1. Weh lesn Jehoava mi teech Aybraham?

 AYBRAHAM mi ga wahn kanvasayshan wid Gaad aynjel weh ih mosi neva ferget. Dis aynjel mi tel Aybraham dat Gaad mi wahn dischrai Sadam ahn Gomora. Weh di aynjel seh mi bada Aybraham, eevn doa hihn mi ga schrang fayt eena Gaad. Soh ih aks Gaad: “Yoo wahn reeli dischrai di raichos peepl lang wid di wikid peepl?” Den ih tel Ahn: “Yoo da di wan weh joj evribadi pahn di ert ahn yu aalwayz du weh rait.” Jehoava neva geh beks wid ih dyaa fren Aybraham. Ih mi payshent wid ahn, an Ih teech ahn dat Ih wahn neva dischrai peepl weh raichos. Dis lesn da neva jos fi Aybraham, bot ih benifit ahn komfert wee tu.—Jen. 18:​23-33.

2. Wai wee ku bee shoar dat wen Jehoava joj sohnbadi, ih aalwayz rait an ih aalwayz shoa mersi?

² Wai wee ku bee shoar dat wen Jehoava joj sohnbadi, ih aalwayz rait an ih aalwayz shoa mersi? Bikaaz wi noa dat “Jehoava si weh deh eena dehn haat.” (1 Sam. 16:7) Soh dat meen dat Jehoava noa “eech persn haat.” (1 Ki. 8:39; 1 Chron. 28:9) Dat amayzin, noh chroo? Jehoava ga lat moa wizdom dan wee, soh wi noh wahn aalwayz andastan wai Jehoava disaid fi du sertn tingz. Dat da di reezn wai di apasl Paal seh dat “nobadi kuda eva noa aal weh Gaad disaid fi du.”—Roam. 11:33.

3-4. Weh kweschanz wi mait aks wiself, ahn weh wi wahn laan eena dis aatikl? (Jan 5:​28, 29)

³ Wi noa dat Jehoava aalwayz du weh rait. Bot stilyet, wi mait ga kweschanz weh bada wi, jos laik Aybraham. Wi mait aks wiself kweschanz laik: ‘Weh wahn hapm tu peepl  weh Jehoava mi dischrai eena di paas, laik di peepl da Sadam ahn Gomora? Dehn ga eni hoap fi kohn bak tu laif eena di fyoocha? Yu tink som a dehn mait bee monks di “peepl weh neva raichos” weh Gaad wahn rayz op bak?ʼ—Aks 24:15.

⁴ Weh wi andastan bowt di rezorekshan? Noh tu lang agoa, wi geh wahn ajosment tu how wi andastan weh Jeezas mi seh bowt it. Wi laan weh ih mi meen wen ih taak bowt dehn wan weh wahn “geh evalastin laif” ahn dehn wan weh wahn “geh joj.” a (Reed Jan 5:​28, 29.) Sayka dis ajosment, wi mi haftu mek sohn moa ajosment tu di way how wi andastan weh Jeezas mi seh. Wi wahn diskos dehnya ajosment eena dis aatikl ahn di neks wan. Fi help wi andastan Jehoava jostis ahn mersi beta, mek wi luk pahn weh wi noh noa ahn weh wi doo noa bowt how Jehoava joj peepl.

WEH WI NOH NOA?

5. Weh wi yoostu seh bowt di peepl weh Jehoava mi dischrai da Sadam ahn Gomora?

⁵ Wen wi poblikayshan dehn yoostu taak bowt peepl weh Jehoava dischrai, wi yoostu seh dat dehn noh ga no hoap fi wahn rezorekshan eena di fyoocha. Fi egzampl, dat da weh wi yoostu seh bowt di peepl fahn Sadam ahn Gomora. Bot afta di faytful ahn waiz slayv stodi di skripchaz moa ahn pray moa bowt it, ih klyaa dat wi kyaahn reeli seh dat dehn noh wahn geh rezorek. Wai wi seh dat?

6. Wat da sohn egzampl weh shoa wi how Jehoava mi joj peepl weh noh raichos, ahn weh wi noh noa?

⁶ Lata egzampl deh eena di Baibl weh tel wi bowt how Jehoava mi joj peepl weh noh raichos. Fi egzampl, hihn mi dischrai evribadi eena di Flod. Onli Noawa an ih famili mi geh sayv. Ahn Gaad mi koman di Izrelaits fi dischrai di peepl fahn di sevn nayshan dehn weh mi liv eena di Pramis Lan. Ahn hihn mi mek wahn aynjel kil 185,000 Asiriyan soalja eena wan nait. (Jen. 7:23; Deut. 7:​1-3; Isa. 37:​36, 37) Bot yu tink di Baibl gi wi inof infamayshan fi noa dat Jehoava dischrai dehndeh peepl fareva ahn dat dehn wahn neva geh rezorek? No. Wai wi seh dat?

7. Weh wi noh noa bowt di peepl weh mi ded joorin di Flod ahn di peepl weh mi geh dischrai wen di Izrelaits mi kanka di lan a Kaynan? (Koment pahn di picha.)

⁷ Wi noh noa how Jehoava mi joj eech wan a dehndeh peepl. Wi aalso noh noa if aala dehn peepl mi geh wahn chaans fi laan bowt Jehoava ahn ripent bifoa dehn mi ded. Mek wi luk pahn weh mi hapm bifoa di Flod. Di Baibl doo tel wi dat Noawa da-mi wahn “preecha a raichosnis.” (2 Peet. 2:5) Bot ih noh seh dat wail Noawa mi-di bil di aak, hihn mi-di chrai preech tu evribadi weh mi liv joorin da taim. Ahn wid di egzampl a di wikid peepl weh mi liv eena di Pramis Lan, wee noh noa if aala dehn mi geh wahn chaans fi laan bowt Jehoava ahn chaynj dehn kandok.

8. Weh wi noh noa bowt di peepl fahn Sadam ahn Gomora?

⁸ Mek wi goh bak tu di egzampl wid di peepl fahn Sadam ahn Gomora. Lat da-mi wahn raichos man weh mi liv monks dehn. Bot yu tink Lat mi geh fi preech tu aal dehn peepl? Wi noh noa. Wi noa dehn mi wikid, bot wee noh noa if dehn mi noa rait fahn rang. Fi egzampl, wen wahn groop a man mi kohn fi rayp Lat ges  dehn, di Baibl seh dat da groop mi mek op a “di oal man dehn rait dong tu di yong bwai dehn.” (Jen. 19:4; 2 Peet. 2:7) Dis shoa dat aala dehn mi groa op monks peepl weh liv wahn imoaral laifstail ahn dehn praabli neva ga di apachooniti fi laan bowt Jehoava standadz bowt weh rait ahn weh rang. Soh dehn neva raichos, ahn Jehoava mi du di rait ting fi dischrai dehn. Jehoava mi tel Aybraham dat dehn noh eevn mi gat ten raichos man fahn dehndeh siti. (Jen. 18:32) Bot wee ku seh fi shoar dat fi wee mersiful Gaad don disaid dat non a dehn peepl wahn geh rezorek? No! Wi kyaahn seh dat!

9. Weh wi noh noa bowt Salaman?

⁹ Di Baibl tel wi bowt peepl hoo mi raichos ahn laytaraan mi ton bad. Wi ga di egzampl a King Salaman. Hihn mi noa Jehoava ahn how fi wership Ahn, an Jehoava mi bles ahn wahn lat. Bot laytaraan, Salaman mi staat tu wership faals gaadz. Dat mi mek Jehoava geh beks bad, an di hoal nayshan mi sofa fi honjridz a yaaz sayka di tingz weh Salaman du. Bot wen Salaman mi ded, “dehn beri ahn eena Dayvid siti,” di saym plays wehpaat faytful peepl laik Dayvid mi geh beri. (1 Ki. 11:​5-9, 43; 2 Ki. 23:13) Bot jos bikaaz di Baibl seh dat, yu tink ih meen dat Jehoava wahn rezorek Salaman? Di Baibl noh tel wi wan way er di ada. Som peepl mait tink dat Salaman wahn geh rezorek bikaaz di Baibl seh dat “weneva wahn persn ded, dat set dehn free fahn dehn sin.” (Roam. 6:7) Bot dat noh meen dat evribadi weh ded wahn geh rezorek. Jos bikaaz wahn persn ded, dat noh meen dat ih ga di rait fi liv agen. Rezorekshan da wahn gif fahn Jehoava, ahn hihn gi da gif tu hoo hihn waahn soh dat dehn ku ga di apachooniti fi serv hihn fareva. (Joab 14:​13, 14; Jan 6:44) Yoo tink Salaman wahn geh da gif? Onli Jehoava noa di ansa. Bot wi doo noa dat Jehoava wahn aalwayz du weh rait.

WEH WI DOO NOA?

10. How Jehoava feel bowt di peepl weh hihn joj? (Ezekiel 33:11) (Koment pahn di picha.)

¹⁰ Reed Ezekiel 33:11. b Jehoava help wi fi andastan how hihn feel wen ih joj peepl. Di apasl Peeta mi seh sohnting simila tu weh Izeekyel mi rait. Hihn mi seh: “Jehoava . . . noh waahn nobadi geh dischrai.” (2 Peet. 3:9) Soh dehn werdz gi wi komfert bikaaz dehn mek wi noa dat Jehoava noh hori fi dischrai sohnbadi fareva anles ih ga wahn gud reezn fi du it. Hihn ful a mersi, an ih shoa mersi weneva dat pasabl.

11. Hoo noh wahn geh rezorek, ahn how wi noa dat?

¹¹ Wat wi doo noa bowt peepl weh noh wahn geh rezorek? Di Baibl onli menshan wahn fyoo egzampl. c Wan a dehn da Joodas Iskaryot. Jeezas mi seh dat hihn noh wahn geh rezorek. (Maak 14:21; si aalso Jan 17:12 ahn di stodi noat dehn eena di Study Bible.) Dis da bikaaz Joodas mi wel ahn noa dat hihn mi-di goh gens Jehoava an Ih Son, bot hihn mi stil gaahn hed ahn du it eniway. (Maak 3:29; si di stodi noat dehn eena di Study Bible.) Ahn Jeezas mi  seh dat som a di rilijos leedaz weh mi deh gens ahn noh ga di hoap fi kohn bak tu laif. (Mach. 23:33; si Jan 19:11 ahn di stodi noat “the man” eena di Study Bible) Ahn di apasl Paal mi waan dat apastayts weh noh ripent ahn chaynj dehn wayz noh wahn geh rezorek eeda.—Heeb. 6:​4-8; 10:29.

12. Weh wi noa bowt Jehoava mersi? Yooz di egzampl dehn eena di paragraaf.

¹² Weh wi don noa bowt Jehoava mersi? Ahn how wee noa dat hihn “noh waahn nobadi geh dischrai”? Mek wi luk pahn Dayvid egzampl. Hihn mi komit sohn seeryos sin, inkloodin adolchri ahn merda. Bot wen Dayvid mi ripent, Jehoava mi shoa ahn mersi ahn fergiv ahn. (2 Sam. 12:​1-13) Ahn wi ga King Manaaseh egzampl tu. Hihn da-mi wahn wikid man. Bot laytaraan, hihn mi ripent, ahn Jehoava mi fergiv ahn. (2 Chron. 33:​9-16) Dehnya egzampl rimain wi dat Jehoava shoa mersi weneva hihn si wahn reezn fi du it. Jehoava wahn rezorek peepl laik dehn too man weh mi komit sohn terabl sin ahn weh mi ripent.

13. (a) Wai Jehoava mi shoa mersi tu di peepl fahn Niniveh? (b) Weh Jeezas mi seh bowt dehn?

¹³ Wi aalso noa dat Jehoava mi shoa mersi tu di peepl fahn Niniveh. Jehoava mi tel Joana: “Ah si how wikid dehn wikid.” Bot wen dehn mi ripent fahn dehn sinz, Jehoava mi fergiv dehn. Jehoava mi ga way moa mersi dan Joana. Joana mi beks bad bikaaz Jehoava mi fergiv di peepl. Soh Jehoava mi haftu rimain Joana dat di peepl fahn Niniveh “nat eevn noa rait fahn rang.” (Joana 1:​1, 2; 3:10; 4:​9-11) Laytaraan, Jeezas mi yooz da saym egzampl fi teech peepl bowt Jehoava jostis ahn mersi. Hihn mi seh dat “di peepl fahn Niniveh wahn rayz op bak fahn di ded pahn Jojment Day.”—Mach. 12:41.

14. Weh apachooniti di peepl fahn Niniveh wahn geh wen dehn geh rezorek?

¹⁴ Weh Jeezas mi meen weh ih seh “di peepl fahn Niniveh wahn rayz op bak fahn di ded pahn Jojment Day”? Jeezas mi seh dat eena di fyoocha som peepl weh geh rezorek “wahn geh joj.” (Jan 5:29) Hihn mi-di rifaa tu di Towzn Yaa Rool wen di “peepl weh mi raichos ahn  peepl weh neva raichos wahn geh rezorek.” (Aks 24:15) Afta di peepl fahn Niniveh geh rezorek, Jehoava ahn Jeezas wahn wach fi si if dehn obay di tingz weh dehn laan. If wan a dehn peepl fahn Niniveh weh kohn bak eena di rezorekshan noh waahn wership Jehoava, Jehoava noh wahn alow ahn fi kantinyu liv. (Isa. 65:20) Bot dehn wan weh chooz fi stay faytful tu Jehoava wahn ga di apachooniti fi liv fareva.—Dan. 12:2.

15. (a) Wai wi noh waahn seh dat dehn wan fahn Sadam ahn Gomora weh geh dischrai noh wahn geh rezorek? (b) Weh di skripcha da Jood 7 meen? (Koment pahn di baks weh naym “ Weh Jood Mi Meen?”)

¹⁵ Jeezas mi seh dat “pahn Jojment Day” ih wahn eeziya fi di peepl a Sadam ahn Gomora dan fi di peepl weh rijek hihn an ih teechin. (Mach. 10:​14, 15; 11:​23, 24; Look 10:12) Weh hihn mi meen? Ih mait luk laik Jeezas mi-di egzajarayt jos fi teech wi sohnting. Bot eena dis kays, ih luk laik Jeezas mi meen egzakli weh ih seh. Memba dat wen Jeezas mi seh dat di peepl fahn Niniveh wahn “rayz op bak fahn di ded,” hihn mi reeli meen dat. Soh di “Jojment Day” weh ih mi-di taak bowt wen ih mi-di rifaa tu di peepl fahn Niniveh da di saym Jojment Day weh ih mi-di taak bowt wen ih mi rifaa tu Sadam ahn Gomora. Ahn memba, tu, dat wen Jeezas mi-di taak bowt di peepl weh wahn geh rezorek, hihn mi seh dat “di peepl weh du bad tingz wahn geh joj.” (Jan 5:29) Jos laik di peepl fahn Niniveh, di peepl fahn Sadam ahn Gomora mi du bad tingz. Bot di peepl fahn Niniveh mi geh wahn apachooniti fi ripent, soh ih luk laik som peepl fahn Sadam ahn Gomora mait geh rezorek, ahn wi mait geh fi teech dehn bowt Jehoava ahn Jeezas Krais.

16. Weh wi noa bowt how Jehoava wahn disaid hoo fi rezorek? (Jeremiah 17:10)

¹⁶ Reed Jeremiah 17:10. Da vers rimain wi a weh wi doo noa. Jehoava da di wan weh saach wi haat ahn noa weh wi di tink deep dong eensaid. Ahn wen Jehoava disaid hoo hihn wahn rezorek, ih wahn aalwayz “giv tu eech persn akaadn tu weh ih du.” Jehoava aalwayz stik tu ih standadz, bot ih wahn shoa mersi wen ih ga reezn fi shoa it. Soh wi shuda neva seh dat wahn persn noh wahn geh rezorek anles di Baibl tel wi dat.

 JEHOAVA JOJMENT DEHN AALWAYZ RAIT

17. Weh wahn hapm tu di bilyanz a peepl weh don ded?

¹⁷ Fahn sins di taim wen Adam ahn Eev mi jain Saytan fi ribel gens Jehoava, bilyanz a peepl don ded. Soh wi si dat “det da wahn terabl enimi.” (1 Kor. 15:26) Weh wahn hapm tu dehndeh peepl? Som a dehn wahn geh rezorek fi goh liv da hevn. Dat wahn bee jos 144,000 a Jeezas faytful falowaz. (Rev. 14:1) Lata faytful man ahn wuman wahn geh rezorek fi liv rait ya pahn ert tu. Dehndeh da di peepl weh Jeezas seh mi du gud tingz ahn wahn geh evalastin laif. Dehn wahn geh fi liv pahn di ert fareva if dehn stay faytful joorin Krais Towzn Yaa Rool ahn paas di fainal tes. (Dan. 12:13; Heeb. 12:1) Joorin da saym taim, di “peepl weh neva raichos” wahn geh wahn chaans fi chaynj dehn wayz ahn serv Jehoava. Dat wahn inklood peepl weh neva geh wahn chaans fi noa Jehoava, an eevn peepl weh mi “du bad tingz.” (Look 23:​42, 43) Bot dehn ga sohn peepl weh soh wikid dat Jehoava disaid ih noh wahn rezorek dehn agen.—Look 12:​4, 5.

18-19. (a) Wai wi ku bee shoar dat Jehoava wahn aalwayz mek di rait disizhan wen ih joj peepl? (Isaiah 55:​8, 9) (b) Weh wi wahn laan eena di neks aatikl?

¹⁸ Wai wi ku bee shoar shoar dat wen Jehoava joj sohnbadi, hihn aalwayz mek di rait disizhan? Wel, bikaaz Jehoava perfek, waiz, ahn mersiful. Dis da egzakli how Aybraham mi feel bowt Jehoava, “di wan weh joj evribadi pahn di ert.” Jehoava chrayn ih Son ahn giv ahn di rispansabiliti fi joj evribadi. (Jan 5:22) Jehoava ahn Jeezas noa weh eena eech persn haat. (Mach. 9:4) Soh wi noa fi shoar dat wen dehn joj sohnbadi, dehn wahn “aalwayz du weh rait.”

¹⁹ Mek wi chros dat aal Jehoava disizhan dehn rait. Wi need fi memba dat wee kyaahn joj nobadi. Jehoava da di joj. (Reed Isaiah 55:​8, 9.) d Soh wi ku lef aal di jojin tu hihn an ih Son. Jeezas wahn kapi ih Pa egzampl eena wahn perfek way wen hihn joj. (Isa. 11:​3, 4) Soh how Jehoava ahn Jeezas wahn joj peepl joorin di grayt chribyulayshan? Eena di neks aatikl wi wahn diskos weh wi noa ahn weh wi noh noa bowt dis.