1. Etthu heeni yoolipiha Yehova aamuxuttinhaawe Abrahamu?

 OTHEKULA weiwo Abrahamu ahaattuwanlaawe. Moorweela mwa nlaika nimoha, Yehova aahimuleela Abrahamu weera aamunyaanya ecidade ya oSodoma ni oGomora. Mulopwana ole oororomeleya aahixupeya. Owo aahikoha eeraka: “Vetthwitthuni weyo onomutoloxe namaloka ni mutakhali? . . . Namathoriha a elapo yothene khanrowa wettela yoloka?” Yehova moopixa murima, aahimuxuttiha nthamwene awe ole oosiveleyaxa etthu yeeyo ennilipiha ootheene hiyo: Muluku khanrowa waanyaanya anaxariya. — Eph. 18:23-33.

2. Eheeni enanroromeliha weera othoriha wa Yehova ti wa xariya ni wa ikharari?

² Ninrowa osuwela moota heeni weera Yehova onnathoriha mwa exariya ni mwa ikharari? Mwaha wooweera noosuwela weera “Muluku onona murima” wa atthu. (1 Sam. 16:7) Eyo ennoonihera weera owo onnasuwela “murima wa ana othene àtthu.” (1 Mam. 8:39; 1 Sow. 28:9) Ola mukhalelo mmoha wootikhiniha. Hiyo khaninrowa osuwela nnene sene moota Yehova onthorihaawe. Ti vawonto murummwa Paulo uupuxerinwaawe olepa woohima sa Yehova eeraka: “Sothoriha sawe siri sohisuwanyeya.” — Arom. 11:33.

3-4. Ikwaha ikina makoho heeni nikhanlaahu oowiipakela, ni eheeni ninrowaahu othokorora mwa yoosoma ene yeela? (Yohani 5:28, 29)

³ Nnaamweera vareene hiiho, hiyo ikwaha ikina pooti okhalano makoho ntoko Abrahamu aaraaweno. Hiyo pooti wiikoha ha: ‘Neereke yookhala yooweherera ya atthu ntoko ale yaanyaanyinwe oSodoma ni oGomora? Akina a yaawo, neereke  enookhala mpuwa mwa “evinyerero ya alipa . . . òhiloka”?’ — Mit. 24:15.

⁴ Nrowe noone veeli etthu nniiwexexaahu woohima sa ovinyerera. Mwa etempu vakhaani ya muttuli, yaahiiwanyeihiwa woohima sa ‘ovinyerera mwa okumi’ ni ‘ovinyerera mwa othorihiwa.’ a (Mmusome Yohani 5:28, 29.) Wiiwanyeihiwa iwo, waakumihera matxentxo manyowani yaawo ninrowaahu othokorora mwa yoosoma ene yeela ni yoosoma enttharelana. Moovarihana ni othoriha wa xariya wa Yehova, woopatxerani ninrowa othokorora itthu nihisuwenlaahu, avinyaka ninrowa othokorora itthu nisuwenlaahu.

ITTHU NIHISUWENLAAHU

5. Mwa etempu vakhaani ya muttuli, irevista sahu siiwanyeiha moota heeni woohima sa ale enyaanyinwe oSodoma ni oGomora?

⁵ Khalayi, irevista sahu saahithokorora etthu eneereya ni ale Yehova onaathorihaawe ntoko atthu oohixariya. Naahima weera, atthu ntoko a oSodoma ni oGomora, khiyaanoono yooweherera ya ovinyerera muhoolo. Mene yoosoma emoha yoowiixera, yaapaka nikoho nna, Neereke onnatthuneya ohima eyo ni nroromelo?

6. Matakihero heeni makina a othoriha wa Yehova woohima sa atthu oohixariya, ni eheeni nihisuwenlaahu?

⁶ Moone makoho makina enlikana ni awo. Soolepa sintxipale sa mBiblyani sinnahima othoriha wa Yehova woohima sa atthu oohixariya ntoko, nummero noohisuwanyeya na atthu yaakhwiiye emaara ya Nowa, ni maloko 7 a elapo yoolaiheriwa vaavo Yehova aakhulenlaawe weera atthu awe etupheliwe, naari anakhotto oophiyeraka 185.000 a w’Asuri yaawo yiivinwe ni nlaika nimoha na Yehova ohiyu omoha. (Eph. 7:23; Ola. 7:1-3; Yes. 37:36, 37) Mwa itthu sene seiya, neereke Biblya onnahima moowiiwanyeya weera Yehova ohaatoloxa atthu ala moomalela ehiwehereraka ovinyerera? Hooye. Mwaha wa heeni ninhimaahu eyo?

7. Eheeni nihisuwenlaahu woohima sa atthu ale etoloxinwe ni epula ya mirupi etempu ya Nowa naari maloko a oKanani? (Nwehe efootu .)

⁷ Hiyo khanisuwenle moota Yehova omuthorinhaawe mutthu ori poothe; naari khanisuwenle waari weera atthu ale yaakhwiiye yaakhalano eparakha yooxuttera woohima sa Yehova ni ottharuwa. Woohima sa etempu ya Nowa, Biblya enre weera Nowa aari “namutthenka a exariya.” (2 Ped. 2:5) Mene khanhima weera emaara aapakaawe nikula nne ntokweene, anneerera waalaleera atthu ootheene weera yaamunyaanyiwa ni epula ya mirupi. Emoha-moharu, voohima sa atthu a oKanani, khanisuwenle waari weera atthu ale oonanara murima yaakhalano eparakha ya oxuttera woohima sa Yehova ni otxentxa mikhalelo saya.

8. Eheeni nihisuwenlaahu woohima sa atthu a oSodoma ni oGomora?

⁸ Nankha woohima sa atthu a oSodoma ni oGomora? Mulopwana mmoha axariya iitthaniwa Lothi, aakhala variyari vaya. Neereke noosuwela weera Lothi aahaalaleera atthu ootheene? Hooye. Atthu ale yaari oonanara murima, mene neereke ootheene yaari atthu oosuwela? Muupuweleke weera muloko mmoha wa alopwana, waaheerera waapakela etthu yoonanara atthu yaaphiyenre owannyawe Lothi. Biblya onnahima weera itthu iye soonanara sannapakiwa okhuma ‘amiravo ni oowuuluvala.’ (Eph. 19:4; 2 Ped. 2:7) Neereke noosuwela nnene sene weera Muluku a ikharari Yehova, oomunyaanya mutthu ori poothe ahiwehereraka ovinyererihiwa? Yehova aahimuleela Abrahamu weera ecidade ele khiyaariwowo naari alopwana 10 axariya. (Eph. 18:32) Ni Yehova mwa exariya, itthu sootheene atthu awo yaapakaaya, miritti saya. Neerekento onnatthuneya ohima nihihovelaka  weera khaavo mutthu mmoha a yaale onrowa ovenxiwa mwa ‘ovinyerera wa . . . alipa oohiloka’? Hooye, khontthuneya ohima eyo ni nroromelo!

9. Eheeni nihisuwenlaahu woohima sa Salomoni?

⁹ Mwa mukhalelo mukina, hiyo-tho ninnaaphwanya atthu yaawo enromoliwa mBiblyani yaari a xariya mene muhoolo mwaya yaari oohixariya. Ntakihero nimoha, ti na mwene Salomoni. Owo aaxuttihiwa nnene sene iphiro sa Muluku ni Yehova aamureeliha vantxipale, mene muhoolo mwaya, aahihapuwa ampatxera waakokhorela amuluku eethiru. Soottheka sawe saamunyoonyiha Yehova ni saahimukumihera maxupo yaawo yaavirinhe iseekulu sintxipale. Ekhaikhai weera soolepa sinhima weera Salomoni ‘aasunkiwa vamoha ni asitiithi awe,’ waahela mpuwa alopwana oororomeleya ntoko mwene Davidi. (1 Mam. 11:5-9, 43; 2 Mam. 23:13) Mene neereke moota ovithinwaawe Salomoni ontaphulela weera anoorowa ovinyererihiwa? Biblya khanhima etthu. Atthu akina pooti wuupuwelaka weera ‘ole okhwiiye oovuluxiwa mwa soottheka.’ (Arom. 6:7) Eyo ekhaikhai, mene khontaphulela weera atthu ootheene ekhwiiye enoovinyererihiwa, eyo yaarowa okhalaka ntoko ekumi enyowani edireitu mutthu iilipiheraawe weera aphwanye. Ovinyererihiwa yoovaha ya Muluku a nsivelo. Owo onrowa waavaha ale owo ontthunaawe waavaha eparakha ya onvarela mahiku ootheene. (Yobi 14:13, 14; Yoh. 6:44) Neereke Salomoni animwaakhela yoovaha eyo? Yehova tasuwenle waakhula waya, hiyo khanisuwenle. Ekhaikhai ti yooweera, Yehova onoorowa opaka itthu sootheene mwa xariya.

ITTHU NISUWENLAAHU

10. Yehova onoonela hayi vaavo onaatoloxaawe atthu? (Ezekiyeli 33:11) (Nwehe efootu.)

¹⁰ Mmusome Ezekiyeli 33:11. Mukhalelo Yehova onaathorihaaweno atthu, ohoonihera moota oniisoonelaawe. Murummwa Pedru aahuupuxeriwa ohima masu mprofeeti Ezekiyeli aalempaawe, eeraka ‘Yehova . . . khantthuna weera mutthu naari mmoha anyaanyiwe.’ (2 Ped. 3:9) Ekhaikhai ela yoomaaliha, ennanikhavihera osuwela weera Yehova khanaakuva waanyaanya atthu ootheene emaara emoha. Owo toomoriwa ikharari, ni onnoonihera ikharari iyo emaara yootheene.

11. Taani ehinrowa ovinyererihiwa, ni ninsuwela moota heeni eyo?

¹¹ Eheeni nisuwenlaahu woohima sa aatthu ehinrowa ovinyererihiwa? Biblya paahi onvaha matakihero. b Yesu ahimme weera Yuda Iskarioti khanrowa ovinyererihiwa. (Mar. 14:21; munwehe-tho Yohani 17:12 ni enoota ya yoosoma.) Yuda moomaaleleya aahivara weera amurukunuwele Muluku vamoha ni Mwana awe. (Munwehe-tho Marko 3:29 ni enoota ya yoosoma.) Moolikana ni eyo, Yesu aahimme weera ahooleli akina a ittiini yaawo yaamurukunuwela, yaamurowa okhwa ehikhanleno yooweherera ya ovinyererihiwa. (Math. 23:33; munwehe-tho Yohani 19:11 ni enoota ya yoosoma “mulopwana.”) Nave-tho murummwa Paulo aahima weera alipa oowootha khenrowa ovinyererihiwa. — Aheb. 6:4-8; 10:29.

12. Eheeni nisuwenlaahu woohima sa ikharari sa Yehova? Nvahe matakihero.

¹² Mwa mukhalelo mukina, eheeni nisuwenlaahu woohima sa ikharari sa Yehova? Moota heeni owo oonihenraawe weera ‘khantthuna weera mutthu naari mmoha anyaanyiwe’? Moone moota oonihenraawe ikharari sawe ni atthu yaapanke soottheka itokweene. Mwene Davidi aahipaka soottheka itokweene, seiyo saahela mpuwa oraruwa ni wiiva. Menento vaavo Davidi aattharunwaawe, mwa ikharari  Yehova aamulevelela. (2 Sam. 12:1-13) Mwene Manase aapaka yoottheka etokweene mweekumini mwawe. Nnaamweera aapanke eyo, Yehova aahaakhulela moomaaleleya ottharuwa wa mulopwana ole, ni aaphwanya eparakha yoowoonihera ikharari sawe ni nlevelelo nawe. (2 Sow. 33:9-16) Matakihero ala ennoonihera weera Yehova onnoonihera ikharari sawe ikwaha sootheene ankhalaaweno eparakha yoopaka eyo. Owo onoorowa waavinyereriha atthu oovirikana, mwaha wooweera yaahoonelela weera yaapaka soottheka itokweene ni yaattharuwa.

13. (a) Mwaha wa heeni Yehova aamorenlaawe ikharari atthu a oNinive? (b) Moovira etempu, Yesu aahimme eheeni woohima sa atthu a oNinive?

¹³ Nave-tho noosuwela omoriwa ikharari wa Yehova ni atthu a oNinive. Muluku aamweerela Yona: “Sotakhala saya sòphiya vamaithoni vaka.” Mene emaara atthu ale yaattharunwaaya soottheka saya, Yehova mwa ikharari aahaalevelela. Owo aari oomoriwa ikharari ompwaha Yona. Muluku wannatthuneya omuupuxera mprofeti awe ole aanyoonyinwe weera atthu ale ‘khiyaasuwela etthu yooreera naari yoonanara.’ (Yona 1:1, 2; 3:10; 4:9-11) Muhoolo mwaya, Yesu aavarihela muteko ntakihero nne weera axuttihe woohima sa exariya ni omoriwa ikharari wa Yehova. Yesu aahimme weera atthu a oNinive yaattharunwe, “enevinye nihiku nothorihiwa.” — Math. 12:41.

14. Entaphulela eheeni ‘evinyerero ya othorihiwa’ wa atthu a oNinive?

¹⁴ Nihiku heeni ‘noothorihiwa’ atthu a oNinive enrowaaya ‘ovinyererihiwa’? Yesu ooxuttiha woohima sa ‘evinyerero ya othorihiwa’ wa muhoolo. (Yoh. 5:29) Owo aahima olamulelo wa iyaakha 1.000 vaavo “alipa òloka ni òhiloka” enrowaaya ovinyererihiwa. (Mit. 24:15) Wa alipa oohiloka, onrowa okhala ‘ovinyerera wa othorihiwa.’ Naari neere, Yehova ni Yesu enoorowa waawehexexa ni woona moota enkhalaaya ni moota enaakhulelaaya sooxuttiha sa Yehova. Wakhala weera mutthu a oNinive onnakhootta weerela eparte okokhorela weekhaikhai, othorihiwa wawe onrowa okhala wookhwa. (Yes. 65:20) Mene ootheene ale enrowa othanla omukokhorela Yehova moororomeleya, enoorowa othorihiwa mooreerela. Nave enoorowa okhalano eparakha yookhala mahiku ootheene! — Dan. 12:2.

15. (a) Mwaha wa heeni nintthuneyaahu osepaka ohima weera atthu ootheene enyaanyinwe oSodoma ni oGomora khenrowa ovinyererihiwa? (b) Moota heeni ninrowaahu wiiwexexa masu eri va Yuda 7? (Nwehe ekwaadru “ Eheeni Yuda aatthunaawe ohima?”)

 ¹⁵ Uulumaka sa atthu a oSodoma ni oGomora, Yesu aahimme weera atthu ale yaamurowa okhumela nnene “nihiku nothorihiwa” waapwaha ale yaakhontte sooxuttiha sawe. (Math. 10:14, 15; 11:23, 24; Luka 10:12) Eheeni owo aatthunaawe ohima? Hiyo pooti weeraka Yesu aapaka ntakihero. Mene hiihaale ntoko uulumaawe woohima sa atthu a oNinive, pooti weeraka khaiyene aatthuna ohima yeeyo. Moovirikana ni eyo, onnooneya weera Yesu aatthuna ohima etthu aahimmaawe. Nihiku noothorihiwa owo aahimaawe mwa itthu iya soopiili, yaari etthu emoha. Ntoko atthu a oNinive, atthu a oSodoma ni oGomora yaapaka itthu soonanara, mene atthu a oNinive yaakhalano eparakha yoottharuwa. Opwaha mwa yeeyo, muupuweleke weera Yesu aahuuluma woohima sa ‘ovinyerera wa othorihiwa’ weiwo onaahela mpuwa ‘ale epanke itthu sootepa onanara.’ (Yoh. 5:29) Mwaha wa yeeyo, onnooneya weera yookhala yooweherera ya atthu a oSodoma ni oGomora. Pooti weeraka apaale, atthu vakhaaneene a atthu ale enoorowa ovinyererihiwa. Nave hiyo nnoorowa okhalano eparakha yoowaaxuttiha woohima sa Yehova ni Yesu Kristu.

16. Eheeni nisuwenlaahu woohima sa moota Yehova onrowaawe othanla ale anrowaawe waavinyereriha? (Yeremiya 17:10)

¹⁶ Mmusome Yeremiya 17:10. Eversu ela ennanikhavihera wiiwexexa etthu nisuwenlaahu: Yehova ‘onnatokosa mirima ni onnatholathola miyuupuwelo soowiixera.’ Nuulumaka woohima sa ovinyerera onkela weereya muhoolo, Yehova ‘onoomulivela mutthu moowiiwanana ni ephiro awe.’ Yehova onoorowa okhala oolipa mene a ikharari. Mwaha wa yeeyo, hiyo khontthuneya ohima weera mutthu khokhanleno yooweherera ya ovinyererihiwa, ohikhanle weera noosuwela nnene sene!

“NAMATHORIHA A ELAPO YOTHENE” ANOOROWA “WETTELA YOLOKA”

17. Atthu ale ekhwiiye enweherera eheeni muhoolo?

¹⁷ Okhumela Adamu ni Heva emuttharakaru Satana ni omurukunuwela Muluku, atthu antxipale ahookhwa. ‘Mwiittani, okhwa’ wohaahepha atthu antxipale! (1 Akor. 15:26) Eheeni atthu awo ootheene enwehereraaya?  Nummero navakhaani paahi 144.000 atthareli oororomeleya a Kristu, enoorowa ovinyererihiwa weera ekhaleno ekumi yoohikhwa wiirimu. (Apok. 14:1) Nummero noowaatta na athiyana ni alopwana oororomeleya yaawo emmusivela Yehova, enimweerela eparte ‘ovinyererihiwa wa anaxariya,’ ni enookhala elapo ela ya vathi mahiku ootheene wakhala weera enoovirelela okhala anaxariya mpuwa mwa Olamulelo wa iyaakha 1.000 wa Kristu ni mpuwa mwa weereriwa woomalihera. (Dan. 12:13; Aheb. 12:1) Ni mpuwa mwa iyaakha 1.000, “alipa òhiloka” waahela mpuwa ale yaahanvarela Yehova ni ‘ale yaapanke itthu sootepa onanara’ enookhalano eparakha yootxentxa mikhalelo saya ni okhala oororomeleya. (Luka 23:42, 43) Mene atthu akina yaari ootepa onanara murima, yaawo yaathanliye omurukunuwela Yehova ni sootthuna sawe, mpaka Yehova othanla weera khiyaano yooweherera ya ovinyererihiwa. — Luka 12:4, 5.

18-19. (a) Mwaha wa heeni nintthuneyaahu ororomelaka othoriha wa Yehova woohima sa atthu ale ekhwiiye? (Yesaya 55:8, 9) (b) Eheeni ninrowaahu othokorora mwa yoosoma enttharelana?

¹⁸ Neereke nookhalano mathowa ooreera enniroromeliha weera ikwaha sootheene Yehova onthorihaawe onnapaka yoothanla yooreera? Aani! Ntoko Abrahamu iiwexenxaawe, Yehova toomalela, a miruku, a ikharari ni “namathoriha a elapo yothene.” Owo oomuxuttiha Mwanawe ni oomuhiyera mathorihelo ootheene. (Yoh. 5:22) Yehova ni Mwanawe ennoona murima wa mutthu ori poothe. (Math. 9:4) Nto vaavo awo emmuthorihaaya mutthu, ennapaka ele “eri yòloka”!

¹⁹ Nikhaleke oolikaneene ororomela weera Yehova toosuwelaxa. Nsuweleke weera hiyo khaniphwanenle othoriha, mene Yehova tophwanenle! (Mmusome Yesaya 55:8, 9.) Nto onnatthuneya ohiya mathorihelo ootheene nimuhiyeraka Yehova ni Mwanawe, Mwene yoowo ontthara moomalela exariya ni ikharari sa Tiithi awe. (Yes. 11:3, 4) Eheeni ninhimaahu woohima sa othoriha wa Yehova woohima sa maxupo matokweene? Eheeni hiyo nihisuwenlaahu? Ni eheeni nisuwenlaahu? Yoosoma enttharelana enoorowa waakhula makoho ala.