1, 2. Japalí novios nili, ¿chu aní jaré hermanos echi jitra?

 JAPALÍ okuá pagótami novios ju, echalí we kanili. Ami olayáaká bilé novio o novia ma, a keʼré japi mi echi riká cho nili. Bilé hermana Etiopía bitéami Tiina riwéami, a jéaní: “Japalí nijé kunala alí nijé ati novios nili, we ni kanílili. Ati raʼichie namuti we natéami jitra, nalí ayénachó ti achiyé. We semati nili machiyá bilé japi we tamí galé alí japi nijé ayénachó we galé”.

² Ayénachó bilé hermano Alessio riwéami, Países Bajos bitéami, jéaní: “We ni kaníliki machiyá nijé upila japalí ti novios nili. Nalí ayénachó jilí nili”. Jenaʼí binelíwami binepo jaré namuti jilírami japi ikí alí chúriká echi Biblia omérima iʼwiria echi japi novios ju jiti aʼlá nátika nokimea. Ayénachó binepo piri omeri nokayá echi hermanos echoná congregación iʼwírimia japi novios ju.

PIRI ANIWÁAMI JU NOVIOS NIYA

3. ¿Chúsiá aʼlá ju novios niya? (Proverbios 20:25).

³ Olayá bilé novio o bilé novia, we semati ju, nalí we mi aʼlá natásaré jiti echi ko ju echi bachá namuti japi nokiwá niwimia. Japalí okuá pagótami niwí, echi ko katúwika ané Jeobá japi sinibí anakupi galema alí riwíwima. Alí kecho katúwika anea Jeobá jepuná namuti o jarecho si, sinéami tamujé we aʼlá natásaré japi ta nokiboa (leeri Proverbios 20:25). Jiti la, novios niya iʼwírima jiti okuánika anakupi aʼlá machimea alí we aʼlá natama achi niwima o ma ke. Alí, ma ke novios nínalaká, ke aniwáami ju japi  timí ke aʼlá nokali; nalí novios niya emi iʼwírili jiti timí aʼlá nátika nokimea.

4. ¿Chúsiá we natéami ju japi ta machiboa piri aniwáami ju novios niya?

⁴ ¿Chúsiá we natéami ju japi ta machiboa piri aniwáami ju novios niya? Jiti bilé we aʼlá machisáaká jepuná, ke novio nima bilé hermana o hermano yúa japi ke siné yúa niwínali. Nalí sinéami machisáré piri aniwáami ju novios niya, ke echi bi japi ke niwíkami ju. ¿Chúsiá? Jiti jaré ko nata japi okuá novios nísaká, ma iʼwérili ju japi niwísaré. Alí echi riká natia ke aʼlá ju, jiti ke iʼwiri echi japi ke niwíkami ju. Japi riká ruyé Melissa, bilé hermana japi bité echomí Estados Unidos. Echi ko aní: “Jaré hermanos iʼwérili ané echi japi novios ju jiti niwima. Jiti la, jaré ko a bijí novios ju tákoré echi ko mayé japi ke aʼlá upila o aʼlá kunala nima. Alí jarecho ko ke olánali novio o novia ma, jiti mayé japi ma iʼwérili ju japi niwísaré”.

IʼWÉRILI NOKISÍ ANAKUPI MACHIYÁ

5, 6. ¿Piri namuti machisáré echi japi novios ju? (1 Pedro 3:4).

⁵ Ami ma olásaká novio o novia ma, ¿piri mi iʼwírima machiyá achi mi niwima echi yúa o ke? Ami we aʼlá machisáré echi. A keʼré japi mi ma machili jaré namuti echi jitra japalí timí kecho bijí chotásili novios niya. Nalí jipi ju japalí mi aminabi we aʼlá machisáré japi chúriká ju echi “ne sulachí jonsa” (leeri 1 Pedro 3:4, TNM). Japi riká, ami machisáré achi we aʼlá Jeobá amígowala ju, chúriká natá alí piri isíami ju. Echi riká ami kilipi niraa machimea achi we aʼláala kunala nima o upila ma (Prov. 31:26, 27, 30; Efes. 5:33; 1 Tim. 5:8). Ayénachó mi nárika isísaré jepuná: “¿Achi ti oméripo anakupi iyayá japi newalé ibili niraa? ¿Achi ni omérima anachia echi namuti japi ke aʼlá isimí echi?” (Rom. 3:23). b Alí newalá japi ke natéami ju japi timí chopi iyiri nima, nalí japi timí aʼlá akaréwima echi namuti japi timí suwinárika ju.

⁶ Alí, ¿piri jarecho si namuti mi machisáré echi jitra japalí timí novios ju?  Kecho bijí we galea echi hermano o hermana ma, aʼlá ju japi timí raʼichama echi namuti we natéami jitra, japi riká piri namuti timí nokinali pe aminana. Ayénachó timí machisáré jepuná: achi timí nayúami ju, achi timí wikáami ju winomí alí echi namuti we jilírami japi timí ikili chabé. Ke newalé japi timí ne kulí jonsa raʼichama jepuná namuti jitra (ayénachó iné japi aní Juan 16:12). Ami níliaká japi mi kecho bijí raʼichánali jepuná jitra, ané. Nalí newalá japi timí raʼichásaré echi jitra jiti biléala newalé machiyá jepuná namuti aʼlá nátika isimia.

7. ¿Piri nokisáré japi novios ju jiti aminabi aʼlá machimea anakupi niraa? (Ayénachó iné echi recuadro “ Japalí echi novio o novia we miká bité” alí echi fotos).

⁷ ¿Piri mi iʼwírima jiti mi we aʼlá machimea chúriká ju biléala? We aʼlá raʼíchika ne sulachí jonsa, naria alí we aʼlá kipúa (Prov. 20:5; Sant. 1:19). Emi ko omeri nokayá jaré namuti japoná timí ke jilí nirama raʼichia, japi riká napawika koʼyá, simíaya biléana japoná nirú wiká pagótami, nawesia alí napawika simaria emi téemala yúa alí amigos. Ayénachó mi omeri isiá namuti japoná mi omérima aʼlá machiyá chúriká isíami ju jarecho pagótami yúa. Echi riká isili Albert, Países Bajos bitéami, japalí novio nili Alicia yúa. Echi ko jéaní: “Ati napawika nokayé jaré namuti japi tamó iʼwírili machiyá anakupi niraa. Japi riká wasia koʼwáami alí ti nokayé jarecho si namuti echoná bitichí. Echi riká ti we aʼlá machiki anakupi niraa”.

8. ¿Chúsiá we aʼlá ju japi echi novios napawika binema echi Biblia?

⁸ Napawika binea echi Biblia ayénachó mi iʼwírima jiti mi we aʼlá machimea chúriká ju echi novio o novia ma. Jiti pe aminana japalí timí ma niwisa, echi riká timí sinibí nokimea jiti Onorúami emi iʼwírima kanílika pirea (Ecl. 4:12). Jiti la, we aʼlá nima japi jipi jonsa a timí chotásima binea echi Biblia napawika niraa, jiti echi riká a timí inema achi biléala we aʼlá Jeobá amígowala ju. Max alí Laysa, bilé niwíkami japi piré echomí Estados Unidos, anijó japi binea echi Biblia ayénachó iʼwírili sinúrika niraa. Max jéaní: “Japalí ti jonsa chotásili novios niya,  ati napawika bineki echi oselí japi raʼicha chúriká nokimea japi novios ju, japalí ma niwisa alí echi niwíkami alí kúchuwala jitra. Suwaba echi namuti jitra, ati omériki raʼichia namuti we natéami japi ta aboi ke natámili echi jitra raʼichia”.

JARECHO NAMUTI JAPI TIMÍ NATÁSARÉ

9. Japi novios ju, ¿jépuká ruyésaré japi chotásili novios niya, alí chúsiá?

⁹ ¿Jépuká timí ruyema? Echi ko emi okuaka natásaré. A timí kulí chotásilaká novios niya, a keʼré japi timí pe kuabi pagótami ruyénali (Prov. 17:27). Jiti echi riká jarecho ko ke emi wiká namuti nárima alí ke emi iʼwérili anema. Nalí, ke timí bilé ruyésaká, a keʼré japi timí awénili mochínalima jiti timí ke nakí japi jarecho machimea; alí a timí awénili mochísaká, a keʼré japi timí we chati namuti nokimea. Jiti la, wabé aʼlá ju japi timí ruyema echi japi a emi iʼwírima alí emi iyama jaré busuréliami, japi riká téemala, amigos alí ancianos (Prov. 15:22).

10. ¿Piri iʼwírima japi novios ju jiti ke cha nokimea? (Proverbios 22:3).

¹⁰ ¿Piri emi iʼwírima jiti timí ke cha nokimea japalí timí novios ju? Japalí emi ko ma wilí novios ju, emi ko aminabi we galema anakupi niraa. Nalí a bichíwali ju japi timí ke nokinali namuti japi Jeobá kichí (1 Cor. 6:18). Jiti la, ke timí raʼichásaré echi nasawíliami chati jitra, ke timí awénili mochísaré alí ke timí waʼlú bajísaré (Efes. 5:3). Suwaba jepuná namuti omeri isiá japi timí we inílima nokinalia echi nasawíliami chati alí timí we jilí nirama nijewia Jeobá. Jiti la, we natéami ju japi timí raʼichama chúriká timí nokimea japalí timí novios ju jiti riwíwima japi Jeobá nulá (leeri Proverbios 22:3). Ma inepo japi nokali Dawit alí Almaz, Etiopía piréami, echi ko jéaní: “Ke ti siné awénili ripíe echoná bitichí o echoná carro, sinibí ti napawíe echi amigos yúa alí ti simíaye japoná jari wiká pagótami. Echi tamó iʼwírili jiti ta ke nokiboa chati namuti”.

11. Japalí echi novios newa noká japi anakupi galé, ¿piri newalásaré?

¹¹ Japalí timí novios ju, a keʼré japi timí newa nokinálima japi timí anakupi galé (Cant. 1:2; 2:6). Nalí, we timí inílisaká nasawínalia, we timí jilí nirama aʼlá nátika nokayá. Ayénachó, japalí timí newa noká japi timí anakupi galé, a keʼré japi echi isima japi timí chati namuti nokimea (Prov. 6:27). Jiti la, we natéami ju japi ne kulí jonsa japalí timí chotásimi novios niya, a timí raʼichama japi chúriká timí nokimea nijewia japi aní echi Biblia (1 Tes. 4:3-7). c Nárika nokisí jepuná: “¿Achi aʼlá niraa iné echi pagótami japoná ni bité japi echi novios newa nokimea japi anakupi galé? ¿Achi echi namuti isima japi biléala o nijé we inílima nasawínalia?”.

12. ¿Piri nokisáré japi novios ju japalí ikisaa namuti we jilírami?

¹² ¿Alí piri timí noká japalí ikisaa namuti we jilírami? Japalí timí sinúrika ineni bilé namuti, ¿achi jepuná aniwáami ju japi timí ma ke novios nísaré? Ke, jiti sinéami japi niwíkami ju isini kaachi sinúrika iné bilé namuti. Bilé niwíkami ko sinibí rojorá japalí echi okuaka iʼwérili  noká ku akarewia japalí ikisaa namuti jilírami. Jiti la, japi riká timí noká jipi ku akarewia echi namuti jilírami japi ikí, néwariwéliti chúriká timí nokiboa japalí timí ma niwisa. Nárika nokisí jepuná: “¿Achi ti simárika alí riwíwika raʼicha jipi? ¿Achi ti aní japi ta ke aʼlá nokali alí ti ku wikáwili taa?” (Efes. 4:31, 32). Nalí, wisabé niraa ke timí katúwika nokisáaká alí timí wisabé niraa naʼáwisaká japalí timí novios ju, kiti natasi japi ma ke echi riká nima japalí timí ma niwisa. Ami machisáaká japi echi ke aʼlá upila o kunala nima, wabé aʼlá ju emi okuá jitra japi timí ma ke novios nima. d

13. Jiti aʼlá nátika nokimea, ¿chu kilí rojorásaré novios niya?

¹³ ¿Chu kilí rojorásaré novios niya? Echi Biblia ko aní japi timí ke aʼlá natásaká kecho isiá bilé namuti, pe aminana ke aʼlá ikimea (Prov. 21:5). Jiti la, ke timí sapú niwísaré alí timí we aʼlá inésaré chúriká ju biléala. Nalí ayénachó ke timí wilí nokisáré, jiti echoná Biblia aní japi “echi namuti japi ta nakí alí japi ke sapú ikí, nayunti tamujé sulala” (Prov. 13:12). Ayénachó japalí timí wilí noká novios niya, a timí we jilí nirámiré anachia ke nasawínalia (1 Cor. 7:9). Nalí be, ke mi natásaré chu kilí timí novios ju. Echi namuti japi mi nalí natásaré ko ju jepuná: “¿Piri bilecho namuti ni newalé machiyá nijé nóviowala jitra jiti ni aʼlá nátika isima?”.

¿CHÚRIKÁ TI IʼWÍRIPO ECHI JAPI NOVIOS JU?

14. ¿Chúriká ti omeri iʼwiria echi japi novios ju? (Ayénachó iné echi foto).

¹⁴ Ati machiyáaká bilé hermano alí hermana japi novios ju, ¿chúriká ti omeri iʼwiria? Ati omeri bayea koʼasia, japalí ti napawika biné echoná bitichí o basalówisia ma (Rom. 12:13). Echi riká echi novios aminabi we aʼlá anakupi machimea. Alí echi a newalésaká, ati oméripo yúa simíaya biléanami o bayea bitichí, jiti echi riká kanila raʼichama ke awénili mochika (Gál. 6:10). Alicia, japi ta bineki echoná párrafo 7, jéaní: “Albert alí nijé, ati we natéami niraa inéi japi jaré hermanos tamó anema japi ta echi inesia simabo japalí ti kanila raʼichánali nalí ke  awénili mochika”. Echi novios tamó anésaká japi echi yúa simabo, natabo japi echi riká ti omeri iʼwiria. Ayénachó ti we aʼlá inésaré chu kabú echi novios newalé anakupi raʼichia, nalí ke ti awénili riwésaré (Filip. 2:4).

15. ¿Piri bilecho namuti nokiboa iʼwírimia japi novios ju? (Proverbios 12:18).

¹⁵ Bilecho namuti japi ta omeri nokayá iʼwírimia echi novios ko ju, aʼlá nátika raʼíchika. Isini kaachi ati we iʼwérili nokisáré jiti ke aniboa bilé namuti japi ta ke anisáré (leeri Proverbios 12:18). Japi riká, a keʼré japi ta ruyénali jarecho japi jaré ma novios ju, nalí ati newalásaré japi echi aboi ruyénali. Ke ti cha riká raʼichásaré echi jitra alí japi echi ke nakí japi jarecho ruyepo (Prov. 20:19; Rom. 14:10, TNM; 1 Tes. 4:11, TNM). Ayénachó ke ti náripo chu kabú niwima o ke ti aniboa jaré namuti japi isima japi echi novios ko nílima japi ma iʼwérili ju japi niwima. Bilé hermana Elise riwéami alí echi kunala, anijó: “We ti cha nilie japalí jarecho tamó narie chu kabú ti niwipo, japalí tamujé aboi ke machiyé echi jitra”.

16. Ati machisáaká japi jaré riweli novios niya, ¿chúriká ti iʼwíripo?

¹⁶ Alí japi novios ju riwésaká novios niya, ke naria járipo chúsiá alí jépuká iyiri nili (1 Ped. 4:15). Bilé hermana Lea riwéami, jéaní: “Ani machiki japi jaré chotásili aniyá chuwé namuti japi jitra ti riweli novios niya, alí echi ko we tamí omonáritili”. Japi riká ti ma bineli, jaré riwésaká novios niya, ke aniwáami ju japi ke aʼlá nokali. Nalí japi novios niya iʼwírili echi, jiti we aʼlá nátika nokimea. Alí tákoré echi ko aʼlá nátika nokali, a omona nílimiré, jiti la ti we aʼlá inésaré chúriká ti iʼwíripo echi (Prov. 17:17).

17. ¿Piri aminabi nokisáré japi novios ju?

¹⁷ Japi riká ti ma ineli, novios niya a jilí ju, nalí ayénachó we semati ju. Jessica jéaní: “A bichíwali ju japi ta iʼwérili nokali we aʼlá machiyá anakupi niraa. Nalí we aʼlá nili japi ta echi riká nokali”. Jiti la, ami olayáaká bilé novio o novia ma, iʼwérili isí we aʼlá machiyá echi. Echi riká mi isísaká, novios niya emi iʼwírima jiti timí okuaka we aʼlá nátika nokimea.