ᲓᲐᲕᲘᲗᲘᲨ ჯარს უცხოტომელეფ ხოლო მსახურენდეს, მაგალთო, ამონელ ცელეკ, ხეთელ ურია დო მოაბელ ითმა a (1 მატ. 11:39, 41, 46). დავითიშ მებრძოლეფ შქას რდესჷ ქერეთელეფ, ფელეთელეფ დო გათელეფ ხოლო (2 სამ. 15:18). მუჭოთ იძირე, ქერეთელეფს დო ფელეთელეფს ფილისტიმელეფწკუმა მანგარ ხოლოშიან კავშირ უღუდეს (ეზეკ. 25:16). გათელეფ ფილისტიმელეფიშ ქალაქ გათშე რდესჷ (იეს. 13:2, 3; 1 სამ. 6:17, 18).

მუშენ ჸუნდჷ დავითის ჯარს უცხოტომელეფ? თინა დარწმუნებულ რდჷ, ნამდა თე ხალხ მუშ ართგურ იჸუაფუდ დო, მუთ არძაშ უმოს მნიშვნელოვან რე, იეჰოვაშ ხოლო. მაგალთო, ქერეთელეფ დო ფელეთელეფიშ გურშენ ართ ბიბლიურ ენციკლოპედიას ჭარჷ: „თინეფს დავითიშ მეფობაშ არძაშ უმოს რთულ პერიოდის ხოლო ვა უღალატებუნა თიშა“ (The New Interpreter’s Dictionary of the Bible). მუჭო გიმირჩქინეს თე უცხოტომელეფქ ართგურობა? მუჟამსით მთელ ისრაელქ ოჭიშ ქურთინუ დავითის დო ბუნტიშდუდ შებას ქეკაჸუნ, ქერეთელეფქ დო ფელეთელეფქ დავითწკუმა ქუდოსქიდეს დო ოხვარუდეს თის (2 სამ. 20:1, 2, 7). შხვა დროს, მუჟამსით დავითიშ ქომოლსქუა ადონია ოცადუდ მეფობაშ ხეშა ეშაჸოთამას, ქერეთელეფქ დო ფელეთელეფქ დავითიშ ართგურქ ქუდოსქიდეს დო მეხვარეს თის, მუშ უკულ სოლომონ ქიგიორინუკო მეფეთ, ნამუთ იეჰოვას აფუდ გიშაგორილ (1 მეფ. 1:24—27, 38, 39).

ხოლო ართ უცხოტომელ, ნამდგაქ დავითიშ ართგურქ დოსქიდ, რდჷ გათელ ითაი. ითაიქ დო მუშ 600 მეომარქ მეხვარეს დავითის, მუჟამსით თიშ ქომოლსქუაქ, აბესალომქ, თიშ წინააღმდეგ იდჷ დო შხვეფ ხოლო გეიჸუნუ. დავითიქ დუდშე მოხვარაშე ვარია უწუ ითაის, მუშენდა უცხოტომელ რდჷ დო ვა რდჷ ვალდებულ იჩხუპუკო. მარა ითაიქ უპასუხ: „ცოცხალ ღორონთ იეჰოვას დო ჩქიმ მეფე-ბატონს იფუფჩუანქ, სოდეთ ჩქიმ მეფე-ბატონ იჸუაფ, მა ხოლო თექ იპჸიქ, გვალო დობღურენ ხოლო“ (2 სამ. 15:6, 18—21).

თიშ უმკუჯინუო, ნამდა ქერეთელეფ, ფელეთელეფ დო გათელეფ უცხოტომელეფ რდესჷ, თინეფს ჯერდეს, ნამდა იეჰოვა რდჷ ჭეშმარიტ ღორონთ დო დავით — თიშე დორნაფილ მეფე. ალბათ დავით მანგარ მარდულ იჸიდ, თეცალ ართგურ ქომოლკათა ალურდუნ!