21 CAJ YACHACHICUY
107 CAJ CANCIÓN ¡Piraj gamno cuyacoj canman!
¿Imanotaj ali majata ashinquiman casacunayquipaj?
“Arukuq warmitaqa ¿piraq fácil tarinman? Arukuq warmiqa ima alhäjapitapis masmi välin” (PROV. 31:10).
¿IMATAJ YACHACUSHUN?
Yachacushun ima nintaj Biblia solterucuna casaracuyta munar majanta ali acrananpaj y hermanucunapis imanotaj paycunata yanapanman.
1, 2. 1) Juc cristiano casacuyta munarga, ¿puntata imatataj tapucunman? 2) ¿Ima ninantaj noviucunano reguinacuyga? (“Maslata tantiarcunapaj” nejta ricay).
¿CASACUYTA munanquimanchuraj? Cushishgala cawanapäga manami casacunanchirächu, chayno captinpis achca hermanunchicuna tucuy edäyoj carpis casacuyta munapäcun. Chaypäga puntata cayta tapucunquiman: ‘¿Casacurga familiäta manteniyta puedishächuraj?, ¿espiritual cajcho y ima necesitashgancunatapis atiendiyta puedishächuraj?’ nir (1 Cor. 7:36). a Chayta rurarga, casacuptiqui más cushishgami cawacunqui.
2 Öraga sasachi canman ali majata tarinayquipaj (Prov. 31:10). Y pilatapis tarishgana carga, capaz sasami canman noviucunano reguinacur galaycunayquipaj. b Canan yachacushun casacuyta munaj solterucunata imata yanapanga ali majata tarinanpaj. Jina ricashun congregaciuncho hermanucunapis imata ruranman casacuyta munajcunata yanapänanpaj.
IMANOTAJ ALI MAJATA ASHINQUIMAN
3. Juc cristiano piwanpis novio cayta manaraj yarpar, ¿imacunamantaj yarpachacunman?
3 Piwanpis noviucunano manaraj reguinacuyta yarpar, puntata yarpanquiman majayqui imano canantataj munanqui. Chayta mana rurarga capazchi mana ali majatapis acranquiman. Ichanga pï majayqui cananpaj acrashgayquega Jehovapa testigun canman (1 Cor. 7:39). Pero chayga manami ninanchu lapan bautizaducuna ali majana cananpaj. Chaymi alichi canman caycunata tapucuptiqui: “¿Shamoj watacunacho ima ruraytataj munä? ¿Imano jipashtaj o imano mozutaj canman majä cananpaj? ¿Munashgäno majaga canmanchuraj?”.
4. ¿Imataj waquin solterucuna mañacuynincho Jehovata mañacärergan?
4 Casaracuyta munarga, Jehovata mañacushcanquinachi chay asuntupaj (Filip. 4:6). Jehovaga manami pitapis majanta ashipanchu. Pero payga musyanmi imano sienticushgayquita y ima necesitashgayquitapis, jina majayquita tarinayquipäpis yanapäshunquimanmi. Chaymi mañacuyniquicho Jehovata parlapanquiman imano sienticushgayquipita y ima munashgayquipitapis (Sal. 62:8). Pacienciacoj y yachaj canayquipäpis mañacuy (Sant. 1:5). Estados Uniduspita John c jutiyoj cristianuga Jehovata wilapan imano canman casacunanpaj caj cristiana y imanolapapis reguircunanpaj. Jina mañacun cananlapita paytapis yanapänanpaj, casacurna ali maja cananpaj. Sri Lanka naciunpita Tanya jutiyoj cristiana cayno nin: “Jehovata mañacö yanapämänanpaj payta sirvir cushishga caycänäpaj majäta manaraj tarirpis”. Tiempo pasariptinpis y majayquita manaraj tarishga carga, Jehová aunishunqui imaypis cuidashunayquipaj y necesitashgayquicunata camaripäshunayquipaj (Sal. 55:22).
5. ¿Imataj solterucunata yanapanga Diosta cuyaj runacunata reguinanpaj? (1 Corintios 15:58, fotutapis ricay).
5 Bibliaga nimanchi Jehovata imaypis sirvir ocupado caycänapaj (leiriy 1 Corintios 15:58). Chayta rurarmi, achca hermanucunawan reguinacärinqui. Y achca amigucunayoj captiqui, ricanqui waquin solterucunapis Jehovata cushishga sirvircaycashganta. Jina Jehovata cushichiyta munar lapan puedishgayquita ruraptiquega, gampis cushishga ricacunquipaj.
Jehovata sirvir ocupado caycaptiquega, achca hermanucunata reguinqui y capaz chaycunapita mayganlapis casacuyta munanman. (5 caj parrafuta ricay).
6. Juc majata ashejcunaga, ¿imataj yarpapäcunman?
6 Casacuyta munaptiquipis, chaytaga cawayniquicho más puntaman churanquimanchu (Filip. 1:10). Rasunpa cushishga canayquipäga manami solterucho o casadurächu canayqui, sinoga Jehovapa amigun canayquimi (Mat. 5:3). Soltero caycarga, Jehovata sirvishgayquicho capaz mastaraj rurayta puedinquimanmi (1 Cor. 7:32, 33). Chaymi soltero cashgayquita ali provechanquiman. Estados Uniduspita Jessica cristiana 40 watayoj caycaptinraj casacurgan, payga nin: “Casacuyta munaycaptëpis, runacunata yachachir ocupada caycashgämi yanapämashga cushishga caycänäpaj”.
PIWANPIS MANARAJ REGUINACUR SHUMAJRAJ RICAPAY
7. ¿Imanirtaj ima sientishgayquita pilatapis manaraj niptiqui shumaj ricapanquiman? (Proverbios 13:16).
7 ¿Imaraj canman yarpaptiqui pilatapis tarishgayquipita ali majayqui cananpaj? ¿Juclachuraj ninquiman payman interesado cashgayquita? Bibliaga ninmi yachaj y tantiacoj runaga shumaj yarpachacunraj imatapis rurananpaj (leiriy Proverbios 13:16). Chaymi ima sientishgayquita manaraj wilapar, disimuladula shumajraj reguinayqui imano runa o warmi cashganta. Países Bajos naciunpita Albert cristianuga cayno nin: “Pipajpis ima sientishgayquega öraga ilajpita ushacäcunman. Chaymi shonguyqui ima munashganta rasla ruranayquipaj trucan, shumajraj ricapanquiman ali reguinayquipaj”. Shumaj reguiycurga capaz cuentata gocunquiman majayquipäno mana cashganta.
8. Juc soltero pilamanpis interesado caycarga, ¿imanotaj shumaj reguinman? (Fotutapis ricay).
8 Capaz öraga tapucunqui imano disimuladula pitapis reguinayquipaj. Reuniuncunacho y waquincunawan caycar ricayta puedinqui imano comportacushganta y Jehovata lapan shongunwan cuyashganta o manapis. ¿Pïcunataj amiguncuna caycan? ¿Imapitaj parlan? (Luc. 6:45). ¿Ima munashgancunaga tincunchu gam munashgayquiwan? Congregaciunninpita ancianuncunawan y payta ali reguej pogushga cristianucunawanpis parlanquiman paypita maslata musyanayquipaj (Prov. 20:18). Hermanucuna imano ricashganta y imano runa o warmi cashgantapis tapupanquiman (Rut 2:11). Pilatapis ricapaycarga, cuidä pengachinquiman ni ajayächinquimanchu. Ima sientishganta, yarpashganta y ima munashgantapis respetanquiman.
Pilamanpis interesado cashgayquita manaraj niptiqui, puntata disimuladula shumaj ricapänayqui. (7 y 8 parrafucunata ricay).
9. ¿Imapitataj quiquiqui convencido caycanquiman pilamanpis interesado caycashgayquita ninayquipaj?
9 Pilatapis ricapaycarga, ¿ayca tiemputaj pasanman payman interesado cashgayquita ninayquipaj? Shumajraj mana reguir jucla ima sientishgayquita niptiquega, mana tantiacoj runatanochi ricashunqui (Prov. 29:20). Pero, cuentata gocuptin payman interesado cashgayquita y achca tiemputaraj shuyaranqui ninayquipaj noviayqui cananpaj, capaz yarpanman mana seguro cashgayquita (Ecl. 11:4). Cayman yarpay, pilamanpis interesado cashgayquita ninayquipäga manami convencidurächu canayqui paywan casacunayquipaj. Ichanga quiquiqui convencido caycanquiman preparado cashgayquita casacunayquipaj y capazchi payga ali maja canman gampaj.
10. ¿Imataraj ruranquiman pilapis gamman interesado caycashganta ricaptiqui y gamga paywan imatapis munanquichu?
10 ¿Imataraj ruranquiman gamman pilapis interesado caycashganta ricaptiqui? Gam paywan imatapis mana munaptiquega, rurayniquicunacho chayta claro ricachicunquiman. Chayta mana rurarga, capaz yarpanman gampis payman interesado cashgayquita, y chayno mana captenga laquicuypämi canman (1 Cor. 10:24; Efes. 4:25).
11. ¿Imatataj waquin naciuncunacho ruran pipis casacuyta munaptin pero imataj cuentaman churanman?
11 Waquin naciuncunacho soltero cajpa taytancuna o mayor caj familiancuna acrapäcun piwan casacunanpaj. Y waquin sitiucunachoga familiancuna o amiguncuna ashipan, nircur imalatapis ruran ishcancuna reguinacärinanpaj. Pilapis chayta ruranapaj nimaptinchega, ishcancuna ima munashganta y ima necesitashgantapis cuentaman churashwan. ¿Imaraj canman yarpaptinchi juc amigunchipaj o castanchipäpis juc ali majata tarishgana carga? Chayno captenga, shumajraj reguinanchi imano comportacushganta, imano runa o warmi cashganta y Diosta sirvishganchopis imano cashganta. Jehovawan amigo cayga ayca guellaypitapis o ima yachashganpitapis más ali caycan. Pero ama gongashunchu, quiquin solterucuna acrapäcunman piwan casacunanpaj cajta (Gál. 6:5).
IMANOTAJ PIWANPIS REGUINACUR GALAYCUNQUIMAN
12. Piwanpis reguinacuyta munarga, ¿imataj ruranquiman?
12 Pilamanpis interesado caycar y reguinacuyta munarga, ¿imataraj ruranquiman? d Capaz runacuna cashgancho ishcalayqui parlapacunquiman, telefunupa gayanquiman o videupapis. Claro niriy payman interesado cashgayquita y maslata reguiyta munashgayquitapis (1 Cor. 14:9). ‘Yarpachacushärämi’ nishuptiquega, shuyarcunquimanmi (Prov. 15:28). Y ‘mana’ nishuptiquega, ima sientishganta respetanquiman.
13. ¿Imataraj ruranquiman pipis nishuptiqui gamman interesado caycashganta? (Colosenses 4:6).
13 ¿Imataraj ruranquiman pipis nishuptiqui gamman interesado caycashganta? Yarpay alaparaj valurcharcushganta ima sientishganta nishunayquipaj, chaymi ali shimilapa y respetuwan tratanquiman (leiriy Colosenses 4:6). Shumaj yarpachacuytaraj munaptiquega, chayta claro ninayqui. Pero alapa tiempo pasanantaga ama jaguiychu (Prov. 13:12). Paywan imatapis mana munaptiquega, ali shimilapa y claro ninayqui. Austriapita Hans jutiyoj cristianutash juc cristiana nergan maslata reguiyta munashganta, Hans cayno wilacun: “Ali shimilapa y respetuwan tantiachergä payman interesado mana cashgäta. Y chayta ruranäpaj alapa tiempo pasananpaj manami jaguishgächu. Chaypita cuidacurgänami hermanacunata imano tratanäpaj”. Pero gampis payman interesado caycaptiquega ima sientishgayquita ninayqui y reguinacunayquipaj tiempupis imano cananpaj parlapacunquiman. Öraga maycho winashga cashgayquiraycu o costumbriraycurpis ima munashgayquega jucno canman.
¿IMANOTAJ SOLTERUCUNATA YANAPASHUN?
14. Solterucunata yanapayta munarga, ¿imataj rurananchi?
14 ¿Imatataj rurananchi casacuyta munaj solterucunata yanapänapaj? Cuidananchi ima parlashganchicunata (Efes. 4:29). Cay tapucuycunaman yarpachacushun: “¿Asipächu casacuyta munajcunata? Juc soltera juc solteruwan parlaycashganta ricar, ¿‘paycuna carcaycannami’ nishwanchuraj?” (1 Tim. 5:13). Jina japalanla caycaj solterucunata ama nishwanchu casaracuptinraj más cushishga o ali caycänanpaj. Näga parlashganchi Hans cristiano cayta wilacun: “Waquin hermanucuna nishunqui ‘¿imanirtaj mana casacunquichu?, auquiyaycanquina o casacunayquipaj edäniquipis pasaycanna’. Chayno pipis nishuptiquega, alapa valuryoj mana cashganchita sientichimanchi y masraj yarpachacächimanchi casacunapaj”. Chaytaga rurashwanchu, sinoga ima nishganchiwan solterucunata imaypis shacyaycächishun (1 Tes. 5:11).
15. 1) Romanos 15:2 nishganno, ¿imatataj cuentaman churananchi pilatapis novianta ashipayta munarga? (Fotutapis ricay). 2) ¿Ima ninquimantaj ricashgayqui videupita? (Ichic wilacuyta ricay).
15 ¿Imaraj canman ‘chay cristiano tagay cristianawan noviucunano ali ricacunman’ nir yarpaptiqui? Bibliaga yachachicun waquincuna ima sientishganta cuentaman churanapaj (leiriy Romanos 15:2). Achca solterucuna mana munanchu novianta ashipänanta, ni pilatapis reguichinanta. Chauraga ima munashgancunata respetananchi (2 Tes. 3:11). Waquincuna ichanga capaz munanman imanolapapis yanapänapaj, pero chayta rurashwan paycuna nimaptinchiraj (Prov. 3:27). e Y waquincunaga disimuladula yanapänapaj munan. Alemaniapita Lydia jutiyoj soltera cristiana nin: “Capaz waquincunawan imalatapis rurar chay hermanuta y chay hermanatapis invitanquiman chaycho reguinacunanpaj y quiquinpitanami canga nircur ima pasananpaj cajta”.
Waquincunawan imalatapis rurarmi solterucuna pilatapis reguiyta puedin. (15 caj parrafuta ricay).
16. ¿Imataj solterucuna gonganmanchu?
16 Casado o soltero caycarpis lapanchi cushishga cawacuyta puedinchi (Sal. 128:1). Casacuyta munar, pero pï majayqui manaraj tarishgayqui carga Jehovata sirvir ocupado caycanquiman. Macao marcapita Sin Yi jutiyoj cristiana nin: “Paraisucho majayquiwanga imaycamapis cawacunquipaj. Pero soltero cashgayquega walca tiempulami caycan. Chaymi japalayqui cashgayquita shumaj provechanquiman”. Pero, ¿imaraj canman pilatapis tarishgana captiqui y paywan reguinacuycaptiqui? Gatejnin yachachicuycho ricashun imata ruranquiman noviucuna cashgayqui wichan Dios munashganno cananpaj.
137 CAJ CANCIÓN Diosta cuyaj warmicuna
a Cay yachachicuyta leinquiman jw.org paginapita “Ser novios. Parte 1: ¿Estoy listo para salir con alguien”.
b MASLATA TANTIARCUNAPAJ: Cay yachachicuycho y gatejnin yachachicuychopis noviucunano reguinacuypita parlaptenga, parlaycämun juc cristiano juc cristianawan más reguinacärinanpaj. Nircurna paycuna decidipäcunga casacunanpaj o manapis. Noviucunano reguinacuyta galaycun ishcancuna jucnin jucninman interesado caycaptin, y tiempuwanna decidipäcun noviucunano manana cananpaj o casacunanpäpis.
c Waquin juticuna trucachishga cargan.
d Waquin naciuncunachoga olgu cajmi warmita nin payman interesado caycashganta. Pero waquin naciuncunachoga warmi cajmi chayta ruran. Ishcancuna rurashganga alimi (Rut 3:1-13). Caypita maslata musyanayquipaj, cayta leiriy: “Los jóvenes preguntan. ¿Cómo le digo lo que siento por él?”, de la ¡Despertad! del 22 de octubre de 2004.
