ДАВИДТИҢ шериинде еврейлерден өске дайынчылар база турган. Чижээ, аммон Целек, хет Урия, моав Ифма (1 Чыл. 11:39, 41, 46) a. Оон аңгыда, Давидке филистимчилер-биле төрел деп санаттынар «керет, пелет уктуг» аймактар болгаш гефчилер бараалгап турган (2 Хаан. 15:18; Иез. 25:16). А гефчилер — Филистияда Геф хоорайның чурттакчылары (Иис. 13:2, 3; 1 Хаан. 6:17, 18).

Давид өске язы-сөөктүг шеригни Иеговага база аңаа шынчы боорга ап турган. Чижээ, бир библейжи справочникте керет биле пелет аймактар дугайында мынча дээн: «Олар Давидтиң башкарылгазының эң-не берге үелеринде хаанын шынчы деткип чорааннар» (The New Interpreter’s Dictionary of the Bible). Ол чүү дээни ол? «Бүгү израильчилер Давидти каапкаш» Савей деп үймээнчини эдерип чоруптарга, керет, пелет уктуг улус хаанны кагбайн, тура халыышкынны базарынга дузалаан (2 Хаан. 20:1, 2, 7). А Давидтиң оглу Адония дүжүлгени эжелээр деп оралдашкан. Ынчалза-даа кереттер, пелеттер хаанынга шынчы болгаш, Давидтиң орнунга Иегованың шилип алганы Соломонну дүжүлгеге олуртурунга дузалаан (3 Хаан. 1:24—27, 38, 39).

Гефчи Иттай база Давидке төнчү чок шынчы чораан. Авессаломга каттышкан элээн израильчилер тура халыышкын үндүрерге, ол 600 дайынчылары-биле хаанын деткээн. Өске язы-сөөктүг болгаш, Иттайга хаан дээш дайылдажыры албан эвес турган. Давид ону сагындырарга, ол мынчаар харыылаан: «Дириг... [Иегованың-даа], мээң дээрги хаанымның-даа ады-биле даңгыраглап тур мен: мээң хааным каяа-даа чорда, чалчаңар мен өлүр-даа болзумза, база кады чоруур мен» (2 Хаан. 15:6, 18—21).

Кереттер, пелеттер, гефчилер израиль чонга хамаарышпас-даа болза, Иегова — алыс шын Бурган, а Давидти шилиттинген бараалгакчызы деп хүлээп алганнар. Ол хире идегелдиг улус дээш, Давид өөрүп четтирер турган боор!