ATUAQQISSAAGASSAQ 22
ERINARSUUT 34 Assuarnaallunga inoorusuppunga
Jehovamut ataqqinaataasumik qanoq peerariittoqarsinnaasoq
‘Qamuuna kinaassusersi naleqangaarpoq.’ – PET 1. 3:4.
SAMMISAQ
Qanoq ajunngitsumik peerariittoqarsinnaasoq aamma ilagiinniittut qanoq peerariit ikiorlugillu tapersersorsinnaagaat.
1-2. Peerariinneq pillugu ilaat qanoq oqarsimappat?
PEERARIINNEQ nuannersuullunilu pissanganartuusinnaavoq. Peeraqaruit qularnanngitsumik kissaatigigunarpat ajunngitsumik kinguneqassasoq. Peerariilluartoqartarpormi. Tsion, a qatanngut arnaq Etiopiamiu, ima oqarpoq: “Inuuninni pilluarnarnerpaat ilagaat uissaralu peerariikkatta. Pingaarutillit pillugit oqaloqatigiittarpugut, aammali illaqatigiittarpugut. Asasannik nassaarama aamma taassumannga asaneqarnera paasigakku pilluaqaanga.”
2 Alessio, qatanngut angut Hollandimiu, ima oqarpoq: “Nuliaralu peerariilluta immitsinnut ilisarisimalerniarnerput nuannaarutigisaqaara, kisianni aamma unamminiarnartoqarpoq.” Unamminiarnarsinnaasut taavalu peerariit Jehovamut ataqqinaataasumik peerariikkumallutik Biibilimi najoqqutassiat iluaqutigisinnaasaat allaaserisami matumani sammissavagut. Aamma paasissavarput ilagiinniittut qanoq peerariit tapersersorlugillu ikiorsinnaagaat.
PEERARIINNERUP SIUNERTAA
3. Peerariinnerup suna siunertaraa? (Ussatit 20:25)
3 Peerariinneq nuannersuuvoq. Kisianni aamma piffissaavoq pimoorunneqartussaq, kingunerisinnaavaami katinneq. Ullormi katiffimminni aappariit inuutillutik asaqatigiinniarlutillu ataqqeqatigiinniarlutik Jehovap saavani neriorsuisarput. Neriorsuinnginnermi tamatigut eqqarsarluaqqaartoqartariaqarpoq. (Ussatit 20:25 atuaruk). Tamannalu katinnermi neriorsoqatigiinnermut tunngatillugu pingaaruteqarluinnarpoq. Taamaattumik peerariit imminnut ilisarisimallualernissaat pingaaruteqarpoq ajunngitsumik aalajangiiniassammata. Aalajangigaq tassaasinnaavoq katinnissaq imaluunniit qimannissaq. Peerariit peerariikkunnaarpata imaanngilaq ajortumik iliorsimasut. Tassami aalajangiinermik kinguneqarpoq, tamannalu peerariinnerup siunertaraa.
4. Sooq peeraqarnermut tunngatillugu eqqortumik isiginnittaaseqassaagut?
4 Sooq peerariinnermut tunngatillugu eqqortumik isiginnittaaseqarnissaq pingaaruteqarpa? Kisimiittut eqqortumik isiginnittaaseqarunik katikkusunngisartik peerarilernavianngilaat. Imaanngilarli kisimiittut kisimik eqqortumik isiginnittaaseqassasut. Tamattami peerariinnerup siunertaa eqqaamassavarput. Assersuutigalugu ilaat isumaqartarput peerariit katittariaqartut. Taamatut isiginnittaaseqarneq kisimiittunut qanoq kinguneqartarpa? Melissa, qatanngut arnaq kisimiittoq USA-mi najugalik, ima oqarpoq: “Uppeqatigiit peerariileraangata Nalunaajaasut ilaasa naatsorsuutigisarpaat katissasut. Tamatuma kingunerisaanik ilaasa tulluartuunngikkaluarlutik peerariinnertik ingerlatiinnartarpaat. Aamma kisimiittut ilaat peeraqarusunngilluinnartarput. Ingasattumimmi tatineqartoqarsinnaammat.”
ILISARISIMALLUALERITSI
5-6. Peerariit peerarisaminnut tunngatillugu suut paasiniartariaqarpaat? (Petrusimit 1. 3:4)
5 Katissanerlusi katissannginnerlusiluunniit aalajangiiniarnissinnut suna iluaqutigisinnaavisiuk? Ilisarisimallualerneq. Peerariilinnginnissinni immissinnut tunngasut paasisimagunarpasi. Maannali ‘qamuuna kinaassusersi’ qanoq ittuunersoq ilinniarnissaanut periarfissaqalerpusi. (Petrusimit 1. 3:4 atuaruk). Tassa aapparilersinnaasavit anersaakkut nukittussusia, inuttut qanoq ittuunera qanorlu eqqarsartariaaseqarnersoq eqqarsaatigalugit ilisarisimanerulersinnaavat. Piffissap ingerlanerani apeqqutit uku akissutissarsissagunarpatit: ‘Uannut aappaalluartuussava?’ (Uss 31:26, 27, 30; Ef 5:33; Tim 1. 5:8) ‘Misigissutsikkut pisariaqartitagut matussusersinnaavagut? Kukkussutai naammagalugit atorsinnaavakka?’ b (Rom 3:23) Ilisarisimanerujartortillusi una eqqaamasiuk: Assigiissuteqarnersi pinnani assigiinngissuteqarnissinnulli tulluarsarnersi pingaaruteqarnerpaajuvoq.
6 Peerariinnissinni aamma suut paasisariaqarpisigit? Asannilersoorpallaannginnissinni pingaarutillit, soorlu inuttut anguniakkasi, eqqartoqqaartariaqarpasi. Imaassinnaavoq arlarsi peqqissutsikkut ajornartorsiuteqartoq, aningaasatigut ajornartorsiuteqartoq imaluunniit kingunerluutigisaminik nalaataqarsimasoq. Taakkualu eqqartornissaat pingaaruteqarpoq. Imaassinnaavorli peerariilerussi tamakku tamaasa ingerlaannaq eqqartortariaqanngikkisi. (Aamma takuuk Johannesi 16:12). Misigiguit namminermut tunngasut eqqartornissaat siusippallaartoq oqarfigiuk. Piffissalli ingerlanerani ammarfigisariaqassavat, peerarisavimmi tamakku paasisariaqassavai aalajangiilluarniassagami.
7. Peerariit imminnut qanoq ilisarisimanerulersinnaappat? (Aamma ungalusaq “ Ungasissumi najugalimmik peeraqarneq” takuuk). (Aamma assit takukkit).
7 Peerarisavit qamuuna qanoq ittuunera qanoq paasiniarsinnaaviuk? Ilaatigut ammasumik unneqqarissumillu oqaloqatigiittarnikkut, aperisarnikkut tusarnaarluartarnikkullu. (Uss 20:5; Jaak 1:19) Immaqa ammasumik oqaloqatigiilerumallusi sammisaqaqatigiissinnaavusi, soorlu nereqatigiillusi, pisuttuaqatigiillusi aamma oqaluusseqatigiillusi. Aamma ikinngutit ilaquttallu ilagisarnerisigut immissinnut ilisarisimanerulersinnaavusi. Aamma sammisaqaqatigiinnissamik pilersaarusiorsinnaavusi taamaalillusi pisuni assigiinngitsuni inuillu assigiinngitsukkuutaat peqatiginerini peerarisaq qanoq pissusilersornersoq maluginiartarsinnaavarsi. Aschwinip Hollandimiup Alicia peerarigamiuk qanoq iliuuseqarsimanera maluginiaruk. Ima oqarpoq: “Immitsinnut ilisarisimalerniassagatta sammisaqaqatigiittarpugut. Ulluinnarsiutaasinnaapput, soorlu igaqatigiinneq imaluunniit arlaatigut ikioqatigiinneq. Taamatut sammisaqaqatigiikkaangatta peeratta nukittoqutai sanngeequtaalu takusarpagut.”
Sammisaqaqatigiittarussi ammasumik oqaloqatigiilersinnaavusi immissinnullu ilisarisimallualerlusi (Immikkoortut 7-8 takukkit)
8. Peerariit Biibilimik misissueqatigiinnertik qanoq iluaqutigisinnaavaat?
8 Aamma immissinnut ilisarisimanerulersinnaavusi anersaakkut ittunik misissueqatigiikkaangassi. Katissagussi Jehova aappariinnissinni pingaarnerpaatittussaagassiuk ilaqutariittut Biibilimik atuaqqissaarnissamut piffissamik immikkoortitsisassaasi. (Oqal 4:12) Taamaattumik maanna peerariitsillusi Biibilimik misissueqatigiinnissamut pilersaarusioreersinnaavisi? Soorunami peerariit suli inoqutigiilinngillat, aamma qatanngut angut suli qatanngummut arnamut niaquunngilaq. Taamaakkaluartorli misissueqatigiittarnissigut anersaakkut ittunik pingaartitsinersi pillugu ilinniarsinnaavusi. Maxip Laysallu, aappariit USA-mi najugallit, iluaqutissaq alla paasivaat. Max ima oqarpoq: “Peerariilerlaajulluta Biibililersaarutigut, soorlu peerariinneq, aappariinneq ilaqutariinnerlu pillugit, misissortalerpagut. Taamaalilluta pingaarutillit pillugit oqaloqatigiittalerpugut, misissueqatigiinngitsuugutta taakku eqqartorsimanavianngikkaluarpagut.”
EQQARSAATIGISASSAT ALLAT
9. Peerariit peerariinnertik kikkunnut oqaatigissanerlugu suut eqqarsaatigissavaat?
9 Peerariinnersi kikkunnut oqaatigissavisiuk? Ilissi nammineq aalajangissavarsi. Immaqa aallaqqaammut amerlavallaanngitsunut eqqaassavarsi. (Uss 17:27) Taamaaliornikkut apeqquterpassuit aalajangiiniarnissinnullu tatineqarnerit pinngitsoortissinnaavasi. Kisianni kimulluunniit oqanngikkussi immikkoornialersinnaavusi ernumassutigalugu allat paasissagaat. Tamanna navianaateqarsinnaavoq, kisimiikkussimi ajortuliornermik kinguneqarsinnaavoq. Taamaattumik ilissinnik ikiuisinnaasunut siunnersuisinnaasunullu oqarnissarsi silatusaarneruvoq. (Uss 15:22) Assersuutigalugu ilaquttat ilaannut, ikinngutinut inersimalluartunut imaluunniit utoqqaanertanut oqaluttuarsinnaavusi.
10. Peerariinnissinni pissusilersornikkut qanoq minguitsuujuarsinnaavisi? (Ussatit 22:3)
10 Peerariinnissinni pissusilersornikkut qanoq minguitsuujuarsinnaavisi? Immissinnut misigissutsissi sakkortusiartornerini pilerissuseqarnerulissaasi. Minguitsuujuarnissassinnulli suna iluaqutigisinnaavisiuk? (Kor 1. 6:18) Kinguaassiuutitigut eqqunngitsuliorneq naleqqutinngitsumik eqqartornaveersaarsiuk kisimiinnaveersaarlusilu, aamma aalakoornartutorpallaassanngilasi. (Ef 5:3) Taakkumi pilerissuseqarnermik pilersitsisinnaapput eqqortuliornissassinnillu sapernartitsilerlutik. Ataqqeqatigiikkumallusi Jehovallu najoqqutassiaanik ataqqinnikkumallusi qanoq iliussanerlusi eqqartuisarussi silatusaassaasi. (Ussatit 22:3 atuaruk). Dawitip Almazillu Etiopiameersut suna iluaqutigisimaneraat maluginiaruk. Ima oqaluttuarput: “Sumiiffinni inoqarluartuni imaluunniit ikinngutigut ilagalugit peqatigiittarpugut. Biilini illumiluunniit kisimiinngisaannarpugut. Taamaalilluta ussernartorsiorfigisinnaasagut ingalassimasarpagut.”
11. Peerariit timikkut attuinermut tunngatillugu suna eqqarsaatigissavaat?
11 Peerariit misigissutsitik timikkut ersersissavaat? Asaqatigiinnerujartortillusi ilisarisimanerujartortillusilu asanninnermik ersersitseriaatsit ilaat naleqqussinnaapput. (Erin 1:2; 2:6) Kisianni immissinnut pileralusi atoqateqarusussuseq annertusivallaarpat silatusaartumik eqqarsarnissaq sapernarsisinnaavoq. Aamma timikkut attortarussi imminut aqussinnaajunnaaratarsinnaavusi eqqunngitsuliorlusilu. (Uss 6:27) Taamaattumik peerariilerlaajullusi Jehovap najoqqutassiai eqqartorsigit killiliinissarsilu eqqartorlugu. c (Tes 1. 4:3-7) Aamma eqqartorsinnaavarsi asaqatigiinnissinnik timikkut ersersitsigussi allat tamanna pillugu qanoq isumaqassanersut, eqqunngitsumillu pilerissuseqalernissamik kinguneqarsinnaanersoq.
12. Peerariit ajornartorsiorunik suna eqqarsaatigissavaat?
12 Ajornartorsiutit isumaqatigiinngissutillu qanoq aaqqissinnaavisigit? Isumaqatigiinngittarussi isumaqarpa peerariinnerliortusi? Taamaattariaqanngilaq; aappariimmi tamarmik isumaqatigiinngissuteqarsinnaapput. Aappariilluartut tassaapput ataqqeqatigiittut aapparisamik assigiinngissutaanut naleqqussarsinnaasut. Tassa maanna ajornartorsiutissinnik qanoq aaqqiisarnissi ersersissinnaavaa aappariillualerumaarnersusi. Uku eqqarsaatigalugillu eqqartorsigit: ‘Eqqissilluta ataqqinnillutalu eqqartuisinnaavugut? Kukkussutigut nassuerutigipallattarpagut inuttullu pitsannguiniartarluta? Immitsinnut naleqqussarumasarpugut, utoqqatsipallattarpugut isumakkeerfigeqatigiipallattarlutalu?’ (Ef 4:31, 32) Peerariinnissinnili isumaqatigiinngittuarussi kamaattuarussilu ilimananngilaq katikkussi suut tamarmik aaqqissasut. Paasigukku tulluarnasi peerariikkunnaarussi tamassinnut pitsaanerpaajussaaq. d
13. Peerariit qanoq sivisutigisumik peerariissanerlutik qanoq paasiniarsinnaavaat?
13 Qanoq sivisutigisumik peerariissavisi? Aalajangiipallannerit kingunerlutsitsisinnaapput. (Uss 21:5) Taamaattumik ilisarisimallualernissassi tungaanut peerariissinnaavusi. Pisariaqartumilli sivisunerusariaqanngilaq. Biibilimi allassimavoq: “Sivisunaartumik pissamaarnerup uummat nappaateqalersittarpaa.” (Uss 13:12) Sivisuumik peerariissimagussi kinguaassiuutitigut eqqunngitsuliornissamut ussernartorsiornermi nakkaannannginnissaq sapernarnerujartortarpoq. (Kor 1. 7:9) Peerariinnersi qanoq sivisutigissanersoq eqqarsaatigivallaarnagu una eqqarsaatigiuk: ‘Silatusaartumik aalajangiiumallunga peerarisannut tunngatillugu suut paasisariaqarpakka?’
ALLAT PEERARIINNIK QANOQ TAPERSERSUISINNAAPPAT?
14. Peerariit tapersersorumallugit allat qanoq ikiuisinnaappat? (Aamma asseq takuuk).
14 Peerariinnik nalunngisaqarutta taakku qanoq ikiorsinnaavagut? Neriartoqqusinnaavagut, Biibilimik misissueqatigiinnitsinnut qaaqqusinnaavagut imaluunniit sukisaarsaqatigisinnaavagut. (Rom 12:13) Taamaalillutik imminnut ilisarisimanerulersinnaapput. Immaqa pingajoqarnissaannik imaluunniit biiliunnissaannik ikiorsinnaavagut, sumiiffimmilluunniit allat ilisimasariaqanngisaannik oqaloqatigiissinnaaniassammata ikiorsinnaavagut. (Gal 6:10) Alicia eqqaaneqareersoq Aschwinilu qanoq ikiorneqarsimanertik pillugu ima oqaluttuarpoq: “Qujamasunnaqaaq peqatigiissinnaaqqulluta qatanngutit oqarfigisarmatigut pulaarsinnaasugut, taamaalilluta kisimiinnaveersaarsinnaavugut.” Aperineqaruit ilagisinnaaneritit ikiuinissamut periarfissatut isigiuk. Mianersuutigiulli peerariit kisimiitinnginnissaat, kisimiitinngikkaluarlugit allat ilisimasariaqanngisaannik oqaloqatigiinnissaannut periarfissikkit. – Flp 2:4.
Peerariinnik nalunngisaqarutta eqqumaffigisinnaavarput qanoq tapersersorsinnaanerlutigit (Immikkoortut 14-15 takukkit)
15. Ikinngutit allatigut qanoq peerariinnik tapersersuisinnaappat? (Ussatit 12:18)
15 Peerariit aamma allatigut tapersersorsinnaavagut, tassa oqaatsitsigut aamma oqaaseqannginnitsigut. Ilaannikkut imminut aqussinnaalluta oqaaseqarnaveersaartariaqarpugut. (Ussatit 12:18 atuaruk). Assersuutigalugu peerariilertoqarsimanera allanut ingerlateqqikkusuppallassinnaavarput, imaassinnaavorli peerariit namminneq oqaatigerusukkaat. Peerariit pillugit eqqartuissanngilagut imaluunniit namminneq aalajangigaat pillugit isornartorsiuinata. (Uss 20:19; Rom 14:10; Tes 1. 4:11) Aamma aperissanngilagut imaluunniit oqamisaarluta katittariaqartut imaluunniit ilimanartoq katissasut. Qatanngut arnaq Elisemik atilik uinilu ima oqaluttuarput: “Peqqusiileqissutigisarparput allat aperigaangata katinnissatsinnut pilersaarutit qanoq ingerlanersut, naak tamakku suli eqqartunngikkaluarigut.”
16. Peerariikkunnaartoqarpat qanoq qisuariassaagut?
16 Taavami peerariit aalajangerunik peerariikkunnaarniarlutik? Susassarinngisagut pillugit aperissanngilagut aappaaluunniit peerariikkunnaarnerannut pisuutillugu. (Pet 1. 4:15) Qatanngut arnaq Leamik atilik ima oqarpoq: “Tusarpara qatanngutit eqqartorsimagaat sooq uppeqatigalu peerariikkunnaarsimanersugut. Tamannalu aliasuutigeqaara.” Siuliani eqqaaneqareersutut imaanngilaq peerariit peerariikkunnaartut naliliinerlussimasut. Tassami peerariinnerup siunertaraa silatusaartumik aalajangiinissaq. Taamaakkaluartorli peerariikkunnaarniarlutik aalajangernertik misigissutsikkut anniaatigisinnaavaat kiserliortutullu misigilerlutik. Taamaattumik qanoq tapersersorsinnaanerlutigit eqqumaffigisinnaavarput. – Uss 17:17.
17. Peerariit qanoq iliortuartariaqarpat?
17 Sammeriikkatsitut peerariinneq ilaannikkut unamminiarnartoqarsinnaavoq, kisianni aamma piffissaasinnaavoq nuannersoq. Jessica oqaluttuarpoq: “Ilumoorlunga oqassaguma peerariikkallaratta piffissangaatsiaq nukippassuillu atortarpagut. Sunali tamarmi imminut akilerpoq.” Peeraqaruit taanna ilisarisimalerniartuaruk. Marluullusi taamaaliorussi silatusaartumik aalajangiisinnaavusi.
ERINARSUUT 49 Jehovap uummataa nuannaartitsigu
a Atit ilaat allanngortitaapput.
b Apeqqutit eqqarsaatigisassat allat uaniipput: Unge spørger – Svar der duer, atuagaq 2, qupp. 39-40.
c Inuup allap kinguaassiuutaatigut attualaarinninneq eqqunngitsuliorneruvoq utoqqaanertat eqqartuussisinnaanermut ataatsimiititaliamik pilersitsinissaannik kinguneqartartoq. Iviangikkut attualaarinninneq aamma ileqqussatigut killissat qaangerlugit oqarasuaatikkut oqaloqatigiinneq allaqatigiinnerluunniit (sexting) qanoq pisoqarnera apeqqutaatillugu utoqqaanertat eqqartuussisinnaanermut ataatsimiititaliamik pilersitsinissaannik kinguneqarsinnaavoq.
d Paasisaqarnerujumallutit allaaserisaq “Spørgsmål fra læserne” Vagttårnet aggustip 15-iat 1999-imoortumiittoq takuuk.