ZAJ KAWM 21
ZAJ NKAUJ 107 Taug Nraim Vajtswv Txojkev Hlub
Yuav Nrhiav Txij Nkawm Li Cas?
“Tus pojniam uas tsimtxiaj muaj nqis dua nyiaj thiab kub, tiamsis laj nrhiav tau ib tug pojniam zoo li ntawd.”—PAJLUG 31:10.
LUB NTSIAB RAU ZAJ NO
Nyob rau hauv zaj no yuav tham txog phau Vajlugkub tej hauv paus ntsiab lus seb yuav ua li cas thiaj nrhiav tau ib tug txij nkawm uas zoo phim yus, thiab seb cov uas nyob hauv lub koom txoos pab txhawb tau cov uas xav sib yuav li cas rau li cas.
1-2. (1) Ib tug Khixatias yuav tau xav li cas ua ntej nws yuav tham ib tug twg? (2) Kev sib tham yog li cas tiag? (Saib “Txhais Tawm.”)
KOJ puas nrhiav txij nkawm? Kev sib yuav tsis yog yam uas tseem ceeb tshaj rau hauv peb lub neej. Txawm li ntawd los, tus laus tus hluas yeej nrhiav nrhw kom tau ib tug khub. Tiam sis ua ntej koj yuav tham ib tug twg, koj txoj kev sib raug zoo nrog Yehauvas yuav tsum loj txaus, paub tias koj nyiam li cas rau li cas, thiab txawj khwv los tab lub cuab lub yig. a (1 Kauleethaus 7:36) Yog koj ua li no ces koj txoj kev txij nkawm yuav ruaj khov khwb kho.
2 Txawm li ntawd los yeej tsis yooj yim nrhiav ib tug txij nkawm kom phim yus. (Pajlug 31:10) Hos tej zaum yus ho nrhiav tau ib tug uas yus nyiam los yuav tsis paub tias yuav pib tog twg tuaj. b Nyob rau hauv zaj kawm no yuav piav tias ib tug Khixatias uas tsis tau muaj txij nkawm yuav nrhiav ib tug khub li cas. Tsis tas li ntawd, peb yuav kawm seb lwm tus uas nyob hauv lub koom txoos ho pab txhawb cov uas xav sib yuav li cas rau li cas.
YUAV NRHIAV IB TUG KHUB LI CAS?
3. Ib tug Khixatias yuav tau ua tib zoo xav li cas ua ntej nws nrhiav ib tug txij nkawm?
3 Yog tias koj xav yuav txij nkawm, koj yuav tau ua tib zoo xav seb koj yuav nrhiav ib tug uas nyiam coj li cas rau li cas ua ntej koj yuav pib tham ib tug twg. c Tsis li ntawd ces tus uas twb zoo phim koj los koj ho xam tsis pom nws, los sis koj ho cia li mus tham ib tug uas ho tsis zoo rau koj. Nco ntsoov tias tus uas koj nrhiav ntawd yuav tsum yog ib tug twb ua kev cai raus dej lawm. (1 Kauleethaus 7:39) Tiam sis tsis yog txhua tus uas twb ua kev cai raus dej lawd yuav zoo rau koj yuav ua txij ua nkawm. Koj yuav tau zaum tsaws ua zoo xav li no tias: ‘Kuv lub hom phiaj ua neej yog li cas rau li cas? Tus uas kuv xav yuav ntawd yuav tsum coj li cas rau li cas? Puas yog kuv muab xav ntau tshaj li tsim nyog?’
4. Thaum hais txog nrhiav txij nkawm, muaj ib txhia tau thov Vajtswv li cas?
4 Yog koj xav yuav txij nkawm, tej zaum koj twb thov Yehauvas kom nrhiav tau ib tug. (Filipis 4:6) Yehauvas tsis tau cog lus rau leej twg kom tau ib tug txij nkawm tiam sis nws yeej paub koj thiab tej uas koj xav ces nws yeej yuav pab seb koj yuav ua li cas koj thiaj nrhiav tau ib tug txij nkawm. Yog li ntawd, kav tsij qhib siab hlo thov Yehauvas kam tiag. (Phau Ntawv Nkauj 62:8) Thov kom Yehauvas pab koj rub lub siab ntev thiab muaj tswv yim nrhiav ib tug rau koj yuav. (Yakaunpaus 1:5) Nyob rau hauv Yunaithim Xatej (United States), muaj ib tug kwv tij npe hu ua Kub d qhia tias thaum nws thov Vajtswv nws hais li no: “Kuv qhia rau Yehauvas tias kuv xav tau ib tug txij nkawm uas muaj cwj pwm li no rau li no, muaj cij fim ntsib tau ib tug zoo txij zoo nkawm, thiab kom kuv muaj cwj pwm zoo ua tau ib tug txiv tsev.” Nyob rau teb chaws Xis Lakam (Sri Lanka) muaj ib tug muam npe hu ua Nyiaj hais tias: “Thaum kuv tab tom nrhiav ib tug txij nkawm, kuv thov kom Yehauvas pab kuv tuav rawv kuv txoj kev ntseeg, xav qhov zoo, thiab muaj kev zoo siab.” Txawm tias koj nrhiav tsis tau ib tug txij nkawm sai sai los Yehauvas cog lus tias nws yeej yuav saib xyuas koj kom noj qab haus huv.—Phau Ntawv Nkauj 55:22.
5. Cov uas hlub Yehauvas es tsis tau muaj txij muaj nkawm sib ntsib li cas? (1 Kauleethaus 15:58) (Saib daim duab.)
5 Nyob rau hauv phau Vajlugkub txhawb kom peb “rau siab ntso ua tus Tswv tes haujlwm.” (Nyeem 1 Kauleethaus 15:58.) Yog tias koj kub siab lug ua Yehauvas tes hauj lwm thiab nrog cov kwv tij nkauj muam ua ke ces koj yuav tau kev txhawb zog thiab koj yuav ntsib cov uas kub siab lug teev tiam Yehauvas uas tsis tau muaj txij nkawm ib yam li koj. Koj yuav txaus siab heev yog tias koj ua npaum li koj ua tau rau Yehauvas.
Yog koj kub siab lug ua Yehauvas tes hauj lwm thiab lauj sij hawm nrog cov kwv tij nkauj muam ua ke ces tej zaum koj yuav ntsib tau tej tug uas kuj xav yuav txij yuav nkawm thiab (Saib nqe 5)
6. Cov uas tsis muaj txij nkawm yuav tau nco ntsoov li cas thaum lawv nrhiav txij nrhiav nkawm?
6 Ua tib zoo saib li no: Tsis txhob nrhiav txij nrhiav nkawm heev dhau es tsis muaj siab ua dab tsi. (Filipis 1:10) Txoj tseem kev zoo siab tiag tiag tsis yog nyob ntawm qhov uas koj muaj txij muaj nkawm los sis tsis muaj tiam sis yog koj txoj kev sib raug zoo nrog Yehauvas. (Mathais 5:3) Cheem koj tseem tsis tau muaj txij nkawm, koj yeej muaj sij hawm ua ntau yam rau Yehauvas. (1 Kauleethaus 7:32, 33) Siv koj lub sij hawm kom muaj nuj nqis. Nyob rau hauv Yunaithim Xatej, muaj ib tug muam npe hu ua Xis uas yuav txiv thaum nws yuav luag muaj 40 xyoo hais tias: “Ua ntej kuv tsis tau sib yuav, kuv kub siab lug mus qhia txoj xov zoo. Qhov kuv ua li ntawd pab tau kom kuv txaus siab rau kuv lub neej tab txawm kuv xav xav yuav txiv.”
LAUJ SIJ HAWM KOM PAUB NWS
7. Vim li cas koj yuav tau lauj sij hawm los saib ib tug tib neeg koj nyiam ntawd ua ntej koj qhia tias koj nyiam nws? (Pajlug 13:16)
7 Koj yuav ua li cas yog tias koj xav tias ib tug koj pom, zoo ua txij ua nkawm? Koj puas cia li qhia kiag rau tus neeg ntawd paub tias koj nyiam nws? Nyob rau hauv phau Vajlugkub hais tias tus neeg txawj ntse yuav ua dab tsi nws xub xav ua ntej mam li ua. (Nyeem Pajlug 13:16.) Yog li ntawd, peb yuav tau lauj sij hawm kom paub ib tug neeg zoo zoo ua ntej peb qhia rau nws paub. Xws li peb yuav tau saib seb thaum nws nrog lwm tus ua ke nws coj li cas rau li cas, tsis hais thaum mus kev sib txoos los sis tawm mus ua si ua ke. Nyob rau teb chaws Nethawlee (Netherlands) muaj ib tug txiv neej npe hu ua Keej hais tias: “Tib neeg muaj siab sai sai tiam sis ploj sai sai. Yog tias koj lauj sij hawm los saib ib tug ua ntej koj tham nws, koj yuav tsis lam tau lam tham nws es muab tso tseg.” Thaum koj ua tib zoo saib ib tug neeg zoo zoo lawm, tej zaum koj yuav pom tias tus neeg koj nyiam tsis zoo txij zoo nkawm.
8. Ib tug uas tsis tau muaj txij nkawm yuav lauj sij hawm kom paub ib tug li cas? (Saib daim duab.)
8 Yuav ua li cas koj thiaj lauj tau sij hawm kom paub ib tug? Thaum mus kev sib txoos los sis mus ua si ua ke, tej zaum koj yuav pom nws tus xeeb ceem, nws tus cwj pwm, thiab nws muaj kev ntseeg npaum li cas. Ua li nws cov phooj ywg yog leej twg, thiab nws kheev tham txog dab tsi xwb? (Lukas 6:45) Nws puas muaj hom phiaj ib yam li koj thiab? Koj kuj nug tau cov txwj laus hauv nws lub koom txoos los sis cov Khixatias uas paub tab seb nws zoo li cas. (Pajlug 20:18) Tej zaud zoo rau koj nug lawv seb nws puas coj zoo hauv lub koom txoos thiab nws muaj tus cwj pwm zoo li cas. (Luv 2:11) Thaum koj lauj sij hawm los paub ib tug twg, tsis txhob ua rau nws ceeb sob los sis ntshai koj. Nco ntsoov tsis txhob caum nws ncuj nciav rau ub rau no, thiab tsis txhob nug txhua yam hauv nws lub neej.
Ua ntej koj qhia siab rau ib tug twg, ua tib zoo saib nws ua ntej tso (Saib nqe 7-8)
9. Ua ntej koj yuav qhia koj lub siab rau ib tug twg, koj yuav tsum paub kom zoo li cas?
9 Koj yuav tau lauj sij hawm ntev npaum li cas koj mam qhia siab rau nws? Yog koj maj qhia zog lawm ces tej zaum yuav ua rau nws xav tias koj tsis xav tom ntej tom qab. (Pajlug 29:20) Yog nws twb paub tias koj nyiam nws tiam sis koj ho tsis hais dab tsi li ces nws yuav xav tias koj lam ua si nrog nws xwb, tsis muaj siab tiag. (Tej Lus Qhia 11:4) Nco ntsoov tias ua ntej koj yuav qhia koj lub siab rau ib tug twg paub, koj yuav tsum paub hais tias koj npaj tau txhij yuav txij nkawm lawm thiab tus koj nyiam ntawd los puas zoo txij zoo nkawm rau koj. Tsis txhob xav tias koj qhia siab rau ib tug lawm ces txawm li cas los koj yuav cia li yuav kom tau nws.
10. Yog ib tug muaj siab rau koj, koj yuav ua li cas xwb yog tias koj tsis muaj siab rau nws?
10 Koj yuav ua li cas xwb yog tias koj paub tias muaj ib tug muaj siab rau koj? Yog tias koj ho tsis muaj siab rov rau nws ces txhob ua zoo li koj nyiam nws rov qab. Nco ntsoov tsis zoo rau koj ua yam nkaus li koj muaj siab rau nws.—1 Kauleethaus 10:24; Efexus 4:25.
11. Yog koj yuav pab xaiv ib tug txij nkawm rau ib tug twg, koj yuav tau ua tib zoo xav li cas ua ntej tso?
11 Nyob rau tej lub teb chaws, muaj tej txhia niam txiv los sis cov laus yeej xaiv txij xaiv nkawm rau cov nruab ze. Hos nyob rau ib txhia teb chaws, tej zaum tej tse neeg los sis tej phooj ywg kwv luag ho pom tej tug zoo txij zoo nkawm ces lawv teem kom nkawd sib ntsib seb nkawd puas sib nyiam. Yog ho muaj leej twg nug kom koj pab nrhiav ib tug txij nkawm rau nws yuav ces koj yuav tau saib seb nws nyiam li cas rau li cas thiab nws phim tus zoo li cas. Yog koj nrhiav tau ib tug txij nkawm uas phim nws ces ua zoo saib seb tus ntawd tus xeeb ceem zoo li cas, tus ntawd coj li cas, thiab seb tus ntawd txoj kev sib raug zoo nrog Yehauvas zoo li cas. Qhov uas nrog Yehauvas sib raug zoo ntawd tseem ceeb tshaj tej nyiaj, tej kev txawj ntse los sis loj siab ntshuas. Nco ntsoov tias yuav tsum yog tus kwv tij los sis tus muam uas tsis muaj txij nkawm ntawd txiav txim seb nws xav yuav los sis tsis xav yuav tus koj xaiv ntawd ua txij ua nkawm.—Kalatias 6:5.
YUAV PIB THAM IB TUG LI CAS?
12. Koj yuav ua li cas koj thiaj qhia tau rau ib tug tias koj muaj siab rau nws?
12 Yog koj xav pib tham ib tug twg, koj yuav hais li cas rau tus ntawd? e Koj kuj teem sij hawm nrog tus ntawd mus sib txuas lus tab meeg tej qho chaw muaj tib neeg coob coob los sis nrog nws tham hauv xov tooj los tau. Qhia phua hlo tias koj muaj siab rau nws thiab xav paub nws kom zoo. (1 Kauleethaus 14:9) Nco ntsoov cia sij hawm rau tus ntawd xav ua ntej nws teb rau koj. (Pajlug 15:28) Yog tias tus tib neeg ntawd ho tsis xav ib yam li koj xav no los cia nyias mus nyias, tsis txhob tu siab rau nws.
13. Koj yuav ua li cas yog hais tias ib tug ho muaj siab rau koj? (Kaulauxais 4:6)
13 Yog tias ho muaj ib tug qhia rau koj tias nws muaj siab rau koj, koj yuav ua li cas? Nco ntsoov ua siab mos siab muag thiab saib taus tus uas muaj cuab kav tsa ncauj los hais koj. (Nyeem Kaulauxais 4:6.) Cia li qhia ncaj qha rau nws paub yog koj ho xav ncua me ntsis sij hawm ua ntej koj teb nws. Tiam sis tsis txhob laug sij hawm ntev ntev mam li teb nws. (Pajlug 13:12) Yog koj ho tsis muaj siab rau nws no los cia li ua tib zoo qhia ncaj qha rau nws paub. Nyob rau teb chaws Auxita (Austria), muaj ib tug kwv tij npe hu ua Hawj hais tias thaum ib tug muam Khixatias los nug nws, nws hais tias: “Kuv ua tib zoo qhia ncaj qha rau nws paub tam sid tias kuv tsis muaj siab rau nws kom nws thiaj li tsis muaj siab rau kuv. Tsis tas li ntawd, kuv kuj tsis ua tej yam kom nws xav tias kuv ho pauv siab rau nws.” Hos yog koj ho muaj siab rau tus neeg ntawd no ces koj yuav tau qhia siab rau nws thiab thaum neb sib tham lawm yuav muaj li cas rau li cas. Nco ntsoov tias neb nyias yog nyias ib haiv neeg ces nyias yuav xav lawm nyias ib yam thaum neb sib tham.
YUAV TXHAWB THIAB PAB COV UAS XAV SIB YUAV LI CAS?
14. Peb hais lus li cas los txhawb cov uas tsis tau muaj txij nkawm?
14 Peb yuav txhawb thiab yuav pab cov tsis tau muaj txij nkawm uas xav sib yuav li cas? Peb yuav tsum tsis txhob lam tau lam hais ub hais no. (Efexus 4:29) Peb yuav tau tshuaj peb tus kheej li no tias: ‘Tej tug uas xav xav sib yuav, kuv puas hais lus dag ntsuav rau lawv? Thaum kuv pom ob tug uas tsis tau muaj txij nkawm tham lus ua ke, kuv puas muab nkawd sib lo?’ (1 Timautes 5:13) Peb yuav tsum tsis txhob ua rau lawv xav tias lawv tsis muaj neej yog tsis muaj txij nkawm. Hawj hais tias: “Muaj ib txhia kwv tij hais tias, ‘Vim li cas koj tsis yuav poj niam li? Koj nyob ua nraug laus tas.’ Cov lus no yuav ua rau tej tug uas tsis muaj txij nkawm tu siab thiab yuav ua rau lawv lam tau lam xav yuav txij yuav nkawm.” Yog li ntawd, zoo rau peb qhuas cov uas tsis tau muaj txij nkawm!—1 Thexalaunikes 5:11.
15. (1) Raws li Loos 15:2, ua ntej peb yuav pab ib tug twg nrhiav txij nkawm, peb yuav tau ua tib zoo xav li cas? (Saib daim duab.) (2) Koj khaws tau dab tsi los ntawm zaj yeeb yaj kiab?
15 Ua li yog peb ho pom tej tug kwv tij Khixatias los sis muam Khixatias sib phim ua niam txiv, peb ho yuav ua li cas? Nyob hauv phau Vajlugkub qhia kom peb ua zoo xav txog lawv ua ntej tso. (Nyeem Loos 15:2.) Muaj coob leej ntau tus uas tsis tau muaj txij nkawm tsis nyiam kom peb qhia rau lawv tias tus twg zoo ua txij nkawm, thiab yog lawv nyiam li cas lawm peb yuav tau ua ib yam li lawv hais. (2 Thexalaunikes 3:11) Muaj ib txhia kuj xav kom peb pab lawv nrhiav txij nrhiav nkawm tiam sis nco ntsoov tsis txhob mus cuam tshuam lawv lub neej yog lawv tsis hais kom peb pab. f (Pajlug 3:27) Hos ib txhia nyiam kom yaum tuaj ua ke es mam tham kom sib paub xwb. Nyob hauv teb chaws Ntsaws Mes Nis (Germany), muaj ib tug muam uas tsis tau muaj txij nkawm npe hu ua Diav hais tias: “Koj caw tau nkawd thiab ib co tib neeg tuaj nyob ua ke seb nkawd puas sib nyiam thiab cia nkawd txiav txim siab seb nkawd yuav ua li cas.”
Caw sawv daws tuaj ua ke kom cov uas tsis tau muaj txij nkawm thiaj sib ntsib tau (Saib nqe 15)
16. Cov Khixatias uas tsis tau muaj txij nkawm yuav tsum nco ntsoov li cas?
16 Txhua tus, tsis hais cov muaj txij nkawm los sis cov tsis tau muaj txij nkawm, yeej muaj taus kev zoo siab! (Phau Ntawv Nkauj 128:1) Yog tias koj xav sib yuav tiam sis haj tseem nrhiav tsis tau tau ib tug, rau siab ntso teev tiam Yehauvas. Nyob rau lub nroog Makhaus (Macao), muaj ib tug muam npe hu ua Yiv hais tias: “Yog koj muab lub neej uas nrog koj tus txij nkawm hauv lub Vaj Kaj Siab piv rau lub neej uas tsis muaj txij nkawm mas lub neej tsis muaj txij nkawm luv heev. Nco ntsoov siv koj lub neej tsis muaj txij nkawm kom muaj nuj nqis.” Tiam sis yog koj ho nrhiav tau ib tug zoo txij zoo nkawm thiab twb pib tham nws lawm, zaj kawm txuas ntxiv tom ntej yuav piav seb yuav ua li cas koj thiaj txawj txiav txim siab thaum koj tab tom nrog ib tug sib tham.
ZAJ NKAUJ 137 Cov Pojniam Txojkev Ntseeg
a Yog koj xav paub ntxiv seb koj puas tau npaj txhij sib yuav, mus saib lub vej xaij jw.org ntawm zaj hu ua “Dating—Part 1: Am I Ready to Date?” ua lus Askiv.
b TXHAIS TAWM: Nyob rau hauv zaj kawm no thiab zaj txuas ntxiv tom ntej yuav hais txog txoj kev sib tham. Lub caij no yog thaum ob tug tib neeg sib txuas lus seb puas ntxim siab. Thaum ib tug txiv neej thiab ib tug poj niam sib qhia siab tias nkawd sib nyiam ces nkawd txoj kev sib tham pib thaum ntawd mus txog hnub nkawd sib yuav los sis sib tso.
c Yuav kom yooj yim rau sawv daws nkag siab, ob peb nqes yuav hais tuaj no yog hais txog tus ntxhais nrhiav txiv yuav. Tiam sis kuj yog hais rau cov kwv tij uas xav nrhiav poj niam yuav tib yam nkaus.
d Tau muab cov npe hauv zaj no ib txhia hloov lawm.
e Tej txhia haiv neeg, tus kwv tij Khixatias yog tus mus cuag tus muam Khixatias kom nkawd sib tham seb puas muaj siab. Txawm li ntawd los, tus muam Khixatias mus cuag tus kwv tij Khixatias los tau tib yam nkaus. (Luv 3:1-13) Yog xav paub ntxiv, mus saib phau Tsim Dheev! lub 10 Hli tim 22 xyoo 2004 ntawm zaj kawm “Young People Ask . . . How Can I Tell Him How I Feel?” ua lus Askiv.
f Mus saib lub vej xaij jw.org/hmn ntawm zaj yeeb yaj kiab Cov Tuav Rawv Txojkev Ntseeg—Cov Tsis Muaj Txij Nkawm.
