Bewati Yini?
Yini leyenta emadvodza lebekangasiwo ema-Israyeli kutsi abe sebutfweni leNkhosi Davide?
LIBUTFO laDavide belakhiwa nangemasotja akuletinye tive, lokufaka ekhatsi Seleki umAmoni, Uriya umHethi, naJithma umMowabi. a (1 Khr. 11:39, 41, 46) Lelibutfo beliphindze lakhiwe ‘ngemaKherethi nemaPhelethi nemaGathi.’ (2 Sam. 15:18) Kubonakala ngatsi emaKherethi nemaPhelethi bekahlobene nemaFilisti. (Hez. 25:16) EmaGathi bekavela eGathi, leseveni lemaFilisti.—Josh. 13:2, 3; 1 Sam. 6:17, 18.
Yini leyenta Davide wavumela lamadvodza ekuhamba kutsi abe sebutfweni lakhe? Bekaciniseka kutsi beketsembekile kuye, ngetulu kwako konkhe beketsembekile kuJehova. Sibonelo nje, ikhuluma ngemaKherethi nemaPhelethi, i-The New Interpreter’s Dictionary of the Bible itsi: “Bahlale betsembekile kuDavide esikhatsini lesimatima kakhulu sekubusa kwakhe.” Kanjani? Ngesikhatsi “onkhe emadvodza aka-Israyeli” ashiya iNkhosi Davide futsi alandzela ‘umuntfu lobekayinkinga, ligama lakhe kunguSheba,’ emaKherethi nemaPhelethi ahlala etsembekile kuDavide futsi asita ekumiseni kuvukela kwaSheba. (2 Sam. 20:1, 2, 7) Ngalesinye sikhatsi, indvodzana yeNkhosi Davide lokungu-Adoniya yetama kutsatsa bukhosi ngenkhani. Kodvwa emaKherethi nemaPhelethi ahlala etsembekile kuDavide futsi asita kuze ente Solomoni abe yinkhosi, ngesizatfu sekutsi Jehova bekakhetse yena kutsi abe yinkhosi ngemuva kwaDavide.—1 Khos. 1:24-27, 38, 39.
Lenye indvodza lengasuye umIsrayeli leyahlala inamatsele kuDavide bekungu-Ithayi umGathi. Ithayi nemadvodza lebekanawo langu-600 basita iNkhosi Davide ngesikhatsi indvodzana yayo lokungu-Absalomu ivukela futsi yetama kwenta emadvodza aka-Israyeli kutsi avukele inkhosi. Ekucaleni Davide watjela Ithayi kutsi angayingeni lemphi ngobe akasuye umIsrayeli. Kodvwa Ithayi watsi: “Ngifunga kuphila kwaJehova nekuphila kwenkhosi yami ngitsi nobe ngabe ngukuphi lapho inkhosi iya khona, nobe kusho kufa nobe kuphila, ngulapho nenceku yakho iya khona!”—2 Sam. 15:6, 18-21.
Ithayi beketsembekile kuDavide, longulogcotjiwe waJehova
Ngisho nobe emaKherethi nemaPhelethi nemaGathi bekangasiwo ema-Israyeli, kodvwa amhlonipha kakhulu Jehova njengobe anguNkulunkulu weliciniso, naDavide njengobe angulogcotjiwe waJehova. Davide wajabula kakhulu ngekusekelwa ngulamadvodza letsembekile!
a Umtsetfo waNkulunkulu lobhalwe kuDutheronomi 23:3-6 bewungawavumeli ema-Amoni nemaMowabi kutsi abe yincenye yesive sema-Israyeli. Nobe kunjalo, kubonakala ngatsi lomtsetfo bewusho kuba nebuve baka-Israyeli, futsi bewungabavimbeli bantfu bakuletinye tive kutsi batihlanganise nebantfu baNkulunkulu nobe kutsi bahlale nabo. Buka i-Insight on the Scriptures, Volume 1, likh. 95.
