1-2. Jo mukene guwinyo nining i kare me winnyegi?

 KARE me winnye twero bedo kare me yomcwiny adada. Ka itye ka winnye ki ngat mo, ci labongo akalakala mo imito ni owot maber. Dok pi jo mapol, meno obedo kare me yomcwiny. Laminwa mo ma a ki Ethiopia ma nyinge Teddy a owaco ni: “Kare me yomcwiny adada i kwona obedo i kare ma wan ki cwara wabedo ka winnye. Wanyamo lok mogo ma pigi tego, dok onongo wanyero bene adada. Cwinya obedo yom adada i kare ma aniang ni anongo ngat ma amaro dok en bene mara.”

² Ento, Omego Alessio, ma a ki i lobo Netherlands, owaco ni, “Abedo ki yomcwiny adada me ngeyo ngat ma dakona obedo i kare me winnyewa, ento wakato bene ki i ariya mogo.” I pwony man, wabinyamo ariya mogo ma twero bedo tye kacel ki cik mogo ma igi lac me Baibul ma twero konyo jo ma gitye ka winnye me moko tam me ryeko. Wabinyamo bene kit ma jo mukene me kacokke gitwero konyo kwede jo ma gitye ka winnye.

WINNYE KONYO ME COBO TIC ANGO?

3. Kare me winnye konyo me cobo tic ango? (Carolok 20:25)

³ Kadi bed kare me winnye twero bedo me yomcwiny adada, ento jo aryo-ni myero guniang ni man gin ma pire tek ma twero terogi i nyom. I nino nyomgi, laco ki dako gikwonge i nyim Jehovah ni gibinyuto mar kacel ki woro i kingi teke pud gitye kwo i lobo kany. Ma peya wakwongo kwong mo keken, pire tek ni kong watam iye matut. (Kwan Carolok 20:25.) Meno tye ada ka odok i kom kwonge me nyom. Kare me winnye miyo ki jo aryo kare me ngene maber wek gumok tam me ryeko. I kare  mogo giromo moko tam me nyomme, i kare mukene gimoko tam me giko winnye meno woko. Ka jo aryo-ni gugiko winnyegi woko, man pe tyen lokke ni winnyegi pe onyako nyige. Me ka meno, winnye meno ocobo ticce maber—okonyogi me moko tam me ryeko.

4. Pingo omyero wabed ki neno mupore i kom winnye?

⁴ Pingo pire tek ni jo ma wigi nono gubed ki neno mupore i kom winnye? Ka gitye ki neno mupore, ci pe gibicako winnye ki ngat ma gingeyo atir ni pe gibinyomone. Ento, pe jo ma wigi nono keken aye omyero gubed ki neno mupore. Wan ducu omyero wiwa opo i kom tic ma winnye cobo. Me labolle, jo mukene gitamo ni ka jo aryo moni gitye ka winnye, ci kadi ningo omyero gunyomme. Kodi tam ma kit man gudo jo ma wigi nono nining? Laminwa mo ma wiye nono ma nyinge Melissa, ma bedo i lobo Amerika, owaco ni: “Ka omego ki lamego moni gitye ka winnye, Lucaden mogo giketo lyeto i komgi me nyomme woko. Macalo adwogine, jo mogo gimedde ki winnye kadi bed wigi pe rwatte. Jo mukene ma wigi nono dong gikwero cako winnye ki ngat mo keken. Lyeto man twero kelo par madwong adada.”

TUTE ME NGEYO LAWOTI MABER

5-6. Gin ango ma omyero jo ma gitye ka winnye guniang i kom ngat acel acel? (1 Petero 3:4)

⁵ Ka itye ka winnye ki ngat mo, gin ango ma bikonyi me moko ka omyero wunyomme nyo pe? Tute me ngeyo lawoti maber. Twero bedo ni onongo dong ingeyo jami mogo manok i kom ngat meno ma peya icako winnye kwede. Ento dong itye ki kare muromo me ngeyo ‘kite me cwiny ma pe nen.’ (Kwan 1 Petero 3:4.) Man kwako niang kit ma watte ki Jehovah tye kwede, kite, kacel ki kit ma en tamo kwede. I nge kare mo, myero dong inge lagam pi lapeny calo magi: ‘Tika ngat-ti bibedo laco nyo dako maber pira?’ (Car. 31:​26, 27, 30; Ep. 5:33; 1 Tem. 5:8) ‘Tika atwero nyutte mar kacel ki mine kare muromo kun en bene timo meno pira? Tika abitwero kanyo gorone?’ b (Rom. 3:23) Ka wumedde ki ngene maber, ci wiwu myero opo ni: Gin ma pire tek loyo pe obedo kit ma kwowu nyo wiwu rwatte kwede, ento kit ma wutwero jolo kwede apokapoka ma tye i kitwu nyo jami ma wumaro.

⁶ Jami mukene ango ma omyero iniang i  kom lawoti i kare me winnye? Ma peya idongo miti matek tutwal i kom ngat meno, bedo ber ka wunyamo lok ma pigi tek, calo yub ma ngat meno tye kwede pi anyim. Ento lok ma gudo kwo pa ngat acel acel kono, calo lok me yotkom, peko me cente, nyo jami maraco mutimme i kwo pa ngat meno i kare mukato? Pe dong tye ni omyero kinyam jami magi ducu i acakki me winnye. (Por ki Jon 16:12.) Ka iwinyo ni pud pe itye atera me gamo lapeny mogo matut tutwal madok i komi, ci wek lawoti onge. Ento ka kare woto ki kato, bimitte ni lawoti onge lok magi wek omiye kare me moko tam maber. Dong bimitte ni i nge kare mo, ilok agonya i kom jami magi.

7. I yo ma nining ma jo ma gitye ka winnye gitwero ngene kwede maber? (Nen bene bok ma winye tye ni “ Ka Itye ka Winnye ki Ngat ma Bedo ka Mabor.”) (Nen bene cal.)

⁷ I yo ma nining ma itwero niang kwede kit ngat moni kikome? Itwero timo man ki penyo lapeny kun itero iti me winyo lagam pa ngat meno. Mitte ni wun aryo ducu wutit kit ma wuwinyo kwede kikome kun pe wumungo lok mukene. (Car. 20:5; Yak. 1:19) Gwok nyo wutwero yero me timo jami ma weko bedo yot botwu me lok, calo cam kacel, rwene kacel i kabedo ma guro wi lwak, nyo tito kwena kacel. Wutwero bene niang lok i komwu ka wutero kare kacel ki luremwu nyo lupacowu. Medo i kom meno, wuket yub me timo jami ma binyuto kit ma lawoti timme kwede i kabedo mapatpat dok tero kwede ki dano mapatpat. Nen kong gin ma omego Edwin, ma a ki i lobo Netherlands, ma kiloko i kome i pwony ma okato-ni otute me timo. En oloko kit man i kom winnyegi ki lamego Alicia: “Wayenyo jami ma watwero timone ma romo konyowa me niang kit pa ngat acel acel. Pol pa jami magi onongo obedo jami mayot, calo tedo kacel, nyo tiyo tic ma gang kacel. I kare ma kit meno, wabedo ka neno kit mabeco ma ngat acel acel tye kwede kacel ki gorone.”

8. Adwogi maber ango ma jo ma gitye ka winnye gitwero nongone ka gikwano kacel?

⁸ Wutwero bene niang kit ngat acel acel maber ka wukwano pwony me Baibul kacel. Ka ce wunyomme, bimitte ni wuket kare me woro pi jo me ot, wek Lubanga obed tol me adekke i nyomwu. (Latit. 4:12) Dong, pingo pe wuket cawa me kwan kacel i kare-ni, ma wutye ka winnye-ni? Ngene kene ni, jo ma gitye ka winnye nongo pud pe gitye jo me ot, dok omego-ni  pud peya odoko lawi lamego-ni. Ento, ka wukwano kacel kare ki kare, ci wutwero niang kit ma wat pa ngat acel acel tye kwede ki Jehovah. Mark ki Lisa, luot mo ma gibedo i lobo Amerika, gunongo adwogi maber mukene ki i kwan kacel. Mark owaco ni: “I acakki me winnyewa, wacako kwano pwony mapatpat ki i bukkewa ma loko i kom winnye, nyom, ki kwo me ot. Pien wabedo ka kwano pwony magi, wabedo ki kare me lok i kom jami ma pigi tego ma onongo romo bedo tek adada me cako lok iye.”

JAMI MUKENE MA PIGI TEGO MA MYERO WUTAM IYE

9. Lok ango ma myero jo ma gitye ka winnye gutam iye ka gitye ka moko anga ma myero gutitte pi winnyegi?

⁹ Anga ma omyero wutitte ni wutye ka winnye? Meno obedo tam ma wun aryo-ni aye myero wumoki. Ka pud wucako winnye acaka, wutwero moko tamwu me tito ki dano manok keken. (Car. 17:27) Ka wutimo meno, ci wutwero gwokke ki lapeny mapol kacel ki lyeto ma dano keto i komwu me moko tam. Ento, ka pe wuwaco ki ngat mo keken, ci wutwero bedo ka kanne akana wek jo mukene pe gunge. Ento man twero weko wupoto i peko. Dong bibedo me ryeko me tito pi winnyewu bot jo mogo ma gitwero miyowu tam maber kacel ki konyowu i yo mukene. (Car. 15:22) Me labolle, wuromo tito ki lupacowu mogo, luremwu muteggi, nyo luelda me kacokke.

10. Gin ango ma jo ma gitye ka winnye gitwero timo wek winnyegi obed maleng? (Carolok 22:3)

¹⁰ Kit ma wutwero weko winnyewu bedo maleng kwede. Ka wat i kinwu woto ki dongo, ci mitiwu bene bimedde ki dongo matek. Ngo ma twero konyowu me gwokke ki tim macilo? (1 Kor. 6:18) Gwokke ki loko lok macilo, bedo kakenwu, kacel ki mato kongo wa i labyel kweri. (Ep. 5:3) Jami magi gitwero tugo miti marac me buto dok weko bedo tek adada me timo gin ma atir. Bedo me ryeko me nyamo kare ki kare gin ma wubitimo me nyuto woro bot ngat acel acel kacel ki me gwoko cik pa Jehovah. (Kwan Carolok 22:3.) Nen kong gin ma okonyo omego Dawit ki dakone Almaz ma gia ki i lobo Ethiopia. Guwaco ni: “Onongo wabedo ka mato yamo i kabedo ma guro wi dano mapol nyo kacel ki luremwa. Onongo pe wabedo wan aryo keken i mutoka nyo i ot. I yo meno, wagwokke ki jami ma onongo twero bolowa i peko.”

11. Jami ango ma myero jo ma gitye ka winnye gutam iye ka gitye ka moko tam madok i kom nyuto mar i kingi?

¹¹ Tika myero jo ma gitye ka winnye gunyut mar i kingi? Ka mar i kinwu woto ki dongo, wuromo yero me nyuto marwu i yo mogo mupore. Ento, ka iweko miti me buto odoko tek adada, ci ibinongo ni tek me moko tam me ryeko. (Wer. 1:2; 2:6) Medo i kom meno, ka inyuto miti mukato kare woko, ci jukke ken twero loyi woko ma weko itimo gin mo ma cwero cwiny Jehovah. (Car. 6:27) Pi meno, i acakki me winnyewu, wunyam cik pa Jehovah kacel ki gin ma wubitimo ki ma pe myero wutim me nyuto marwu. c (1 Tec. 4:​3-7) Macalo jo ma gitye ka winnye, wupennye kekenwu ni: ‘Dano ma i kabedowa gineno tim me nyuto mar i dye lwak nining? Tika kodi tim magi twero tugo miti macilo i cwinywa?’

12. Ka tele tye i kin jo aryo moni ma gitye ka winnye, gin ango ma myero gutam iye?

¹² Wutwero cobo pekki ma bino i kare me winnye nining? Ka wubedo ki tele mo manok i kinwu kare ki kare, tika meno nyuto ni winnyewu pe tye ka wot maber? Pe tye kit meno; jo munyomme  ducu wang ma gubedo ki tele mo i kingi. Nyom ma bedo matek nongo tye ki jo aryo ma gitye ki woro i kingi dok gitwero tic kacel me cobo niang manok ma i kingi. Pi meno, kit ma wucobo kwede telle ma tye i kinwu i kare-ni binyuto ka nyomwu bibedo maber. Macalo jo ma gitye ka winnye, pennye kekenwu ni: ‘Tika watwero nyamo lok ma nongo komwa opye mot kun wanyuto woro i kinwa? Tika waye balwa dok watute me timo alokaloka? Tika watye atera me jalo lok, kwayo kica, ki timo kica?’ (Ep. 4:​31, 32) Ento, ka kare ducu wubedo ka telle nyo daa i kare me winnyewu, ci jamine pe omaro lokke kadi wa i nge nyomwu. Ka iniang woko ni ngat meno pe bibedo mupore piri, ci giko winnyewu bibedo tam maber loyo pi wun aryo ducu. d

13. Gin ango ma bikonyo jo ma gitye ka winnye me moko kare marom mene ma myero winnyegi oter?

¹³ Winnyewu myero oter kare marom mene? Ka pe watero kare muromo me tam i kom gin moni, adwogine pol kare bedo marac. (Car. 21:5) Pi meno, winnyewu myero oter kare muromo ma weko ingeyo ngat ca maber. Ento, pe myero wuwek orii tutwal labongo tyen lok mo. Baibul bene waco ni: “Gen ma pe gicobo miyo two i cwiny dano.” (Car. 13:12) Medo i kom meno, ka wat i kinwu medde ki dongo, twero doko tek adada me ciro atematema me donyo i tim me buto. (1 Kor. 7:9) Me ka keto cwinyi i kom kare marom mene ma winnyewu myero oter, itwero pennye kekeni ni, ‘Gin ango ma odong ma pud mitte ni ange i kom lawota ka wek amok tam maber?’

JO MUKENE GIROMO KONYO JO MA GITYE KA WINNYE NINING?

14. Jo mukene giromo konyo jo ma gitye ka winnye nining? (Nen bene cal.)

¹⁴ Ka wangeyo jo mo ma gitye ka winnye, waromo konyogi nining? Watwero lwongogi me nywako cam kacel kwedwa, ribbe kwedwa i woro pi jo me ot, nyo pi namo mo ma wayubo. (Rom. 12:13) I kare ma kit meno, gitwero bedo ki kare me ngene maber adada. Gwok nyo itwero wot kacel kwedgi ka gicito ka namo, tingogi ki mutoka-ni, nyo lwongogi i paconi ka gimito ka mo ma gitwero lok iye kun nongo pe gitye kengi. (Gal. 6:10) Alicia, ma kiloko i kome con-ni, wiye pud po i kom kony ma gunongo i kare ma gitye ka winnye ki Edwin. En owaco ni, “Wabedo ki yomcwiny adada i kare ma omege ki lumege mogo guwaco  ni watwero limogi ka wamito ka mo ma watwero bedo iye kacel ento ma nongo pe watye kakenwa.” Ka jo ma gitye ka winnye gupenyi ni iter kare kacel kwedgi, itwero neno macalo obedo yo maber me konyo luremi. Gwokke pe iwek jo ma gitye ka winnye-ni gurweny woko ki i ka wangi, ento bene myero inyut niango ka gimito lok ci idirre cen dok iminigi kare.—Pil. 2:4.

15. Gin ango mukene ma jo me kacokke gitwero timo me konyo jo ma gitye ka winnye? (Carolok 12:18)

¹⁵ Watwero bene cuko cwiny jo ma gitye ka winnye ki lok ma waloko kacel ki lok ma pe wawaco. I kare mukene, twero mitte ni wajukke kenwa dok pe wawac lok mo. (Kwan Carolok 12:18.) Me labolle, watwero bedo ki miti me tito ki jo mukene ni omego ki lamego moni gucako winnye, ento twero bedo ni jo aryo-ni gimito nywako kwena meno gin kikomgi. Myero wagwokke ki kwoto nying jo ma gitye ka winnye nyo lok marac i kom tam ma gumoko. (Car. 20:19; Rom. 14:10; 1 Tec. 4:11) Medo i kom meno, myero wagwokke ki waco lok nyo penyo lapeny ma twero keto lyeto i komgi me nyomme. Laminwa mo ma nyinge Elisa gin ki cware wigi po ni, “Lewic onongo makowa ka jo mukene gupenyowa pi yubwa me nyomme kun onongo wan kikomwa peya wanyamo lok meno.”

16. Omyero wadok iye nining ka jo ma gitye ka winnye gugiko winnyegi woko?

¹⁶ Ka jo aryo-ni gumoko tamgi me giko winnyegi kono? Omyero wagwokke ki rwako wiwa i lok ma pe kwakowa nyo kok i kom ngat acel i kingi pi giko winnyegi. (1 Pet. 4:15) Laminwa mo ma nyinge Lea owaco ni: “Awinyo ni jo mukene gubedo ka nguru ni pingo an ki omego mo wapokke woko. Man ocwero cwinya matek.” Kit ma kitito kwede con, ka jo aryo moni gumoko tamgi me giko winnyegi woko, pe omyero watam ni gumoko tam marac. Pol kare, man nyuto ni winnyegi ocobo ticce—okonyogi me moko tam maber. Ento, twero bedo ni tam meno oturo cwinygi dok oweko gitye ka winyo ni gitye kic kic. Pi meno, omyero wayeny yo me konyogi.—Car. 17:17.

17. Gin ango ma myero jo ma gitye ka winnye gumedde ki timone?

¹⁷ Kit ma waneno kwede, kare me winnye twero bedo ki ariya mogo, ento twero bene bedo kare me yomcwiny adada. Laminwa Jessica wiye po ni: “Ki lok ada, kare me winnyewa pe obedo yot. Ento cwinya obedo yom ni watiyo ki kare meno kacel ki kerowa me ngene maber.” Ka wutye ka winnye kombeddi, wumedde ki tic matek me ngene maber. Ka wutimo meno, ci winnyewu bikonyowu me moko tam maber.