ᲝᲒᲣᲠᲐᲤᲐᲚ ᲡᲢᲐᲢᲘᲐ 21
ᲝᲑᲘᲠᲔᲨᲘ 107 ღორონთ — ჸოროფაშ მაგალით
მუჭო შეილებ გორე მომავალ მეუღლე?
„მის აგორე ჯგირ ოსურ? მარჯანშე ბრელით ძვირფას რე თინა“ (ᲘᲒᲐᲕ. 31:10).
ᲛᲘᲖᲐᲜ
გუვარჩიენთ ბიბლიურ პრინციპეფს, ნამუთ დაუქორწინებელ ქრისტიანეფს მეხვარებ, დოგორან ჯგირ მეუღლე. ჩიება მაღვენუნა თიშე ხოლო, მუჭო შეულებუნა შხვეფს, მეხვარან თინეფს, მით დაოჯახებას ფიქრენა.
1, 2. ა) მუშე ოკო დეფიქრას დაუქორწინებელ ქრისტიანქ, ონდო მიდგაინწკუმა ურთიერთობას დიჭყანს? ბ) მუს ნიშნენს გაჩინებაფაშ პერიოდ? (ქოძირით „განმარტება“).
ᲛᲐᲠᲗᲐᲚ რე, ნამდვილ ბედნერობა ხვალე ქორწინებაშა ვა რე დამოკიდებულ, მარა ნამთინე ქრისტიანს, ახალგაზრდა იჸინ დოვარ უნჩაშ ასაკიშ, ოკო დაქორწინება. სი ხოლო ხომ ვა ფიქრენქ დაოჯახებას? თაშ ქორენ-და, ონდო თე მიზანით მიდგაინწკუმა ურთიერთობას დიჭყანქ, ფინანსურო, სულიერო დო ემოციურო მზათ ოკო რდე ქორწინებაშო a (1 კორ. 7:36). თაშ ქიმიქციებუქ-და, უმოს რე შანს, ნამდა ბედნერ ოჯახიქ ქუგაღვენუას.
2 მარა, სი მზათ რდენჷ ხოლო, ირო ვა რე ადვილ თიცალ ადამიანიშ გორუა, მით ჯგირ მეუღლე იჸუაფ სქანო (იგავ. 31:10). თიმწკუმა ხოლო, მუჟამსით ქოძირუნქ თეცალ პიროვნებას, შილებე ვეჸუას ადვილქ ნაბიჯიშ გინოდგუმაქ დო ურთიერთობაშ დოჭყაფაქ. b ათეშენ, თე სტატიას გუვარჩიენთ, მუ მეხვარებ დაუქორწინებელ ქრისტიანეფს, დოგორან მომავალ მეუღლე დო ქიდიჭყან ურთიერთობა. ჩიება მაღვენუნა თიშე ხოლო, მუჭო შეულებუნა შხვა ქრისტიანეფს, ხუჯ ქუდუკინან თინეფს, მით დაქორწინებას ფიქრენა.
ᲛᲣ ᲛᲘᲒᲔᲮᲕᲐᲠᲔᲑ ᲯᲒᲘᲠ ᲛᲔᲣᲦᲚᲔᲨ ᲒᲝᲠᲣᲐᲡ?
3. მუშე ოკო დეფიქრას ქრისტიანქ, ნამუთ დაოჯახებას ფიქრენს?
3 დაოჯახებას ქოფიქრენქ-და, ონდო მიდგაინწკუმა ურთიერთობას დიჭყანდე, დიო ნაფიქრებ ოკო გაფუდას, მუნერ გოკო რდასჷ სქან მეუღლე. თაშ ვეჸუ-და, შილებე ქეშეხვადე თიცალ პიროვნებას, ნამუთ გვალო ჯგირ მეუღლე იჸუაფუდ სქანო, მარა სი შურო ვემკაჯინე ვარდა ხოლო შილებე თიცალწკუმა ქიდიჭყე ურთიერთობა, ნამუთ ვა რე სასქანო. შურო ორაგადე ვა რე, ნამდა მომავალ მეუღლე ნათილ ქრისტიანეფ შქას ოკო გორე (1 კორ. 7:39). მარა პიროვნება ნათილ რენ თენა, შუროთ ვა ნიშნენს, ნამდა იშენდოიშენ ჯგირ მეუღლე იჸუაფ სქანო. ათეშენ, დეფიქრ: მუ მიზნეფ მიღჷ? მუ თვისებეფ მოკო უღუდას ჩქიმ მომავალ მეუღლეს? ქორენო ჩქიმ მოთხოვნეფ რეალურ?
4. მუშე ლოცულენს ნამთინე დაუქორწინებელ ქრისტიან?
4 რახანს დაქორწინება გოკო, ალბათ თე საკითხშე ლოცულენდენ იჸი (ფილ. 4:6). მუშო ოკო რაგად, იეჰოვა პირობას ვარზენს მუშ მსახურეფს, ნამდა აუცილებერო დოგორუნა მეუღლეს. მარა თიშო არძაართ ვა რე სქან საჭიროებეფ დო გრძნობეფ, ათეშენ ირნერო მიგეხვარებ მეუღლეშ გორუას. თაშ ნამდა, გურ გეგნუფაჩ თის დო ალალას ქეჩი, მუ გოკო დო მუს გინაფლენქ (ფსალმ. 62:8). ქოთხი მოთვინება დო სიბრძნე (იაკ. 1:5). ამერიკას მახორუ ართ დაუქორწინებელ ჯიმა, სახელო ჯონ, c მირაგადუნა, მუს ურაგად იეჰოვას ლოცვას: „იეჰოვას ვეჩიებუქ, მუ თვისებეფ მოკო უღუდას ჩქიმ მომავალ მეუღლეს დო ბლოცულენქ, ნამდა თეცალ პიროვნებაწკუმა შეხვალამაშ სიტუაციაქ ქუმაშუას. იეჰოვას თის ხოლო ფთხინქჷ, ნამდა ქიმმეხვარას თიცალ თვისებეფიშ გავითარებას, ნამუთ ჯგირ ქომონჯის ოკო უღუდას“. ართ და, ტანია, ნამუთ შრი-ლანკაშე რე, იჩიებ: „იეჰოვას ფთხინქჷ, ქიმმეხვარას, ვა ვოდინუე ართგურობა, დადებით განწყობა დო ხიოლ, ონდო მომავალ მეუღლეს შეფხვადუქ“. შილებე სი ელუქინ თიშმამალას ვეშეხვადე თიცალ პიროვნებას, მით ჯგირ მეუღლე იჸუაფ სქანო, მარა რჯერდას, იეჰოვა ქიზრუნენს სქან ფიზიკურ დო ემოციურ საჭიროებეფშე (ფსალმ. 55:22).
5. მუჟამ შილებე დაუქორწინებელ ქრისტიანეფქ შეხვადან ართიანს? (1 კორ. 15:58; ქოძირით სურათ).
5 ღორონთიშ სიტყვა ელამჩანა, ნამდა ბრელ იფხანდათ უფალშო (წეკითხით 1 კორინთელეფიშ 15:58). იეჰოვაშ მსახურებათ ქიჸიქ დაკავებულ დო ბრელ და დო ჯიმაწკუმა ქუგაღვენუ ურთიერთობა-და, შილებე უმოსო ქეშეხვადე თიცალ დაუქორწინებელ თანაქრისტიანეფს, მიდგას სქანცალო იეჰოვაშ მსახურება პირველ ადგილშა გეურენა. სქან დრო დო ენერგიას ღორონთიშ მსახურებაშო გეგმირინუანქ-და, ნამდვილ ბედნერობას ქიგინანქ.
იეჰოვაშ მსახურებათ ქიჸიქ დაკავებულ დო ბრელ და დო ჯიმაწკუმა ქუგაღვენუ ურთიერთობა-და, უმოსო შილებე ქეშეხვადე თიცალ თანაქრისტიანეფს, მიდგას, სქანცალო დაქორწინება ოკონა (ქოძირით აბზაც 5)
6. მუ ოკო შუდან დაუქორწინებელ ქრისტიანეფს?
6 მარა ფრთხილას ოკო რდე, ნამდა მთელ ყურადღება მეუღლეშ გორუაშა ვა გაფუდას გინოღალირ დო სქან ცხოვრებას თექ ვედეკინას მთავარ ადგილ (ფილ. 1:10). რშუდას, ნამდვილ ბედნერობა იეჰოვაწკუმა ურთიერთობაშა რე დამოკიდებულ დო ვართ ხოლო თიშა, დაქორწინებულ რექჷ დო ვარ (მათ. 5:3). დაუქორწინებელ ქრისტიანს უმოსო შეულებ, ბრელ იხანდას ღორონთიშ საქმეს, ათეშენ ჭკვერულო გეგმირინე სქან დრო (1 კორ. 7:32, 33). ართ ამერიკელ და, ჯესიკა, ნამუთ სოდგარენ 40 წანერ რდჷ, მუჟამსით დექორწინ, იჩიებ: „მოკოდ დაქორწინება, მარა ონდო მომავალ მეუღლეს შეფხვადუდ, მთელ ყურადღება იეჰოვაშ მსახურებაშა მაფუდ გინოღალირ, მუდგას კმაყოფილება მოუღუდ ჩქიმდა“.
ᲯᲒᲘᲠᲝ ᲥᲘᲓᲔᲙᲕᲘᲠ
7. მუშენ რე ჭკვერულ ჯგირო დაკვირება, ონდო მიდგაინს უწინქ, ნამდა მორწონს? (იგავ. 13:16).
7 მუჭო ოკო მიქცუე, მუჟამსით ქეშეხვადუქ თიცალ პიროვნებას, მიდგაშეთ ფიქრენქ, ნამდა ჯგირ მეუღლე იჸუაფ სქანო? უცფას ოკო უწუენიო, ნამდა მორწონს? მუჭოთ ბიბლიაშე ბგებულენთ, ჭკვერ კოჩ, ონდო მუდგაინს გაკეთენდას, დიო ფიქრენს (წეკითხით იგავეფიშ 13:16). თაშ ნამდა, ჭკვერულ იჸუაფ, დიო ჯგირო ქიდეკვირე თი პიროვნებას, ონდო მუდგაინს უწინქ. ართ ნიდერლანდელ ჯიმა, ეშვინ, იჩიებ: „მიდგაინიშ მიმართ რომანტიკულ გრძნობეფქ შილებე ხეთეშე გოირჩქინდას დო ქოთ ხეთეშე მეიდინას. ათეშენ, პიროვნებას ჯგირო ქიდეკვირებუქ დო ხეთე ვემოქმედენქ-და, თენა მიგეხვარებ, ვეიაჸუნე ემოციეფს“. ჯგირ დაკვირებაშ შედეგო შილებე თის ხოლო ქიმეხვადე, ნამდა თი პიროვნებაქ, მიდგაქ მიგეწონ, შილებე შუროთ ვეჸუას სქანო ჯგირ მეუღლექ.
8. მუჭო შეილებ უმოს გეგე თი პიროვნებაშ გურშენ, მით მორწონს? (ქოძირით სურათ).
8 კრებას ვარდა მეგობრულ შეხვალამეფს შილებე ქუმგაჩას საშვალებაქ, ჯგირო ქიდეკვირე თი პიროვნებას, მით მორწონს. შილებე თეცალ დროს ქოძირე, მუჭო იქციებ, მუნერ ხასიათიშ რე დო ქორენ დო ვარ სულიერო მოწიფულ პიროვნება. ქოძირუნქ, მი რენა თიშ მეგობრეფ, მუ საკითხეფშენ იჩიებ დო ქოიღუნან დო ვარ ართნერ მიზნეფ (ლუკ. 6:45). თეს გეძინელ, შეილებ თიშ კრებაშ უხუცესეფს ვარდა სულიერო მოწიფულ თანაქრისტიანეფს, მით ჯგირო იჩინენა თის, ქოკითხე, მუნერ რეპუტაცია დო თვისებეფ უღჷ (იგავ. 20:18; რუთ. 2:11). მარა ფრთხილას რდა, ნამდა დაკვირებაშ პერიოდის დუდ უხერხულო ვაგინაფუე. პატი ქოცჷ თიშ გრძნობეფს, გვალო ირფელ ვეგთიკითხა თიშ პირად ცხოვრებაშ გურშენ დო ქეცად, ირიათო თექ ვა რდე, სოდეთ თინა რე.
ონდო ურთიერთობაშ დაჭყაფალო ნაბიჯის გინოდგუნქ, ჯგირო ქიდეკვირ პიროვნებას (ქოძირით აბზაცეფ 7, 8)
9. მუშა ოკო რდე დარწმუნებულ, ონდო მიდგაინს უწინქ, ნამდა მორწონს?
9 მუზმა ხანს ოკო გეგრძელას დაკვირებაქ? მორწონსინ თი პიროვნებაშა ხეთეშე ქიმურქ-და, შილებე იფიქრას, ნამდა ემოციეფს ეჸუნქ დო უდუფიქრებუო ღებულენქ გადაწყვეტილებეფს (იგავ. 29:20). მარა ვართ ბრელ დროშ ღალა რე ჯგირ, განსაკუთრებულო თიმწკუმა, მუჟამსით მეხვალამირ რე, ნამდა მორწონს, მუშენდა თაშ ქიმიქციებუქ-და, შილებე იფიქრას, ნამდა გიჭირს გადაწყვეტილებეფიშ მეღება (ეკლ. 11:4). ონდო თიშა ქიმურქ დო სქან გრძნობეფიშ გურშენ ეჩიებუქ, აუცილებერ ვა რე, დარწმუნებულ რდე, ნამდა თე პიროვნება იჸუაფ სქან მეუღლე. მთავარ რე, თიშა რდე დარწმუნებულ, ნამდა მზათ რექჷ დაოჯახებაშო დო მიგორჩქუდას, ნამდა თინა ჯგირ მეუღლე იჸუაფ სქანო.
10. მუ ოკო აკეთე, მუჟამსით მიდგაინს მოწონქ, მარა სი ვაილამ თიწკუმა ურთიერთობაშ დოჭყაფა?
10 მორთ ასე თიშე ქიფჩუათ, მუ ოკო აკეთე, მუჟამსით გინაფლენქ, ნამდა მიდგაინს მოწონქ. თეცალ გრძნობა თიშ მიმართ სი ვაიღუნ-და, სქან საქციელით ქიმიოხვამილე. მანგარ გლახა იჸი, სქან მოქმედებეფით პიროვნებას იმენდ გურჩქინე, მუჟამსით შუროთ ვაილამ თიწკუმა ურთიერთობაშ დოჭყაფა (1 კორ. 10:24; ეფეს. 4:25).
11. მუ ოკო გეთვალისწინან თი კულტურას, სოდეთ ძღაბ დო ბოშიშ გარიგება მეღებულ რე?
11 ნამთინე კულტურას დაუქორწინებელ პიროვნებას მშობლეფ, ნათესეეფ ვარდა მეგობრეფ უგორუნა მომავალ მეუღლეს დო შეიოხვამილუანა ართიანს. მიდგაინქ გარიგება თქვა ხოლო ქორთხის-და, გეთვალისწინით ჟირხოლო მხარეშ საჭიროებეფ დო შეხედულებეფ. თქვან ნათესეშო ვარდა მეგობარშო მიდგაინ ქიმგეწონებუნან-და, ჯგირო გეჩინებაფეთ თინა. ქიგეგით, მუნერ თვისებეფ უღჷ დო მუთ მთავარ რე, ქიდეკვირით, ქუღუნ დო ვარ ხოლოშიან ურთიერთობა იეჰოვაწკუმა. მუშენდა არძაშ უმოს მნიშვნელოვან ზუსტას იეჰოვაწკუმა ჯგირ ურთიერთობა რე დო ვართ ხოლო თინა, მუნერ საშვალებიან, განათლებურ ვარდა მუნერ ოჯახიშ სქუა რე თინა. თქვა შილებე ჟირ პიროვნება ართიანს გაჩინებაფუათ, მარა ვაგგოჭყორდან, მუნეფიშ გინაჭყვიდირალ რე, დექორწინებუნან დო ვარ (გალ. 6:5).
ᲛᲣᲭᲝ ᲨᲔᲘᲚᲔᲑ ᲣᲠᲗᲘᲔᲠᲗᲝᲑᲐᲨ ᲓᲝᲭᲧᲐᲤᲐ?
12. მუჭო შეილებ უწუე პიროვნებას, ნამდა თიწკუმა ურთიერთობაშ დოჭყაფა გოკო?
12 მუჭო შეილებ უწუე პიროვნებას, ნამდა მორწონს დო თიწკუმა ურთიერთობაშ დოჭყაფა გოკო? d შეილებ საჯარო სივრცეს ვარდა ტელეფონით ქუდურაგადუე თეშ გურშენ. გასაგებო გეუნწყ, ნამდა გოკო, უმოს ხოლოშე გეჩინებაფუე (1 კორ. 14:9). საჭიროქ ქიჸუ-და, მაფიქრებელო დრო ხოლო ქიმეჩ (იგავ. 15:28). მარა ურთიერთობაშ დოჭყაფაშე ვარია ქოიწუ-და, პატი ქოცჷ თიშ აზრის.
13. მუ შეილებ აკეთე, მუჟამსით მიდგაინს სქანწკუმა ურთიერთობაშ დოჭყაფა ოკო? (კოლ. 4:6).
13 ასე თიშე ქიფჩუათ, მუ ოკო აკეთე, მუჟამსით მიდგაინ გირაგად, ნამდა მოწონქ დო სქანწკუმა ურთიერთობაშ დოჭყაფა ოკო. რშუდას, სქანდა მოულა დო მუშ გრძნობეფშენ ჩიება გვალო ეფჷ ვეჸიდ თიშო, თეს მანგარ გაბედულება ოსაჭირ, ათეშენ პატიცემათ მექცი (წეკითხით კოლოსელეფიშ 4:6). პასუხიშ მაფიქრებელო დრო ქუგოსაჭირუნ-და, თენა ხოლო ქუწი, მარა ეცად, გვალო ბრელ დრო ვეღე დო მუთ შილებენ მალას ქუწუე სქან გადაწყვეტილება (იგავ. 13:12). თიწკუმა ურთიერთობაშ დოჭყაფა ვა გოკონ-და, თენა გასაგებო, მარა პატიცემათ ქუწი. დეკვირ, მუჭო მიქცუ ართ ავსტრიელ ჯიმაქ, ჰენსიქ, მუჟამსით დაქ ურთიერთობაშ დოჭყაფა შეთავაზ. თინა იჩიებ: „ჩქიმ გადაწყვეტილება ტაქტიანო, მარა გასაგებო უწი. ბრელ დრო ვამღალ, მუშენდა ვა მოკოდ, მუდგაინიშ იმენდ ნოღვედკო. თეშ უკულ ხოლო ირიათო ვოკვირუდ ჩქიმ ჩიებას დო საქციელს, მუშენდა ვა მოკოდ იფიქრუკო, ეგება აზრ დითირუასია“. მუ ოკო აკეთე, მუჟამსით თანახმა რექჷ ურთიერთობაშ დოჭყაფაშენ? ქუწი, ნამდა სი ხოლო გოკო თიშ უჯგუშო გაჩინებაფა დო ქიჩით, მუქ მუჭო გოკონა იჸუას გაჩინებაფაშ პერიოდის. თეშ კეთება ჯგირ იჸუაფ, მუშენდა შილებე კულტურაშ ვარდა შხვადოშხვა მიზეზეფიშ გურშენ თე საკითხიშ დინახალე განსხვავებულ აზრ გიღუდან.
ᲛᲣᲭᲝ ᲨᲔᲛᲚᲔᲑᲣᲜᲐ ᲮᲣᲯ ᲥᲣᲓᲣᲙᲘᲜᲐᲗ ᲓᲐᲣᲥᲝᲠᲬᲘᲜᲔᲑᲔᲚ ᲥᲠᲘᲡᲢᲘᲐᲜᲔᲤᲡ?
14. მუჭო შემლებუნა ხუჯ ქუდუკინათ დაუქორწინებელ ქრისტიანეფს?
14 მუჭო შემლებუნა ხუჯ ქუდუკინათ თი ქრისტიანეფს, მით დაოჯახებაშე ფიქრენა? ართ-ართ საშვალება რე, ქიდვეკვირათ, მუს ურაგადუთ თინეფს (ეფეს. 4:29). ჯგირ იჸუაფ, ჩქინ დუდის ქოპკითხათ: ჩქიმ ციგანობეფ გურს ხომ ველაჭუანს თი თანაქრისტიანს, მიდგას დაოჯახება ოკო? მუჟამსით ვორწყექ, ნამდა დაუქორწინებელ და დო ჯიმა ართო იჩიებ, ხეთეშე თის ხომ ვა ფიფქრენქ, ნამდა მოწონა ართიან? (1 ტიმ. 5:13). თეს გეძინელ, თანაქრისტიანს ოკო ვა ვოგინაფუათ, ნამდა დაოჯახებულ ვა რენ თიშენ, მიდგაინშე ნაკლებ რე. ჟიშე მოშინაფილ ჰენს იჩიებ: «ნამთინე თანაქრისტიან მირაგად: „მუს უჯინექ, დრო რე, ოსურ ქიმიჸონე, ანწ ბაღანა ვა რექჷ“. თეცალ რაგადეფ დაუქორწინებელს დუდის თეშ ოგინაფუანს, ითამ თანაქრისტიანეფ ვაფასენდან დო უმოსო ოფიქრებაფუანს ქორწინებაშე ხოლო». თეცალ ჩიებაშ მანგიორო, უჯგუშ ვეჸინო, ირნერ საშვალება გეგმიბრინუათ, ნამდა ქუვოცქუათ დაუქორწინებელ თანაქრისტიანეფს?! (1 თეს. 5:11).
15. ა) რომაელეფიშ 15:2-იშ თანახმას, მუ ოკო გეფთვალისწინათ, ონდო გინოპჭყვიდუნთ, მიდგაინს დაქორწინებას ქიმვეხვარათ? (ქოძირით სურათ). ბ) მუ დიგურეთ ვიდეოშე? (ქოძირით სქოლიო).
15 მუჭო ოკო მიქცუე, მუჟამსით ფიქრენქ, ნამდა ნამდგაინ და დო ჯიმა ართიანს მანგარო ოსქვანს? ბიბლია მირაგადუნა, ნამდა გეფთვალისწინათ შხვეფიშ გრძნობეფ (წეკითხით რომაელეფიშ 15:2). ბრელ ქრისტიანს შუროთ ვა უსხუნ, შხვაქ მიშართას თიშ დაქორწინებაშ ამბეშა, ათეშენ, პატი ოკო ფცათჷ თინეფიშ სურვილს (2 თეს. 3:11). ნამთინე შურო ვა რე მოვარიე, შხვაქ ხე ქეშუნწყუას, მარა აშო ვა ფთხინან-და, ჩქინ დუდშა მუთუნით ოკო ვეპჭოფათ თეშ კეთება e (იგავ. 3:27). ბრელ და დო ჯიმას ვა უსხუნ, ურთიერთობაშ დოჭყაფაქ ოფიციალურ ფორმათ მოხვადას. გერმანიას მახორუ ართ დაუქორწინებელ და, ლიდია იჩიებ: „შეილებ მეგობრულ შეხვალამა მანწყუე დო თი ძღაბ დო ბოშ ხოლო ქუდაპატიჟე, მით ართიანშო მორწონს. სიტუაცია თეშ მანწყი, ნამდა ართიანწკუმა ჩიებაშ საშვალებაქ ქიმიაჩან დო დანარჩენ მუნეფს ქიმიანდ“.
მეგობრულ შეხვალამეფს დაუქორწინებელ ქრისტიანეფს ერზიებუნა ართიანიშ გაჩინებაფაშ საშვალება (ქოძირით აბზაც 15)
16. მუ ოკო შუდან დაუქორწინებელ ქრისტიანეფს?
16 ქოთ დაქორწინებულს დო ქოთ დაუქორწინებელს, შემლებუნა მიღუდან ბედნერ დო კმაყოფილებათ ეფშა ცხოვრება (ფსალმ. 128:1). თაშ ნამდა, მომავალ მეუღლეს დიო ვეშეხვალამექ-და, მთელ ყურადღება იეჰოვაშ მსახურებაშა გეგნიღ. მაკაოს მახორუ ართ და, სინ-ი იჩიებ: „დეფიქრ, ნამდა თი დრო, ონდო ხვალე რექჷ, მუთუნ ვა რე თი მარადიულ ბედნერობაშ კარს, ნამუთ სამოთხეს სქან მეუღლეწკუმა ართო გელჷ“. უკულიან სტატიას გუვარჩიენთ, მუ ოკო აკეთე, მუჟამსით ქიმიოგორე თი პიროვნებას, მიდგაშეთ ფიქრენქ, ნამდა ჯგირ მეუღლე იჸუაფ სქანო დო ურთიერთობა გაფჷ დოჭყაფილ. თის ხოლო ქიგებგენთ, მუ მიგეხვარებ ჭკვერულ გადაწყვეტილებაშ მეღებას.
ᲝᲑᲘᲠᲔᲨᲘ 137 ართგურ ქრისტიან დალეფი
a თიშ გაგებელო, რექჷ დო ვარ მზათ დაოჯახებაშო, ვებგვერდის jw.org ქოძირ სტატია „პაემან — ნაწილ 1: ადრე ხომ ვა რე ჩქიმო პაემანშა გილულა?“ [ქორთ.].
b ᲒᲐᲜᲛᲐᲠᲢᲔᲑᲐ: გაჩინებაფაშ პერიოდის ძღაბ დო ბოშ უჯგუშო იჩინებაფუანა ართიანს, ნამდა ქიგეგან, ქორენან დო ვარ ართიანიშ შესაფერის. ნამთინე ქიანას თეს „ჸოროფილობას“ ვარდა „რომანტიკულ ურთიერთობას“ უძახუნა. თე პერიოდ თიმწკუმა იჭყაფ, მუჟამსით ძღაბ დო ბოშ ართიანს ურაგად, ნამდა მოწონა ართმაჟია დო თიმწკუმა ითებ, მუჟამსით გინოჭყვიდუნა, დექორწინან ვარდა მიოტუან ურთიერთობა.
c ნამთინე სახელ თირელ რე.
d ნამთინე კულტურას უმენტაშო ბოშ გინოდგუნს პირველ ნაბიჯის, მარა ვართ თინა რე სათაკილო, ნამდა ძღაბიქ მერთას ბოშშა დო გეგნოდგას პირველ ნაბიჯ ურთიერთობაშ დაჭყაფალო (რუთ. 3:1—13). უმოს ინფორმაციაშ გაგებელო, 2004 წანაშ 22 ოქტომბერიშ ჟურნალს „გეგშაკურცხით!“, ქოძირ სტატია „ახალგაზრდეფიშ კითხვეფ — მუჭო უწუა, ნამდა მოპწონს?“ [ქორთ.].
e ვებგვერდის jw.org ქუჯინ ვიდეოს „თინეფ დუდის ვა დვანა რწმენაშო ბრძოლას — დაუქორწინებელ ქრისტიანეფ“.
