Seto Questo?
Parché ghen’era òmini che no i era mia israeliti nel esèrsito de Davi?
INTRÀ quei che no i era israeliti nel esèrsito de Davi, ghen’era Zaleche, el amonita, Uria, el itita e Itma, el moabita. a (1 Cró. 11:39, 41, 46) Intrà i soldadi de Davi, anca ghen’era ‘i cheretiti, i peletiti e i getei’. (2 Sam. 15:18) I getei i era òmini dela cità de Gate, che la era nela Filistea. (Gios. 13:2, 3; 1 Sam. 6:17, 18.) I cheretiti e i peletiti anca i era de star insieme dei filistei. — Eze. 25:16.
Ma parché che Davi el gavea nel so esèrsito questi òmini che no i era mia israeliti? Davi el se fidea che lori i era leai a lu e a Geovà. Par esémpio, un dissionàrio dela Bìblia el parla sora i cheretiti e i peletiti: “Questi òmini i ga seità leai a Davi anca quando lu el ga infrontà tante dificoltà.” Come che lori i ga mostrà che i era leai? Par esémpio, una volta, un omo de nome Seba el se ga rebelà contra el rè e ‘tuti i òmini de Israel i ga assà Davi par ndar drio a lu’. Invesse, i cheretiti e i peletiti i ga seità leai a Davi e i ga giutà a finir con quela rebelion. (2 Sam. 20:1, 2, 7) Un tempo dopo, un fiol de Davi de nome Adonia el volea lu esser rè. Alora, nantra volta i cheretiti e i peletiti i ze stati leai a Davi e i ga giutà Salomon a esser rè, parché l’era stà Geovà che lo gavea scoliesto. — 1 Rè 1:24-27, 38, 39.
Itai, el geteu l’è stà nantro omo che no l’era israelita e l’è stà leal a Geovà. Una volta Absalon, fiol de Davi, el volea esser rè e lu insieme a tanti israeliti i ze ndati contra so pare. Alora, quando Davi l’è scampà via, Itai e altri 600 òmini i ze ndati insieme a lu. Come Itai no l’era mia israelita, Davi el ga dito che saria meio che Itai no’l restesse dela so banda in quela lota. Ma, Itai el ghe ga dito: ‘Cossita come Geovà el vive e cossita come ti, el rè, te vivi, mi starò ndove te ndarè de star. Sìpia par viver o par morir!’ — 2 Sam. 15:6, 18-21.
Itai l’è stà leal a Davi, el rè che Geovà el gavea scoliesto
Anca se i cheretite, i peletiti e i getei no i fusse mia israeliti, lori i adorea a Geovà come el vero Dio e i se fidea in Davi come el rè che Geovà el gavea scoliesto. Sicuro che Davi el ghe dea tanto valor a questi òmini leai che i era dela so banda!
a De acordo cola Lege de Geovà in Deuteronómio 23:3-6, i amoniti e i moabiti no i podaria mia far parte dela congregassion de Israel. Pol esser che la lege la volea dir che queste persone no le podaria mia gaver diriti compagno i israeliti. Ma, lore le podaria ndar de star intrà el pòpolo de Dio e restar lì se le ndaria obedir ala Lege e adorar a Geovà. Varda anca “Amonitas”, nel Estudo Perspicaz das Escrituras.
