Nyuwo Mwaanisuwela?
Xeeni anakhotto akina a Mwene Davidi yaahaakhanle aya aisarayeli?
ANAKHOTTHO a Davidi yaahaakhanle aisarayeli taala: Seleki a wAmoni, Uriya muHiti ni Itima a oMowabi. a (1 Wah. 11:39, 41, 46) Nave anakhotto awo a Davidi yaahela muhina “akereti, apeleti, ni atthu a oGathi”. (2 Sam. 15:18) Akereti ni apeleti, woonasa wene yaayariwe ni afilisti. (Ezek. 25:16) Atthu a oGathi pooti wiira yaayariwe epooma ya oFilisti masi muttetthe woGathi. — Yoox. 13:2, 3; 1 Sam. 6:17, 18.
Masi exeeni yaamwiirinhe Davidi oweemererya atthu ale wiira ekhale anakhotto awe? Okhala wiira owo aanikupali wiira atthu ale yaari oororomeleya wa yena, masi etthu yootepa okhalana efaita okhala wiira yaari oororomeleya wa Yehova. Mwa ntakiheryo Disionaario mmosa olavulaka sa akereti ni apeleti, ohimmye so: “Awo khiyaahiyale okhala oororomeleya hata okathi wooxankiha wa olamulelo awe”. Masi yaawenrye sai wooniherya ororomeleya waya? Okathi ‘alopwana ootheene a aisarayeli yaahiyale aya omutthara Davidi, anamutthara Xeba’ akereti ni apeleti, yaahihala ni Mwene, enamukhaliherya omala-maliha ohiiwanana waakumiheriwe ni Xeba. (2 Sam. 20:1, 2, 7) Okathi mukina, mwanawe Davidi, Adoniya, aaniphavela okhala mwene omuranttelaka Salomoni. Masi akereti ni apeleti khiyaahiyale okhala oororomeleya wa Davidi ni yaahimukhaliherya Salomoni okhala mwene, maana yaari yoothanla ya Yehova. — 1 Mam. 1:24-27, 38, 39.
Mulopwana mukina ahaakhanle mwisarayeli aari oororomeleya wa Davidi, aari Itayi a oGathi. Itayi vamosa ni alopwana 600 yaamutthara, yaahimukhaliherya mwene Davidi okhathi aarukunuweliwe awe ni mwanawe iitthaniwa Absalomi ni aaphavela wiira atthu a wisarayeli amurukunuwele mwene Davidi. Wanipacerya Davidi aahimuleela Itayi wiira ohiikelihe muhina mwa ekhotto eyo, okhala wiira khahiyo aari mwisarayeli. Masi Itayi aahimwaakhula mwene ohimyaka so: “Ntoko siisaale Yehova onikhala awe, ni ntoko siisaale pwiyaka mwene onikhala awe, khula opuro pwiyaka mwene onrowa awe okhala, hata orowaka okhwa, wala okhala mukumi, ni miyo kinrowa weiwo!” — 2 Sam. 15:6, 18-21.
Itayi khaahiyale omuroromela Davidi, mwene yoowo aathanliwe ni Yehova
Hata akereti, apeleti, ni atthu a oGathi, yaahaakhanle aisarayeli, awo yaanisuwela wiira Yehova Muluku eekeekhai nave Davidi aathanliwe ni Yehova. Moohaanyiherya, Davidi aanixukhurela vanceene mwaha wookhalana alopwana awo oororomeleya ni yaamukhaliherya!
a Moovarihana ni nlamulo naakumiheriwe ni Yehova niri Otumererya 23:3-6, atthu a oMowabi ni a wAmoni, yaanikhoottiheriwa orowa mmulokoni mwa aisarayeli. Vanikhala wiira nlamulo nno, naakhoottiherya maloko awo paahi okhalana ediretu ya okhala mwisarayeli. Ohiya-vo, khinaakhoottiherya waataana ni okhala vamosa ni atthu a Muluku. Nwehe nuulumo noowi: “Amonitas” niri Perspicaz Vol. 1 epaax. 111.
