I ROTO i ta ˈna nuu, e faehau ta Davida e ere i te Iseraela, mai ia Zeleka ati Amona, ia Uria ati Heta e ia Itema ati Moabi. a (Par. 1, 11:39, 41, 46) Oia atoa “te mau Kereti, te mau Peleti e [to] Gata.” (Sam. 2, 15:18) E au ra e mea piri roa te mau Kereti e te mau Peleti i te ati Philiseti. (Ezk. 25:16) E to Gata, no Gata mai paha ïa, e oire Philiseti.—Ios. 13:2, 3; Sam. 1, 6:17, 18.

No te aha Davida i rave mai ai ia ratou i roto i ta ˈna nuu? Ua papu ia ˈna e turu iho â ratou ia ˈna, e te mea faufaa roa ˈˈe, ia Iehova. No nia i te mau Kereti e te mau Peleti, te na ô ra te hoê titionare: “Ua turu noa ratou ia Davida i te mau taime fifi roa ˈˈe a faatere ai oia ei arii.” (The New Interpreter’s Dictionary of the Bible) I te faaearaa “to Iseraela taatoa” i te pee ia Davida no te pee i te “taata faahuehue . . . o Seba te iˈoa,” ua turu noa te mau Kereti e te mau Peleti ia Davida e ua tauturu ratou ia ˈna ia faaore i te orureraa hau a Seba. (Sam. 2, 20:1, 2, 7) I te tahi atu taime, ua tamata Adonia te tamaiti a Davida i te haru i te terono. Area te mau Kereti e te mau Peleti, ua turu noa ïa ia Davida e ua apiti i te faatoroaraahia Solomona ei arii, ta Iehova i maiti no te mono ia Davida.—Arii 1, 1:24-27, 38, 39.

O Itai no Gata te tahi atu e ere i te Iseraela o tei turu roa ia Davida. Ua na reira oia e ta ˈna na 600 faehau i to Abasaloma te tamaiti a Davida orure-hau-raa e eiâraa i te aau o to Iseraela no te pee mai ia ˈna. Ua parau Davida ia ˈna e no te mea e taata ê o ˈna, eiaha o ˈna e na muri ia ratou. Pahono maira râ Itai: “Te horeo nei au i te ora o te Atua ra o Iehova e ia oe, to ˈu fatu te arii, e pee au ia oe i te mau vahi atoa e haere ai oe, no te pohe anei aore ra no te ora.”—Sam. 2, 15:6, 18-21.

Noa ˈtu e ere te mau Kereti, te mau Peleti e to Gata i te Iseraela, e faatura rahi to ratou ia Iehova te Atua mau e ia Davida ta Iehova i faatavai. Papu, ua mauruuru roa Davida i teie mau taata o tei turu noa ia ˈna!