ATUAQQISSAAGASSAQ 21
ERINARSUUT 107 Guutip asanninnermik najoqqutassiaa
Qanoq aappassarsiortoqarsinnaasoq
“Arnaq pikkorissoq sumiippa? Sapannganit naleqarnerungaarpoq.” – USS 31:10.
SAMMISAQ
Tulluartumik aappassarsiornermut najoqqutassiat Biibilimeersut aamma ilagiinniittut allat aappaqanngitsunik katikkusuttunik qanoq annertoqqusersuisinnaanersut.
1-2. (a) Kisimiittut peeraqalinnginnermi suut eqqarsaatigisariaqarpaat? (b) Peerariinnermut tunngatillugu suna pivarput? (“Nassuiaat” takuuk).
KATIKKUSUPPIT? Imaanngilaq katikkaanni aatsaat pillualivittoqartartoq. Taamaakkaluartorli kisimiittorpassuit aappartaarusuttarnerat pissusissamisuuginnarpoq. Kisianni peeraqalinnginninni Jehovamut qanimut attaveqarluarnissat, imminut ilisarisimalluarnissat aamma aappartaarnerup kingunerisaanik aningaasatigut akisussaaffeqarnerup isumagisinnaanissaa pingaaruteqarput. a (Kor 1. 7:36) Tamakku piareersimaffigigukkit aappariinnermi pilluarnissat ilimanarnerussaaq.
2 Tulluartumilli aappartaarnissaq ajornaatsuujuaannanngilaq. (Uss 31:10) Allaat ilisarisimanerulerusutannik naapitaqaruit soqutigalugu oqarfiginissaa sapernarsinnaavoq. Tulluartumik aappassarsiornermut peeraqalernissamullu siunnersuutit allaaserisami matumani sammissavagut. b Aamma ilagiinniittut allat katikkusuttunik qanoq annertoqqusersuisinnaanersut paasissavarput.
TULLUARTUMIK AAPPASSARSIORNEQ
3. Kisimiittup aappassarsioruni aappassaminut tunngatillugu suut eqqarsaatigissavai?
3 Katikkusukkuit peeraqalinnginninni aappassappit pissuserisinnaasaasa takorloortarnissaat pitsaassaaq. Tamanna eqqumaffiginngikkukku aapparisinnaagaluarlugu paasinngitsoorsinnaavat imaluunniit ilinnut tulluanngitsumik peeraqalersinnaavutit. Soorunami peerarisinnaasaq kristumiuusariaqarpoq imermut morsutsitaasimasoq. (Kor 1. 7:39) Imaanngilarli kinaluunniit imermut morsutsitaasimasoq ilinnut tulluartuusoq. Taamaattumik uku eqqarsaatigikkit: ‘Inuuninni sunik anguniagaqarpunga? Aappassanni pissuserineqartussat suut pingaaruteqarsoraakka? Piumasaqaatikka piviusorsiortuuppat?’
4. Ilaasa suut qinnutigisarsimavaat?
4 Katikkusukkuit qularnanngitsumik tamanna Jehovamut qinnutigisarsimavat. (Flp 4:6) Soorunami Jehovap neriorsunngilaatit aappartaartissallutit. Jehovalli pisariaqartitatit misigissutsitillu soqutigai aappassarsiorninnilu ikiorsinnaallutit. Taamaattumik kissaatigisatit misigissutsitillu oqaluttuarisakkit. (Tuss 62:9) Naammagittartuunissat ilisimassuseqarnissallu qinnutigisakkit. (Jaak 1:5) Johnip, c qatanngutip angutip kisimiittup USA-mi najugallip, qinnutimini suut eqqaasarnerlugit ima oqaluttuaraa: “Aappassama suna pissuserissagaa kissaatigalugu Jehova oqarfigisarpara. Qinnutigisarpara naapitaqarnissamut periarfissaqaqqullunga. Aamma uiulluarnissara kissaatigalugu pissuserineqartussanik ineriartortitsinissamut ikioqqullunga qinnuigisarpara.” Tanya, Sri Lankameersoq, ima oqarpoq: “Aappassarsiorninni aalajaaqqullunga, isumalluaqqullunga nuannaaqqullungalu Jehova qinnuigisarpara.” Ingerlaannaq aapparisinnaasannik nassaanngikkaluartutit Jehovap neriorsorpaatit isumassortuarumallutit isumagalutillu tamatigut asajuassallutit. – Tuss 55:23.
5. Jehovamik asannittunik allanik qanoq naapitaqartoqarsinnaava? (Korintimiunut 1. 15:58) (Aamma asseq takuuk).
5 Biibilimi kajumissaarneqarpugut ‘Naalakkamut kiffartornermi ulapputeqartuaqqulluta’. (Korintimiunut 1. 15:58 atuaruk). Jehovamut kiffartornermi ulapputeqaruit qatanngutillu angutit arnallu assigiinngitsut piffissaqarfigisarukkit peqatigiinnersi nakussatsissutigissavat, aamma aappaqanngitsut allat ilittulli Jehovamut kiffartornermik aallutaqartut naapinnissaannut periarfissaqassaatit. Sapinngisannillu Jehova nuannaartikkakku pilluarneq ilumoortoq misigissavat.
6. Aappassarsiornermi suna eqqaamaneqartariaqarpa?
6 Mianersuutigissavalli aappassarsiorneq inuuninni pingaarnerpaatilissannginnakku. (Flp 1:10) Pillualivissagaanni imaanngilaq katittoqartariaqartoq, Jehovamummi attaveqarluarneq pillualivissutaavoq. (Mat 5:3) Aamma kisimiitillutit oqaluussinerulernissamut kiffaanngissuseqarnerusinnaavutit. (Kor 1. 7:32, 33) Taamaattumik piffissaq pitsaanerpaamik atoruk. Jessica, USA-meersoq 40-t pallillugit ukioqarluni katittoq, ima oqarpoq: “Kisimiittuugallarama oqaluussinermi ulapputeqartarpunga, tamannalu nalerisimaarnissannut iluaqutigaara naak katikkusukkaluarlunga.”
INUTTUT QANOQ ITTUUNERSOQ MALUGINIAQQAARUK
7. Sooq aapparilersinnaasat soqutiginerarlugu oqarfiginnginnerani maluginiaqqaartarnissaa silatusaarnerua? (Ussatit 13:16)
7 Taavami isumaqaruit uppeqat aappaalluarpasissinnaasoq? Ingerlaannaq oqarfigissaviuk soqutigalugu? Biibilimi allassimavoq silatooq iliuuseqartinnani ilisimasaqalerniaqqaartartoq. (Ussatit 13:16 atuaruk). Taamaattumik uppeqatit soqutiginerarlugu oqarfiginnginnerani inuttut qanoq ittuunerata maluginiaqqaartarnissaa silatusaarneruvoq. Aschwin Hollandimiu ima oqarpoq: “Misigissutsit qaffakaallutillu allanngupallassinnaapput. Taamaattumik inuttut qanoq ittuunera maluginiaqqaarukku misigissutsit allanngupallasinnaasut tunngavigiinnarlugit peeraqalernavianngilatit.” Aamma maluginiarnissaa piffissaqarfigigukku imaassinnaavoq paasilerit taanna ilinnut tulluarnavianngitsoq.
8. Kisimiittup qanoq peerarilersinnaasani maluginiarsinnaavaa? (Aamma asseq takuuk).
8 Qanoq malunnaarsaarlutit maluginiarsinnaaviuk? Ilagiit ataatsimiittarnerini aamma katerisimaarnerni anersaakkut inuttullu qanoq ittuunera pissusilersorneralu maluginiartarsinnaavatit. Kikkut ikinngutigai? Suut eqqartortarpai? (Luk 6:45) Anguniagai illit anguniakkannut naapertuuppat? Utoqqaanertat imaluunniit anersaakkut inersimalluartut allat taassuminnga ilisarisimannilluartut oqaloqatigisinnaavatit. (Uss 20:18) Aperisinnaavatit allanit qanoq tusaamaneqarnersoq aamma qanoq pissuseqarnersoq. (Ruth 2:11) Uppeqatilli soqutigisat maluginiartillugu nuanniilliortinnginnissaa eqqumaffigiuk. Inuttut ataqqiuk.
9. Peerarilersinnaasavit saaffiginnginnerani suna qularissanngiliuk?
9 Uppeqatit soqutiginerarlugu oqarfiginnginnerani qanoq sivisutigisumik maluginiaqqaassaviuk? Saaffigiaarpallaarukku immaqa isumaqassaaq eqqarsaqqaarnak iliuuseqapallattutit. (Uss 29:20) Aappaatigulli malugisinnaaguniuk soqutigineqarluni oqarfiginissaanullu nangaaguit eqqarsarsinnaavoq nalornisutit. (Oqal 11:4) Eqqaamajuk uppeqatit saaffigigukku qulakkeerlugu isummissanngilatit taanna katinniarlugu. Qularinngittariaqarpalli katinnissamut piareersimallutit taannalu ilinnut tulluarsinnaasoq.
10. Misigiguit uppeqativit soqutigigaatit illilli peerarilernissaa soqutiginngikkukku sussavit?
10 Taavami illit misigiguit uppeqativit soqutigigaatit? Peerarilernissaa soqutiginngikkukku ersarissumik takutiguk. Asannittuliornerussanngilaq eqqarsalersikkukku peerariilersinnaasusi uffa tamanna kissaatiginagu. – Kor 1. 10:24; Ef 4:25.
11. Aappassarsiuussinermi suut eqqarsaatigineqartussaappat?
11 Nunat ilaanni naatsorsuutigineqartarpoq angajoqqaat inersimasulluunniit allat eqqarliminnut aappaqanngitsunut aappassarsiuussisarnissaat. Nunani allani ilaquttat ikinngutilluunniit aappaqanngitsup aapparisinnaasaanik ujarlertarput isumagalugulu taakkua naapinnissaat paasiniassammassuk peerariilerusunnerlutik. Taamatut akisussaaffilerneqaruit arnap angutillu nuannarisaat pisariaqartitaallu eqqarsaatigikkit. Nalunngisannut tulluarpasittoq eqqumaffigilerukku inuttut qanoq ittuunersoq pissusiilu pillugit paasiniaagit, pingaarnerpaamillu paasiniaruk Jehovamut qanimut attaveqarnersoq. Jehovamut qanimut attaveqarneq aningaasanit, ilinniagaqarnermit inuiaqatigiinnilu inissisimaffeqarnermit pingaaruteqarnerungaarpoq. Eqqaamajulli naggataatigut uppeqativit namminneq aalajangertussaagaat katissanerlutik. – Gal 6:5.
PEERAQALERNEQ
12. Ilisarisimanerulerusutat qanoq oqaluttuussinnaaviuk soqutigalugu?
12 Ilisarisimanerulerusutat qanoq paasitissinnaaviuk soqutigalugu? d Allanit takuneqarsinnaasumiillusi imaluunniit oqarasuaatikkut oqaloqatiginissaa pilersaarusiorsinnaavat. Ersarissumik oqaluttuuguk soqutigisaralugu ilisarisimanerulerusullugulu. (Kor 1. 14:9) Imaassinnaavoq qanoq pissanerluni eqqarsaatigeqqaarusukkaa. (Uss 15:28) Peerariilernissarsilu kissaatiginngippagu ataqqiuk.
13. Ilinnik soqutiginnittumit oqarfigineqaruit peerarineqarusullutit susinnaavit? (Kolossimiut 4:6)
13 Taavami arlaata oqarfigippatit soqutigalutit? Ilinnut saaffiginninnissaminut sapiiserunarmat inussiarnersuugit ataqqinnillutillu. (Kolossimiut 4:6 atuaruk). Peerarilerusunnerlugu eqqarsaatigeqqaarusullugu oqarfigisinnaavat. Piaarnerpaamilli ilisimatiguk. (Uss 13:12) Peerarilerusunngikkukku ersarissumik inussiarnersumillu oqarfigiuk. Hans, qatanngut angut Østrigimiu, qatanngutip arnap misigissutsiminik oqaluttuummani qanoq qisuariartoq maluginiaruk. Hans ima oqarpoq: “Ingerlaannaq inussiarnersumik ersarissumilli akivara isumaqalersikkusunnginnakku peerariilernissarput soqutigalugu. Aamma kingorna taassumunnga iliuutsikka oqaatsikkalu mianersuutigisarpakka.” Kisianni ilisarisimanerulerusukkukku qanoq misiginerlutit oqarfigiuk, aamma immissinnut peerariinnissinnullu qanoq naatsorsuuteqarnerlusi eqqartuigitsi. Eqqartornissaat pingaaruteqarpoq kulturi apeqqutaatillugu allamilluunniit pissuteqarluni assigiinngitsunik naatsorsuuteqarsinnaagassi.
ALLAT AAPPAQANNGITSUNIK QANOQ ANNERTOQQUSERSUISINNAAPPAT?
14. Uppeqatitsinnik aappaqanngitsunik qanoq oqaatsitsigut annertoqqusersuisinnaavugut?
14 Uppeqatigut aappaqanngitsut katikkusuttulli qanoq annertoqqusersorsinnaavagut? Ilaatigut oqaatsitta mianersuutiginissaat pingaaruteqarpoq. (Ef 4:29) Uku eqqarsaatigisinnaavagut: ‘Katikkusuttut quiasaarnikkut ajuallaatigisaannik qinngasaalaartarpakka? Angut arnarlu oqaloqatigiittut takugaangakkit perariilernissaminnut soqutigiissorisarpakka?’ (Tim 1. 5:13) Aamma aappaqanngitsut amigaateqartutut misigitikkusunngilagut. Hans eqqaaneqareersoq ima oqarpoq: “Qatanngutit ilaasa aperisarpaannga sooq inuusuttuujunnaareeraluarlunga suli nuliaqannginnersunga. Oqaatsit taamaattut pissutigalugit aappaqanngitsut pingaartinneqanngitsutut misigilertarput katinnissamullu tatineqarnerulersutut misigalutik.” Pitsaanerungaarpoq aappaqanngitsut nersualaarnissaannut periarfissarsiortarutta! – Tes 1. 5:11.
15. (a) Aappassarsiortup ikiunnginnerani suna eqqarsaatigeqqaassavarput? (Romamiut 15:2) (Aamma asseq takuuk). (b) Videumit suna ilikkarpiuk? (Quppernerup ataani ilanngussaq takuuk).
15 Taavami qatanngut angut qatanngullu arnaq tulluartuusorigutsigit? Biibilimi kajumissaarneqarpugut allat misigissusiinik innimittartuussasugut. (Romamiut 15:2 atuaruk). Kisimiittut amerlasuut kissaatigineq ajorpaat allanut ilisaritinneqarnissartik, tamannalu ataqqissavarput. (Tes 2. 3:11) Allat aappassarsiornerminni ikiorneqarnissartik qujamasuutigisinnaavaat, kisianni aperineqanngikkutta akuliutissanngilagut. e (Uss 3:27) Ilaasa malunnaarsaartumik ilisaritinneqarnissartik piumanerusarpaat. Lydia, qatanngut arnaq kisimiittoq Tysklandimeersoq, ima oqarpoq: “Qatanngut angut qatanngullu arnaq uppeqaterpassuit ilagalugit qaaqqusinnaavatit. Taamatut taakkua naapinnissaannut periarfississinnaavatit, qanorlu iliornissartik namminneq aalajangissavaat.”
16. Aappaqanngitsut suna eqqaamasariaqarpaat?
16 Tamatta – kisimiittuugaluarutta aappaqartuugaluaruttaluunniit – pilluarluta nalerisimaarlutalu inuusinnaavugut! (Tuss 128:1) Katikkusukkuit kisiannili suli nassaarsimanak Jehovamut kiffartornerit pingaarnerpaatiguk. Qatanngut arnaq Macaomeersoq Sin Yi-mik atilik ima oqarpoq: “Aapparisassavit paratiisimi ilaginissaanut naleqqiukkukku maanna kisimiittuunerit sivikippoq. Kisimiittuunerit nuannaarutigiuk atorluarlugulu.” Taavami aapparisinnaasannik nassaarsimaguit maannalu peerariilersimallusi? Allaaserisami tulliuttumi qanoq peerariilluarsinnaanersusi sammissavarput.
ERINARSUUT 137 Arnat aalajaatsut maligassiuisut
a Piareersimanerlutit naliliiniarninni allaaserisaq “Peerariinneq – Immikkoortoq 1: Peeraqalernissamut piareersimavunga?” jw.org-imiittoq iluaqutigisinnaavat.
b NASSUIAAT: Peerariinneq allaaserisami matumani tullianilu eqqaaneqaraangat angutip arnallu katinnissamut tulluartuunerlutik paasiniarumallugu imminnut ilisarisimanerulernerat pineqartarpoq. Angut arnarlu peerariilernissamut imminnut soqutigalutik oqarfigigunik peerariilertarput. Katinniarnerlutik peerariikkunnaarniarnerlutilluunniit aalajangernissamik tungaanut peerariipput.
c Atit ilaat allanngortitaapput.
d Kulturit ilaanni angutip uppeqatini arnaq saaffigisarpaa peerarilernissaa siunertaralugu. Kisianni aamma qatanngut arnaq siulliulluni saaffiginnissinnaavoq. (Ruth 3:1-3, 8-13) Paasisaqarnerujumallutit allaaserisaq “Unge spørger: Hvordan får jeg fortalt ham hvad jeg føler?” Vågn op! oktobarip 22-at 2004-moortumiittoq takuuk.
e Video Nogle der kæmper for troen og klarer det – Singler jw.org-imiittoq isiginnaaruk.