21. ČLANKO PROUČIBASE
ĐILI 107 Mothov mangipe sar o Devel
Sar šaj te arakhe tuće bračno drug?
Ko ka arakhi šukar romni? Oj vredini pobuter ando biserija (POSL. 31:10)
SO KA SIKLJOVA?
Ka vaćera ando biblijake načelija kola ka pomožinen nekase te arakhi pese šukar bračno drug hem sar avera ki skupština šaj te pomožinen okolenđe kola mangena te khuven ko brak.
1-2. (a) Sostar valjani te razmislinen o hrišćanija angleder te khuven ki veza? (b) So značini te ove ki „veza“? (Dikh o „Objasnime lafija“.)
DA LI bi mangeja te khuve ko brak? Iako o brak nane uslov neko te ovel bahtalo, but phralja hem phenja, bilo te oven terne ili ko berša, jedva ađićerena te khuven ko brak. Naravno, angleder te khuve ki veza, valjani te ove spremno ko duhovno, finansijsko hem emocionalno pogled (1. Kor. 7:36). a Ako hijan spremno, tegani tani pobari mogućnost so ka ovel tut bahtalo brak.
2 Ama, nane uvek lokho te arakhi pe šukar bračno drug (Posl. 31:10). Čak hem te arakhe nekas kasa mangeja pošukar te upoznajine tut, nane lokho te počmine veza. b Ko akava članko ka vaćera so šaj te pomožini nekase te arakhi pese šukar bračno drug hem te počmini veza. Isto ađahar, ka dikha sar šaj avera ki skupština te pomožinen okolenđe kola mangena te khuven ko brak.
SO ŠAJ TE POMOŽINI TUĆE TE ARAKHE ŠUKAR BRAČNO DRUG?
3. Sostar valjani te razmislini jekh phral ili jekh phen angleder te khuvel ki veza?
3 Ako mangeja te khuve ko brak, najšukar tano angleder te đane savo mangeja te ovel to bračno drug. Ako ćereja odova, tu na ka propustine disavi šukar prilika ili na ka khuve ki veza nekasa ko nane šukar tuće. Te šaj te khuve ki veza nekasa, odija osoba valjani te ovel krstimi (1. Kor. 7:39). Ama, odova so neko tano krstimo na značini so ka ovel šukar bračno drug. Odolese, šaj te puće tut: „Kola ciljija isi man ko životi? Kola osobine mo bračno drug mangava te ovel le? Da li tane me očekivanja razumna?“
4. Aso so disave molinđe pe?
4 Ako mangeja te khuve ko brak, sigurno molinđan tut e Jehovase aso odova (Fil. 4:6). Naravno, o Jehova na obećini so ka arakhi tuće bračno drug. Ama, ov brinini pe ando te potrebe hem te osećanja hem šaj te pomožini tut đi rodeja tuće bračno drug. Odolese, hem ponodri vaćer lese te želje hem sar osetineja tut (Ps. 62:8). Molin tut aso strpljenje hem mudrost (Jak. 1:5). O Džon, c jekh phral andi Amerika phenela aso so molini pe. Ov phenela: „Me vaćerava e Jehovase kola osobine mangava te ovel la mi romni. Isto ađahar, molinava man te ovel man prilika te upoznajinav nekas. Ando Jehova rodava te pomožini man te razvijinav o osobine kola ka pomožinen man te ovav šukar rom.“ I Tanja, jekh phen andi Šri Lanka, phenela: „Đi rodava nekas ko šaj te ovel mo bračno drug, ando Jehova rodava te pomožini man te aćhovav verno, pozitivno hem te ovav bahtali.“ Ako pana na arakhljan tuće rome ja romnja, o Jehova obećini tuće so hem ponodri ka brinini pe ando te fizička hem emocionalna potrebe (Ps. 55:22).
5. Ked okola kola tane kokri šaj te upoznajinen nekas ko mangela e Jehova? (1. Korinćanima 15:58; dikh i slika)
5 I Biblija podstaknini amen „uvek te ćera buti e Jehovase“. (Čitin 1. Korinćanima 15:58.) Ako hijan zaokupimo ki služba e Jehovase hem družineja tut različito phralencar hem phenjencar, na samo so ka uživine nego hem ka ovel tut prilika te upoznajine okolen kola tane kokri hem kola sar tute dena sa pestar te služinen e Jehovase. Đi trudineja tut te de to najšukar e Jehovase, tu ka ove but bahtalo.
Ako trudineja tut te de sa tutar ki služba hem družineja tut različito phralencar hem phenjencar, tegani šaj te upoznajine averen kola mangena te khuven ko brak (Dikh o 5. odlomko)
6. So okola kola tane kokri na valjani te bistren đi rodena bračno drug?
6 Ama, pazin i najvažno buti ko to životi te na ovel te rode tuće bračno drug (Fil. 1:10). To bahtalipe na zavisini ando odova da li hijan ko brak ili hijan kokri, već ando to amalipe e Jehovaja (Mat. 5:3). Đi pana hijan kokri, isi tut pobari sloboda te proširine ti služba (1. Kor. 7:32, 33). Odolese, trudin tut so pošukar te koristine to vreme. I Džesika, jekh phen andi Amerika koja lelja pese rome ked hine la oko 40 berš, phenela: „Angleder te khuvav ko brak, pobaro deo ando mo vreme koristinđum te đav ki služba. Odova pomožinđa maje te ovav zadovoljno, iako mangljum te khuvav ko brak.“
ODVOJIN VREME TE POSMATRINE E OSOBA
7. Sose tano mudro te posmatrine disave osoba angleder te phene laće so osetineja premalo late? (Poslovice 13:16)
7 So ako mislineja so jekh osoba šaj te ovel tuće šukar bračno drug? Da li valjani odmah te phene laće so osetineja premalo late? I Biblija phenela so o mudro manuš razmislini angleder diso te ćerel. (Čitin Poslovice 13:16.) Odolese, bi ovela mudro disavo vreme neprimetno te posmatrine odola osoba, angleder so pheneja laće so osetineja premalo late. O Ešvin andi Holandija, phenela: „O osećanja šaj sigate te razvijinen pe, ama hem sigate te našalđon.“ Odolese, ked odvojineja vreme te posmatrine nekas, tu na ka počmine veza samo sebepi te osećanja kola šaj te našalđon. Isto ađahar, đi posmatrineja disave osoba šaj ka haljove so oj na ka ovel tuće šukar bračno drug.
8. Sar šaj neko koj tano kokri te posmatrini disave osoba? (Dikh i slika.)
8 Sar šaj te posmatrine disave osoba, a oj te na primetini odova? Ko sastankija hem ko druženja šaj te zapazine disave buća olatar. Na primer, savi tani olaki duhovnost? Savi osoba tani hem sar ponašini pe? Koj tane olake amala? Sostar vaćeri? (Luka 6:45). Da li isi tumen slična ciljija? Isto ađahar, šaj te vaćere olake starešinencar ja dijekhe zrelo hrišćaneja kova šukar penđari la (Posl. 20:18). Šaj te puće len ko savo glaso tani hem save osobine isi la (Ruta 2:11). Đi ka posmatrine la, trudin tut te na ćere diso so ka ćhivel la te osetini pe neprijatno. Poštujin olake osećanja hem olaki privatnost.
Angleder so ka puće e osoba asi veza, jekh vreme posmatrin la (Dikh o 7. hem o 8. odlomko)
9. Ko so valjani te ove uverimo angleder so vaćereja disave osobaće so osetineja premalo late?
9 Kobor valjani te posmatrine disave osoba angleder so pheneja laće so osetineja premalo late? Ako odmah pheneja laće, oj šaj te mislini so tu na leja dovoljno vreme te razmisline angleder so aneja odluke (Posl. 29:20). A ki aver strana, ako previše ađićereja, a i osoba haljilji so osetineja diso premalo late, oj šaj te mislini so tu previše ađićereja angleder te ane disave odluke (Prop. 11:4). Ma bistri, angleder te vaćere e osobaja, na valjani te misline so odmah ka venčine tut olaja. Ama, valjani te ove uverimo so hijan spremno aso brak hem so odija osoba šaj te ovel tuće šukar bračno drug.
10. So valjani te ćere ako haljiljan so neko mangela te upoznajini pe tuvaja?
10 So valjani te ćere ako haljiljan so neko mangela te upoznajini pe tuvaja? Ako na mangeja te khuve ki veza, tegani jasno mothov odova odola osobaće. Ne bi ovela šukar te ćhive e osoba te mislini so mangeja te ove ki veza, a u stvari na mangeja (1. Kor. 10:24; Ef. 4:25).
11. So na valjani te bistre ako pomožineja nekase te khuvel ki veza ja ko brak?
11 Ko disave phuvja, ando roditeljija ili andi disavi aver odraslo osoba očekujini pe te birinen bračno drug okolenđe kola tane kokri. Ko avera phuvja, i porodica ili o amala arakhena bračno drug e osobaće koja tani kokri hem palo odova organizujinena odova ćhavo hem odija ćhaj te upoznajinen pe hem te dikhen da li pasujinena jekh jekhese. Ako neko pućela tut te pomožine nekase te khuvel ki veza ja ko brak, razmislin so mangela odija ćhaj ili odova ćhavo hem so valjani lenđe. Ako mislineja so nesavi osoba šaj te ovel šukar bračno drug te amalese ili te rođakose, prvo valjani šukar te upoznajine odola osoba, te đane olake osobine hem soj tano najvažno te đane da li tani paše e Jehovaja. Olako amalipe e Jehovaja tano but považno ando pare, obrazovanje ili disavo položaj. Ama, ma bistri so ko krajo odova phral hem odija phen valjani te odlučinen da li ka len pe (Gal. 6:5).
SAR ŠAJ TE POČMINE VEZA?
12. Sar šaj te phene e osobaće so mangeja te khuve ki veza olaja?
12 Ako mangeja nekasa te khuve ki veza, sar šaj te phene odova odola osobaće? d Šaj te dogovorine tut odola osobaja te resen tumen ko disavo javno than ja te vaćeren prekalo telefoni. Jasno vaćer kola namere isi tut (1. Kor. 14:9). Ako valjani, de la vreme te razmislini odolestar (Posl. 15:28). Ako na mangela te khuvel ki veza, prihvatin odova.
13. So šaj te ćere ako jekh osoba phenela tuće so sviđineja tut olaće? (Kološanima 4:6)
13 So ako jekh osoba phenela so sviđineja tut olaće? Ma bistri so verovatno valjanđa laće bari hrabrost te phenel tuće odova. Odolese, ov ljubazno hem mothov laće poštovanje. (Čitin Kološanima 4:6.) Ako valjani tuće vreme te razmisline da li te khuve ki veza, vaćer laće odova. Ama, ma odugovlačin već sigate odgovorin laće (Posl. 13:12). Ako na mangeja te khuve ki veza, vaćer laće odova. Ama, đi ćereja odova, ov ljubazno hem jasno. O phral Hans andi Austrija, phenđa so vaćerđa jekha phenjaće koja pućlja le te ovel olaja ki veza. Ov phenela: „Me vaćerđum laće mi odluka ljubazno hem jasno. Odmah ćerđum odova sose na mangljum te dav la lažno nada. Isto ađahar, pazinđum sar ka ponašinav man olaja palo odova.“ Ki aver strana, ako mangeja te khuve ki veza, vaćer e osobaće so osetineja premalo late hem sar mangeja te izgledini tumari veza. Šaj ka dikhen so na očekujinena ista buća. Ama, odova ma te iznenadini tut sose i kultura hem avera buća šaj te utičinen ko odova savo stav isi le neko premali veza.
SAR ŠAJ AVERA TE PODRŽINEN OKOLEN KOLA NANE KO BRAK?
14. Sar šaj amare lafencar te pomožina okolenđe kola pana na khuvđe ko brak?
14 Sar šaj te podržina okolen kola mangena te khuven ko brak? Ađahar so ka pazina so ka vaćera (Ef. 4:29). Šaj te puća amen: „Da li zadinava okolen kola mangena te khuven ko brak? Ked dikhava so jekh phral hem jekh phen kola nane ko brak vaćerena, da li odmah mislinava so isi diso maškaro lende?“ (1. Tim. 5:13). Amen niked na valjani te ćhiva jekha osoba koja tani kokri te mislini so diso falini laće odolese so pana na khuvđa ko brak. O Hans, kole angleder pominđam, phenela: „Disave phralja phenena: ’Sose pana na ženinđan tut? Đelje te berša.‘ Asavke lafija ćhivena okolen soj tane kokri te mislinen so avera na ceninena len hem samo ćerena lenđe pritisak so mora te khuven ko brak.“ Odolese, but tano pošukar te rode diso so šaj te pohvaline ko okola kola pana na khuvđe ko brak (1. Sol. 5:11).
15. (a) Premalo načelo ando Rimljanima 15:2, sostar valjani te razmislina angleder te pomožina nekase te arakhi pese bračno drug? (Dikh i slika.) (b) So sikljiljan ando video?
15 So ako mislinaja so jekh phen hem jekh phral bi ovena šukar par? I Biblija phenela so valjani te razmislina ando averenge osećanja. (Čitin Rimljanima 15:2.) But osobe kola nane ko brak na mangena avera te upoznajinen len nekasa hem amen valjani te poštujina olenge želje (2. Sol. 3:11). Avera bi šaj ceninena disavi pomoć, ama na valjani te mešina amen ako na pućlje amen (Posl. 3:27). e Disave šaj na mangena te upoznajinen pe ko asavko način. I Lidija, jekh phen andi Nemačka, phenela: „Šaj te ćere disavo druženje kuri šaj te aven but phenja hem phralja. Tu ćer prilika te upoznajinen pe, a olen mukh kokri te odlučinen so ka ćeren.“
Ked hijan ko disavo druženje kuri isi but manuša, tegani šaj te ovel tut prilika te upoznajine nekas (Dikh o 15. odlomko)
16. So na valjani te bistren okola soj tane kokri?
16 Sare amen šaj te ova bahtale hem zadovoljna bilo te ova kokri ja ko brak (Ps. 128:1). Odolese, ako mangeja te khuve ko brak, a pana na arakhljan tuće nekas hem ponodri de sa tutar te služine e Jehovase. Jekh phen kotar Makao koja vićini pe Sin Ji phenela: „Ako uporedineja o vreme kova šaj te ove te romeja ko raj, ka dikhe so o vreme kova akana hijan kokri tano but kratko. Odolese, cenin odova vreme hem šukar koristin le.“ Ama, so ako arakhljan nekas ko šaj te ovel to bračno drug hem mangeja te khuve ki veza? Ko aver članko ka vaćera odolestar sar šaj te ane mudra odluke ked hijan ki veza.
ĐILI 137 Amare verna phenja
a Te šaj te đane da li hijan spremno te khuve ko brak, ko amaro sajt jw.org dikh o članko „Zabavljanje (1. deo): Da li sam spreman za zabavljanje?“
b OBJASNIME LAFIJA: Ko akava hem ko aver članko o lafi „veza“ odnosini pe ko period ked jekh murš hem jekh đuvli mangena pošukar te upoznajinen jekh jekhe te šaj te dikhen da li bi ovena šukar rom ja romni jekh jekhese. Ko disave phuvja, akava lafi odnosini pe ko period ando zabavljanje ja ko period ked upoznajinena pe. I veza počmini ked jekh murš hem jekh đuvli phenena so sviđinena pe jekh jekhese hem osetinena diso jekh premalo aver. Odova trajini sa đi na odlučinena te khuven ko brak ja te raskininen.
c Disave anava tane menime.
d Ko disave kulture ja phuvja, o phral pućela e phenja asi veza. Ama, isto ađahar hem i phen šaj te pućel e phrale asi veza (Ruta 3:1-13). Ako mangeja pobuter te đane, dikh o članko „Kako da mu kažem šta osećam prema njemu?“ ko Probudite se! ando 22. oktobar 2004. berš.
e Ko amaro sajt jw.org dikh o video „On šukar borinena pe asi pi vera – Okola so nane ko brak“.
