U di gu dziti?
Khu ginani avba nya libuthu la Dhavhidhe gu nga ba guri ni masotshwa ma nga ba ma siri Vaisrayeli?
AVBA nya libuthu la Dhavhidhe ma di romo masotshwa ma nga ba ma siri Vaisrayeli, khu giyeyedzo Zeleki Muamoni, Uriya Muhiti ni Etima Mowabhita. a (1 Dzik. 11:39, 41, 46) Libhuthu la Dhavhidhe li di gu wumbwa gambe khu “Vakereti, Vapeleti ni Vageti.” (2 Sam. 15:18) Si di gu wonega gu khatshi Vakereti ni Vapeleti va diri ni wulongo ni Vafilistiya. (Ezek. 25:16) Adzina saye Vageti va di gu dugeya khu dhoropani ga Filistiya wa Gati. — Jos. 13:2, 3; 1 Sam. 6:17, 18.
Khu ginani Dhavhidhe a nga dzumeleya vama va gu siri Vaisrayeli va gira gipandre nya libuthu laye? Uye a di gu tiyisega gu khuye avo va di gu tumbega gwaye, nigu nya lisima ga satshavbo va di gu tumbega ga Jehovha. Khu giyeyedzo, na yi gu ganeya khu Vakereti ni Vapeleti, disiyonariyu nyo khaguri nya Bhibhiliya yari khiyo: “Avo va simamide gu tumbega ga Dhavhidhe ambari tepo va nga tshangana ni sigaradzo ndrani nya mufumo waye.” Khu ndziya muni? Tepo “vatshavbo vama va na Israyeli” va nga diga Pfhumu Dhavhidhe va landreya ‘mwama moyo nya dzihanyi nyo pwani khu Sebha,’ Vakereti ni Vapeleti va di simama gu tumbega ga Dhavhidhe va bwe va mu phasa gu landra Sebha. (2 Sam. 20:1, 2, 7) Ga giemo nyo khaguri, gyanana gya Pfhumu Dhavhidhe Adhoniya, gi di zama gu khala pfhumu wulangani ga Solomoni. Ambari ulolo, Vakereti ni Vapeleti va simamide na va tumbegide ga Dhavhidhe va bwe va phasa Solomoni gu khala pfhumu, kholu khuye a nga hathwa khu Jehovha. — 1 Dzipf. 1:24-27, 38, 39.
Limbe lisotshwa li nga ba li siri Muisrayeli li nga simama gu tumbega ga Dhavhidhe khu Itayi nya Mugeti. Itayi ni 600 masotshwa va seketede Pfhumu Dhavhidhe tepo gyanana gyaye Abhisalamo gi nga mu wugeya gi bwe gi kutsedzeya vama va Israyeli gu mu landreya. Dhavhidhe a di embeya Itayi gu khuye khu kotani nya olu a gu siri Muisrayeli kha sa nga ba si vbwetega gu dwana. Ganiolu, Itayi a di khuye: “Nyi ngu sambanya khu Pfhumu Nungungulu a vbanyago ni ga womi wa mufumeli, mune wangu, kheni: “Gani khu hayi mufumeli, mune wangu, gani lufuni gani guvbanyani, githumi gyago, gi na bani giri nago.” — 2 Sam. 15:6, 18-21.
Itayi a di gu tumbegide ga Dhavhidhe, Pfhumu yi nga todzwa khu Jehovha
Ambari olu Vakereti ni Vapeleti ni Vageti va nga ba va siri Vaisrayeli, avo va di gu ninga githawo Jehovha kha nga Nungungulu nya lisine ni gu tumba gu khavo Dhavhidhe a di gu todzidwe khu Jehovha. Khu lisine, Dhavhidhe tsakide ngudzu khu gu manega ni vama vava nyo tumbege vbafuvbi gwaye!
a Nayo wa Nungungulu wu gomogo omu ga Dhewuteronome 23:3-6 wu di gu himbedzeya Vaamoni ni Vamowabhi gu beya omu nya libandla la va na Israyeli. Ambari ulolo, si di gu wonega gu khatshi nayo wowu wu di gu tshamuseya gu khuwo kha va nga ba va yede gu lumba lihundzo la Israyeli, ganiolu kha wa nga ba wu himbedzeya vathu va gu siri Vaisrayeli va tshangana ni vathu va Nungungulu. Wona Estudo Perspicaz das Escrituras Vholume 1, paj, 95.
