¿Anaʼojbal-a?
¿Bin yuʼun ay jyanlumetik ta yolil te soldadoetik yuʼun te David?
TA YOLIL te soldadoetik yuʼun te David ay winiketik te ma jaʼukik israeletik, jich bitʼil te Zélec te ammonita-winik, te Urías te hitita-winik sok te Itmá te moabita-winik (1 Crón. 11:39, 41, 46). a Jaʼnix jich tey ayik-euk-a te «cereteohetic soc te peleteohetic, spisil te geteohetic» (2 Sam. 15:18). Te machʼatik kuxinemik ta Gat jaʼik filisteoetik, sok jich yilel te lek yiloj sbaik sok-euk te cereteohetik sok te peleteohetik (Ezeq. 25:16; Jos. 13:2, 3; 1 Sam. 6:17, 18).
¿Bin yuʼun te David la yakʼ ayinuk jyanlumetik ta yolil te soldadoetik yuʼune? Melel schʼuunoj yoʼtan te jun yoʼtan ya yakʼ sbaik ta stojol soknix ta stojol te Jehová. Jich bitʼil ta stojol te cereteohetik sok te peleteohetik, jun libro te sbiil The New Interpreterʼs Dictionary of the Bible jich ya yal: «Te winiketik-abi jun yoʼtan la yakʼ sbaik ta stojol te David te kʼalal wokol la yaʼiy wentainwanej». ¿Bin-utʼil ya jnaʼtik? Kʼalal «spisil te winiquetic yuʼun Israel» la yijkitayik te ajwalil David yuʼun ya stʼunik te chopol winik te «Seba» sbiil, te cereteohetik sok te peleteohetik la skoltayik te David ta slajinel te kontrainwanej yuʼun te Seba (2 Sam. 20:1, 2, 7). Kʼalal te Adonías la skʼan ya x-och ta ajwalil, te cereteohetik sok te peleteohetik jun yoʼtan la yakʼ sbaik ta stojol te David sok koltaywanik yuʼun jaʼ ya x-och ta ajwalil te Salomón, melel snaʼojik te jaʼ yichʼoj tsael yuʼun te Jehová swenta ya x-och ta ajwalil (1 Rey. 1:24-27, 38, 39).
Yan winik te jaʼ jyanlum te la yakʼ ta ilel te jun yoʼtan ta stojol te David, jaʼ te Ittái te guitita-winik. Te Ittái sok te 600 ta tul soldadoetik yuʼun la skoltayik te David kʼalal te yan snichʼan, te Absalón sbiil, la skontrain te ajwalil sok la sloʼlaybey yoʼtan te ants winiketik yuʼun jaʼ ya skʼan ya x-och ta ajwalil. Te David la yalbey te Ittái te ma snujpʼuk te ya yakʼ guerra ta stojol, pero te Ittái jich la yalbey te ajwalil: «¡Cuxul te Dios, soc cuxul te ajwalil cuʼun! bayuc ya xbaht te ajwalil cuʼun, aunque ta lajel o ta cuxlejal, ha nix hich tey ay a te aʼbat awuʼune» (2 Sam. 15:6, 18-21).
Te Ittái jun yoʼtan la yakʼ sba ta stojol te David, te ajwalil tsabil yuʼun te Jehová.
Manchukme jyanlumetik te winiketik ta Gat, te ceretehoetik sok te peletehoetik, schʼuunoj yoʼtanik-a te jaʼ smelelil Dios te Jehová sok ya yichʼik ta mukʼ te ajwalil David, melel snaʼojik-a te jaʼ tsabil yuʼun te Diose. Jnaʼojtik te la yal bayal wokol te David yuʼun te jun yoʼtan la yakʼ sbaik ta stojol te winiketik-abi.
a Te ley yuʼun te Dios te ya jtatik ta Deuteronomio 23:3-6 ya yal te ma xjuʼ ya x-och ta congregación yuʼun Israel jtuluk ammonita sok moabita. Jaʼniwan ya skʼan ya yal te ma xjuʼ ya yichʼik spisil te derechoetik te ay yuʼun te nación. Pero ya xjuʼ ya sjokinik te lum yuʼun te Dios sok te tey ya xkuxinik-ae. Ta libro Perspicacia para comprender las Escrituras, lea te banti ya yal «Ammonitas» ta patil ilawil te subtítulo «Se casan con israelitas».
