Asa mba Hainao?
Nan̈ino ma nisy olo tsy israelita tamy tafikin’i Davida Mpanjaka?
AN̈ISAN’NY maramila tsy israelita tamy tafikin’i Davida iry Zaleka Amonita, i Oria Hetita, aviô Jitma Moabita. a (1 Tan. 11:39, 41, 46) Nisy ‘Keretita ndreky Peletita aviô Gatita koa tamy tafikin’i Davida.’ (2 Sam. 15:18) Mety nifandray marikitry tamy Filistiny irô Keretita ndreky Peletita aby io. (Ezek. 25:16) Irô Gatita aby io olo baka ta Gata, tanàna ta Filistiny tan̈y.—Jos. 13:2, 3; 1 Sam. 6:17, 18.
Nan̈ino ma irô olo aby tsy israelita aby io niken’i Davida ho an̈isan’ny tafikinany? Izy natoky fa irô tsy hivadiky amy Jehovah ndreky tsy hivadiky aminany. Ohatra, karaha ty raha nivolan̈in’ny diksionera araiky momba Baiboly momba irô Keretita ndreky Peletita aby io: “Irô tsy nivadiky tamy Davida foeky nata tan̈atin’ny raha faran’ny sarotro tamy fotoan̈a nanjakany.” Karakôry nan̈aboahandrô zen̈y? Irô “lelahy israelita jiaby” koa fa niala Davida, ke nandeha nan̈araka lelahy araiky “mpan̈akorontan̈a, Sheba an̈arany”, irô Keretita ndreky Peletita aby io tsy niala Davida foeky. Irô nan̈ampy Davida nampijanon̈o raha nataon’i Sheba io. (2 Sam. 20:1, 2, 7) Nisy fotoan̈a koa i Adonia zanakan’i Davida Mpanjaka, nila han̈ano ain̈inany ho mpanjaka handimby babany. Fa irô Keretita ndreky Peletita aby io mbala tsy nivadiky tamy Davida fo koa, ke nan̈ano Solomona hanjary mpanjaka handimby Davida. Solomona baka olo nifidin’i Jehovah.—1 Mpanj. 1:24-27, 38, 39.
Itahy Gatita koa an̈isan’olo tsy israelita tsy nivadiky tamy Davida. Itahy ndreky maramilanany 600 nanohan̈a Davida Mpanjaka, tamin’i Absaloma zanakan’ i Davida nangala fanjakan̈an’i Davida sady nan̈ano raha tsy nitiavan’olo i Davida. Nivolan̈in’i Davida i Itahy baka tsy hiady hiarovan̈a Davida, fôtony izy hafa firenena. Fa Itahy nivolan̈a: ‘Jehovah koa mbala velon̈o, aviô izikoa mpanjaka mbala velon̈o, amy zay tany misy mpanjaka tômponaka fo hisy mpanomponao, na hofoaty na ho velon̈o!’—2 Sam. 15:6, 18-21.
Itahy tsy nivadiky tamy Davida, mpanjaka voahosotron’i Jehovah
Irô Keretita, Peletita, ndreky Gatita aby io nata tsy israelita, haindrô fa Jehovah ten̈a Zan̈ahary, aviô Davida io olo voahosotron’i Jehovah. Misora ravoravo Davida nanan̈a maramila tsy nivadiky taminany karaha zen̈y!
a Lalàn̈an’ny Zan̈ahary amy Deoteronomia 23:3-6 mandrova Amonita ndreky Moabita aby io tsy hiditry amy fiangonan̈an’ny Israely. Kanefa, raha mety tian’ny lalàn̈a io koran̈iny, irô tsy nahazo lôso ho an̈isan’ny firenena io, fa tsy hoe irô tsy nahazo nifandray na niara-monin̈y tamin’ny vahoakan’ny Zan̈ahary foeky. Zahava boky Fandalinana ny Soratra Masina, amin’ny “Amonita”: “Nifanambady tamin’ny Israelita.”
