide mu bipungo bi bukopo mu kumunana kuaye kooso.” Buakinyi babaadi baleshe lulamato lui bino? Nsaa “ibakatukile beena-Isaleele booso” kui Nfumu Davide na kulonda uno “muntu mutwelakane aitaanyinwa buu Sheba,” bena Kerete na bena Pelete, babasheele nka na lulamato kui Davide na abo nkumukuasha buadia kutshokola buno buntomboshi bua Sheba. (2 Sam. 20:1, 2, 7) Ungi musuusa Adoniya muana a Nfumu Davide batompele kuituula ku lupuna-nsulu aye nabene pa bukopo pa mbalo ya Solomonyi. Sunga mbiabia, bena Kerete na bena Pelete, babaadi bashaale nka na lulamato kui Davide, na abo nkumukuasha buadia kutuula Solomonyi bu nfumu, abaabadi basangule kui Yehowa buadia kuikala bu mpianyi a Nfumu Davide.—1 Bf. 1:24-27, 38, 39.
Ungi muntu a ingi miilo baadi mushaale na lulamato kui Nfumu Davide nyi Itaayi muina Giite. Itaayi na basalayi baye 600, babaadi bakuatshishene Nfumu Davide nsaa ibaadi Absalome muana a Davide mutombokie na aye nkutakula bangi bana balume ba mu Isalele, buabadia kutombokiela Nfumu Davide. Nfumu Davide balunguile Itaayi bu bibaadi muntu a ingi miilo’shi, ta baadi mulombene kuluila Nfumu Davide ngoshi nya. Anka Itaayi baluluile Nfumu amulungula’shi: “Na bi Yehowa na mûwa, mpâ na byodi’be nfumwami na mûwa, nakutshipila’shi, mbalo yoso y’okekala obe nfumwami, su ngya mûwa su ngya lufu, ami muntu ôbe nakekala n’obe.”—2 Sam. 15:6, 18-21, EEM.
Itaayi baadi na lulamato kui Davide, muedibue muimu a Yehowa
Sunga mbibaadi bena Kerete na bena Pelete bantu ba ingi miilo, babaadi batundule’shi Yehowa ngi Efile Mukulu, a binyibinyi na’shi Davide mmuedibue muimu a Yehowa. Davide baadi na lutumbu ngofu paye kuikala na bano bana balume ba sha lulamato ku lupese luaye!
a Muiya w’Efile Mukulu wi mu Miiya Ikituulwe 23:3-6, ubaadi upeleshe bena Aamone na bena Moabe kutuela mu kakongie ka bena Isalele. Anka abimueneka’shi uno muiya ubaadi utale kuikala na matalua ooso mu muilo. Na taubaadi aupelesha bano bantu ba ingi miilo bua kuibunga sunga kushaala munkatshi mua muilo w’Efile Mukulu nya. Tala mukanda wa Étude perspicace des Écritures, Volime 1, Esak. 100.
