1. So ciacimos sicadea o Iehova le Avraamos?

 ACANA but bărșa, o Del folosisardea ieche îngeros caște phenel le Avraamosche că Vo va chosela cu sea le forurea Sodoma hai Gomora. Chiar cana sas-les iech pachiamos zuralo ando Del, anda o Avraam sas pharo te hachiarel cadaia. Vo pușlea: „Va avela te mudares codoles orta ande iech than codolesa nasul? . . . Ci va cherela o Judecătorii sea la phuveaco so si orta?”. O Iehova sicadea pherdo răbdarea pesche lașe amales o Avraam iech baro sicaimos: că o Del ci va distrugila niciechdata le manușen orta. Cado ciacimos del amen pachiamos hai zuriarel vi amaro ilo aghies. (Gen. 18:23-33)

2. Sostar daisaras te pachias că o Iehova si iech judecătorii orta, cai sicavel îndurarea?

² Sostar daisaras te pachias că o Iehova si iech judecătorii orta, cai sicavel îndurarea? Anda codoia că les siles o zuralimos ‘te dichel so si ando ilo’ le manușengo. (1 Sam. 16:7) Mai but, vo prinjianel „o ilo fiesave manușesco”. (1 Regi 8:39; 1 Cron. 28:9) Cado si iech baro ciacimos. O Iehova si o mai goghiaver, cadea că na-i amen sar te hachiaras sea o timpo sar cherel vo peschi cris. Anda codoia, o apostolo Pavel phendea anda o Iehova cadal dumes: „Chichi de neprinjiande si lesche crisa!” (Rom. 11:33)

3, 4. So daisaras te pușias amen poiechdata hai so va avela te dichas ande cado articolo? (Ioan 5:28, 29)

³ Cu sea cadala, daștil-pe că vi ande amari goghi vazden-pe pușimata sar codola cai șiutea-len vi o Avraam. Daisaras chiar te gândisaras amen: „Daștinas codola cai sas-le distrugime anda i cris le Iehovaschi te aven uștiade andal mule, sar avelas le manușa anda Sodoma hai Gomora? Daștil-pe ca chichiva anda lende  te aven mașcar codola cai va avena andine parpale viațate co «jiuvindimos codolengo neorta»?”. (Fap. 24:15)

⁴ Cadea că, te dichas harnes so hachiaras amen anda o jiuvindimos. Na de but timpo, sas amenghe dino iech nevo hachiarimos ande soste priveal ‘o jiuvindimos la viațaco’ hai ‘o jiuvindimos la crisaco’. a (Citisar Ioan 5:28, 29.) Cado nevo hachiarimos andea vi aver paruimata, anda save va dela-pe duma ande cado articolo hai ande codo cai avel. Anda i cris orta le Iehovaschi, va avela te dichas mai anglal so ci jianas, hai pala codoia so jianas.

SO CI JIANAS

5. So phende amare publicații acana mai but timpo anda le manușa cai o Iehova distrugisardea-len andi Sodoma hai Gomora?

⁵ Acana mai but timpo, amare publicații sicade so întâmplol-pe codolența cas o Iehova arachen-len neorta pala so cherel lenghe cris. Phendeam că le manușa cai sas-le distrugime la Iehovastar, sar avenas codola cai beșenas andi Sodoma hai Gomora, ci va avena uștiade andal mule. Tha, pala so rodeam te prinjianas mai but sicaimata anda cadaia hai mangleam amen, hachiardeam că ci daisaras te phenas siguro cadai buchi. Sostar? Te dichas mai dur.

6. Save si chichiva exemplea cana o Iehova andea peschi cris caring le manușa neorta hai so ci jianas?

⁶ Andi Biblia, arachas vi aver relatări cai den duma anda i cris le Iehovaschi caring codola neorta, sar avenas, le but manușa cai mule co Potopo, le efta națiuni anda o Them Promiso chosle cu sea anda i porunca le Iehovaschi sau le 185 000 asirieni mudarde catar iech îngero le Iehovasco ande iech corcori riat. (Gen. 7:23; Deut. 7:1-3; Is. 37:36, 37) Hachiaras andai Biblia că o Iehova mudardea anda sea o timpo cadale manușen hai că ci va mai uștiavela-len parpale viațate niciechdata? Nici. Sostar daisaras te phenas cadaia?

7. So ci jianas anda le manușa cai sas-le mudarde co Potopo sau anda codola cai sas-le mudarde cana le israeliți line tela pengo zuralimos o Them Canaan? (Dich i imaginea.)

⁷ Ci jianas so cris cărdea o Iehova fiesave manușesche hai nici dacă codola cai sas-le mudarde daisarde te sichion anda o Iehova hai te risaren-pe catar pengo phiraimos nasul. Si ciaces, i Biblia phenel că, angla te avel o Potopo, o Noe sas-lo iech „predicatorii le ciacimasco”. (2 Pet. 2:5) Tha voi ci phenel că, ando timpo so vazdelas i bari arca, vo dea peschi zor vi te arăsăl ca fiesavo manuș pa i phuv hai te phenel că va avela o Potopo. Sa cadea, ci jianas dacă sea le manușa nasul cai traisarde ando Canaan daisarde te sichion anda o Iehova hai te paruven penghi viața.

8. So ci jianas anda le manușa cai beșenas andi Sodoma hai Gomora?

⁸ So daisaras te phenas anda le manușa cai beșenas andi Sodoma hai Gomora? Mașcar lende trailas o Lot, iech manuș orta. Tha, daisaras te phenas că o Lot predichisardea savore manușenghe de othar? Nici. Si ciaces, codola manușa cherenas buchia jiungale, tha jianenas von so si mișto hai so si nasul? Pala so fal-pe, nici. Te anas amenghe andi goghi că le murșa anda o foro camle te soven codolența cai avile co Lot. I Biblia sicavel că code chidine-pe sea le murșa andai Sodoma, „catar o tărno șiavo ji co phuro manuș”. (Gen. 19:4; 2 Pet. 2:7) Daisaras te phenas că amaro lașio Del, cai sicavel îndurarea, alosardea ca niciech anda cadal manușa te na mai avel vroiechdata uștiado andal mule? Si ciaces că o Iehova phendea caring o Avraam că ande codo foro ci sas nici barem deș manușa orta. (Gen. 18:32) Cadea că, von sas-le neorta, hai le Iehovas sas-les ciacimos te anel i cris opral lende hai te aven mudarde. Cu sea cadala, daisaras te phenas  amen siguro că niciech mașcar lende ci va avela andino parpale viațate co ‘jiuvindimos codolengo neorta’? Nici.

9. So ci jianas anda o Solomon?

⁹ I Biblia del duma vi anda manușa orta cai arăsle te aven neorta. Iech anda lende sas o rege Solomon. Vo prinjianelas mișto le Iehovas, anelas lesche închinarea anda sea o ilo hai o Del dea-les bare miștimata. Tha, mai târzio, vo astardea te del cianga angla le devla neciace. Lesche păcatea holiarde zurales le Iehovas hai andine but pharimata opral le manușa anda o Israel. Le buchia nasul cai țârdine-len încărde but șăla bărșa. Si ciaces, i Biblia sicavel că o Solomon sas-lo prahome „pașa lesche phure” – iech mașcar cadal murșa loialo sas chiar o rege David. (1 Regi 11:5-9, 43; 2 Regi 23:13) Tha, sicavel o than ande savo sas-lo prahome o Solomon că va avela uștiado andal mule? I Biblia ci phenel. Cu sea cadala, chichiva daștinas te pachian că vo va avela uștiado andal mule anda codoia că andi Biblia phenel-pe: „Con mulea sas-lo iertime catar pesco păcato”. (Rom. 6:7) Cu sea cadala, cadaia ci însemnol că sea le manușa cai mule va avena uștiade andal mule. Ji la urmă, o merimos ieche manușesco ci anel lesche o drepto te avel andino parpale viațate. O jiuvindimos si iech daro amare lașe Devlestar hai vo alosarel casche camel te del i ocazia te slujisarel lesche veșnico. (Iov 14:13, 14; Ioan 6:44) Va avela dino vi le Solomonosche cado daro? Ci jianas, numai o Iehova jianel. Tha, so jianas si că o Iehova va cherela so si orta.

SO JIANAS

10. So si ando ilo le Iehovasco cana cherel cris le manușenghe? (Ezechiel 33:11) (Dich vi i imaginea.)

¹⁰ Citisar Ezechiel 33:11. Pherdo lașimos, o Iehova sicavel amenghe so si ande lesco ilo cana cherel cris le manușenghe. Cadea sar scriisardea vi o profeto Ezechiel bute bărșența mai anglal, o apostolo Petru phendea: „O Iehova . . . ci camel ca vroiech te avel distrugime”. (2 Pet. 3:9) Cadal dumes zuriaren amen but. Jianas că o Iehova ci sighiarel te chosel anda sea o timpo varecas, numai dacă siles sostar te cherel cadaia. Vo sicavel peschi bari mila orichichi-var daștil-pe.

11. Con ci va avela andino parpale viațate hai catar jianas cadaia?

¹¹ Tha so jianas anda codola cai ci va avena andine parpale viațate? I Biblia del amen numai chichiva exemplea manușendar sar cadala. b O Isus sicadea că o Iuda Iscariot ci va avela uștiado andal mule. (Mar. 14:21; dich vi Ioan 17:12 hai i nota anda o studio.) O Iuda jianelas că prin so cherelas așelas contra le Iehovasche hai lesche Șiavesche, tha cu sea cadala cărdea-la mai dur. (Dich Marcu 3:29 hai le note anda o studio.) Sa cadea, o Isus phendea că chichiva conducători religioși cai ci pachiaie ande leste hai așile lesche contra avenas te meren bi te avel-len i speranța le jiuvindimaschi. (Mat. 23:33; dich Ioan 19:11 hai i nota anda o studio „o manuș.”) Vi o apostolo Pavel sicadea că nici le apostați cas ci fal-len nasul anda lenghe păcatea ci va avena uștiade parpale viațate. (Evr. 6:4-8; 10:29)

12. So jianas andai mila le Iehovaschi? Den exemplea.

¹² So jianas anda i mila le Iehovaschi? Cadea sar dichleam mai anglal, o Iehova silo pherdo mila hai „ci camel ca vroiech te avel distrugime”. Te dichas sar sicadea o Iehova peschi mila caring codola cai cărde bare păcatea. O rege David cărdea-pe doșalo catar buchia zurales jiungale, sar avelas o adultero hai o mudarimos. Tha, les falea-les nasul anda sea o ilo anda  so cărdea hai o Iehova, pherdo mila, iertisardea-les. (2 Sam. 12:1-13) O rege Manase, cărdea bare nasulimata ande le mai but bărșa anda peschi viața. Tha, chiar vi ande cadai situația zurales phari, o Iehova sicadea mila hai iertisardea le Manases anda codoia că falea-les ciaces nasul anda so cărdea. (2 Cron. 33:9-16) Cadal exemplea sicaven mișto că o Iehova silo gata te sicavel peschi mila cana dichel că siles sostar te cherel cadaia. O Iehova va anela parpale viațate codolen cai cărde bare păcatea, tha falea-len ciaces nasul hai risarde-pe catar pengo phiraimos.

13. a) Sostar sicadea o Iehova mila caring le niniviți? b) So phendea o Isus pala but bărșa anda le niniviți?

¹³ Sa cadea, jianas sar sicadea o Iehova peschi mila caring le manușa anda o foro Ninive. O Del phendea caring o Iona: „O nasulimos le manușengo de othar arăslea ji mande”. Tha, cana le niniviți risarde-pe catar pengo phiraimos hai falea-len ciaces nasul anda so cărde, o Iehova sicadea lenghe lașimos hai iertisardea-len. O Del sicadea iech mila mai bari sar o Iona. Anda codoia, o Iehova andea andi goghi le Ionaschi, cai holiardea-pe, că le niniviți ci jianenas „nici te alosaren mașcar so si mișto hai so si nasul”. (Iona 1:1, 2; 3:10; 4:9-11) Pala but bărșa, o Isus folosisardea cado exemplo caște sicavel le manușen anda o ortomos hai i mila le Iehovaschi. Vo phendea că, „ca i cris, le manușa anda Ninive va uștena andal mule” anda codoia că von risarde-pe catar pengo phiraimos nasul. (Mat. 12:41)

14. So va însemnola că le niniviți ‘va uștena ca i cris’?

¹⁴ Tha so însemnol că le niniviți ‘va uștena ca i cris’? O Isus phendea că va avela iech „jiuvindimos la crisaco”. (Ioan 5:29) Cado va avela ando Raimos de Iech Mia Bărș, cana va avela iech jiuvindimos „vi codolengo cai sile orta, hai vi codolengo cai nai-le orta”. (Fap. 24:15) Anda codola neorta, va avela „iech jiuvindimos la crisaco”. Cadaia însemnol că, pala so cadala va avena uștiade parpale viațate, o Iehova hai o Isus va dichena dacă von va așunena hai va cherena so va avela lenghe sicado. Sar exemplo, dacă iech ninivito cai sas-lo uștiado andal mule ci va camela te anel închinarea le Iehovasche andi lumea nevi, o Iehova ci va mechela-les te așel andi viața. (Is. 65:20) Tha, codola cai alosaren te anen închinarea le Iehovasche va daștina te train anda sea o timpo. (Dan. 12:2)

15. a) Sostar ci trebul te phenas că niciech manuș andai Sodoma hai Gomora ci va avela uștiado andal mule? b) So daisaras te hachiaras catar le dumes anda Iuda 7? (Dich o chenarii „ So camlea te phenel o Iuda?”.)

 ¹⁵ O Isus phendea că anda le manușa anda Sodoma hai Gomora va avela lenghe mai ușoro ando „Ghies la Crisaco” sar anda codola cai ci pachiaie ande leste hai ande lesche sicaimata. (Mat. 10:14, 15; 11:23, 24; Luca 10:12) So camlea vo te phenel cade? Mai anglal fal-pe că o Isus phendea cadal dumes numai caște sicavel chichi de nasul sas-le le manușa anda lesche ghiesa. Tha, o ciacimos si că o Isus chiar camlea te phenel că vi le manușa anda Sodoma hai Gomora va avena andine parpale viațate co jiuvindimos. Sostar daisaras te phenas cadaia? Te na bâstras că cadal dumes trebun hachiarde cadea sar le dumes phende andal niniviți. Si ciaces, cana dea duma anda Ninive hai vi anda Sodoma hai Gomora, o Isus dea duma anda sa codo ghies la crisaco. Sa cadea, te încăras ande amari goghi că, cana o Isus dea duma anda codola cai va vazdena-pe ando „Ghies la Crisaco”, vo dea duma vi anda codola cai „cărde buchia nasul”. (Ioan 5:29) Le manușa anda Sodoma hai Gomora sas-le nasul, cadea sar le niniviți. Tha le niniviți daisarde te paruven pengo phiraimos hai te sicaven că fal-len ciaces nasul anda so cărde. Cadea că, daisaras te pachias că chichiva mașcar codola cai beșle andi Sodoma hai Gomora va avena andine parpale viațate. Hai amen daștil-pe că va avela amen i buchi te sicavas-len anda o Iehova hai anda o Isus Cristos.

16. So jianas anda sar va alosarela o Iehova te anel parpale viațate le manușen? (Ieremia 17:10)

¹⁶ Citisar Ieremia 17:10. Ande cado verseto citisaras chiar so jianas anda sar cherel o Iehova peschi cris. Vo ‘rodel ando ilo’ hai ‘dichel le mai garade gânduri’. Cana va anela parpale viațate le manușen, vo ‘va dela fiesaves pala lesco phiraimos’, cadea sar cherel sea timpo. O Iehova încărel peschi cris cana trebul, tha sicavel mila cana daștil te cherel cadaia. Cadea că, ci trebul te pachias niciechdata că iech manuș ci va avela uștiado parpale viațate, numai cana jianas siguro că cadaia phenel-pe andi Biblia.

„O JUDECĂTORII SEA LA PHUVEACO” VA CHERELA SEA O TIMPO SO SI ORTA

17. So va avela le manușența cai mule?

¹⁷ Pala so o Adam hai i Eva risarde o dumo le Iehovasche hai șiute-pe de i rig le Satanoschi,  miliardea manușa mule. Amaro dușmano, o merimos, țârdea peste bute manușen! (1 Cor. 15:26) So va avela cadale bute manușența? Iech număro alosardo, de 144 000 manușa loialo le Cristososche, va avena jiuvindime viațate ando cerii, bi te mai meren niciechdata. (Rev. 14:1) Le coaver manușa le Iehovasche va avena uștiade parpale viațate co ‘jiuvindimos codolengo orta’ hai va traina anda sea o timpo pi phuv, dacă va așena loialo le Iehovasche ando Raimos de Iech Mia Bărș hai co testo finalo. (Dan. 12:13; Evr. 12:1) Sa ando Raimos de Iech Mia Bărș, codola „neorta” – vi codola cai ci prinjiande niciechdata le Iehovas hai chiar „cărde buchia nasul” – va daștina te paruven pengo phiraimos hai te cheren so si mișto andel iacha le Iehovasche. (Luca 23:42, 43) Tha sas vi chichiva manușa zurales nasul cai așile contra le Iehovasche. Cadea că, codole manușen o Del ci va anela-len parpale viațate. (Luca 12:4, 5)

18, 19. a) Sostar daisaras te pachias amen ande sar va cherela o Iehova cris opral codola cai mule? (Isaia 55:8, 9) b) So va avela te dichas ando articolo cai avel?

¹⁸ Daisaras te pachias anda sea o ilo că, de fiesavi data cana o Iehova cherel cris opral le manușa, vo lel le mai lașe alosarimata. Cadea sar o Avraam, vi amen pachias ciaces că o Iehova, o „Judecătorii sea la phuveaco”, silo perfecto, o mai goghiaver jeno hai silo pherdo mila. O Iehova sicadea vi pesche Șiaves te cherel cris opral le manușa hai dea-les te cherel cadai buchi. (Ioan 5:22) O Iehova, hai vi lesco Șiavo, daștin te dichen so si ando ilo fiesave manușesco. (Mat. 9:4) Cadea că, de fiesavi data von va cherena „so si orta”!

¹⁹ Te pachias amen sea o timpo ando Iehova hai ande lesche alosarimata! Hachiaras că na-i amari buchi te cheras cris. Numai vo daștil te cherel cadaia. (Citisar Isaia 55:8, 9.) Cadea că, te mechas pherde pachiamos sea i cris andel vasta le Iehovasche hai lesche Șiavesche, amaro Rege, cai sicavel ande iech modo perfecto o ortomos hai i mila le Devleschi. (Is. 11:3, 4) Tha sar va cherena cris o Iehova hai o Isus ando baro necazo? Ando articolo cai avel va avela te dichas so jianas hai so ci jianas anda cadai buchi.