EKICWEKA C’OKWEGA 21
ECESHONGORO CA 107 Rukundo nk’Eya Ruhanga
Oku ori kubasa kubona ow’okutasana na we
‘Omukazi w’omutima, ni oha owakumubona? Ahakuba nakira amabare g’obuguzi bwingi.’—EMI 31:10.
ENTEGO
Omuri eki kicweka, twaza kureba emisinge eri kubasa kukwasa omuntu kubona owu babuganisize kugira ngu bije kutasana, n’oku abandi omu kibina bari kubasa kushagika abacari bonka abari kwenda kwija kutaha omu maka.
1-2. (a) Ni enki eki Omukristo ocari wenka ari kuba ashemerire kubanza kushwijuma mbere y’okutandika kusigurana? (b) “Okusigurana” nibimanyisa ki? (Reba “ekigambo ekishoborwirwe.”)
MBEHI noyenda kutaha omu maka? N’obu okutasana atari byo ebiri kureta okushemererwa, abingi omu Bakristo abacari bonka, bakuba bacari bato ninga bakuzire, nibaba bategerize n’ekihika owu barije kutasana. Ni amazima, mbere y’okutandika kusigurana n’omuntu noba oshememerire kwetegura omu bikwatirine n’esente, eby’omwika, n’omu by’enyehurira. a (1 Kor 7:36) Eco wakikora, nibyija kutuma wagira eki wahikaho omu ka yawe.
2 Konka, ti ko burijo kiri kuba corobi kubona omuntu owu mubuganisize. (Emi 31:10) Kandi n’omu bwire obu wamara kubona owu muri kubasa kukizaho kumanyana, nikiba kitorobi kutandika okusigurana. b Omuri eki kicweka, twaza kushwijuma ekiri kubasa kukwasa Abakristo abacari bonka kubona owu babuganisize kandi bakatandika kusigurana. Nambwenu nitwija kureba oku abandi omu kibina bari kubasa kushagika abari kwenda kutasana.
OKURONDESA OWU MUBUGANISIZE
3. Ni biha bintu ebi Omukristo ocari wenka ashemerire kufaho yaba ari kurondesa owu barije kutasana?
3 Yaba ori kwenda kutaha omu maka, ni kirungi munonga kubanza wayetegereza omuntu mutakatandikire kusigurana. Eco wacehuza, nobasa kutandika kusigurana n’omuntu owu otari kwenda, ninga osigurana n’omuntu owu mutabuganisize. Ni amazima, omuntu murungi w’okusigurana na we ashemererire kuba ari Omukristo owabatizibwe. (1 Kor 7:39) Konka namwenu, ti ko omuntu wena owabatizibwe ari kubasa kukubera omushija ninga omukazi murungi. Obwe rero, nobasa kwebuza ngu: ‘Ni ziha ntego ezi nyine omu kubaho kwange? Ni eha mitwarize mikuru eyi ndi kwetenga aha muntu owu turije kutasana? Mbehi nimwetengaho ebintu ebirengeserize?’
4. Ni biha bintu ebi bamwe bari kuta omushara zabo?
4 Hatariho okubanganisa, oshemerire kushaba ori kugamba ku ori kwenda ow’okutasana na we kandi ogamba ebi ori kumwetengaho byona. (Fil 4:6) Ni amazima, Yehova tari kukuraganisa ku arije kukuha owu murije kutasana. Konka nabasa kufa ahabi ori kwetenga kandi akukwasa kuronda owu muri kubasa kutasana. Obwe rero, oshemerire kugumizamu kumugambira ebyetengo byawe n’enyehurira zawe. (Zab 62:8) Guma omushabe kugira akukwase kwehangana kandi akuhe obwenge. (Yak 1:5) Mwenetata ocari wenka w’omuri Amerika ori kwetwa John c, akashoborora ebi ari kugamba omu shara zeye ari kugira ati: “Ningambira Yehova emitwarize eyi ndi kwetenga aha wu turije kutasana. Nimushaba kugira ngu ampe oburyo bw’okubugana n’owu turije kutasana. Nambwenu ninshaba Yehova kugira ngu ankwase kugira emitwarize erije kutuma naba omushija murungi.” Omunyanyazi w’omuri Sri Lanka ori kwetwa Tanya, akagamba ati: “Naba ndi kwetegereza owu tubuganisize, ninshaba Yehova kugira ngu ankwase kuguma ndi omwesigwa, ndi kufa aha birungi kandi nyine okushemererwa.” Kandi n’obu wakuba otabwine owu mubuganisize omu bwire obu ori kwenda, Yehova nakuraganisa ku arigumizamu kukufaho omu by’omubiri n’omu by’enyehurira.—Zab 55:22.
5. Ni ryari obu Abakristo abacari bonka bari kubasa kutunga oburyo bw’okubugana n’abandi abari kukunda Yehova? (1 Abakorinto 15:58) (Nambwenu reba ekishushani.)
5 Bibuli netuhiga kutura ‘twine byingi by’okukora omu murimo gwa Mukama.’ (Shoma omu 1 Bakorinto 15:58.) Wagumizamu kuhugira omu murimo gwa Yehova kandi okamarana obwire na benetata na banyanyazi, nikija kutuma watunga abanywani bingi kandi kije kutuma wabugana n’abandi abacari bonka abari kuta omutima aha kukorera Yehova. Kandi waguma kukora cona eki ori kubasa kugira ngu ohe Yehova ebirungi kukira ebindi, nibyija kutuma watunga okushemererwa okwa buzima.
Waguma ohugire omu murimo gwa Yehova kandi ori kwekwatanisa n’abandi Bakristo bagenzi bawe abatari kushushana, noyija kubona owu muri kubasa kutasana (Reba paragurafu ya 5)
6. Abakristo abacari bonka baba bari kuronda abu barije kutasana na bo, ni enki eki bashemerire kwijuka?
6 Konka, guma oyetonde kugira ngu otata okurondesa owu murije kutasana omu mwanya g’okubanza. (Fil 1:10) Okushemererwa okwa buzima tikuri kuruga omu kutaha omu maka, ahobwe nikuruga omu kugira obunywani burungi na Yehova. (Mat 5:3) Kandi waba ocari wenka, noba oyine oburyo burungi bw’okukora byingi omu murimo g’okuburira. (1 Kor 7:32, 33) Guma okorese ge obwo bwire. Omunyanyazi ori kwetwa Jessica, otwire omuri Amerika owatahire omu maka arengize emyaka 30 akagamba ati: “Nkaguma mpugire omu murimo gwa Yehova kandi bikankwasa kumarwa, n’obu nabire ntegerize owu turije kutasana.”
GUMA OKWATE OBWIRE BW’OKWETEGEREZA
7. Ahabw’enki kiri ec’obwenge kwetegereza owu mubuganisize mbere y’okumugambira ku ori kumukunda? (Emigani 13:16)
7 Ni enki eki ori kubasa kukora wareba hariho omuntu owu muri kubasa kutasana? Mbehi oshemerire kuhika ori kumwereka ku ori kumukunda? Bibuli negamba ku omunyabwenge ari kwetonda mbere y’okugira eki yakora. (Shoma omu Migani 13:16.) Obwe rero, kikaba kiri ec’obwenge obandize wakwata obwire bw’okwetegereza ogo muntu otakamwerekire ku ori kumukunda. Aschwin w’omuri Nezalandi akagamba ati: “Enyehurira nizibasa kweyongera juba juba konka nambwenu nizibasa kicendera juba. Obwe rero nobasa kukwata obwire bw’okwetegereza omuntu, oyerinda kuhika ori kumusigura ogendire aha nyehurira eziri kumara obwire buce.” Ekiri kukiraho, ku ori kwetegereza omuntu nibibasa kutuma wamanya ku mutari kubuganisa.
8. Ni bata oku ocari wenka ari kubasa kwetegereza owu bari kubasa kubuganisa? (Nambwenu reba ekishushani.)
8 Mbwenu shi ni bata oku ori kubasa kwetegereza omuntu konka okakikora omu bwenge? Omu nterane zitu, n’omu zindi mbaga eziri kutubuganisa, nobasa kuhamanyira yaba ogo muntu ari ow’omwika, omanya emitwarize yeye n’ebiri kumushemeza. Ni baha banywani beye kandi shi ni enki eki ari kukira kugambaho? (Luk 6:45) Mbehi entego zeye nizibugana n’ezawe? Nobasa kugira eki wabuza abazehe b’ekibina ninga abandi Bakristo abakuzire omu by’omwika abari kumanya ge ogo muntu. (Emi 20:18) Nobasa kubabuza oku ari kugambwa n’emitwarize yeye. (Rus 2:11) Waba ori kwetegereza ogo muntu, guma oyerinda kutuma yayehurira kubi. Guma ohe ekitinisa enyehurira zeye n’amabanga geye, kandi oyerinde kwenda kumumanyaho buri kantu kona.
Mbere y’okwereka omuntu ku n’omukunda, ni ec’obwenge kukwata obwire bw’okumwetegereza (Reba paragurafu ya 7-8)
9. Mbere y’okubugana n’owu muri kubuganisa, ni enki eki oshemerire kumanya?
9 Mbwenu shi nobasa kumara obwire oburi kwingana ki ori kwetegereza ogo muntu konka otakamwerekire ku ori kumukunda? Wahika ori kukunda ogo muntu, abantu nibabasa kutecereza ku wahubuka. (Emi 29:20) Konka nambwenu, wakwata obwire buringwa nibabasa kureba ku ori kweziringa kukora ensharamu, namunonga ogo muntu yaba yarebire ku ori kumukunda. (Mub 11:4) Guma oyijuke ku mbere y’okusigurana n’omuntu ori kuba oshemerire kwerinda kwetamu ku ni we owu murije kutasana. Konka oshemerire kuba ori kwesiga otari kubanganisa ku oyetegwire kutaha omu maka, kandi oreba yaba ogo muntu mubuganisize.
10. Ni enki eki oshemerire kukora wamanya ku hine omuntu ori kukukunda konka iwe otari kumukunda?
10 Konka shi okakora ki wamanya ku hine omuntu ori kukunda? Yaba otari kwenda ngu osigurane na we noba oshemerire kuhika ori kubyereka omu bikorwa. Kikaba kitari ec’obwenge kutuma ogo muntu yatecereza ku murije kugirana obunywani kandi kitarije kubasika.—1 Kor 10:24; Efe 4:25.
11. Ni enki eki oshemerire kutecerezaho oyetonzire waba ori kwenda kubuganisa abantu ngu batandike kusigurana?
11 Omu tucweka tumwe na tumwe, abazire ninga abandi bantu abakuzire nibabasa kurondera abacari bonka abantu b’okwija kutasana na bo. Omu tundi tucweka, abanyabuzare ninga abanywani nibarondera abacari bonka abu bari kutecereza ku bari kubasa kutasana na bo, rero babuganisa kugira ngu barebe yaba bari kubasa kutasana. Yaba omuntu yakushaba kumurondera owu bari kubasa kutasana, guma ofe aha bi bona bari kwetenga. Waba ori kumurondera owu bari kubasa kutasana, guma orebe emitwarize yeye kandi ekiri kukira byona orebe yaba akuzire omu by’omwika. Okugira obunywani burungi na Yehova nibikira okugira esente nyingi, okwega amashomero mingi, ninga shi ebindi bintu. Konka guma oyikuke ku ogo musigazi n’omuhara ari bo abashemerire kwekorera ensharamu y’aha muheru y’okutasana.—Gal 6:5.
OKUTANDIKA OKUSIGURANA
12. Ni bata oku ori kubasa kugambira omuntu ku ori kwenda ngu mutandike kusigurana?
12 Mbehi wareba ori kubasa kutandika kusigurana n’omuntu, ni bata oku ori kubasa kubimugambira? d Nobasa kutaho entebekanisa y’okuganira n’ogo muntu, muri ahantu ahariho abantu, ninga mubikora aha simu. Mushobororere otari kushereka oku ori kwehurira. (1 Kor 14:9) Ohe ogo muntu obwire bw’okubitecerezaho, mbere y’okukugarukamu. (Emi 15:28) Kandi ogo muntu yaba atari kwenda ngu mugumizemu kumanyana, ohe ekitinisa ensharamu yeye.
13. Ni enki eki ori kubasa kukora omuntu yakwereka ku ari kukukunda? (Abakolosayi 4:6)
13 Mbwenu shi okakora ki, omuntu akugambire ku ari kwenda ngu mukizeho kumanyana? Ogume oyijuke ku ogo muntu biri kuba bimushabire obumanzi kukugambira oku ari kwehurira, obwe rero noba oshemerire kumugarukamu omu muringo murungi kandi omuha ekitinisa. (Shoma omu Bakolosayi 4:6.) Waba ori kwetenga obwire bw’okubitecerezaho mbere y’okumugarukamu, bimugambire. Konka, gezaho kumugarukamu juba oku biri kubasika. (Emi 13:12) Yaba ori kureba mutari kubasa kusigurana, bimugambire omu muringo murungi kandi otari kuraba aha rubaju. Reba oku mwenetata ori kwetwa Hans w’omuri Ositiriya, yagarukiremu omunyanyazi owamugambire ku ari kumukunda. Akagamba ati: “Nkamushobororera ensharamu yange omu bwenge, konka nambwenu ntari kuraba aha rubaju. Nkakikora baso kugira ngu atatecereza ku nabire ndi kumubeha. Eyo ni na yo nshonga eyi nabire ndi kwetonda omu ku nabire ndi kumutwariza bwanyima yaho.” Konka nambwenu wayikiriza kukundana n’ogo muntu, mugambire enyehurira zawe kandi muganire ahari oko kusigurana. Ebi abantu bari kuba bari kwetenga aha muntu, nibibasa kutana aha bw’omucwe ninga shi ebindi bintu.
NI BATA OKU ABANDI OMU KIBINA BARI KUBASA KUSHAGIKA ABAKRISTO ABACARI BONKA?
14. Ni bata oku turi kubasa kushagika Abakristo abacari bonka omu bi turi kugamba?
14 Ni bata oku twena turi kubasa kushagika Abakristo abacari bonka, abari kwenda kuza omu maka? Oburyo obumwe obu turi kubasa kukikoramu, ni okwerinda omu bi turi kugamba. (Efe 4:29) Nitubasa kwebuza ngu: ‘Mbehi nimbagambira ebigambo ebiri kubasa kubashasha? Mbehi nareba mwenetata na munyanyazi abacari bonka bari kuganira, nimpika ndi kutecereza ku bari kwenda kutasana?’ (1 Tim 5:13) Nambwenu titushemerire kukora ekintu cona, ekiri kubasa kutuma Abakristo abacari bonka batecereza ku hine ekintu eki babuzirwe ahabw’okuba batari omu maka. Hans owu tugambireho, akagamba ati: “Bamwe omuri benetata na banyanyazi, nibakira kubuza abacari bonka ngu ‘Mbehi ahabw’enki otari kwenda kutaha omu maka? Manya okakura, tihihine ekindi eki otegerize.’ Konka ebigambo nk’ebyo, nibituma bayehurira kubi kandi bibagemesereza kwenda kuza omu maka.” Obwe rero, ni kirungi kurondesa oburyo bw’okusima Abakristo abacari bonka!—1 Tes 5:11.
15. (a) Tukuratize omusinge oguri omu Baroma 15:2, ni enki eki tushemerire kutecerezaho twetonzire mbere y’okukwasa omuntu kuronda owu barije kutasana? (Nambwenu reba ekishushani.) (b) Ni gaha mashomo g’omugasho agu wayegera omuri vidiyo?
15 Mbwenu shi tukakora ki twaba turi kureba mwenetata na munyanyazi bari kubasa kukora eka ndungi? Bibuli netugambira ku tushemerire kufa aha nyehurira z’abandi. (Shoma omu Baroma 15:2.) Abacari bonka bingi nibaba batari kwenda ngu tubarondere owu barije kutasana kandi tushemerire kuha ekitinisa enyehurira zabo. (2 Tes 3:11) Abandi bo nibaba bari kwetenga obuyambi konka titushemerire kububaha batabutushabire. e (Emi 3:27) Abacari bonka abamwe nibaba batari kwenda ngu hagire owababuganisa n’owu bari kubasa kutasana omu misho g’abantu bingi. Omunyanyazi ori kwetwa Lydia, w’omuri Jamani akagamba ati: “Nobasa kubuganisa mwenetata na munyanyazi n’obu hakuba hari omu mutwe gw’abantu bingi. Eki ori kuba oshemerire kukora ni okubabuganisa, rero ebindi okabibarecera.”
Twabuganira hamwe turi bingi nikituma abacari bonka batunga oburyo bw’okumanyana (Reba paragurafu ya 15)
16. Ni enki eki Abakristo abacari bonka bashemerire kwijuka?
16 Twena abacari bonka, n’abatahire omu maka, nitubasa kubaho tushemerirwe kandi tumazirwe! (Zab 128:1) Obwe rero yaba ori kwenda ow’okutasana na we konka otakamubwine, gumizamu kuta omutima aha kukorera Yehova. Omunyanyazi w’omuri Macao ori kwetwa Sin Yi akagamba ati: “Watecereza aha bwire obu orije kumara n’owu mwatasine omuri paradiso, noshanga obwire obu ori kumara ori wenka, ari buce munonga. Obwe rero, guma oburebe nk’obw’omuhendo kandi obukorese ge.” Konka shi okakora ki yaba wabwine owu mubuganisize kandi mwatandikire kusigurana? Omu kicweka ekiri kukurataho, nitwija kureba eki ori kubasa kukora kugira ngu ogire eki wahikaho omu kusigurana kwawe.
ECESHONGORO CA 137 Abakazi Abeesigwa, Banyaanyazi-itwe Abakristaayo
a Kugira ngu orebe yaba oyetegwire kutaha omu maka reba ekicweka c’ahari jw.org ekine omutwe oguri kugira ngu: Okusigurana—Ekicweka ca 1: Mbehi nyetegwire kutaha omu maka?”
b EKIGAMBO EKISHOBORWIRWE: Omuri eki kicweka n’ekiri kurataho, ekigambo “okusigurana” nikimanyisa obwire obu omwojo n’omuhara bari kumanyana ge kugira ngu barebe yaba bari kubasa kutasana. Omu mahanga agamwe nikimanyisa okugezaho okumanya omuntu. Okusigurana nibitandika omwojo n’omuhara bagambirana ku bari kukundana kandi bigumizamu okuhisa obu bari kugambirana yaba bari kubasa kutasana ninga shi bakabyemereza.
c Amazina agamwe gakahindurwa.
d Omu micwe emwe, mwenetata ni we ori kubuza omunyanyazi yaba bari kubasa kutandika kusigurana. Konka omunyanyazi na we nabasa kubuza mwenetata kandi nikiba kitine nshonga. (Rus 3:1-13) Kugira ngu omanye ebiri kukiraho, reba ekicweka ekiri kugamba ngu: “Ebibuzo by’eminyeto . . . Ni bata oku ndi kubasa kumugambira oku ndi kwehurira?” omuri g04-E 10/22.
