KAWUWA Daawita olanchchatu giddon Israaˈeela asa gidennaageeti deˈoosona; leemisuwawu Amoonappe yiida Xeleqa, Hiitiya Ooriyonanne Mooˈaabappe yiida Yitima. a (1 Odi. 11:39, 41, 46) Daawita olanchchatun ‘Kariita asati, Peleeta asatinne Gaate asatikka’ deˈoosona. (2 Sam. 15:18, NW) Kariita asatinne Peleeta asati Pilisxxeematuura hashetiyaba milatees. (Hiz. 25:16) Gaate asati Gaate giyo Pilisxxeema kataman deˈiyageeta.—Yaa. 13:2, 3; 1 Sam. 6:17, 18.

Daawiti he asati ba olanchcha gidanaadan paqqadidoy aybissee? Eti awunne ubbaappe aaruwan Yihoowawu ammanettiya asa gidiyogaa I ammanettido gishshataassa. Leemisuwawu, Kariita asatanne Peleeta asata xeelliyagan Geeshsha Maxaafaa qaalaa kochchay hagaadan giis: “Keehi metiya Daawita haaruwa wode eti awu ammanettidi deˈidosona.” Eti ammanettiyogaa waati bessidonaa? “Israa7eela asati ubbai” Kawuwa Daawita aggidi ‘Shebaaˈa giyo issi shori baynna bitaniya’ kaallido wode, Kariita asatinne Peleeta asati Daawitawu ammanettidi deˈidosonanne Shebaaˈi makkaliyogaa agganaadan oottidosona. (2 Sam. 20:1, 2, 7) Hara wode qassi, Kawuwa Daawita naˈay Adoonee kawotaa araatan uttanawu maliis. Shin Kariita asatinne Peleeta asati Daawitawu ammanettidi deˈidosona; qassi eti Yihooway Solomona doorido gishshawu I kaallidi kawotanaadan maaddidosona.—1 Kaw. 1:24-27, 38, 39.

Hara biittaa asa gidida Gaatiya Ittaayikka Daawitawu keehi ammanettiis. Abeseloomi Israaˈeela asay bana kaallanaadan oottanawu malido wode, Ittaayinne 600 A olanchchati Kawuwa Daawita maaddidosona. Ittaayi hara biittaa asa gidiyo gishshawu olawu baana bessennaagaa Daawiti yootiis. Shin Ittaayi hagaadan giis: “GODAI ero! Ta godai kawoi ero! Ta godai kawoi de7iyoosan awan gidinkka, i tau haiqo gidin, paxa gidinkka, taani ne ashkkarai nenaara de7ana.”—2 Sam. 15:6, 18-21.

Kariita asati, Peleeta asatinne Gaate asati hara biitta asa gidikkonne, Yihooway tumu Xoossaa gidiyogaanne Daawiti Yihooway sunttido kawo gidiyogaa eridosona. Daawiti he asati A maaddido gishshawu I Yihoowa wozanappe galatidoogee qoncce!