Maizviziya Here?
Ngei anhu e nyika dzimweni aibatanidzwawo pa cikwata ce anyahondo a Mambo Dhavhidhi?
PAKATI pe anhu e nyika dzimweni aiseenza mu cikwata ce anyahondo a Dhavhidhi mainga muna Zereki mu Amoni, Uriya mu Hiti na Itma mu Moabhi. a (1 Mak. 11:39, 41, 46) Mucikwata ce anyahondo a Dhavhidhi maingawo muno “Akhereti, Aphereti, uye Ajeteu.” (2 Sam. 15:18) Akhereti no Aphereti pamweni ainga ano ukama we padhunze no Afiristiya. (Ezek. 25:16) Ajeteu akabva mu thaundi re Firistiya ku Gati.—Djs. 13:2, 3; 1 Sam. 6:17, 18.
Asi ngei Dhavhidhi wakatendera anarume aya kuti aseenze mucikwata ce anyahondo ake? Iyena waizviziya kuti awona ainga akagondeka kaari uye cinonyanya kukosha ainga akagondeka kuna Djehovha. Ngo muezaniso, dhisionariyo imweni ye Bhaibheri inobhuya ngezve Akhereti no Aphereti kuti: “Awona akarumbwa akagondeka kuna Dhavhidhi pa migariro inoshupha yaaibatana nayo, pa nguwa yaitonga Dhavhidhi.” Awona akapangidza kudini kugondeka? “Anarume ese e Israeri” paakasiya kuzwira Mambo Dhavhidhi kuti azwire “mupanduki Sebha,” Akhereti no Aphereti akarumbwa ari ku dii ra Dhavhidhi, ecibetsera Dhavhidhi kuti apedze kupanduka ka Sebha. (2 Sam. 20:1, 2, 7) Pa mugariro umweni, mwana wa Mambo Dhavhidhi Adhoniya, waida kugara Mambo pa mbuto ya Soromoni. Asi, Akhereti no Aphereti akarumbwa akagondeka kuna Dhavhidhi uye akabetsera Soromoni kuti agare mambo, ngekuti cainga ciri cisananguro ca Djehovha.—1 Mad. 1:24-27, 38, 39.
Mwanarume umweni wainga asiripi mu Israeri, asi wainga akagondeka kuna Djehovha waizwi Itai mu Jeteu. Itai no anarume anokwana kuita 600 aimuperekedza, akabetsera Mambo Dhavhidhi mwana wake Absaromi paakamupandukira uye iyena waida kuti anhu e Ciisraeri aitewo zvimwezvo. Pakutanga Dhavhidhi wakabvunza Itai kuti wainga asikadikani kubatanidzwa pa hondo iyona, ngekuti wainga asiripi mu Israeri. Asi Itai wakati: “Ndinopika na Djehovha mupenyu, uye no upenyu wa tenzi wangu mambo, pasinei no mbuto inonga ina tenzi wangu mambo ndiponawo panonga pano muranda wenyu, kunyazi zvecireya upenyu kana rufu!”—2 Sam. 15:6, 18-21.
Itai wakagara munhu wakagondeka kuna Dhavhidhi, mambo wakadzodzwa ndi Djehovha
Kunyazi kuti Akhereti, Aphereti uye Ajeteu ainga ari anhu e nyika dzimweni, awona akazwisisa kuti Djehovha ainga ari Mwari we zvirokwazvo uye Dhavhidhi wainga ari mudzodziwa wake. Zvezvirokwazvo Dhavhidhi wakatenda maningi nge kugara no anhu akagondeka ku dii rake!
a Maererano no Mutemo wakapaswa ndi Djehovha uri pana Dheuteronomiyo 23:3-6, a Amoni uye Amoabhi ainga akarambidzwa kupinda mu ungano ye Ciisraeri. Asi zvingaita kuti mutemo uu waireya kuti anhu e madzinza amweni ainga asina citenderhwa cekuita zviro zvimweni zvaiizwa no nhengo ye dzinza re Aisraeri. Asi wainga usikarambidzi kuti anhu aya e madzinza amweni abatane uye agare no anhu a Mwari. Onai pakazwi: Amonitas mu bhuku ra Estudo Perspicaz das Escrituras, mu ciPutukezi.
