Ya mo Oni Ini Gipai Re?
Tipagine ayeaye aamangasunge ti ni rogo gu rii-vura nangia ga Bakindo Davide?
DAGBA gu kere abasovura naamangasunge rogo gu riivura nangia nga ga Davide, akumba adu yo wa Sereke boro Amona, Uria boro Eto, na Yitema boro Moaba. a (1 Peka 11:39, 41, 46) Ga Davide rii-vura aima koda kura angbatunga a wa “aKereto, aPereto, na AGata.” (2 Sam. 15:18) Si nawira wa aKereto na aPereto aima du na mbembedi pagume na aFeresto. (Yeze. 25:16) Aboro aGato aenge ti aFeresto rogo gu gbata nangia Gata.—Yos. 13:2, 3; 1 Sam. 6:17, 18.
Tipagine David ambu agi akumba ti ni nangia ayeaye re i du rogo gako rii-vura? Ko aima du na gu kido nga i adu ni ruruyo fuko, na gu paha anyaki gbe nga i adu ni ruruyo fu Yekova. Ni kpiapai, nibipa aKereto na aPereto, gu kura buku sa nasakapai tipa Baibiri naya: “I anye ni ruruyo fu Davide ti kere kpakarakpakara regbo ti regbo gako zogarago.” Waigu gipai re adu? Ho “akumba aYisaraere dunduko” ambu pekafuo Bakindo Davide ni ka pekafuo gu “gbegberẽ sino kumba nangia Siba,” aKereto na aPereto anye ni ruruyo fu Davide na kini undo ko i dibe gu samungu nangia ga Siba. (2 Sam. 20:1, 2, 7) Ti gu kura regbo, wiri Bakindo Davide nangia Adonanya ataburo tipa ka dia mbata kindo ngbaome. Ono tie, aKereto na aPereto anye ni ruruyo fu Davide na ki undo ka maa Soromo ni Bakindo nangia gu boro Yekova asia ni ni diba bakindo Davide.—1 Aba. 1:24-27, 38, 39.
Gu kura yeaye berewe na nye ni ruruko koyo du Davide ni angia Itai boro Gata. Itai na gako kere abasovura 600 aundo Bakindo Davide ti gu regbo wiriko nangia Abisaroma asamungu na ki sa kpoto agu akumba yo nangia ga Yisaraere yo i zingi kuti Bakindo. Ti tonatonaha, Davide aima fu gu berãpai fu Itai nga wangia ko yeaye, gu vura re gako ngaha te. Ono Itai aya: “A wa du Yekova ni ungako, a wa du bakindo ni ungako nga gi gbia, nirengo kina gu ba gi gbia nga bakindo ka du ni, watadu kpio na unga, ga moyambu adú kina ho a.”—2 Sam. 15:6, 18-21.
Itai adu ni ruruko fu Davide, ga Yekova mbembedi bakindo
Wa si avura du nga aKereto na aPereto angia ayeaye, i aima ida kuti Yekova ni ndikidi Mbori na kuti Davide ni ga Yekova mbembedi boro. Nairiwo wai Davide adu na tambuahe tipa kadu na ngbatunga ruru akumba wa gure ku bara ko yo!
a Ga Mbori ndiko du ni kekehe rogo Pa Fu Rugute ni Ue he 23:3-6 aima zahe ti rimo aAmono gbiati aMoabo ku rogo gu dungurati nga ga aYisaraere. Ono tie, si nangera wa gu ndiko re aabi pa da ni Yisaraere kuti ndiko angianga ka zahe ti ayeaye koditiyo watadu ka sungo dagba Yisaraere ya. Mo bi Insight on the Scriptures, Volume 1, kpe. 95.
