U wa zvi tiva?
Hikuyini a vavanuna vo kari vo kala va nga hi vaIzrayeli va nga hi ka butho ga yimpi ga Hosi Dhavhidha?
CIKARI ka tinhenha ta Dhavhidha ku wa hi ni vavanuna vo kala va nga hi vaIzrayeli. Hi cikombiso, Zeleke a muAmoni, na Uriya a muHiti na “Itma a muMowabhi. a (1 Kro. 11:39, 41, 46) Ahandle ka lavo zvo khwatsi ka butho ga Dhavhidha ku wa hi ni ‘vaKereti, ni vaPeleti ni vaGati’. (2 Sam. 15:18) Zvi wonekisa ku khwatsi a vaKereti, ni vaPeleti va wa hi maxaka ya laha kusuhani ya vaFilistiya. (Ezek. 25:16) A vaGati va wa dhawukela le Filistiya dhoropeni ga Gati. — Jox. 13:2, 3; 1 Sam. 6:17, 18.
Hikuyini Dhavhidha a nga vhumela ku a vavanuna vo kala va nga hi vaIzrayeli va maha cipandze ca butho gakwe? Hi ku i wa tiyiseka lezvaku va wa tsumbeka kakwe niku a ca hombe ka zvontlhe va wa tsumbeka ka Jehovha. Hi cikombiso, xungetano hi vaKereti ni vaPeleti, a dhisionario go kari ga ku tlhamusela Bhibhiliya gi wula lezvi: “Va simamile va tsumbile ka Dhavhidha ndzeni ka zvikhati zvo karata nguvhu mufun’weni wakwe.” Va zvi mahisile kuyini? A cikhati leci vontlhe ‘a vavanuna va ka Izrayeli’ va nga tsika Dhavhidha kasi va landzela a ‘wanuna wa nyamijiri wa ku Xebha’, a va vaKereti ni vaPeleti va no simama va tsumbekile ka Dhavhidha va tlhela va vhunetela a ku mbheta a wuhluwuki ga Xebha. (2 Sam. 20:1, 2, 7) Ka khati gin’wani, Adhonija a n’wana wa Hosi Dhavhidha i no zama ku wutla wuhosi. Hambulezvo, ka khati legi kambe, a vaKereti ni vaPeleti va no simama va tsumbekile ka Dhavhidha va tlhela va vhunetela a ku yimisa Solomoni kota hosi, loyi a nga hlawulilwe hi Jehovha kasi ava hosi andzhako ka Dhavhidha. — 1 Tih. 1:24-27, 38, 39.
A wanuna mun’wani wo kala a nga hi muIzrayeli, loyi a nga simama a tsumbekile nguvhu ka Dhavhidha hi Itayi, a muGati. Itayi ni tinhenha takwe ta 600 va no vhuna Hosi Dhavhidha a cikhati leci Absalome, a n’wana wa Dhavhidha, a nga mu vhukela a tlhela a kucetela a timbilu ta vanhu va ka Izrayeli lezvaku va vhukela hosi. Kusanguleni, Dhavhidha i no byela Itayi lezvaku kota lezvi a nga kala a nga hi muIzrayeli i wa nga ta famba naye yimpini. Kanilezvi Itayi i wulile lezvi: ‘Ndzi hlambanya ha Jehovha a hanyako ni hosi ya mina, kani hi kwihi laha a hosi yi ta ngava kona, a kufeni ni kuhanyeni, a nandza ga wena gi tava naye.’ — 2 Sam. 15:6, 18-21.
Itayi i wa tsumbekile ka Dhavhidha, a hosi yi totilweko ya Jehovha
Hambu lezvi ka ku a vaKereti ni vaPeleti ni vaGati va wa nga hi vaIzrayeli, va wa zvi tiva lezvaku Jehovha i Nungungulu wa lisine niku Dhavhidha i wa totilwe hi Jehovha. Handle ko kanakana, Dhavhidha i bongile nguvhu hi kuva ni vavanuna lavo vo tsumbeka tlhelweni gakwe!
a A nayo wa Nungungulu wu tsalilweko ka Deuteronome 23:3-6 wu wa betela a vaAmoni ni vaMowabhi a ku nghena ka bandla ga Izrayeli. Hambulezvo, zvi wonekisa ku khwatsi a nayo lowu wu wula a fanelo ya kuva ciro ca tiko ga Izrayeli na ku nga hi ku betela ku a vanhu lava va nga hiko va Izrayeli va tlhangana kutani ku tshama zvin’we ni vanhu va Nungungulu. Wona a bhuku Estudo Perspicaz das Escrituras vholume 1 pajina 113.
