1-2. Nama asai ati sekeda orang lebuh bepangan?

 TIMPUH bepangan ulih nyadi timpuh ti ngagaka ati. Enti nuan benung bepangan, nuan tentu deka kaul nya mujur. Lalu mayuh pasangan udah mujur ngereja nya. Tsion, a siku menyadi indu ari Etiopia madahka: “Siti ari timpuh ke ngagaka ati aku, iya nya lebuh aku enggau laki aku bepangan. Taja pan kami bisi berandauka pekara ti penting, tang kami mega bisi mayuh ketawa. Aku amat gaga ati laban aku udah tetemuka orang ke dikesayauka aku sereta ke sayauka aku.”

² Taja pia, Alessio, siku menyadi lelaki ari Belanda madahka: “Aku enjoy ulih ngelala bini aku lebuh kami duai benung dating. Tang kami mega bisi napi sekeda cabaran.” Dalam artikel tu, kitai deka berandauka sekeda cabaran ke ulih nyadi, sereta prinsip Bup Kudus ke ulih nulung pasangan ke benung bepangan ngambika ulih ngaga pemutus ti manah. Kitai mega deka berandauka baka ni bala menyadi ba raban gempuru ulih nyukung pasangan ke benung bepangan.

TUJU BEPANGAN

3. Nama tuju bepangan? (Jaku-Dalam 20:25)

³ Taja pan timpuh bepangan ngagaka ati, tang pasangan nya patut nemu pemesai reti pengawa tu laban tu engka ulih ngujungka seduai iya kawin. Ba hari pasangan nya kawin, seduai iya besemaya ba mua Jehovah deka rindu sereta bebasaka pangan diri seagi-agi seduai iya agi idup. Nya alai, sebedau kitai ngaga sebarang semaya, kitai patut berundingka pekara nya enggau silik. (Bacha Jaku-Dalam 20:25.) Nya mega sama enggau semaya jadi melaki-bini. Lebuh bepangan, seduai iya ulih ngelala pangan  diri enggau manah agi lalu tu ulih nulung seduai iya ngaga pemutus ti manah. Kekadang pemutus nya ngujungka pasangan nya kawin tauka ngujungka seduai iya mutuska kaul nya. Enti pasangan nya mutuska kaul nya, tu ukai reti iya seduai iya udah gagal. Tang timpuh bepangan nya nulung seduai iya nemu sekalika seduai iya patut kawin tauka enda. Enggau nya, pengawa bepangan nya udah nulung seduai iya ngaga pemutus ti manah.

4. Nama kebuah kitai patut bisi runding ti betul pasal pengawa bepangan?

⁴ Nama kebuah nya penting ngembuan runding ti betul pasal pengawa bepangan? Enti nuan nemu, nuan nadai ati deka kawin enggau orang nya, kati nuan deka berengkah bepangan enggau iya? Enti nuan bisi runding ti betul pasal pengawa bepangan, nuan tentu enda ngereja nya. Tang, ukai orang ke bujang dara aja ke patut ngembuan runding ti betul. Semua kitai patut ingat tuju pengawa bepangan. Ambika chunto, sekeda orang ngumbai, enti pasangan benung bepangan, sida mesti kawin. Baka ni runding ke baka tu ulih ngachau orang Kristian ke bujang dara? Melissa, siku menyadi indu ke bedau kawin ari Amerika Serikat madahka: “Mayuh bala menyadi ke benung bepangan berasai ditekan laban sekeda orang ngumbai sida tentu deka kawin. Ketegal nya, sekeda pasangan terus bepangan taja pan seduai iya enda sesuai ke pangan diri. Bisi mega ke langsung enggai bepangan. Tu engka ulih balat nekan bala menyadi ke agi bujang dara.”

NGELALA PANGAN DIRI ENGGAU MANAH

5-6. Nama utai ke patut ditemu pasangan ke benung bepangan pasal pangan diri? (1 Peter 3:4)

⁵ Enti nuan benung bepangan, nama deka nulung nuan ngaga pemutus sekalika deka kawin tauka enda? Kelala meh pangan diri enggau manah agi. Nuan engka udah nemu sekeda utai pasal pasangan nuan sebedau seduai berengkah bepangan. Tang diatu nuan bisi peluang ngelala sapa iya ti bendar. (Bacha 1 Peter 3:4.) Nuan ulih nemu mayuh agi pasal kaul iya enggau Jehovah, personaliti iya, sereta chara iya berunding. Nyau kelama, nuan ulih tetemuka saut ngagai tanya ke baka tu: ‘Kati iya ulih nyadi kaling pengidup ti manah ke aku?’ (J-lam. 31:​26, 27, 30; Eps. 5:33; 1 Tim. 5:8) ‘Kati kami duai bela ulih rindu sereta meri perhatian ke diguna ngagai pangan diri? Kati kami duai bela ulih nerima pengurang pangan diri?’ b (Rom. 3:23) Seraya seduai majak ngelala pangan diri, kingatka meh: Utai ti pemadu penting ukai utai ti sama entara seduai, tang sekalika seduai ulih nerima utai ti bebida entara pangan diri.

 ⁶ Nama utai bukai ke patut ditemu nuan pasal pasangan nuan maya bepangan? Sebedau asai ati nuan ke pangan nuan majak dalam, nuan engka patut berandauka sekeda pekara ti penting, baka nama juluk ati seduai. Tang baka ni enggau pekara peribadi baka pengerai, situasi kewangan, tauka utai ke enda manah ke kala nyadi dalam pengidup seduai? Seduai enda ibuh berandauka semua utai lebuh baru bepangan. (Banding John 16:12.) Enti nuan ngasaika kelalu tumu deka berandauka pasal sekeda pekara peribadi nya, padahka nya ngagai pasangan nuan. Tang nyau kelama, nuan patut madahka utai nya ngagai pasangan nuan ngambika seduai ulih ngaga pemutus ti manah. Nyadi, lebuh nuan udah besedia, berandauka meh utai tu enggau pasangan nuan secara terus terang. Nuan enda ulih nyeliah ari berandauka pekara tu belama iya.

7. Baka ni pasangan ke benung bepangan ulih ngelala pangan diri? (Peda mega kutak “Lebuh Bepangan enggau Orang ke Diau ba Endur ti Jauh ari Nuan.”) (Peda mega gambar.)

⁷ Baka ni nuan ulih ngelala pasangan nuan enggau manah agi? Nuan ulih ngereja tu enggau nanya tanya, lalu udah nya mendingka pangan diri. Anang nangi madahka asai ati nuan, lalu beterus-terang meh enggau pangan diri. (J-lam. 20:5; Jas. 1:19) Nuan engka ulih milih ngereja pengawa ke ngasuh seduai senang agi berandau. Seduai ulih makai begulai, bejalai ba endur orang mayuh, tauka nginjil begulai. Seduai mega ulih belajar pasal pangan diri lebuh begulai enggau bala kaban tauka diri sebilik. Nambahka nya, nuan mega ulih ngatur mayuh macham aktiviti ngambika nuan ulih meda reaksi pasangan nuan ba situasi ti bebida, sereta lebuh iya begulai enggau mayuh macham orang. Peratika utai ke digaga Aschwin ari Belanda. Ku iya madah pasal utai ke digaga iya lebuh bepangan enggau Alicia: “Kami ngiga aktiviti ke ulih nulung kami ngelala pangan diri. Kesuah iya, kami ngereja pengawa ti simple aja, baka nyediaka pemakai begulai tauka ngereja sekeda pengawa. Lebuh kami ngereja pengawa nya, kami ulih meda pengering enggau pengurang pangan diri.”

8. Nama penguntung lebuh pasangan ke benung bepangan belajarka Bup Kudus begulai?

⁸ Nuan mega ulih ngelala pangan diri lebuh belajarka Bup Kudus begulai. Enti seduai udah kawin, seduai patut netapka awak belajarka Bup Kudus ba diri sebilik. Enggau nya, Petara ulih nyadi sebagi ari tikah seduai. (P-jar. 4:12) Nyadi, seduai engka ulih netapka awak belajarka  Bup Kudus diatu, indah lebuh seduai benung bepangan. Endang amat, pasangan ke benung bepangan bedau nyadi siti ruang bilik. Lalu menyadi lelaki nya ukai kepala menyadi indu nya. Taja pia, lebuh seduai suah belajarka Bup Kudus begulai, seduai ulih belajar pasal kaul pangan diri enggau Jehovah. Max enggau Laysa, sepasang laki bini ari Amerika Serikat, madahka siti agi penguntung lebuh seduai iya belajarka Bup Kudus begulai. Ku Max: “Lebuh kami baru bepangan, kami belajarka topik pasal dating, tikah, enggau pengidup ba diri sebilik. Ketegal kami belajarka litaricha ke ngembuan topik ke baka nya, kami ulih berandauka mayuh pekara ti penting ke tusah deka dibai berandau.”

PEKARA BUKAI KE PATUT DIPERUNDINGKA

9. Nama utai ke ulih nulung pasangan ke benung bepangan milih sapa ke patut nemu pasal kaul seduai iya?

⁹ Sapa ke patut nemu nuan benung bepangan? Nya pemutus ke patut digaga nuan enggau pasangan nuan. Lebuh seduai baru bepangan, seduai engka milih deka madahka tu ngagai sekeda orang aja. (J-lam. 17:27) Enggau nya, nuan ulih nyeliah ari ditanya mayuh tanya pasal kaul nuan enggau pasangan nuan. Nuan mega ulih nyeliah ari ditekan ngaga sesiti pemutus. Taja pia, enti nuan nadai madah ngagai sapa-sapa, tu mega bahaya ke seduai. Seduai engka ngereja utai kediri ba endur ti sunyi laban enggai ditemu orang. Nyadi, manah agi enti nuan ulih madah ngagai sida ke ulih meri nasihat ti manah sereta nulung nuan enggau chara ti bukai. (J-lam. 15:22) Ambika chunto, nuan ulih madah ngagai sekeda diri sebilik, sekeda kaban ti matang, tauka sekeda bala tuai gempuru.

10. Baka ni pasangan ke benung bepangan ulih nentuka ulah seduai iya ngelantangka ati Jehovah? (Jaku-Dalam 22:3)

¹⁰ Baka ni nuan ulih bepangan enggau chara ti ngelantangka ati Jehovah? Endang amat, seraya asai ati nuan ke pangan nuan majak dalam, seduai deka majak agi bisi minat ngagai pangan diri. Nama ulih nulung seduai nyeliah ari ngereja utai ti enda ngelantangka ati Jehovah? (1 Kor. 6:18) Seliahka randau pasal ulah seks ti kamah, begulai kediri enggau pasangan nuan ba endur ti sunyi, enggau pengawa udu ngirup. (Eps. 5:3) Ulah tu ulih meransang pengingin seks, lalu tu deka ngasuh nuan tusah deka ngereja utai ti betul. Manah agi enti seduai suah berandau pasal chara seduai ulih bebasaka pangan diri sereta nitihka standard Jehovah. (Bacha Jaku-Dalam 22:3.) Peratika utai ke nulung Dawit enggau Almaz ari Etiopia. Seduai iya madah: “Kami ngiga endur ke bisi mayuh orang tauka mai bala kaban enggau kami duai. Kami enda kala kediri dalam kerita tauka dalam rumah. Nyadi, tu ulih nulung kami nyeliahka situasi ti bahaya.”

11. Nama utai ke patut diperundingka pasangan ke benung bepangan lebuh ngaga pemutus pasal chara ngayanka penyayau ngagai pangan diri?

¹¹ Kati pasangan ke benung bepangan ulih ngayanka penyayau ngagai pangan diri? Lebuh pengerindu seduai majak dalam, seduai engka deka ngayanka penyayau ngagai pangan diri enggau chara ti enda ngelanggar prinsip Bup Kudus. (P-dai. 1:2; 2:6) Taja pia, enti pengingin seks nuan majak kuat, nuan engka tusah deka ngaga pemutus ti manah pasal pasangan nuan. Pia mega, lebuh nuan ngayanka penyayau, nuan engka tusah deka nagang diri lalu tu ulih ngujungka nuan ngereja utai ti dipegedika Jehovah. (J-lam. 6:27) Nya alai, lebuh seduai baru bepangan, berandauka meh standard Jehovah lalu tetapka tatak lebuh seduai ngayanka penyayau. c (1 Tes. 4:​3-7) Seduai ulih berandauka tanya tu: ‘Nama runding orang bukai ba  endur tua diau lebuh sida meda tua ngayanka penyayau ngagai pangan diri? Kati chara tua ngayanka penyayau ulih ngemansangka pengingin seks entara tua?’

12. Enti pasangan ke bepangan enda sepenemu, nama utai ke patut diperundingka seduai iya?

¹² Nama ulih digaga nuan enti nuan enda sepenemu enggau pasangan nuan? Enti kekadang seduai enda sepenemu enggau pangan diri, kati tu reti iya seduai enda sesuai ke pangan diri? Enda semesti iya, laban semua pasangan kekadang enda sepenemu enggau pangan diri. Dua iku orang ke ulih bebasaka pangan diri sereta sanggup ngubah diri nitihka utai ke dikerinduka pasangan iya, deka numbuhka siti tikah ti tegap. Nyadi, chara nuan mutarka penanggul diatu deka nunjukka sekalika tikah nuan deka mujur tauka enda. Seduai ulih berandauka tanya tu: ‘Ulih tua berandauka pekara nya enggau tenang sereta basa? Kati tua sanggup ngaku penyalah diri lalu bebendar ngaga ubah? Kati tua ulih ngalahka diri, minta ampun, sereta ngampun?’ (Eps. 4:​31, 32) Taja pia, enti seduai selalu enda sepenemu tauka suah belaya maya bepangan, situasi nya engka deka terus nyadi indah pengudah seduai kawin. Enti nuan sedar orang nya ukai pasangan ti sesuai ke nuan, pemutus ti pemadu manah ke seduai, iya nya mutuska kaul nya. d

13. Nama ulih nulung pasangan ke benung bepangan ngaga pemutus pasal ni pengelama seduai iya patut bepangan?

¹³ Ni pengelama nuan patut bepangan? Pemutus ke digaga enggau beguai-guai kesuah iya enda mujur. (J-lam. 21:5) Nyadi, timpuh seduai bepangan patut chukup panjai ngambika seduai ulih ngelala pangan diri enggau manah. Taja pia, seliahka meh ari bepangan kelalu lama enti nuan enda ibuh ngereja nya. Bup Kudus mega madahka: ‘Utai ti diadang orang tang enda datai, iya ngasuh ati tusah.’ (J-lam. 13:​12, Bup Kudus Berita Manah Ka Rebak Diatu.) Nambahka nya, majak lama seduai bepangan, majak tusah seduai deka ngelaban pengingin seks. (1 Kor. 7:9) Nyadi, ari ke betumpu ba pengelama seduai udah bepangan, tanya meh diri empu: ‘Nama agi utai ke patut ditemu aku pasal pasangan aku ngambika ulih ngaga pemutus?’

BAKA NI ORANG BUKAI ULIH NYUKUNG PASANGAN KE BENUNG BEPANGAN?

14. Baka ni orang bukai ulih nyukung pasangan ke benung bepangan? (Peda mega gambar.)

¹⁴ Enti nuan nemu pasangan ke benung bepangan, baka ni nuan ulih nulung sida? Nuan ulih mai seduai iya makai begulai, belajarka Bup Kudus ba diri sebilik begulai, tauka berekreasi begulai. (Rom. 12:13) Enggau nya, seduai iya ulih ngelala pangan diri enggau manah agi. Engka nuan ulih pansut enggau seduai iya, nepan kerita enggau seduai iya, tauka mai seduai iya ngagai rumah nuan ngambika seduai  iya ulih berandau secara peribadi enggau pangan diri. (Gal. 6:10) Alicia, ke disebut sebedau tu, ngenang baru utai ke negu ati iya enggau Aschwin. Ku iya: “Kami amat gaga ati lebuh sekeda bala menyadi madah, kami ulih ngagai rumah sida enti kami begunaka tempat kena berandau enggau pangan diri.” Enti pasangan nya mai nuan pansut enggau seduai iya, anggap meh nya siti chara nulung kaban nuan. Bejimat meh ngambika enda nejuka seduai iya kediri aja, tang nuan mega mesti nemu ni maya nuan patut nejuka seduai iya berandau secara peribadi.—Plp. 2:4.

15. Nama agi chara bukai ke ulih digaga bala kaban kena nyukung sida ke benung bepangan? (Jaku-Dalam 12:18)

¹⁵ Kitai mega ulih nyukung sida ke benung bepangan ari utai ti disebut kitai enggau utai ti enda disebut kitai. Bisi maya iya, kitai patut nagang diri lalu enda nyebut nama-nama utai. (Bacha Jaku-Dalam 12:18.) Ambika chunto, kitai engka keran deka madah ngagai orang bukai pasal pasangan ke baru bedating, tang seduai iya engka deka bekunsika berita nya kediri empu ngagai orang bukai. Kitai enda patut bejakuka sida ke benung bepangan, tauka bejaika pemutus ke digaga sida. (J-lam. 20:19; Rom. 14:10; 1 Tes. 4:11) Pia mega, kitai enda patut nyebut tauka nanya utai ke ulih ngasuh pasangan nya berasai ditekan ngambika kawin. Siku menyadi indu ke benama Elise enggau laki iya ngenang baru: “Malu amat lebuh orang nanya pasal pelan kawin kami. Maya nya, kami empu pan bedau agi berandauka nya.”

16. Nama reaksi ke patut dikembuan kitai enti pasangan ke bepangan mutuska kaul seduai iya?

¹⁶ Baka ni enti pasangan ke bepangan mutuska kaul seduai iya? Kitai enda patut sibuk deka masuk champur hal peribadi seduai iya, tauka bepiak ba sapa-sapa. (1 Pet. 4:15) Siku menyadi indu ke benama Lea madahka: “Lebuh aku ninga orang bukai bejaku pasal kebuah aku enggau siku menyadi lelaki badu agi bepangan, aku amat pedis ati.” Baka ke dikerandauka sebedau tu, enti pasangan ke benung bepangan mutuska kaul seduai iya, tu ukai reti iya seduai iya udah gagal. Kebendar iya, timpuh seduai iya bepangan nya udah nulung seduai iya ngaga pemutus ti manah. Taja pia, pemutus ke digaga seduai iya nya tentu ngasuh seduai iya berasai tusah ati sereta puang. Nya alai, giga meh chara kena nulung seduai iya.—J-lam. 17:17.

17. Nama utai ke patut terus dikereja pasangan ke benung bepangan?

¹⁷ Baka ke udah dikerandauka kitai, timpuh bepangan nya bisi cabaran, tang timpuh nya mega ulih ngagaka ati. Ku Jessica ngenang baru: “Terus terang, bepangan nya begunaka mayuh usaha. Tang aku gaga ati kami duai pangan aku, ngena awak enggau pengering ngelala pangan diri enggau manah.” Enti nuan benung bepangan, terus meh ngelala pangan diri enggau manah. Enti nuan ngereja nya, nya deka nulung seduai ngaga pemutus ti manah.