Yu Save Long Dispela?
Wai na ol man bilong ol narapela kantri i insait long ami bilong King Devit?
SAMPELA man bilong narapela kantri em ol i insait long ami bilong Devit, em Selek bilong lain Amon, Uria bilong lain Hit, na Itma bilong lain Moap. a (1 Sto. 11:39, 41, 46) Na tu, “ol Keret, ol Pelet” na ol Git, ol tu i insait long ami bilong Devit. (2 Sml. 15:18) I luk olsem ol Keret na ol Pelet, ol i wanblut bilong ol Filistia. (Ese. 25:16) Ol Git em ol man bilong taun Get bilong Filistia.—Jos. 13:2, 3; 1 Sml. 6:17, 18.
Wai na Devit i kisim ol man bilong narapela kantri long insait long ami bilong em? Em i bilip tru olsem ol i stap gut long em, na bikpela samting moa, ol i stap gut long Jehova. Olsem, wanpela buk (The New Interpreter’s Dictionary of the Bible) i tok long ol Keret na ol Pelet olsem: “Ol i stap gut long Devit long wanpela haptaim long wok king bilong em we i gat bikpela hevi tru.” Hau ol i stap gut long em? Taim “olgeta man bilong Israel” i lusim King Devit na bihainim “Seba, em i man bilong kamapim trabel,” ol Keret na ol Pelet i stap gut long Devit na ol i helpim Devit long daunim pasin bikhet bilong Seba. (2 Sml. 20:1, 2, 7) Long narapela taim, pikinini man bilong King Devit em Adoniya, em i laik stilim wok king bilong papa bilong em. Tasol ol Keret na ol Pelet i stap gut long Devit, na ol i helpim wok bilong mekim Solomon i kamap king, em man Jehova i makim bilong kisim wok king bilong papa bilong em.—1 Kin. 1:24-27, 38, 39.
Narapela man i stap gut long Devit em Itai em man Git. Itai na 600 soldia bilong em i sapotim King Devit taim pikinini man bilong em Absalom i bikhet long em na pulim tingting bilong ol man Israel long lusim king na bihainim em. Pastaim Devit i tokim Itai olsem em i man bilong narapela kantri na i no gat wok long em i mekim dispela pait. Tasol Itai i tok: “King, bikman bilong mi, mi tok tru antap long Jehova husat i stap laip na long yu i stap laip, wanem hap king, bikman bilong mi i go long en, mi tu bai go. Na sapos ol i kilim yu i dai, orait ol i ken kilim mi tu i dai!”—2 Sml. 15:6, 18-21.
Itai i stap gut long Devit em man Jehova i bin makim
Maski ol Keret, ol Pelet, na ol man Git em ol i man bilong narapela kantri, ol i luksave olsem Jehova em i God tru na Devit em man Jehova i bin makim. Devit i amamas tru long kain ol gutpela man olsem em ol i bin stap gut long em!
a Lo bilong God i stap long Buk Lo 23:3-6 i tambuim lain Amon na lain Moap long kam insait long kongrigesen bilong lain Israel. Tasol i luk olsem dispela lo i tambuim ol long kamap hap bilong lain Israel na em i no tambuim ol dispela man bilong narapela kantri long bung wantaim o sindaun namel long lain bilong God. Lukim buk Insight on the Scriptures, Volium 1, p. 95.
