Wubedi buzabilanga?
Bila mbi batu ba zitsi zinkaka beba sadilanga kisalu ki soda kuidi Ntinu Davidi?
MU MAKESA mo maba mu zitsi zinkaka mu nkangu wu masodi ma Davidi, mu ba na Seleki muisi Amoni, Ulia muisi Heti, ayi Yitima muisi Moabi. a (1 Lus. 11:39, 41, 46) Mu nkangu wu masodi ma Davidi mu ba phe na “basi Keleti, basi Peleti ayi basi Ngati.” (2 Sam. 15:18) Khumbu ziwombo batu beba banzilanga ti basi Keleti ayi basi Peleti baba bakhomba ba basi Filistea. (Yeh. 25:16) Basi Ngati bawu badi basi mbanza mosi yi Filistea yo batedidi Ngati.—Yos. 13:2, 3; 1 Sam. 6:17, 18.
Bila mbi Davidi kazola kotisila banzenza mu dingumba di ba masodi mandi? Wuba sikididi ti batu beni baba bakuikama kuidi niandi, nduka nduka kuidi Yehova. Mu kifuani, mu tadila basi Keleti ayi basi Peleti, The New Interpreter’s Dictionary of the Bible yitubidi ti: “Baba bakuikama kuidi Davidi mu zithangu ziozi kaluta bela mu ziphasi mu mbiadulu’andi.” Mu phila mbi? Mu thangu “babakala boso ba Iseli” basundula Davidi mu landakana “ntukisi mosi wu mvualangani nio wuba mu dizina di Seba,” basi Keleti ayi basi Peleti bawu batatamana kuawu ba bakuikama kuidi Davidi ayi bansadisa muingi kanunga kimbeni ki Seba. (2 Sam. 20:1, 2, 7) Mu diluaku dinkaka, muana wu Ntinu Davidi nio wuba mu dizina di Adonia wedi katomba vinza kipfumu ki siandi. Vayi basi Keleti ayi basi Peleti bawu batatamana kaka ba bakuikama kuidi Davidi ayi bansadisa mu bieka Solomo nio wusobulu kuidi Yehova muingi kaba ntinu wumvinginina kipfumu ki siandi.—1 Mtn. 1:24-27, 38, 39.
Mutu wunkaka wu tsi yi kinzenza nio wutatamana ba wukuikama kuidi Davidi, wuba Itai muisi Ngati. Itai ayi 600 ki makesa mandi babuela Ntinu Davidi mioko mu thangu muan’andi nio wuba mu dizina di Abasalomi kayiza tombuka ayi vukumuna babakala ba Iseli babika bue tumukina ntinu. Davidi weketa kamba Itai ti bo kaba nzenza kalendi ko kota mu mvita beni. Vayi Itai wunkamba: “Bukiedika bo Yehova kadi mu luzingu ayi bukiedika bo pfumu’ama kadi mu luzingu, ninga pfumu, voso kuandi wunkuenda, sadi kiaku phe maka landakana, kutu khikinini kuama phe fua va kimosi ayi ngeyo!”—2 Sam. 15:6, 18-21.
Itai wuba wukuikama kuidi Davidi, ntinu wo Yehova kabieka
Buba ti basi Keleti, basi Peleti ayi basi Ngati baba batu ba zitsi zinzenza, bazaba ayi bakikinina ti Yehova niandi Nzambi yikiedika ayi niandi wubieka Davidi. Davidi wuba na phutudulu matondo mu ba va kimosi na batu beni bo baba bakuikama kuidi niandi!
a Nsiku wu Nzambi wo widi mu 5 Mose 23:3-6 wukandika ti basi Amoni ayi basi Moabi babika kota mu kimvuka ki Iseli. Vayi yimonika banga nsiku beni wa wutubila tsienzulu yi dikanda mu ba muisi Iseli ayi wisi kandika ko ti banzenza babika sangana voti vuanda va kimosi ayi dikanda di Nzambi. Tala Étude perspicace des Écritures, Volume 1, pha. 100.
