1-2. Nilavulaka sa onamorari, exeeni atthu akina anihimya aya?

 VAAVO makristau aninamorari aya, owo pooti okhala okathi wootepa ohakalaliha mookumini mwaya. Akhala wiira munninamorari, moohaanyiherya muniphavela wiira onamorari wanyu okhumele saana. Eyo ti etthu eniiraneya ni makristau manceene aninamorari. Murokora mmosa a wEthiyopia oniitthaniwa Tsion, a onihimya so: “Vaavo miyo ni iyaka naanamorari ahu, ole waari okathi wootepa ohakalaliha wa mookumini mwahu. Naanilavula itthu sootheiha. Kaahihakalala nuumala osuwela wiira kaahimphwanya mutthu kamphentaka ni yena aakiphenta vanceene”.

² Nave Alessio, munna mmosa onikhala elapo ya Holanda, onihimya so: “Kaahihakalala omusuwela saana mwaaraka okathi ole naanamorari ahu. Masi onamorari wahu waahikhalana mixankiho saya”. Mwaha ola, nnoothokorerya mixankiho sinikhumela okathi woonamorari ni malakiheryo a mbiibiliyani, anrowa waakhaliherya makristau aninamorari opaka eyo mwa enamuna eninvuwiha Yehova. Nave nnoothokorerya moota atthu akina a mmulokoni anrowa aya waakhaliherya makristau aninamorari.

YOOLAKELA YA ONAMORARI

3. Yoolakela xeeni ya onamorari? (Miruku 20:25)

³ Nnaamwi okathi makristau aninamorari aya ori ene woohakalaliha, masi awo ahaana ovarerya saana maana nlo nivalo nuulupale nikhanle oowiiriha othelana. Nihiku anithelana aya, awo annimuleiherya Yehova wiira anrowa ophentanaka ni ottittimihana mukina ni mukhwaawe okumi aya wootheene. Nto nihinatthi oleiherya khula etthu, nihaana wuupuwela saana. (Musome Miruku 20:25.) Nave eyo, enihela muhina yooleiherya ya othelana. Yoolakela ya onamorari, ori osuwelana oratteene mukina ni mukhwaawe wiira apake yoothanla yooloka. Ikwaha sikina, yoothanla eyo pooti okhala othelana aahiiso omala-maliha onamorari iwo. Nto akhala wiira makristau  annithanla omala-maliha onamorari waya, eyo khentaphulela wiira onamorari waya khokhumenle saana. Masi eyo entaphulela wiira aamaleliha yoolakela ya onamorari, eyo piiyo, opaka yoothanla yooloka.

4. Xeeni ootheene ahu ninreerela ahu okhalana moonelo wooloka voohimya sa onamorari?

⁴ Xeeni vari aya vooloka osuwela saana yoolakela ya onamorari? Mukristau oohithela aahiiso oohitheliwa orina moonelo wooloka, khokhanle oonamorari ohiphavelaka othelana. Masi khahiyo moonelo owo wooloka anireerela okhalana paahi makristau oohithela aahiiso oohitheliwa. Ootheene ahu, nihaana wuupuwelela yoolakela ya onamorari. Mwa ntakiheryo, atthu akina anuupuwela wiira makristau yaanamorariki, awo ahaana othelana. Ankhi makristau oohithela aahiiso oohitheliwa, anoonela sai muupuwelo owo? Murokora mmosa oohitheliwa onikhala wEstados Unidos, oniitthaniwa Melissa, onihimya so: “Eyo enniwiiriha Anamoona a Yehova anceene aninamorari othelana mwaha wookhanyereriwa, nnaamwi onamorari waya ohikhumelaka saana. Nave eyo enniwiiriha makristau ahinnamorari ohiphavela-tho. Nto eyo enniwiiriha atthu akina oxankiheya”.

MUSUWELANEKE SAANA MUKINA NI MUKHWAAWE

5-6. Itthu xeeni ale aninamorari anireerela aya ovaanela okathi owo? (1 Pedru 3:4)

⁵ Akhala wiira munninamorari, exeeni enrowa wookhaliheryani othanla othelana wala omaliha onamorari iwo? Etthu enrowa wookhaliheryani ori osuwelana saana mukina ni mukhwaawe. Woonasa wene, munnisuwela itthu sikina voohimya sa mutthu owo muhinatthi opacerya onamorari. Masi vano nyuwo mookhalana eparakha ya omusuwela saana mutthu a “vamurimani” vanyu. (Mmusome 1 Pedru 3:4.) Eyo enihela muhina osuwela soophavela sa mutthu owo, moota ori aya waataana wawe ni Yehova, mikhalelo sawe ni moota onuupuwela awe. Nuuvira okathi, eyo enimookhaliheryani owerya waakhula makoho anittharelana: ‘Kiireke onoowerya okhala iyaka aahiiso mwaaraka onrowa okhikhaliheryaka saana?’ (Mir. 31:26, 27, 30; aEef. 5:33; 1 Tim. 5:8) ‘Kiireke kinoowerya omphentaka ni onvaha itthu onipirisari awe nave yena opakaka etthu emosa-ru wa miyo? Kiireke nnaawerya ovilelana mukina ni mukhwaawe?’ b (aRom. 3:23) Nto okathi owo munisuwelana anyu mukina ni mukhwaawe, muhiliyale ela: Etthu yootepa okhalana efaita, khahiyo osuwela moota mphwanelanne anyu, masi ori oweha moota khula mmosa onrowa awe owerya wiilimaleliha makhalelo masya.

⁶ Itthu xeeni sikina munireerela anyu ovarerya okathi muninamorari anyu? Muhinatthi okhummwa murima mootepana, vaamuloka ovaanela  itthu sa faita ntoko apalano oniwuupuwela awe mutthu owo muhoolo. Masi ankhi itthu sikina sa omwaneene ntoko eretta, othoiwa musurukhu ni itthu sikina soohiloka simwiiranenle mutthu owo khalai? Sookhala itthu sihinreerela ovaanela wanipacerya wa onamorari. (Munwehe-tho Yohani 16:12.) Akhala wiira sookhala myaha muhimphavela anyu omusuweliha wanipacerya wene, pooti omuleela ole oninamorari ni nyuwo. Masi nuuvira okathi, owo pooti ophavelaka osuwela itthu sikina wiira owerye opaka yoothanla yooloka. Nto waphiya okathi owo, muhaana omuleela ekeekhai voohimya sa nyuwo.

7. Makristau aninamorari, anrowa osuwelana sai saana mukina ni mukhwaawe? (Nwehe ekaaxa eni: “ Onamorari Muttaivelanne Ene”.) (Nwehe efootu.)

⁷ Munrowa owerya sai osuwela mikhalelo sa mutthu owo? Enamuna emosa mukhanle anyu oosuwela, ori omukohaka itthu muniphavela anyu osuwela ni owiriyana ni ephoole moota onaakhula awe. (Mir. 20:5; Yak. 1:19) Wiira eyo yiiraneye, nyuwo muhaana ohaavya miteko mukhanle anyu oovaraka hoothe, sinrowa wookhaliheryani ovaanela, ntoko olya hoothe, opasiyari mapuro oowaatta atthu ni okhuma hoothe muteko woolaleerya. Nave etthu ekina enrowa wookhaliheryani osuwelana, ori oviriha okathi muri ene ni amusi ni apatthani. Nave nyuwo pooti ompaka palano a ovara etthu enrowa omukhaliherya ole oninamorari ni nyuwo, opaka itthu mwa inamuna soovirikana ni atthu a makhalelo oovirikana. Nrowe nthokorerye etthu Aschwin yoowo onikhala elapo ya Holanda, aapanke awe, okathi aanamorari awe ni Alicia. Owo onihimya so: “Naanithanla miteko naakhanle ahu oovara hoothe, saanikhaliherya osuwelana mukina ni mukhwaawe. Miteko iyo saakhala saamukhaani ntoko olokiherya yoolya ni miteko sikina sa vate. Opaka eyo yaaninikhaliherya osuwela mikhalelo sa khula mmosa ni ifaalya sawe”.

8. Xeeni vari aya vooloka ale aninamorari omusoma Biibiliya hoothe?

⁸ Nave nyuwo munoosuwelana oratteene akhala wiira munoomusomaka Biibiliya hoothe. Nuumala othelana, muhaana opaka eprokrama ya omulompa Muluku vatthokoni, okhala wiira muhaana omuhela Yehova nipuro noopacerya mukasamentoni mwanyu. (Mus. 4:12) Nto ti vooloka opacerya niinaano-va muninamorari anyu, omusoma Biibiliya hoothe. Ekeekhai wiira ale aninamorari, khahiyo anamathelana nto mulopwana khahiyo muhooleli a muthiyana owo. Akhala wiira khamunihiya omusoma Biibiliya hoothe, eyo enimookhaliheryani osuwela moota waataana wawe ni Yehova ori aya, ole oninamora ni nyuwo. Max ni Laysa, anamathelana yaawo anikhala  wEstados Unidos, aawerya osuwela etthu ekina eniphwanyiha mureerelo. Max onihimya so: “Okhuma wanipacerya wa onamorari wahu, hiyo naanisoma iliivuru sinimutthokiherya Biibiliya sirina myaha saalavula voohimya sa onamorari, ekasamento ni okumi wa vatthokoni. Nto osoma iliivuru iyo, saaninikhaliherya oovaanela myaha sa faita, saakhanle oonixankiha opaceriha oovaanela”.

ITTHU SIKINA ANIREERELA AYA OTHOKORERYA ALE ANINAMORARI

9. Tani anireerela anyu waaleela voohimya sa onamorari wanyu?

⁹ Tani anireerela anyu waaleela voohimya sa onamorari wanyu? Eyo nyuwosa mukhanle oothanla. Okathi onipacerya anyu onamorari, woonasa wene, nyuwo pooti othanla waaleela atthu vakhaani paahi. (Mir. 17:27) Opaka eyo, nyuwo pooti osyaka okohakohiwa voohimya sa onamorari wanyu ni okathi munrowa anyu othelana. Mwaahimuhimeerye mutthu, eyo pooti owiirihani woovelelaka opaka itthu sikina moovaka osuweliwa. Nto eyo pooti okhala etthu yoowoopiha! Vaarowa okhala vamiruku waaleela atthu munaaroromela anyu, anrowa wookhaliheryani ni woovahani miruku sooloka. (Mir. 15:22) Mwa ntakiheryo, nyuwo pooti waaleela atthu akina a vatthokoni vanyu, apatthani arina waataana wooloka ni Yehova aahiiso axitokweene.

10. Ale aninamorari, anrowa wiiriha sai onamorari waya onvuwiha Yehova? (Miruku 22:3)

¹⁰ Munrowa onamorari sai mwa enamuna eninvuwiha Yehova? Nuuvira okathi, osivelana wanyu pooti otepaka wuncerereya. Masi muhaana osyaka opaka itthu sikhanle oomuriipiha murima Yehova. (1 aKor. 6:18) Musyakeke ovaanela itthu sinivarihana ni orupihana, okhala opuro atthu akina ahiniwerya aya woowehasani ni musyakeke ohapaliwa. (aEef. 5:3) Akhala wiira khamunisyaka itthu iya, muupuwelo wa ophavela orupihana woohiloka onrowa otepaka wuncerereya vamurimani vanyu, nto eyo ewiirihekeni opaka itthu sikhanle oomuriipiha murima Yehova. Munoonela sai ovaanelaka ikwaha sinceene itthu sikhanle ookhaliherya onamorari wanyu okhala woottittimiheya ni oninvuwiha Yehova? (Musome Miruku 22:3.) Nrowe nithokorerye etthu yaamukhalihenrye Dawit ni Almaz yaawo anikhala wEthiyopia. Awosa anihimyasa so: “Hiyo naaniviriha okathi niri ene hoothe opuro woowaatta atthu aahiiso ni apatthani ahu. Khinaatonko okhala mekhihu mukaaroni aahiiso opuro mukina woowiipitheya. Hiyo naanisyaka okhala mapuro yaarowa oniiriha opaka etthu yoohiloka”.

11. Itthu xeeni ale aninamorari anireerela aya wuupuwelela sa moota woowooniheryana osivelana waya?

¹¹ Munrowa opaka sai itthu sinooniherya osivelana? Vaavo ophentana wanyu onincerereya aya, munoophavelaka opaka itthu mookhalela sinooniherya wiira munnimphenta tthiri. Masi akhala wiira ophavela orupihana onnincerereya vamurimani vanyu, vanookhala woovila opaka soothanla sooloka. (Nsip. 1:2; 2:6) Nto ophavela omooniherya wanyu osiveliwa, pooti owiirihani ohiwerya wiikasoopa ni opaka itthu sikhanle oomuriipiha murima Yehova. (Mir. 6:27) Okathi munipacerya anyu onamorari, muhaana ovaanela itthu mukhanle anyu oopaka moovarihana ni malakiheryo a mbiibiliyani. c (1 aTes. 4:3-7) Ntoko atthu aninamorari, nyuwosa pooti wiikohasa so: “Muttetthe kinikhala aka, itthu xeeni sinipakiwa sinooniherya wiira atthu annisivelana? Itthu nimpaka ahu, niireke pooti omwiiriha khula mmosa a hiyo ophavela orupihana woohiloka?”

12. Vakhala wiira ale aninamorari khaniiwanana exeeni anireerela aya wuupuwelela?

¹² Munrowa ophuka sai mixankiho sikhanle ookhumelela? Ankhi vakhala wiira ikwaha sikina  khamuniiwanana? Niireke eyo enitaphulela wiira khivanrowa oweryaneya othelana? Khahiyo ti yeeyo, maana ale aninamorari aakhalana miyoonelo soovirikana. Ekasamento ennikhala yoolipa vakhala wiira atthu oowanli annittittimihana ni toowaakuva olimalela makhalelo ni soophavela sa khula mmosa. Enamuna muniphuka anyu mixankiho nenna-va, eyo enimooniherya vakhala wiira ekasamento anyu enookhumela saana. Mwiikoheke so: ‘Ninnivaanela mwa enamuna yoottittimihana ni mooreerelana murima? Niireke ninneemererya soovonya sahu ni wiimananiha opaka marukunuxo? Niireke ninnihiya itthu sikina siviraka, ovekelana muswammaha nave na atthu oolevelela?’ (aEef. 4:31, 32) Nto akhala wiira ikwaha sinceene munnivaanyihana ni onyakulihana okathi woonamorari, eyo enooniherya wiira hata muthelanaka khiivo enrowa oturukeya. Nto akhala wiira mmosa a nyuwo onnoona wiira khamuniiwanana, etthu munireerela anyu opaka oowanli ori omaliha onamorari iwo. d

13. Exeeni enrowa waakhaliherya ale aninamorari, othanla okathi mikavi anireerela aya oviriha enamorariki?

¹³ Okathi mikavi munireerela anyu oviriha munamorariki? Akhala wiira munipaka soothanla mwaakuveyasaka aahiiso mwaha wookhummwa murima, eyo pooti okumiherya mixankiho. (Mir. 21:5) Nto onamorari wanyu ohaana oviriha okathi munceene wiira mmusuwele saana ole oninamorari ni nyuwo. Masi muhaana okhalana ephoole wiira muhivirihe okathi munceenexa ovikana vanireerela aya. Biibiliya onihimya so: “Otepa owehererya onniripiha murima”. (Mir. 13:12) Ohiya-vo, akhala wiira munniviriha okathi munceene muri ene hoothe, vanoovila osyaka orupihana woohiloka. (1 aKor. 7:9) Ohiya owehexexa okathi mikavi nvirihe anyu munamorariki, vaamuloka wiikoha so: ‘Etthu xeeni kinireerelaka wiixutta voohimya sa ole oninamorari ni miyo, enrowa okikhaliherya opaka yoothanla yooloka?’

MOOTA ATTHU AKINA A MMULOKONI ANROWA AYA WAAKHALIHERYA ALE ANINAMORARI

14. Atthu akina anrowa waakhaliherya sai ale aninamorari? (Nwehe efooru.)

¹⁴ Akhala wiira munnasuwela makristau aninamorari, munrowa waakhaliherya sai? Enamuna emosa mukhanle anyu oopaka eyo, ori waalattula wiira mulye hoothe, yiirele mpantta omulompa Muluku vatthokoni vanyu aahiiso othweela hoothe. (aRom. 12:13) Nto awo pooti orumeela okathi owo wiira asuwelane saana. Nave hiyo pooti waakhaliherya naaholaka mikwaha saya, waavaha puleya aahiiso owooliha evaranta ahu wiira avaanele  myaha saya, masi vaniweryaneya aya waaweha. (aGal. 6:10) Alicia nimulavunle ahu ittima sivinre, onnuupuwela moota anna ni arokora yaamukhalihenrye aya yena ni Aschwin. Owo onihimya so: “Naanihakalala vanceene vaavo anna ni arokora yaivahererya aya onaakhela okathi naapirisari ahu ovaanela”. Akhala wiira ale aninamorari annoovekelani wiira mwaahoole, munimwaakhaliherya vanceene. Mukhalaneke ephoole wiira muhaahiye awo ari ene meekhayasa, masi mwaavaheke okathi wiira avaanele myaha saya nyuwo muhiwiriyanaka. — aFil. 2:4.

15. Etthu xeeni ekina nikhanle ahu oopaka wiira naakhaliherye ale aninamorari? (Miruku 12:18)

¹⁵ Nave nnoowerya waakhaliherya ale aninamorari, nithanlelaka itthu nikhanle ahu oolavula ni nihikhanle ahu oolavula. Ikwaha sikina, vannivila okhalana ephoole ni itthu ninlavula ahu. (Musome Miruku 12:18.) Mwa ntakiheryo, hiyo pooti ophavelasaka waaleela atthu akina wiira afulano anoonamorari, variki awo aphavelasaka ohimya mmensaya. Nihiwaapeke ale aninamorari aahiiso waaphukela ni soothanla anipaka aya. (Mir. 20:19; aRom. 14:10; 1 aTes. 4:11) Nave, khivanireerela waakoha-koha aahiiso olavula itthu sikhanle oowiiriha ophavela othelana moowakuveya ahiilokihenrye. Murokora mmosa oniitthaniwa Elise ni iyawe anihimyasa so: “Hiyo naanixanka okathi atthu akina yaanikoha aya voohimya sa apalano ahu a okathi ninrowa ahu othelana, okhala wiira khinaatonko ovaanela mwaha owo”.

16. Nooneleke sai okathi ale aninamorari anithanla aya omala-maliha onamorari waya?

¹⁶ Masi ankhi vakhala wiira ale aninamorari annithanla omala-maliha onamorari waya? Khivaarowa okhala vooloka, waakoha aahiiso ophavelasa osuwela exeeni yiirinhe ni tani apacenrye omala-maliha onamorari iwo. (1 Ped. 4:15) Murokora mmosa oniitthaniwa Lea, onihimya so: “Kaahixanka nuumala osuwela wiira atthu akina yaaniphavelasa osuwela etthu yiirinhe miyo ni munna kaanamorarana aka ohiyana. Tthiri nkaareere oriipiwa murima”. Ntoko niixuntte ahu, akhala wiira ale aninamorari annithanla omaliha onamorari waya, eyo khentaphulela wiira onamorari iwo khokhumenle saana. Eyo entaphulela wiira onamorari iwo woomaleliha yoolakela aya, eyo piiyo, ohaakhaliherya opaka yoothanla yooloka. Masi opaka yoothanla eyo khivaakhweyale maana khula mmosa pooti oriipiwa murima ni wiixoona okhala mekhaawe. Ti maana aya vari aya va faita ophavelasa waakhaliherya. — Mir. 17:17.

17. Exeeni ale aninamorari anireerela aya opaka?

¹⁷ Ntoko niixuntte ahu, onamorari wookhalana mixankiho saya masi pooti okhala okathi wootepa ohakalaliha wa ale aninamorari. Jessica ohimmye so: “Ohimya ekeekhai, onamorari muritti muulupale. Masi vaakisivela oviriha okathi ola munceene nisuwelanaka oratteene”. Nto akhala wiira munoonamorari, mwiimananiheke opaka ele muniwerya anyu wiira musuwelane oratteene. Mwapaka eyo, onamorari wanyu onimookhaliheryani opaka soothanla sooloka ni sininvuwiha Yehova.