1-2. Ano an namamati kan nagkapira manungod sa pag-ilusyunan?

 AN PAG-ILUSYUNAN puwedeng magin nakakaugmang marhay na panahon. Kun igwa ka nin kailusyon ngunyan, siguradong gusto mong magin maugma an saindong pag-ilusyunan. Asin totoo iyan sa dakul na magkailusyon. Si Tsion, a sarong sister sa Ethiopia, nagsabi: “Kaidtong nag-iilusyon pa lang sako si agom an saro sa pinakamaugmang panahon sa buhay ko. May mga seryosong bagay kaming pinag-uulayan, asin may mga makangirit man. Maugmahon ako ta namidbid ko siya, namumutan ko siya asin namumutan niya ako.”

² Alagad, si Alessio na sarong brother sa Netherlands, nagsabi, “Maugmahon kaidtong lalo ko pang nabibisto si agom kan nagdi-date pa sana kami, pero may mga kadipisilan man.” Sa artikulong ini, pag-uulayan ta an nagkapirang kadipisilan na puwedeng maeksperyensiyahan kan mga magkailusyon asin an nagkapirang prinsipyo sa Bibliya na makakatabang sa sainda na magin mapanggana an saindang pag-ilusyunan. Pag-uulayan ta man kun paano an iba sa kongregasyon makakatabang sa mga magkailusyon.

AN KATUYUHAN KAN PAG-ILUSYUNAN

3. Ano an katuyuhan kan pag-ilusyunan? (Talinhaga 20:25)

³ Dawa ngani puwedeng magin nakakaugma an pag-ilusyunan, sarong seryosong lakdang man iyan na puwedeng sumagkod sa pag-aguman. Sa aldaw kan saindang kasal, nanunumpa an nobyo asin nobya sa atubangan ni Jehova na mamumutan asin irerespeto ninda an lambang saro sagkod na sinda nabubuhay. Bago gumibo nin ano man na promesa, dapat na pag-isipan tang marhay an bagay na iyan. (Basahon an Talinhaga 20:25.) Totoo nanggad iyan pag-abot sa sumpaan sa kasal. An pag-ilusyunan nagtatao sa magkailusyon nin panahon na mamidbid an lambang saro asin na makagibo nin madunong na desisyon. An desisyon puwedeng sumagkod sa pagpapakasal o pagtapos sa saindang relasyon. Kun an magkailusyon magdesisyon  na magsuwayan, dai buot sabihon kaini na dai nagin mapanggana an saindang pag-ilusyunan. Imbes, nagibo kan pag-ilusyunan an katuyuhan kaiyan—nakatabang iyan sa sainda na makagibo nin madunong na desisyon.

4. Taano ta dapat magkaigwa kita nin tamang pagmansay sa pag-ilusyunan?

⁴ Taano ta mahalagang magkaigwa nin tamang pagmansay sa pag-ilusyunan? Pag an sarong daing agom may tamang pagmansay, dai siya makikipag-ilusyon sa saro na mayo man siya nin intensiyon na pakasalan. Minsan siring, bako sanang mga daing agom an kaipuhan na magkaigwa nin tamang pagmansay. Gabos kita dapat na magkaigwa kaiyan. Halimbawa, inaasahan kan iba na pag an duwang indibidwal nagin magkailusyon, dapat sindang magpakasal pag-abot nin panahon. Ano an puwedeng magin epekto kaini sa daing agom na mga Kristiyano? Si Melissa, sarong daing agom na sister sa Estados Unidos, nagsabi: “Napi-pressure an magkailusyon dahil sa inaasahan sainda kan ibang mga tugang. Dahil diyan, may mga magkailusyon na nagpapadagos lang dawa bako nang marahay an saindang relasyon. An iba man habo na lugod makipag-ilusyon. Grabeng stress an puwedeng magin epekto kaiyan.”

MIDBIDON NA MARHAY AN LAMBANG SARO

5-6. Ano an dapat hinguwahon na maaraman kan magkailusyon sa lambang saro? (1 Pedro 3:4)

⁵ Kun may kailusyon ka, ano an makakatabang saindo para makapagdesisyon kun baga mapakasal kamo o dai? Midbidon na marhay an lambang saro. Posibleng marhay na may aram ka nang nagkapirang bagay manungod sa kailusyon mo bago ka pa nagpuon na makipag-ilusyon saiya. Pero ngunyan may oportunidad kang maaraman an saiyang “personang nasa puso.” (Basahon an 1 Pedro 3:4.) Kaiba digdi an pag-aram pa sa saiyang espirituwalidad, personalidad, asin kaisipan. Sa paglihis nin panahon, dapat na masimbag mo an mga hapot na arog kan: ‘Magigin marahay na agom daw siya para sa sako?’ (Tal. 31:​26, 27, 30; Efe. 5:33; 1 Tim. 5:8) ‘Maitatao mi daw sa lambang saro an samong emosyonal na mga pangangaipo? Mapapalampas mi daw an mga pagkukulang kan lambang saro?’ b (Roma 3:23) Mantang namimidbid nindo an lambang saro, tandaan: An pagigin magkabagay nindo nakadependeng marhay, bako sa mga pagkakapareho nindo, kundi sa kun paano nindo pinapakibagayan an mga pagkakalain kan lambang saro.

⁶ Ano pang mga bagay an dapat mong maaraman manungod sa kailusyon mo? Bago pa mahulog na marhay an saindong buot sa kada saro,  tibaad marahay na pag-ulayan nindo an nagkapirang importanteng bagay, arog kan mga plano kan kada saro sa saindo sa maabot. Pero paano man an personal na mga bagay arog kan problema sa salud, sa pinansiyal, o inagihan na trauma? Bako man gabos na bagay kaipuhan nang pag-ulayan sa pagpupuon kan pag-ilusyunan. (Ikumparar an Juan 16:12.) Kun sa hiling mo amayon pa para simbagon an nagkapirang personal na hapot, sabihon iyan sa kailusyon mo. Minsan siring, pag-abot nin panahon, kaipuhan na maaraman an mga iyan kan kailusyon mo tanganing makagibo nin marahay na desisyon. Kaya kaipuhan mong magin onesto pag ipinakipag-ulay mo na an manungod sa mga bagay na iyan.

7. Paano mas lalo pang mabibisto kan magkailusyon an lambang saro? (Hilingon an kahon na “ Magkailusyon na Harayo sa Kada Saro.”) (Hilingon man an mga ritrato.)

⁷ Paano mo mamimidbid na marhay an kailusyon mo? An saro sa pinakamarahay na paagi iyo an prangka asin onestong pakikipag-ulay. Haputon siya asin magdangog na marhay. (Tal. 20:5; Sant. 1:19) Para magibo iyan, puwedeng makatabang kun magkaigwa kamo nin mga aktibidad kun sain puwede kamong makapag-ulay, arog kan pagkakan na magkaibanan, paglakaw-lakaw sa pampublikong mga lugar, asin paghulit na magkaibanan. Mamimidbid man nindo an lambang saro pag kaibanan nindo an saindong mga amigo asin kapamilya. Apuwera kaiyan, magplano nin mga aktibidad na diyan mahihiling mo kun paano siya minagawi sa manlain-lain na sitwasyon kaibanan nin manlain-lain na tawo. Mangnuhon kun ano an hininguwang gibuhon ni Aschwin, na taga Netherlands. Mapadapit sa pag-ilusyunan ninda ni Alicia, inistorya niya: “Nag-iisip kami nin mga puwede ming gibuhon na makakatabang samo na mas mamidbid an kada saro. Sa parati simpleng mga bagay sana iyan, arog kan pagluto o paggibo nin iba pang mga gibuhon na magkaibanan. Sa arog kaiyan na mga aktibidad, nahihiling mi an kakusugan asin kaluyahan kan kada saro.”

8. Paano puwedeng makinabang an magkailusyon sa pag-adal nin Bibliya na magkaibanan?

⁸ Puwede man nindong mamidbid an lambang saro paagi sa pag-adal nin Bibliya na magkaibanan. Pag mag-agom na kamo, kaipuhan nindong magtao nin panahon para sa pampamilyang pagsamba tanganing an Diyos an magin panginot na kabtang kan saindong pag-aguman. (Ecl. 4:12) Kaya ngunyan na magkailusyon pa sana kamo, taano ta dai mag-iskedyul nin panahon na magkaibanan kamong mag-adal? Siyempre, bako pa man sarong pamilya an magkailusyon, asin an brother bako pa man an payo kan sister. Minsan siring, paagi sa regular na pag-adal nin magkaibanan, naaaraman  nindo an espirituwalidad nin lambang saro. Si Max asin Laysa, na taga Estados Unidos, may nahiling na saro pang pakinabang. Sinabi ni Max: “Sa pagpupuon pa sana kan samong pag-ilusyunan, pinag-aadalan mi na an mga publikasyon manungod sa pakikipag-date, pag-aguman, asin buhay pampamilya. Nakatabang samo an mga publikasyon na iyan na mapag-ulayan an importanteng mga bagay na masakit punan na pag-ulayan.”

IBA PANG MGA BAGAY NA DAPAT KONSIDERARON

9. Anong mga bagay an dapat konsideraron kan magkailusyon pag nagdedesisyon kun sairisay an sasabihan ninda manungod sa saindang relasyon?

⁹ Sairisay an dapat makaaram kan saindong pag-ilusyunan? Nasa saindo kun sairisay an gusto nindong sabihan. Sa pagpupuon pa sana kan saindong pag-ilusyunan, puwedeng nagkapira sana an pilion nindong sabihan. (Tal. 17:27) Paagi kaiyan, malilikayan nindo an pressure asin dakul na hapot manungod sa saindong relasyon. Alagad, kun mayo kamong sasabihan, tibaad isuway nindo an saindong sadiri sa takot na maaraman iyan kan iba. Peligroso iyan. Kaya maski paano, marahay na sabihon iyan sa mga puwedeng makatao nin marahay na sadol asin praktikal na tabang. (Tal. 15:22) Halimbawa, puwede nindong sabihon iyan sa nagkapirang miyembro kan saindong pamilya, sa saindong maygurang na mga amigo, o sa mga elder.

10. Ano an puwedeng gibuhon kan magkailusyon tanganing mapagdanay na kagalang-galang an saindang pag-ilusyunan? (Talinhaga 22:3)

¹⁰ Paano nindo mapapagdanay na kagalang-galang an saindong pag-ilusyunan? Mantang mas nagrararom an saindong relasyon, natural sana na mas maakit kamo sa lambang saro. Ano an makakatabang para magdanay kamong malinig sa moral? (1 Cor. 6:18) Likayan an bastos na urulay, pag-ibanan na kamo sana, asin sobrang pag-inom. (Efe. 5:3) An mga bagay na ini puwedeng makapukaw kan saindong seksuwal na pagmawot asin makapaluya kan saindong determinasyon na gibuhon an tama. Marahay kun parati nindong pag-uulayan kun ano an mga puwede nindong gibuhon para mapagdanay na kagalang-galang an saindong pag-ilusyunan. (Basahon an Talinhaga 22:3.) Mangnuhon kun ano an nakatabang ki Dawit asin Almaz na taga Ethiopia. Sinabi ninda: “Nag-iibanan kami sa mga lugar na dakul nin tawo o pag may kaibanan kaming mga amigo. Dai kami nag-iibanan na kami sana sa laog nin awto o sa harong. Paagi kaiyan, nalilikayan mi an mga sitwasyon na puwedeng makatentar samo.”

11. Anong mga bagay an dapat konsideraron kan magkailusyon pag nagdedesisyon kun anong mga kapahayagan nin kapadangatan an puwede nindang ipahiling sa kada saro?

¹¹ Kumusta man pag-abot sa pagpahayag nin kapadangatan? Mantang mas nagrararom an saindong relasyon, may mga angay na kapahayagan nin kapadangatan na puwede nindong ipahiling sa kada saro. Pero, kun mapukaw an saimong seksuwal na pagmawot, posibleng marhay na madipisilan ka na gumibo nin madunong na desisyon. (Awit ni Sol. 1:2; 2:6) Pag nagpapahayag nin kapadangatan, puwedeng madalion sana na mawaran ka nin pagpupugol sa sadiri asin makagibo nin ikinakaanggot ni Jehova. (Tal. 6:27) Kaya sa pagpupuon kan saindong pag-ilusyunan, pag-ulayan na an mga limitasyon na ibubugtak nindo, kauyon kan mga prinsipyo sa Bibliya. c (1 Tes. 4:​3-7) Bilang magkailusyon, haputon an saindong sadiri: ‘Paano daw mamansayon kan mga tawo sa lugar mi an samong mga kapahayagan nin kapadangatan sa lambang saro? An mga iyan daw makakapukaw kan samong seksuwal na pagmawot?’

12. Ano an dapat konsideraron kan magkailusyon mapadapit sa mga problema asin dai pagkakauyon sa panahon kan saindang pag-ilusyunan?

¹² Paano nindo puwedeng atubangon an mga problema asin dai pagkakauyon? Paano kun dai kamo nagkakauyon sa pana-panahon? Nagpaparisa daw iyan na bako kamong angay sa kada saro?  Dai man; an gabos na magkailusyon may mga dai pagkakauyon. An mag-agom na may makusog na relasyon kompuwesto nin duwang tawo na nagtitinabangan para pakibagayan an pagkakalain kan kada saro. Kaya an paagi nindo ngunyan nin pag-atubang sa mga problema puwedeng magpahiling kun baga magigin mapanggana an saindong pag-aguman. Bilang magkailusyon, haputon an saindong sadiri: ‘Nagigibo mi daw na pag-ulayan an mga bagay-bagay sa kalmado asin magalang na paagi? Inaako mi daw tulos an samong mga pagkukulang asin naghihinguwang gumibo nin mga pagbabago? Madali daw kami na magpahunod, maghagad nin dispensa, asin magpatawad?’ (Efe. 4:​31, 32) Alagad, kun pirmi kamong dai nagkakauyon o dai nagkakasinabutan sa panahon kan saindong pag-ilusyunan, dakula an posibilidad na dai na iyan magrahay pag mag-agom na kamo. Kun marealisar nindo na bako kamong angay sa kada saro, an pagtapos kan saindong relasyon tibaad iyo an pinakamarahay na desisyon para sa kada saro sa saindo. d

13. Anong mga bagay an puwedeng makatabang sa magkailusyon para madeterminaran kun gurano dapat sinda kalawig magigin magkailusyon?

¹³ Gurano dapat kalawig an saindong pag-ilusyunan? Sa parati, negatibo an nagigin resulta kan pabigla-biglang mga desisyon. (Tal. 21:5) Kaya dapat na tawan nindo nin igong panahon an saindong pag-ilusyunan para mamidbid nindong marhay an kada saro. Minsan siring, dai dapat pagparapalawigon na marhay an pag-ilusyunan kun dai man kaipuhan. Sinasabi man kan Bibliya: “An inaantisipar na naaatraso nagpapasakit sa puso.” (Tal. 13:12) Saro pa, mantang mas naghahaloy an pag-ilusyunan, tibaad magin mas dipisil na likayan an imoral na pagmawot. (1 Cor. 7:9) Imbes na pagparaisipon kun gurano na kahaloy an saindong pag-ilusyunan, puwede nindong haputon an saindong sadiri, ‘Ano pa an dapat kong maaraman manungod sa sakong kailusyon para makagibo ako nin desisyon?’

PAANO MASUSUPORTARAN KAN IBA AN MGA MAGKAILUSYON?

14. Sa anong praktikal na mga bagay puwedeng masuportaran kan iba an magkailusyon? (Hilingon man an ritrato.)

¹⁴ Kun may midbid kitang magkailusyon, paano ta sinda matatabangan? Puwede ta sindang imbitaran na magkakan, umiba sa pampamilyang pagsamba, o sa paglilibang. (Roma 12:13) Paagi kaiyan, may pagkakataon sindang mas mabisto an kada saro. Kaipuhan daw ninda nin tsaperon, malulunadan, o lugar kun sain makakapag-ulay sinda? Kun iyo, puwede daw kitang mag-alok nin tabang? (Gal. 6:10) Nagigirumduman ni Alicia, na sinambit  sa inutan, kun ano an napahalagahan ninda ni Aschwin. Sinabi niya, “Nauugma kami pag may mga tugang na nag-iimbitar sa samo na magduman sa sainda kun kaipuhan mi nin lugar kun sain puwede kaming magkaibanan na dai man napapasuway sa sainda.” Kun pinakiulayan ka na magtsaperon, ibilang iyan na sarong pribilehiyo. Magin maingat na dai pabayaan an magkailusyon na sinda sana, pero magin mapagmansay man pag kaipuhan ninda nin oras saka lugar para makapag-ulay nin pribado.​—Fil. 2:4.

15. Ano pa an puwedeng gibuhon kan mga amigo para suportaran an magkailusyon? (Talinhaga 12:18)

¹⁵ Masusuportaran ta man an mga magkailusyon paagi sa satong mga sinasabi o dai sinasabi. Kun minsan, tibaad kaipuhan tang kontrulon an satong sadiri. (Basahon an Talinhaga 12:18.) Halimbawa, tibaad gustong-gusto tang sabihon sa iba na magkailusyon na an sarong brother saka sister, pero tibaad gusto ninda na sinda an magbareta kaiyan sa iba. Dai ta dapat itsismis an manungod sa magkailusyon o kritikaron sinda manungod sa personal na mga bagay. (Tal. 20:19; Roma 14:10; 1 Tes. 4:11) Apuwera kaiyan, tibaad dai magustuhan kan magkailusyon an mga komento o mga hapot na nagpaparisa na dapat na sindang magpakasal o na mapakasal na sinda. Nagirumduman ni Elise saka kan saiyang agom, “Makaalangan pag hinahapot kami kan iba manungod sa mga plano mi sa kasal mantang dai mi pa man ngani iyan napag-uulayan.”

16. Ano an dapat na magin reaksiyon ta pag nagsuwayan an sarong magkailusyon?

¹⁶ Paano kun magdesisyon an magkailusyon na tapuson an saindang relasyon? Dapat tang likayan na makiaram o kumampi sa kiisay man sa sainda. (1 Ped. 4:15) Sinabi kan sister na si Lea: “May nadangog akong mga uruistorya kun taano ta nagsuwayan kami kan brother. Makulugon idto sa buot.” Arog kan sinambit sa inutan, an pagsuwayan dai man pirming nangangahulugan na dai nagin mapanggana an pag-ilusyunan. Sa parati, nangangahulugan lang iyan na nagibo kan pag-ilusyunan an katuyuhan kaiyan—nakatabang iyan sa magkailusyon na makagibo nin marahay na desisyon. Minsan siring, an desisyon na iyan puwede man giraray magresulta nin kamunduan asin pakamati na nagsosolo sinda. Kaya puwede kitang maghanap nin mga paagi para tabangan sinda.​—Tal. 17:17.

17. Ano an dapat padagos na gibuhon kan magkailusyon?

¹⁷ Arog kan nahiling ta, an pag-ilusyunan puwedeng magkaigwa nin mga kadipisilan, pero puwede man iyan magin nakakaugma. Nagirumduman ni Jessica: “Sa totoo lang talaga, bakong madali an pag-ilusyunan, pero sulit nanggad an panahon asin kusog na itatao mo diyan.” Kun igwa ka nin kailusyon, padagos nindong hinguwahon na mabistong marhay an kada saro. Kun gigibuhon nindo iyan, magigin mapanggana an saindong pag-ilusyunan—pareho kamong matatabangan kaiyan na makagibo nin madunong na desisyon.