MWAZI G’OKUYIGA 21
OLWIMPO 107 Rhuyiganye Obuzigire bwa Mungu
Gurhe Wakajira y’Opata Eyi Washabana Naye?
“Inde wakapata omukazi mwinja? Akachiro kage kalushire ak’amarijani.”—MEZ. 31:10.
EBIRHWAYIGA
Rhwaganira oku makanuni me Biblia makarhabala Omukristu apate omuntu mwinja ashabana naye, na gurhe abandi omu chibaga makarhabala abachili balamba bali balonza kushaba changwa kushabwa.
1-2. a) Bichi Abakristu bachili balamba bakwanene kurhanga kuwazako bwinja embere bahwanzise obwira? b) “Okushambaza” k’okuderha gurhe? (Olole “Amafasiriyo m’Ebinwa.”)
OLONZEZE kushaba changwa kushabwa si? Chiro akaba okushaba changwa okushabwa arhali k’okukwanene kulerhe obusime, Bakristu banene bachili balamba babe basole changwa bakala bakulire, banalingiriza okunyorha okubona eyi bashabana naye. Kweri, embere y’okuhwanzisa obwira, okwanene kuba ey’ogwerhe obwira bukomere haguma na Yehova, okala ochimenyere bwinja-bwinja, onabe ochiyeneze omu kuntu ogale kushishikala byoshi mukenere omu bunyumpa. a (1 Ko. 7:36) Akaba ntyo ku bili, ahola byakashobokana ogwarhe obunyumpa buli m’obusime.
2 Aliko, buli mango birhaba biyorohere okupata omuntu mwinja wakashabana naye. (Mez. 31:10) Chiro n’amango wamabuganana n’omuntu wakasimire omenyane naye bwinja, birhaba biyorohere okuhwanza kushambaza. b Mu gunola mwazi, rhwaganira oku byakarhabala Abakristu bachili balamba bapate muntu mulebe mwinja bakashabana naye, naho banarhondera kushambazana. Kandi rhwayiga gurhe abandi omu chibaga bakarhabala omuntu oli walonza kushaba changwa kushabwa.
BICHI BYAKAKURHABALA OPATE OMUNTU MWINJA WASHABANA NAYE?
3. Bichi Omukristu w’omulamba akwanene kurhanga kuwazako amango ali alonza ey’ashabana naye?
3 Akaba oli walonza kushaba changwa kushabwa, kuli kwinja orhange omenye ngeso zihe oli walonza k’oyola muntu embere muhwanze kushambazana. Akaba arhali ntyo, wakasuzagura muntu mulebe wakakubera mukazi changwa mulume mwinja, changwa wakarhondera kushambaza muntu mulebe orhakukwanene. Kweri omuntu wakaba mukazi mwinja changwa mulume mwinja, akwanene kuba Mukristu obatizwe. (1 Ko. 7:39) Aliko, arhali buli muntu obatizwe yiwakakubera mukazi changwa mulume mwinja. Bobola, okwanene kuchibanza ntya: ‘Mihigo ehe njira omu kalamo? Ngeso zihe ndonzeze eyi nashabana naye akwanene agwarhe? Ka ngwerhe olugero oku bilolere engeso nakasima agwarhe?’
4. Bichi bantu baguma bahebere omu masala mabo?
4 Akaba olonzeze kushaba changwa kushabwa, okwanene kuba eyi wasalirire oku bilolere echola. (Flp. 4:6) Kweri, ntaye Yehova alaganyize oku nj’aha eyashabana naye. Aliko analaga oku by’okenere n’okukuntu oli wachiyunva, kandi akurhabala amango oli wachihangana kulonza eyi washabana naye. Bobola, ogenderere kumubwira enyifinjo zawe n’okuntu oli wachiyunva. (Zb. 62:8) Osalire akuhereze engeso y’okulembera n’obwengehe. (Yak. 1:5) Mwene-werhu John, c ochili mulamba w’omu Etats-Unis, afasiriye bichi anaderha omu masala mage: “Inambwira Yehova engeso ndonzeze eyi njinashabana naye nj’agwarhage. Inamuhema ngwarhe orozo l’okubuganana n’eyi nakasima abe mukani. Kandi nampema Yehova antabale inkuze engeso zakantabala yi nji mba mulume mwinja.” Mwali-werhu Tanya, w’omu chihugo che Sri Lanka, aderhere ntya: “Okunandi nalonza eyi nashabana naye, inansalira Yehova antabale nyorhe mwimana eyi nangwerhe obusime.” Chiro byakakuhema ok’olindire bwenene kulusha oku waliwazize y’opata eyi washabana naye, Yehova akulaganyize okw’agenderera kukushishikala, okukuyereka obuzigire, n’okugenderera kukulagako.—Zb. 55:22.
5. Abakristu bachili balamba banapata rozo luhe l’okubuganana n’ababo balamba bazigire Yehova? (1 Wakorinto 15:58) (Olole n’efoto.)
5 Ebiblia erhuhebere omurhima rhugwarhe “binene by’okukola omu kasi ka Waliha.” (Osome 1 Wakorinto 15:58.) Amango ogwerhe binene by’okukola omu kasi ka Yehova, n’okugeza ebisanzi na bene-berhu na bali-berhu ba buli lubero, orhasimira konyine kugeza ebisanzi bihebere omurhima haguma nabo, s’aliko kandi wapata orozo l’okubuganana n’abenyu balamba basezeze obwenge bwabo oku kasi ka Yehova kuguma nawe. Kandi, ok’onali wajira okwawe koshi y’osimisa Yehova wagwarha obusime b’okuli.
Amango oli wakola binene omu kasi ka Yehova n’okugeza akasanzi n’abenyu Bakristu ba buli lubero, wakabuganana na balala balonzeze kushaba changwa kushabwa (Olole echifungo cha 5)
6. Bichi Omukristu ochili mulamba akwanene kuyibuka amango ali alonza eyashabana naye?
6 Aliko, ochilange, okulonza eyiwashabana naye chirhabaga che chintu ch’akamaro bwenene omu kalamo kawe. (Flp. 1:10) Obusime b’okuli burharhengene n’okuba mulamba changwa kuba muntu oshabire, s’aliko buyumangire oku bwira bwawe bukomere haguma na Yehova. (Mt. 5:3) N’amango ochili mulamba, ogwerhe orozo l’okukola binene omu kasi ka Yehova. (1 Ko. 7:32, 33) Okolese bwinja loshi akola kasanzi. Mwali-werhu Jessica, w’omu Etats-Unis washabwaga ey’agwerhe hofi mwaka 40, aderhere ntya: “Naligwerhe binene by’okukola omu kasi k’amahubiri, n’echola chantabala ngwarhe busime bunene chiro akaba oku naliri nalindira kushabwa.”
ORHOLE AKASANZI K’OKULOLEREZA EY’OLONZEZE KUSHABANA NAYE
7. Bulagurhe kuli kwinja orhange ololereze mu kasanzi kalebe ey’olonzeze kushabana naye embere omubwire ok’omuzigire? (Mezali 13:16)
7 Gurhe akaba owazize oku muntu mulebe akaba mulume changwa mukazi mwinja? Okwanene kumubwira aho han’aho ok’omuzigire si? Ebiblia ederhere ok’omuntu mwengehe anagwarha obumenyi embere ajire chintu chilebe. (Osome Mezali 13:16.) Bobola, bikuhemere omulolereze mu kasanzi kalebe buzira yewe kumenya embere omubwire ok’omuzigire. Mwene-werhu Aschwin w’omu Pays-Bas aderhere ntya: “Wakachiyunva juba-juba ozigire muntu mulebe, aliko wakashuba kuchiyunva aho han’aho ok’orhachimuzigire. Bobola, amango wamarhanga kurhola akasanzi k’okulolereza muntu mulebe, orhahwanza kukola obwira naye juba juba bulala wachiyunvirhe ok’omusimire.” Aliko, ok’onali walolereza muntu mulebe, hali amango wakarhegera oku murhakayunvikana naye.
8. Nka gurhe omulamba akarhanga kulolereza omuntu ashondere kushabana naye? (Olole n’efoto.)
8 Nka gurhe wakarhondera kulolereza muntu mulebe buzira yewe kumenya? Amango m’embuganano z’echibaga changwa muli mwachisimisa omu chigusho ch’abantu, wakarhegera bintu bilebe oku bilolere ehali yage y’ekiroho, oborhere bwage, n’olugenzi lwage. Bande baba bera bage, na bichi anazigana kuganirako? (Lu. 6:45) Emihigo yage epatene n’eyawe si? Wakashambala n’abashamuka b’echibaga chage changwa n’abandi Bakristu bakulire ekiroho bamumenyere bwinja. (Mez. 20:18) Wakababaza oku bilolere engeso z’oyola muntu n’olugenzi lwage. (Rut. 2:11) Amango oli walolereza oyola muntu, ojire okwawe koshi y’orharhuma achiyunva kubi changwa kumugayisa. Y’ogala kujira ntyo bikuhemere okenge okuntu y’achiyunva, orhaberaga haguma naye kasanzi kanene changwa kulonza kumenya buli kantu koshi-koshi oku bimulolere.
Embere obwire muntu mulebe ok’omusimire, bikuhemere orhange orhole kasanzi kalebe omu kumulolereza buzira yewe kumenya (Olole echifungo cha 7-8)
9. Embere obwire ey’olonzeze kushabana naye ok’omuzigire, bichi okwanene kurhanga kuchizera?
9 Bisanzi bingana gurhe okwanene kulolereza oyola muntu embere omubwire ok’omuzigire? Nk’obwirire omuntu juba-juba ok’omuzigire nkabaga akawaza ok’orhawaza bwinja embere orhole esimikiro. (Mez. 29:20) Aliko kandi, amango omuntu amamenya ok’osimisizwe naye, hakashuba kugera kasanzi kanene buzira kumubwira, akawaza ok’onagangana bwenene embere orhole esimikiro. (Muh. 11:4) Oyibuke okw’embere obwire muntu mulebe ok’omuzigire, birhakuhemere ok’ochizere ahohan’aho oku nji mwashabana naye. Aliko, okwanene kuchizera ok’oli tayari kushaba n’ok’oyola muntu y’owazize oku y’okwanene kushabana naye.
10. Gurhe okwanene kujira amango wamabona oku muntu mulebe asimisizwe nawe, aliko eyi woyo orhamusimire?
10 Aliko si, gurhe wakajira nka wamarhegera oku muntu mulebe asimisizwe nawe? Akaba ochiyunvirhe ok’orhasimisizwe naye, ochihangane kuyerekana ntyo bwinja-bwinja kugerera ebijiro byawe. Kurhali kwinja okurhuma omuntu awaza oku nkabaga nji mwakakola naye obwira nobo arhali ntyo ku bili.—1 Ko. 10:24; Efe. 4:25.
11. Nka byamahema oku walonzeza muntu mulebe ey’ashabana naye, bichi okwanene kuwazako bwenene?
11 Mu bihugo biguma, abazere changwa abandi bantu bakulu nkabaga bakawaza oku babakwanene kuchishogera abalamba b’omu milala yabo ababashabana nabo. Omu bindi bihugo, omuntu w’omu mulala changwa abera babanalonzeza omulamba ey’ashabana naye naho banajira okwabo koshi y’oyola musole n’omunyere babuganana na buzinda banaja balola akaba bakahwanzisa obwira. Nka muntu mulebe akuhemere omulonzeze ey’ashabana naye, bikuhemere owaze oku by’abola bombi banasima n’ebi baba bakenere. Akaba owazize oku muntu mulebe akaba mukazi mwinja changwa mulume mwinja ku mwira wawe changwa ku muntu mulebe w’omulala gwawe, ochihangane kumenya bwinja oyola muntu, omenye engeso zage, n’ech’akamaro bwenene omenye akaba agwerhe obwira bukomere haguma na Yehova. Obwira bukomere bwenene haguma na Yehova bo bw’akamaro bwenene kulusha efuranga, amasomo, changwa okurhengerera omu mulala gumenyikene bwenene. Aliko oyibuke oku mwene-werhu na mwali-werhu bachili balamba bonyine babagwerhe esimikiro y’obuzinda y’okushabana changwa nanga.—Gal. 6:5.
GURHE WAKAHWANZISA OBWIRA?
12. Gurhe wakabwira muntu mulebe ok’oshondere mumenyane naye?
12 Akaba olonzeze kuhwanzisa obwira na muntu mulebe, gurhe wakamubwira ok’osimisizwe naye? d Wakarhola emipango y’okuntu mwakaganira haguma, mwakakolera eyola nganiro ahantu hanazigana kubonekana bantu banene changwa kugerera etelefone. Omubwire bwinja-bwinja ok’omuzigire n’okuwakasima omumenye bwinja-bwinja. (1 Ko. 14:9) Akaba bihemereko, olekere oyola muntu akasanzi k’okuwaza y’amenya gurhe akushubiza. (Mez. 15:28) N’akaba omuntu arhalonze oku mube bera, okenge esimikiro yage.
13. Gurhe wakajira akaba muntu mulebe akubwirire okw’akusimire? (Wakolosai 4:6)
13 Gurhe wakajira nka muntu mulebe amakubwira okw’akusimire? Kweri, binahema omuntu bushiru bunene embere akubwire okw’akuzigire, bobola omuyereke obwinja, n’obukenge. (Osome Wakolosai 4:6.) Akaba bikuhemere orhole akasanzi k’okuwaza akaba wayemera muhwanzise obwira, omubwire ntyo. Aliko, ochihangane kumushubiza juba juba nk’oku byakanagalikana. (Mez. 13:12) Akaba ochiyunvirhe ok’orhasimisizwe naye, omubwire nanga n’obukenge na buzira kumubisha chintu. Yunva okuntu mwene-werhu Hans, w’omu chihugo che Autriche, ajiraga amango mwali-werhu muguma amubwiraga okw’amusimire. Aderhere ntya: “Namubwira esimikiro yani n’obukenge na nta chintu n’echiguma nali mubishire. Najira ntyo ahohan’aho bulala ntalilonzeze kumuha echilagane ch’obubeshi. N’eju yeyo mpanvu yen’eyo, naliri merangwe yi nta jira changwa kuderha echintu chakarhuma awaza oku nahindamwire amawazo mani.” Oku bwindi, akaba osimire muhwanzise obwira n’oyola muntu, mubwirane amawazo menyu naho muganire okuntu obwira bwenyu bwagenderera. Hali amango omuhigo gwawe gurhakaba kuguma n’og’owenyu eju y’emicho yenyu changwa eju y’ebindi bintu.
GURHE ABANDI BAKARHABALA ABAKRISTU BACHILI BALAMBA?
14. Gurhe rhwakarhabala Abakristu bachili balamba kugerera ebinwa byerhu?
14 Gurhe rhweshi rhwakarhabala Abakristu bachili balamba balonzeze kushaba changwa kushabwa? Njira nguma kuli kuba merangwe oku bilolere ebirhunaderha. (Efe. 4:29) Rhwakachibaza ntya: ‘Inanshinyagulira balala balonzeze kushaba changwa kushabwa si? Amango namabona mwene-werhu na mwali-werhu bachili balamba yibaganira, ahohan’aho inambwaza oku bali bashambazana si?’ (1 Ti. 5:13) Oku bwindi, rhurhakwanene chiro kurhuma bene-berhu na bali-berhu bachili balamba bayunva oku hali ebi babulire bulala barhaza kushaba changwa kushabwa. Mwene-werhu Hans, rhwabaga rhwashambereko embere, aderhere ntya: “Bene-berhu baguma banaderha ntya: ‘Bulagurhe orhaza kushaba? Orhachili mwana muza.’ Ebinwa bili nk’ebyola binarhuma abalamba bachiyunva nka barhazigirwe, kandi binabayongerera konyine akahidiko k’okuchiyunva oku bibahemere bashabe changwa bashabwe.” Kuli kwinja bwenene rhulonze orozo rhwakabwira mw’Abakristu bachili balamba koko!—1 Te. 5:11.
15. a) Embere y’okurhabala muntu mulebe apate ey’ashabana naye, bichi rhukwanene kurhanga kuwazako bwinja? (Waroma 15:2) (Olole n’efoto.) b) Bintu bihe by’akamaro wayigire kugerera evideo?
15 Gurhe byakaba nka rhuwazize oku mwene-werhu na mwali-werhu mulebe bakaba mulume n’omukazi benja? Ebiblia erhubwirire oku rhulage oku kuntu abandi bali bachiyunva. (Osome Waroma 15:2.) Balamba banene barhasima ok’owindi muntu yebayerekage eyi bashabana naye, rhunakwanene kukenga agola mawazo mabo. (2 Te. 3:11) Abandi bakasima muntu mulebe abarhabale, s’aliko rhurhakwanene kujira ntyo nka barharhuhemere oburhabale. e (Mez. 3:27) Balamba baguma barhasima omuntu abalonzeze eyi bashabana naye omu njira eli wazi. Mwali-werhu muguma oyirikirwe Lydia, w’omu chihugo che Alemanye, aderhere ntya: “Wakaheba oyola mwene-werhu na mwali-werhu omu chigusho ch’abantu banene omu kulonza konyine babuganane. Naho, wanaja wabaleka bachishoge echibajira.”
Echigusho cha bene-berhu na bali-berhu b’Abakristu chamalekera abachili balamba orozo l’okubuganana (Olole echifungo che 15)
16. Bichi Abakristu bachili balamba bakwanene kuyibuka?
16 Rhweshi rhube balamba changwa bantu bali omu buhya, rhwakalama akalamo kali m’obusime n’okutosheka! (Zb. 128:1) Bobola, akaba olonzeze kushaba changwa kushabwa aliko orhaza kubona okukwanene, ogenderere kuseza obwenge bwawe oku kasi ka Yehova. Mwali-werhu muguma w’omu chihugo che Chine omu vile ye Macao oyirikirwe Sin Yi aderhere ntya: “Akasanzi wakamala ey’oli mulamba zene, kagehere bwenene omu kuhuzanya n’akasanzi nji wakageza n’eyi nji washabana naye omu Paradizo. Osimiswe n’akola kasanzi k’amango ochili mulamba onakakolese bwinja.” Aliko, gurhe si akaba wapatire eyi wakashabana naye mwanahwanzize kushambazana? Omu mwazi gwakulikiraho, rhwabona gurhe mwakashambazana omu kuntu kusimisize Yehova.
OLWIMPO 137 Abakazi b’Obwemere; Bali-berhu b’Abakristu
a Y’omenya akaba oli tayari kushaba changwa kushabwa, olole oku jw.org omwazi “Okushambaza—Chigabi cha 1: Indi Tayari Kushambaza Changwa Kushambazwa Si?”
b AMAFASIRIYO M’EBINWA: Echinwa kushambaza changwa kuganiza chiderherwe mu gunola mwazi n’omu gwakulikiraho, chili chihe omusole n’omunyere banalonza kumenyana bwinja-bwinja n’okumenya akaba kweri bakaba mulume n’omukazi bapatene buli muguma n’owindi. Mu bihugo biguma, echola chinwa chakashuba kuderhera kandi okuhwanzisa obwira, okulonza kumenya muntu mulebe, changwa obwira b’omulume n’omukazi. Okushambazana kunahwanza amango omusole n’omunyere bamayerekana bwinja bwinja oku bazigirene buli muguma n’owindi. N’obola bwira bwanagenderera kuhika amango barhola esimikiro y’okushabana changwa y’okuyirha obola bwira.
c Mazino maguma mahindamwirwe.
d Mu micho miguma, bene-berhu babazigana kubwira bali-berhu mpu bashambazane. Aliko kandi na mwali-werhu akachishoga kubwira mwene-werhu okw’akasima bashambazane nako kurhali kubi. (Rut. 3:1-13) Y’omenya myazi minene, olole omwazi “Vijana Huuliza . . . Nitamwambiaje Jinsi Ninavyo Hisi?” (Emisole Enabaza, Gurhe Nakamubwira Okuntu Indi Nachiyunva?) omu Amuka! ya Siku 22 Mwezi gwe 10, 2004.
e Olole oku jw.org evideo Wanapata Matokeo ya Muzuri kwa Kupigania Imani Yao—Wakristo Wenye Hawajaoa ao Kuolewa. (Banapata Amalehe Menja omu Kulwira Obwemere Bwabo, Abakristu Bachili Balamba)
