Maaram Ka Ba?
Kay ano nga an diri Israelita nga kalalakin-an nagin mga sundalo ni Hadi David?
HA KASUNDALOHAN ni David, may kalalakin-an nga diri mga Israelita, pananglitan, hi Zelek nga Ammonita, hi Uria nga Hiteo, ngan hi Itma nga Moabita. a (1 Cron. 11:39, 41, 46) Ha kasundalohan ni David may-ada liwat mga “Kereteo, mga Peleteo, ngan mga Giteo.” (2 Sam. 15:18) An mga Kereteo ngan mga Peleteo baga hin mga paryente han mga Filisteo. (Ezek. 25:16) An mga Giteo nagtikang ha Gat nga syudad han mga Filisteo.—Jos. 13:2, 3; 1 Sam. 6:17, 18.
Kay ano nga ini nga kalalakin-an ginpaapi ni David ha iya kasundalohan? Kay nasarig hiya nga maunungon hira ha iya, ngan labaw ha ngatanan, kan Jehova. Pananglitan, mahitungod ha mga Kereteo ngan mga Peleteo, an The New Interpreter’s Dictionary of the Bible nasiring: “Nagpabilin hira nga maunungon kan David ha pinakamakuri nga mga kahimtang han iya pagmando.” Paonan-o? Han an “ngatanan nga kalalakin-an” han Israel binaya kan Hadi David basi sumunod ha “tawo nga nagpatikang hin samok nga an ngaran amo hi Sheba,” an mga Kereteo ngan mga Peleteo nagin maunungon kan David ngan binulig hira ha pagpaundang han rebelyon ni Sheba. (2 Sam. 20:1, 2, 7) Ha usa pa nga panhitabo, an anak ni Hadi David nga hi Adonias naningkamot pag-agaw han trono. Pero an mga Kereteo ngan mga Peleteo nagin maunungon kan David, ngan binulig nga hi Solomon an magin sunod nga hadi, kay hiya an ginpili ni Jehova.—1 Hadi 1:24-27, 38, 39.
An usa pa nga diri Israelita nga nagin maunungon gud kan David, amo hi Ittai nga Giteo. Hi Ittai ngan an iya 600 nga girriro sinuporta kan Hadi David han an iya anak nga hi Absalom nagrebelde ngan ginkawat an kasingkasing han kalalakin-an han Israel basi kontrahon an hadi. Ginsidngan ni David hi Ittai nga tungod kay diri hiya Israelita, diri niya kinahanglan makig-away para kan David. Pero hi Ittai nagsiring: “Sugad nga buhi hi Jehova ngan sugad nga buhi an akon ginoo nga hadi, hain man an akon ginoo nga hadi, ha kamatayon man o ha kinabuhi, aadto liwat an imo surugoon!”—2 Sam. 15:6, 18-21.
Hi Ittai nagin maunungon kan David, an kan Jehova ginpili nga hadi
Bisan pa kon an mga Kereteo, mga Peleteo, ngan mga Giteo diri mga Israelita, ginkilala nira hi Jehova sugad nga an tinuod nga Dios ngan hi David sugad nga ginpili ni Jehova. Sigurado nga mapasalamaton gud hi David nga may sugad hiya hito nga klase hin maunungon nga kalalakin-an nga nadapig ha iya!
a An balaud han Dios nga nakarekord ha Deuteronomio 23:3-6 nagsiring nga diri ginpapasulod ha kongregasyon han Israel an mga Ammonita ngan Moabita. Pero baga hin ini nga balaud nagpapasabot ha pagin legal nga membro han nasud ngan diri man nga gindidid-an hira ha pakig-upod o pag-ukoy upod ha katawohan han Dios. Kitaa an Kaunawaan sa Kasulatan, Tomo 1, p. 114-115.
