¿Xkatsiyata?
¿Tuku xlakata makgapitsi ksoldados David xalak atanu kachikinin xwankgonit?
MAKGAPITSI ksoldados David ni israelitas xwankgonit. Akgtum liʼakxilhtit, Zélec ammonita xwanit, Urías hitita chu Itmá moabita xwanit (1 Crón. 11:39, 41, 46). a Na xwilakgo tiku «keretitas, peletitas chu guititas» xwankgonit (2 Sam. 15:18). Max keretitas chu peletitas xalak xfamilia filisteos xwankgonit (Ezeq. 25:16). Chu guititas xalak Gat xwankgonit, akgtum kachikin nema xkatapakgsini filisteos (Jos. 13:2, 3; 1 Sam. 6:17, 18).
¿Tuku xlakata David mastalh talakaskin pi tiku xalak atanu kachikinin na ksoldados xlitaxtukgolh? Xlakata liwana xkatsi pi umakgolh lakchixkuwin ni xʼamakgo makgxtakgkgo, chu tuku tlakg xlakaskinka, na ni xʼamakgo makgxtakgkgo Jehová. Akgtum liʼakxilhtit, libro The New Interpreterʼs Dictionary of the Bible lichuwinan xpalakata keretitas chu peletitas: «Xlakan ni makgxtakgkgolh David akxni xtitaxtuma tuku tlakg tuwa kxtamapakgsin». ¿Tuku likatsiyaw? Akxni «putum lakchixkuwin xalak Israel» akgxtakgmakgankgolh mapakgsina David xlakata tatayakgolh «chatum chixku tiku xwanikan Seba [...] tiku lu xtaʼakglhuwi», keretitas chu peletitas tatayakgolh David chu makgtayakgolh xlakata Seba nialh xtalalakatawakalh (2 Sam. 20:1, 2, 7). Atanu kilhtamaku, akxni Adonías, chatum xkgawasa mapakgsina David, xmakglhtiputun xtamapakgsin, keretitas chu peletitas ni makgxtakgkgolh David chu makgtayanankgolh xlakata Salomón mapakgsina xlitaxtulh, xlakata xkatsikgo pi Jehová wa xlaksaknit Salomón (1 Rey. 1:24-27, 38, 39).
Atanu chixku tiku nikxni makgxtakgli David, wa Ittái, tiku guitita xwanit. Xla chu 600 ksoldados tatayakgolh mapakgsina David akxni atanu xkgawasa, tiku xwanikan Absalón, talalakatawakalh chu tlawalh pi lakchixkuwin xalak Israel mapakgsina xlimaxtukgolh. David wanilh Ittái pi xlakata xla xalak atanu kachikin xwanit, ni xtalakaskin xtalatlawanalh xpalakata. Pero Ittái kgalhtilh: «¡Kmalaknuniyan kxtukuwani Jehová xastakna Dios chu kxtukuwani kimalana tiku kgalhi lhuwa kakni, pi kaxanikawa niku natawila kimalana tiku kgalhi lhuwa kakni anta natawila miskujni, komo nakni o komo naklatama!» (2 Sam. 15:6, 18-21).
Ittái ni makgxtakgli David, mapakgsina tiku Jehová xlaksaknit.
Maski keretitas, peletitas chu guititas xalak atanu kachikinin xwankgonit, xkanajlakgo pi Jehová wa xaxlikana Dios, chu xmaxkikgo kakni David xlakata wa Jehová xlaksaknit. Xlikana pi David lu kapaxtikatsinilh umakgolh lakchixkuwin tiku nikxni makgxtakgkgolh.
a Xlimapakgsin Dios nema min kDeuteronomio 23:3-6 xwan pi nipara chatum ammonita chu nipara moabita tlan xmakgtapakgsikgo kkachikin Israel. Uma limapakgsin xkilhchanima pi chatum tiku xalak atanu kachikin nila xlitaxtu chuna la chatum israelita chu nila xlakgchan putum tuku xkalakgchan israelitas. Pero ni xwan pi nila xkatalalinkgolh xkachikin Dios o nila xlatamakgolh anta. Kaʼakxilhti libro Perspicacia para comprender las Escrituras niku wan «Ammonitas» chu alistalh kaputsa subtítulo «Se casan con israelitas».
