Obaire Okimanyire?
Habwaki abasaija abakaba batali Baisaleri baaheeriize omu mahe g’Omukama Daudi?
OMU MAHE g’Omukama Daudi hakaba harumu abasaija abamu abakaba batali Baisaleri. Ekyokurorraho, Zereki Omwamoni, Uliya Omuhiti, na Ituma Omumoabu. a (1 Byom. 11:39, 41, 46) Omu mahe ga Daudi hakaba harumu “Nabakereti bona Nabapereti bona Nabagiti bona.” (2 Sam. 15:18) Nikitekerezebwa ngu Abakereti n’Abapereti bakaba baine obuzaale n’Abafirisiti. (Ez. 25:16) Abagiti baikaraga omu rubuga rw’Abafirisiti orwa Gasi.—Yos. 13:2, 3; 1 Sam. 6:17, 18.
Habwaki Daudi yaikiriize abantu abatali Baisaleri kuheereza omu mahe ge? Akaba nakigumya ngu nibaija kuba besigwa haluwe, kandi ekirukukirayo obukuru babe besigwa hali Yahwe. Ekyokurorraho, ekitabu kimu ekirukusoborra Baibuli kibazaaho Abakereti n’Abapereti kiti: “Daudi obwakaba nalema, bakaikara bali besigwa haluwe n’omu nyikara ezigumire muno.” Bakooleka bata obwesigwa? “Abasaija bona aba Isareri” obubaalekere kuhondera Omukama Daudi, baahondera “Seba mutabani wa Bikuli,” Abakereti n’Abapereti bakaikara na Daudi kandi baamukonyera kumaraho akatabanguko Seba akaakaba alesereho. (2 Sam. 20:1, 2, 7) Omurundi ogundi Adoniya mutabani wa Daudi akalengaho kwefoora omukama. Na ha murundi gunu, Abakereti n’Abapereti bakaikara bali besigwa hali Daudi kandi baamukonyera kufoora Sulemani omukama, habwokuba nuwe Yahwe akaba akomere kugaruka omu bigere bya Daudi.—1 Bakam. 1:24-27, 38, 39.
Omusaija ondi ayaikaire ali mwesigwa hali Daudi nuwe Itai Omugiti. Itai n’abarwani 600 bakasagika Omukama Daudi, mutabani we Abusalomu obuyahindwire emitima y’abantu nagonza bamufoole omukama. Hakubanza, Daudi akagambira Itai ngu kikaba kitarukumwetaagisa kurwana habwokuba akaba ali ow’ihanga erindi. Baitu Itai akamugambira ati: “Nka [Yahwe] okwali omwomezi, kandi nka mukama wange omukama okwali omwomezi, mazimakwo omu kiikaro kyona nambere mukama wange omukama alibaho, rundi habwokufa rundi habwobwomezi, nuho haliba oku nomuiru wawe.”—2 Sam. 15:6, 18-21.
Itai akaikara ali mwesigwa hali Daudi, omukama Yahwe ow’akaba akomere
N’obukiraaba ngu Abakereti, Abapereti, n’Abagiti bakaba batali Baisaleri, bakaba bakimanyire ngu Yahwe nuwe Ruhanga ow’amananu kandi ngu akaba akomere Daudi kuba omukama. Mali kiine kuba kyasemiize Daudi habwokuba n’abasaija banu abesigwa kumusagika!
a Ekiragiro kya Yahwe ekiri omu Ekyebiragiro 23:3-6 kikaba nikitanga Abamoni n’Abamoabu kutaaha omu kusorrokana kw’Abaisaleri. Baitu nikisisana ngu ekiragiro kinu kyali nikibatanga kufooka kicweka ky’ihanga lya Isaleri baitu kikaba kitarukubatanga kukoragana n’Abaisaleri rundi kwikara nabo. Rora ekitabu Insight on the Scriptures, Volume 1, rup. 95.
