Fanta’o Vao?
Nagnino ro nisy lahilahy tsy Israelita nenga i Davida Mpanjaka ho agnisa ty maramila’e?
NISY lahilahy tsy Israelita i maramila i Davida Mpanjaka rey. Agnisa izay ohatse ty Zaleka Amonita, Oria Hetita vaho i Jitma Moabita. a (1 Tan. 11:39, 41, 46) Agnisa ty maramila i Davida ka “o Keretitao, o Peletitao naho o Gatitao.” (2 Sam. 15:18) Nifandrambe maifitse tamo o Filistinao o Keretitao naho o Peletitao. (Ezek. 25:16) Azo antoke fa ndaty boake amy ty tana ty Filistina ta Gata tagne o Gatitao.—Jos. 13:2, 3; 1 Sam. 6:17, 18.
Nagnino ty Davida ro nagnenga o lahilahy rehoe ho agnisa ty maramila’e? Natoky reke fa tsy hivalike ama’e iareo lohotsie fa amy i Jehovah. Mareho ohatse ty raha rehafe ty diksionera raike miomba ty Baiboly miomba o Keretita naho o Peletita reo: “Tsy nivalike tamy i Davida iareo lohotsie naho fa nisy raha sarotse tagnate i fotoagne nanjaka’ey.” Akore ty nampisehoa iareo izay? Naho fa nienga i Davida Mpanjaka ty lahilahy iaby tamo o Israelio eo sady nagnorike ty mpigoreve raike atao tihoe Sheba, le tsy nivalike tama’e o Peletitao naho o Keretitao sady nagnampe aze hampijanogne i goreve natao i Shebay. (2 Sam. 20:1, 2, 7) Tamy tie indraike zay, le nanao ze hahazoa’e fahefagne ho mpanjaka ty Adonia ana-dahy i Davida. Faie mbe tsy nivalike tamy i Davida avao o Keretitao naho o Peletitao sady nagnampe aze amy ty fanoagne i Solomona ho mpanjaka handimbe aze, i tinendre i Jehovah-y.—1 Mpanj. 1:24-27, 38, 39.
Agnisa ty lahilahy tsy Israelita tena tsy nivalike tamy i Davida ty Itahy Gatita. Nanohagne i Davida Mpanjaka ty Itahy naho i maramila’e 600 rey naho fa nigoreve ty Absaloma ana-dahy i Davida sady nanao ze hahazoagne ty fo o lahilahy Israelitao amy izay iareo manohetse i Mpanjakay. Nirehake tamy i Itahy ty Davida tie tsy voatere hialy hoaze reke satria tsy Israelita. Faie izao ty navale i Itahy aze: “Naho mbe velogne ty Jehovah sady naho mbe velogne ka ty mpanjaka tompoko, le amy ze hisy i mpanjaka tompoko ty hisy ty mpanompo’o toy, ndra tie ho mate ndra tie ho velogne!”—2 Sam. 15:6, 18-21.
Tsy nivalike tamy i Davida, i mpanjaka tinendre i Jehovah-y ty Itahy
Ndra tie tsy Israelita aza o Keretitao naho o Peletitao vaho o Gatitao, le nahafantatse fa Andrianagnahare maregne ty Jehovah sady agnisa ty voahoso’e ty Davida. Azo antoke fa tena nahafale i Davida ty nanagne o lahilahy tsy nivalike tama’e rehoe!
a Trea amy ty lalàn’Andrianagnahare amy Deoteronomia 23:3-6 ao fa rinaran’Agnahare tsy hampidiregne ho agnisa ty fiangona o Israelio o Amonitao naho o Moabitao. Tsy mandrara o hafa firenena reo tsy hifandrambe ndra tsy hiarake hitoboke amo o vahoan’Agnahareo zay fa ty zo ho agnisa i firenenay avao ro tea o lalàna io horehafegne. Henteo ty boke Fandalignagne ty Soratse Masigne amy tihoe “Amonita” “Nifanambady tamin’ny Israelita.”
